Kico A Pasa cu Nan?

NOF y No ta e nombernan biblico original pa e capitalnan Egipcio Menfis y Tebas cu un tempo tawata famoso. Nof (Menfis) tawata situa un 23 kilometer suit di Cairo, na e banda west di Riu Nijl. Sinembargo, cu tempo Menfis a perde su status como capital di Egipto. Na principio di siglo 15 prome cu nos era, Egipto tawatin un capital nobo: No (Tebas), situa un 500 kilometer suit di Menfis. Entre e hopi ruinanan di tempel na Tebas tin esun di Karnak, cu ta ser considera como e structura di pilar mas grandi cu hende hamas a construi. Tebas y su tempel di Karnak tawata dedica na adoracion di Amon, e dios principal di e Egipcionan.

Kico profecia biblico a predeci relaciona cu Menfis y Tebas? El a declara huicio contra Farao y e diosnan di Egipto, specialmente contra e dios principal, “Amon di Tebas.” (Yeremias 46:25, 26) E multitud di adorado cu tawata basha bai einan, lo a ser ‘corta kita afo.’ (Ezekiel 30:14, 15) Y asina a sosode. Tur loke a resta di e adoracion di Amon ta ruinanan di tempel. E stad moderno Luxor ta situa riba un parti di e sitio di antiguo Tebas, y tin otro pueblitonan ta existi entre su ruinanan.

Pa loke ta Menfis, a resta masha poco di dje, cu excepcion di su santananan. Experto di Bijbel, Louis Golding ta bisa: “Pa siglo tras di siglo e conkistadonan Arabe di Egipto a uza e ruinanan gigantesco di Menfis como luga di saca piedra pa construi nan capital [Cairo] na otro banda di e riu. E combinacion di e lodo di Nijl y e trabou di e constructornan Arabe tawata asina cabal cu pa varios kilometer den e sircuito di e stad antiguo bo no ta mira ni un solo piedra ta sali for di e tera preto.” Realmente, manera Bijbel a profetisa, Menfis a bira “un desolacion . . . sin habitante.”—Yeremias 46:19.

Esakinan ta simplemente dos di e hopi ehempelnan cu ta demostra e exactitud di profecianan biblico. E destruccion di Tebas y Menfis ta duna nos motibo solido pa tene pleno confiansa den e profecianan biblico cu ainda no a cumpli.—Salmo 37:10, 11, 29; Lucas 23:43; Revelacion 21:3-5.

[Reconocemento di plachi na pagina 32]

Potret saca pa cortesia di British Museum