Bo Ta Spera Riba Yehova?

“Ki clase di persona boso mester ta den actonan santo di conducta y echonan di debocion na Dios, sperando y teniendo bon na mente e presencia di e dia di Yehova!”—2 PEDRO 3:11, 12, NW.

1, 2. Con nos lo por ilustra kico ta nifica spera riba e dia di Yehova?

IMAGINA bo un famia cu ta spera bishita pa bin come. E ora palabra ta acercando rapidamente. E esposa ta druk haciendo e preparacionnan final na e cuminda. Su esposo y yiunan ta yuda haci sigur cu tur cos ta cla. Tur hende ta emociona. Si, henter e famia ta spera ansiosamente riba yegada di e invitadonan y ta anticipa un cuminda delicioso y dushi compañerismo.

² Como cristian nos ta sperando riba algo mas importante ainda. Kico esei ta? Wel, nos tur ta spera riba “e dia di Yehova”! Tanten cu e dia ei no yega, nos mester ta manera profeta Mikeas, kende a bisa: “Lo mi warda cu speransa riba SEÑOR; lo mi spera riba e Dios di mi salbacion.” (Mikeas 7:7) Esaki ta duna indicacion di inactividad? No. Tin hopi trabou pa haci.

3. Segun 2 Pedro 3:11 y 12, ki actitud cristiannan mester tin?

³ Apostel Pedro ta yuda nos pa nos tin e actitud corecto mientras cu nos ta spera. E ta bisa: “Ki clase di persona boso mester ta den actonan santo di conducta y echonan di debocion na Dios, sperando y teniendo bon na mente e presencia di e dia di Yehova!” (2 Pedro 3:11, 12, NW) Tuma nota cu esaki ta un declaracion cu tin un signo di sclamacion. Pedro no a haci un pregunta. Den su dos cartanan inspira pa Dios, el a describi ki clase di persona cristiannan mester ta. Tambe el a conseha nan pa sigui haci “actonan santo di conducta y echonan di debocion na Dios.” Maske cu alrededor di 30 aña a pasa desde cu Hesucristo a duna e señal “di e fin di tempo”, cristiannan no mester a baha nan vigilancia. (Mateo 24:3) Nan mester a keda ‘spera y tene bon na mente’ e presencia di e dia di Yehova.

4. Kico “teniendo bon na mente e presencia di e dia di Yehova” ta encera?

⁴ E palabra Griego traduci aki “teniendo bon na mente” literalmente ta nifica “purando.” Claro cu literalmente nos no por ‘pura’ e dia di Yehova. Eigenlijk nos “no sa e dia ni e ora” cu Hesucristo lo bin pa ehecuta huicio contra e enemigonan di su Tata. (Mateo 24:36; 25:13) Un buki di referencia ta splica cu e verbo basico di e palabra “purando” ta nifica akinan “‘haci lihe’ y pesei ta estrechamente relaciona cu ‘ser celoso, activo y mustra  interes den algo.’” Esei kiermen cu Pedro tawata recomenda rumannan den fe pa nan tin un deseo intenso pa e presencia di e dia di Yehova. Nan por a haya e deseo ei door di tene e dia aki constantemente na mente. (2 Pedro 3:12) Siendo cu “e dia grandi y temibel di SEÑOR” ta asina serca awor, nos mester tin e mesun actitud ei.—Joel 2:31.

Spera cu “Actonan Santo di Conducta”

5. Con nos por mustra cu nos tin e deseo intenso pa mira “e dia di Yehova”?

⁵ Si nos tin e deseo intenso pa sobrevivi e dia di Yehova, nos lo demostra esei mediante nos “actonan santo di conducta y echonan di debocion na Dios.” Probablemente e expresion “actonan santo di conducta” ta haci nos corda e conseho di Pedro: “Como yiunan obedecido, no conforma boso cu e pasionnan cu boso tawatin antes den boso ignorancia, ma mescos cu Esun Santo cu a yama boso, boso mes tambe sea santo den tur boso conducta; pasobra ta para skirbi: ‘Boso lo ta santo, pasobra ami ta santo.’”—1 Pedro 1:14-16.

6. Pa nos por ta santo, kico nos mester haci?

⁶ Pa nos por ta santo, nos tin cu keda limpi fisicamente, mentalmente, moralmente y spiritualmente. Nos ta preparando pa “e dia di Yehova” door di mantene nos mes santo como esnan cu ta carga e nomber di Yehova? Awendia no ta facil pa mantene e puresa ei pasobra e normanan moral di mundo dia pa dia ta bai mas atras. (1 Corintionan 7:31; 2 Timoteo 3:13) Nos ta nota cu e diferencia entre nos normanan moral y esnan di mundo ta birando mas grandi? Si esei no ta e caso, nos tin motibo pa precupa. Ta posibel cu nos normanan personal, maske nan ta mas halto cu esnan di mundo, ta bayendo atras? Si ta asina, nos tin cu tuma medidanan firme pa corigi esei pa nos por agrada Dios.

7, 8. (a) Con nos lo por perde for di bista e importancia di keda ocupa den “actonan santo di conducta”? (b) Pa corigi e asunto ki medidanan lo ta necesario pa nos tuma?

⁷ Cu introduccion di pornografia riba Internet y pa motibo cu esaki ta disponibel den privasidad, algun hende cu na un tempo no tawatin acceso na tal material inmoral, awor ta haya “un cantidad infinito di oportunidad [pa tin contacto cu cosnan] sexual”, segun un docter. Si nos ta bai na e tipo di sitionan impuro ei riba Internet, anto sin duda nos ta ignorando e mandato di Bijbel pa “no mishi cu nada impuro.” (Isaias 52:11) Realmente nos lo ta “teniendo bon na mente e presencia di e dia di Yehova”? Of kisas nos lo ta posponiendo e dia mentalmente door di rasona cu si acaso nos contamina nos mente cu material sushi, ainda nos tin tempo pa limpia nos mes? Pesei si nos tin problema cu pornografia, ta masha importante pa pidi Yehova pa ‘kita nos bista for di banidad; y rebiba nos den su camindanan’!—Salmo 119:37.

⁸ E gran mayoria di Testigonan di Yehova, tanto chikito como grandi, ta pega na Dios su normanan moral halto y ta keda leu di tentacionnan inmoral di e mundo aki. Door cu nan ta conciente di e urgencia di nos tempo y di Pedro su spiertamento cu “e dia di Señor lo bin manera un ladron”, nan ta keda ocupa den “actonan santo di conducta.” (2 Pedro 3:10) Nan accionnan ta proba cu nan ta “sperando y teniendo bon na mente e presencia di e dia di Yehova.” *

 Spera cu “Echonan di Debocion na Dios”

9. Kico echonan di debocion na Dios mester motiva nos pa haci?

⁹ “Echonan di debocion na Dios” tambe ta vital pa nos por tene e dia di Yehova na mente. “Echonan di debocion na Dios” ta encera un respet profundo pa Dios cu ta motiva nos pa haci loke ta bon den su bista. Apego leal na Yehova ta e motivacion tras di tal echonan di debocion. Ta su boluntad pa “tur hende wordo salba y yega na conocemento di e berdad.” (1 Timoteo 2:4) Dios “no kier pa ningun hende bai perdi, ma pa tur bin na repentimento.” (2 Pedro 3:9) Pues anto, nos echonan di debocion na Dios lo no mester motiva nos pa haci mas esfuerso pa yuda hende siña tocante Yehova y imit’e?—Efesionan 5:1.

10. Dicon nos tin cu vigila contra “e engaño di rikesa”?

¹⁰ Nos bida lo ta abunda cu echonan di debocion na Dios si nos ta busca prome e Reino di Dios. (Mateo 6:33) Esaki ta encera cu nos lo tin un punto di bista balansa di cosnan material. Hesus a spierta: “Tene cuidou, y warda boso di tur golosidad; pasobra bida di hende no ta consisti di e abundancia di e cosnan cu e tin.” (Lucas 12:15) Maske kisas nos no por imagina cu amor pa placa lo por ciega nos, ta bon pa nos tuma nota cu “e precupacionnan di e mundo aki y e engaño di rikesa” por “hoga e palabra” di Dios. (Mateo 13:22) Kisas no ta facil pa gana nos pan di cada dia. Pesei den algun parti di mundo, hopi hende ta rasona cu pa nan por tin un miho bida, nan tin cu bai biba na un pais mas prospero, kisas lagando nan famia atras pa algun aña. Asta algun persona den Dios su pueblo a rasona di e manera aki. Door di bai biba na un otro pais, kisas nan ta den un posicion pa provee comodidadnan moderno pa nan famianan. Sinembargo, kico por pasa cu e estado spiritual di nan sernan keri cu nan a laga atras? Si e cabes di cas no t’ei pa duna e debido guia, nan lo ta suficiente fuerte spiritualmente pa sobrevivi e dia di Yehova?

11. Con un imigrante a demostra cu echonan di debocion na Dios ta mas importante cu rikesa?

¹¹ Un imigrante di Filipinas cu a bai traha na Hapon a siña e berdad di Bijbel einan serca un Testigo di Yehova. Ora el a haya sa di e responsabilidadnan biblico cu e tin como cabes di cas, el a realisa cu e tin cu yuda su famia pa nan por bira adorado di Yehova. (1 Corintionan 11:3) Pero su esposa na Filipinas tawata masha contra di e religion nobo cu el a haya y tawata kier pa e sigui manda placa en bes di bin cas bek pa siña e famia su creencianan basa riba Bijbel. Pero toch el a bai cas bek, motiva door di e urgencia di e tempo y debi na su interes den su sernan keri. Su pasenshi den trata amorosamente cu su famia a wordo recompensa. Cu tempo, su famia a uni den adoracion berdadero, y su esposa a drenta den e sirbishi di tempo completo.

12. Dicon nos mester pone interesnan spiritual na prome luga den nos bida?

¹² Nos por compara nos situacion cu hende cu ta den un edificio na candela. Lo ta sabi pa core bai bini pa loco sacando cosnan material for di e edificio aki cu ta casi basha den otro? En bes di esei, lo no ta hopi mas importante  pa salba nos mes bida y tambe e bida di nos famia y di otro hende cu ta den e edificio? Wel, e mundo malbado aki ta a punto di basha den otro, y bida di hende ta na peliger. Siendo conciente di esaki, siguramente nos lo pone interesnan spiritual na prome luga y consentra celosamente riba e trabou di predica e Reino cu ta salba bida.—1 Timoteo 4:16.

Nos Mester Ta “sin Mancha”

13. Den ki condicion nos lo kier ta ora e dia di Yehova dal aden?

¹³ Apostel Pedro a enfatisa e importancia di mantene un actitud corecto mientras cu nos ta spera. El a bisa: “Stimanan, siendo cu boso ta spera e cosnan aki, haci boso sumo posibel pa e haya boso finalmente sin mancha y sin defecto y na pas.” (2 Pedro 3:14, NW) Ademas di su conseho pa nos keda ocupa den actonan santo di conducta y echonan di debocion na Dios, Pedro a enfatisa e importancia di cu al final Yehova mester haya cada un di nos purifica mediante e sanger precioso di Hesus. (Revelacion 7:9, 14) Esaki ta rekeri pa un hende eherce fe den e sacrificio di Hesus y bira un sirbido dedica y batisa di Yehova.

14. Kico ser “sin mancha” ta encera?

¹⁴ Pedro a urgi nos pa haci nos maximo esfuerso pa wordo haya “sin mancha.” Nos ta manteniendo nos “pañanan” di conducta y personalidad cristian sin mancha, sin contaminacion di mundo? Normalmente ora nos ripara cu tin un mancha riba nos paña, mesora nos ta purba kit’e. Si ta trata di un paña cu nos gusta hopi, nos lo limpi’e cu mas cuidou ainda. Nos ta pensa pa haci e mesun cos si na moda di papia nos paña cristian mancha pa motibo di algun debilidad den nos personalidad of conducta?

15. (a) Pakico e Israelitanan mester a traha fraña na e zom di nan pañanan? (b) Dicon Yehova su sirbidonan djawe ta destaca como diferente?

¹⁵ E Israelitanan mester a traha ‘fraña pa nan mes na e zom di nan pañanan’ y cose un hilo blou riba rand di e zom. Dicon nan mester a haci esei? Pa nan corda riba e mandamentonan di Yehova, obedece nan, y demostra di ta “santo” pa nan Dios. (Numbernan 15:38-40) Como Yehova su sirbidonan djawe, nos ta destaca como diferente for di mundo pasobra nos ta cumpli cu leinan y principionan di Dios. Por ehempel, nos ta mantene limpiesa moral, nos ta respeta e santidad di sanger y nos ta evita tur sorto di idolatria. (Echonan 15:28, 29) Hopi hende ta respeta nos pa nos determinacion firme pa mantene nos mes puro y sin mancha.—Santiago 1:27.

Nos Mester Ta “sin Defecto”

16. Kico ta encera mantene nos mes “sin defecto”?

¹⁶ Tambe Pedro a bisa cu nos mester wordo haya “sin defecto.” Con esei por ta posibel? Por lo general ta posibel pa kita un mancha pero un defecto ta duna e idea di algo mas serio. E ta indica cu algo di paden ta robes. Apostel Pablo a conseha su rumannan cristian na Filipos: “Haci tur cos sin murmura ni discuti, pa boso por proba boso mes di ta sin culpa y inocente, yiunan di Dios sin reproche meimei di un generacion corumpi y perverso, entre cualnan boso ta briya manera lusnan den mundo.” (Filipensenan 2:14, 15) Si nos sigui e conseho ei, nos lo evita di murmura y discuti cu otro, anto nos lo sirbi Dios motiva pa  sintimentonan puro. Nos lo ser motiva pa nos amor pa Yehova y pa nos prohimo segun cu nos ta predica “e evangelio aki di e reino.” (Mateo 22:35-40; 24:14) Ademas, nos lo sigui proclama e evangelio di reino apesar cu hende en general kisas no ta compronde dicon nos ta uza nos tempo boluntariamente pa yuda otro personanan siña tocante Dios y su Palabra, Bijbel.

17. Kico mester ta nos motivacion ora nos ta purba haya un privilegio den e congregacion cristian?

¹⁷ Ya cu nos tin deseo di wordo haya “sin defecto” ta bon pa nos examina kico ta nos motivacion tras di tur loke nos ta haci. Nos a bandona mundo su manera di haci cos pa motibonan egoista. Por ehempel nos no ta core mas tras di rikesa of no ta purba haya mas poder. Si nos ta purba haya privilegionan den e congregacion cristian, laga nos motibonan keda puro y semper laga nos sea motiva pa amor pa Yehova y pa otro hende. Ta refrescante pa mira hombernan spiritual “aspira na e puesto di anciano” cu un goso y cu e deseo humilde pa traha manera esclabo pa Yehova y pa nan rumannan den fe. (1 Timoteo 3:1; 2 Corintionan 1:24) Si, esnan cu ta cualifica pa sirbi como anciano ta “pastorea e tou di Dios . . . boluntariamente, segun e boluntad di Dios; y no pa ganashi deshonesto, sino cu hopi afan; no manera hende cu tin dominio riba esnan cu a wordo confia na [nan], ma siendo ehempel pa e tou.”—1 Pedro 5:1-4.

Nos Mester Wordo Haya ‘na Pas’

18. Pa ki cualidadnan Testigonan di Yehova ta bon conoci?

¹⁸ Por ultimo Pedro ta bisa cu nos mester wordo haya ‘na pas.’ Pa nos cumpli cu e rekisito aki, nos mester ta na pas cu Yehova y nos prohimo. Pedro a enfatisa e importancia di “keda ferviente den boso amor pa otro” y mantene pas cu nos rumannan cristian. (1 Pedro 2:17; 3:10, 11; 4:8; 2 Pedro 1:5-7) Pa mantene nos pas, nos mester stima otro. (Huan 13:34, 35; Efesionan 4:1, 2) Nos amor y pas ta bisto principalmente na nos congresonan internacional. Na un congreso na Costa Rica na 1999, un bendedo na aeropuerto a rabia pasobra Testigonan local inconcientemente tawata para y tapa e bista di su negoshi ora cu nan tawata duna bonbini na e delegadonan cu tawata yega. Sinembargo, riba e di dos dia, el a ripara e amor y pas demostra den e caloroso bonbini cu e delegadonan tawata ricibi, maske e Testigonan local no tawata conoce nan personalmente. Riba e ultimo dia, e bendedo a join nan den e dunamento di bonbini y a pidi un studio di Bijbel.

19. Dicon ta importante pa busca pas cu rumannan den fe?

¹⁹ Nos sinseridad den busca pas cu nos rumannan spiritual por indica cu di berdad nos  ta spera riba e dia di Yehova y e mundo nobo cu el a priminti. (Salmo 37:11; 2 Pedro 3:13) Supone cu nos tin dificultad pa mantene pas cu un cierto ruman den fe. Nos por imagina nos mes ta biba na pas cu ne den Paradijs? Si un ruman tin algo contra nos, nos mester actua lihe pa ‘reconsilia cu ne.’ (Mateo 5:23, 24) Ta importante pa nos haci esei si nos kier ta na pas cu Yehova.—Salmo 35:27, NW; 1 Huan 4:20.

20. Den ki maneranan nos por mustra cu nos ta spera riba Yehova?

²⁰ Personalmente, nos ta “sperando y teniendo bon na mente e presencia di e dia di Yehova”? Nos deseo intenso pa mira fin di maldad ta ser demostra ora nos ta keda santo den e mundo inmoral aki. Ademas, nos anhelo ferviente pa e dia di Yehova bini y pa biba bou di e gobernacion di Reino ta bisto na nos echonan di debocion na Dios. Y nos expectativa di biba den e mundo nobo di pas ta ser refleha den e manera cu awor nos ta busca pas cu nos rumannan den fe. Di e maneranan aki, nos ta mustra cu nos ta “teniendo bon na mente e presencia di e dia di Yehova.”

[Nota]

Bo Ta Corda?

• Kico ta nifica tene “bon na mente e presencia di e dia di Yehova”?

• Con nos conducta por demostra cu nos ta spera riba Yehova?

• Dicon “echonan di debocion na Dios” ta vital?

• Kico nos mester haci pa Yehova haya nos ‘sin mancha y sin defecto y na pas’?

[Preguntanan di Estudio]

[Plachi na pagina 11]

Spera riba Yehova ta ser refleha den actonan santo di conducta

[Plachi na pagina 12]

E trabou di predica e Reino ta salba bida

[Plachi na pagina 14]

Segun cu nos ta spera e dia di Yehova, laga nos busca pas cu otro hende