Pobernan Ta Bira Mas Pober

“Ningun sosiedad por ta berdaderamente prospero ni felis ora e gran mayoria di su miembronan ta pober y den miseria.”

E ECONOMISTA Adam Smith a haci e declaracion ei den siglo 18. Hopi hende ta combenci cu e berdad di loke el a bisa ta asta mas bisto awe. E contraste entre rico cu pober a bira mas skerpi ainda. Na Filipinas, un tercera parti di e poblacion ta biba cu menos di 1 dollar pa dia, un montante cu hopi hende den paisnan mas rico ta gana pa minuut. E Informe di Desaroyo Humano di 2002 di Nacionnan Uni ta bisa cu “e 5% di hende mas rico na mundo ta gana 114 biaha mas tanto cu e 5% di esnan mas pober.”

Mientras algun hende ta biba basta comodo, miyones di hende ta biba den krot cu nan ta traha ‘unda cu ta’ riba tereno cu nan a coi sin permit. Otronan ta mas mal para ainda pasobra nan ta biba riba caya. Kisas tur loke nan tin ta djis un pida carton of plestik pa drumi ariba. Hopi di nan ta pasa basta trabou pa sobrevivi door di haci tur sorto di cos, manera cana busca articulo di uzo na dom, carga cos pisa, core cu garoshi pa colecta obhetonan pa recycle.

No ta den paisnan den desaroyo so bo por haya desigualdad entre rico cu pober sino, manera Banco Mundial ta bisa, “den tur pais ta existi ‘zonanan di pobresa.’” For di Bangladesh te Merca, pa con bon para algun hende por ta, hopi tin cu lucha pa nan tin suficiente pa come of pa tin un dak riba nan cabes. The New York Times a cita un informe di Departamento di Censo Mericano di 2001 cu ta indica cu e brecha entre rico cu pober na Merca a sigui crece. El a bisa: “Un di cada cinco hende mas rico di e poblacion a ricibi mita di tur entrada domestico aña pasa . . . Un di cada cinco hende mas pober a ricibi 3,5 porshento.” E situacion ta mescos of piyo den masha hopi otro pais. Un informe di Banco Mundial a mustra cu mas o menos 57 porshento di poblacion di mundo ta biba cu menos di 2 dollar pa dia.

Pa colmo, na 2002, informe di ehecutivonan cu a enrikece nan mes bou di circunstancianan cuestionabel a molestia miyones di hende. Asta si nada  abiertamente ilegal no a tuma luga, hopi a haya cu e ehecutivonan aki, manera e revista Fortune a declara, “a bira sumamente, extraordinariamente y askerosamente rico.” Den e contexto di loke ta pasando na mundo, tin hende ta puntra nan mes con bo por hustifica cu algun persona ta haya asina tanto placa—miyones y miyones di dollar—mientras cu masha hopi hende ta biba den pobresa.

Pobresa T’ei pa Keda?

Esaki no ta nifica cu ningun hende no ta haci nada tocante e condicion miserabel di hende pober. Funcionarionan di gobierno cu tin bon intencion y organisacionnan cu ta duna yudansa sigur a bin cu proposicionnan pa trece cambio. No obstante, e echonan no ta duna motibo pa optimismo. E Informe di Desaroyo Humano di 2002 ta bisa cu apesar di hopi esfuerso noble pa trece mehoransa, “hopi pais ta mas pober cu 10, 20 y den algun caso, 30 aña pasa.”

Esaki ta nifica cu no tin speransa pa hende pober? Nos ta invita bo pa bo lesa e siguiente articulo pa considera algun conseho sabi y practico cu por ta util for di awor y tambe solucionnan cu kisas bo no a pensa mes ariba.