Con Algun Persona Ta Wordo Recorda

ROND di tres mil aña pasa, David tawata huyendo for di Rei Saul di Israel. David a manda pidi e homber rico Nabal, un criado di carne y cabrito, cuminda cu awa. Eigenlijk, Nabal tawata debe David y su siguidonan un fabor pasobra nan a proteha Nabal su bestianan. Sinembargo, Nabal a nenga di mustra hospitalidad. Asta el a zundra e hombernan di David. Nabal tawata hunga cu candela, pasobra David no a laga hende probecha di dje asina asina.—1 Samuel 25:5, 8, 10, 11, 14.

Nabal su actitud no tawata na harmonia cu e tradicion di Medio Oriente di mustra hospitalidad na bishitante y stranhero. Pesei, ki reputacion Nabal a haya? E relato di Bijbel ta bisa cu e “tawata bruto y di mala fe” y “perverso.” Su nomber ta nifica “banidad”, y e sigur a manifesta e cualidadnan ei. (1 Samuel 25:3, 17, 25) Abo lo kier wordo recorda asina? Bo ta un persona bruto y inflexibel ora di trata otro hende, specialmente ora cu aparentemente nan tin cierto desbentaha? Bo ta amabel, hospitalario y compasivo?

Abigail Tawata un Mohe Huicioso

Nabal a haya su mes den problema serio pa motibo di su mal actitud, ya cu David hunto cu 400 di su hombernan a coi nan spada y sali pa bai regla cuenta cu ne. Abigail, esposa di Nabal a tende loke a pasa. E tawata sa cu un confrontacion tawata inevitabel. Kico e por a haci? El a core prepara suficiente cuminda y bai pa stroba David y su hombernan di cumpli cu nan plan. Ora el a topa nan, el a roga David pa no drama sanger inocente. Esei a suavisa David su curason. David a scucha Abigail su suplicanan y a cambia di idea. Un poco despues di e incidentenan aki, Nabal a muri. E ora ei David, reconociendo Abigail su bon cualidadnan, a tum’e como esposa.—1 Samuel 25:14-42.

Ki clase di reputacion Abigail a establece pa su mes? Bijbel ta bisa cu e tawata un mohe “inteligente.” Ta obvio cu e tawata huicioso, capas pa haci cosnan na un manera practico, y tawata sa con y ki ora pa tuma iniciativa. El a actua cu lealtad pa proteha su esposo bobo y su famia for di desaster. Cu tempo Abigail a muri, pero cu un reputacion sobresaliente como un mohe huicioso.—1 Samuel 25:3.

Ki Registro Pedro A Laga Atras?

Laga nos avansa den tempo te na e prome siglo di nos era y wak e caso di e 12 apostelnan di Hesus. Sin duda un di esnan mas expresivo  y impulsivo tawata Pedro, of Cefas, un expiscado di Galilea. Aparentemente e tawata un persona dinamico cu no tawatin miedo di expresa su sintimentonan. Por ehempel, na un ocasion Hesus a laba pia di su disipelnan. Con Pedro a reacciona ora el a yega na beurt?

Pedro a bisa Hesus: “Señor, abo ta laba mi pia?” Hesus a contest’e: “Loke mi ta haci bo no ta compronde awor, ma despues lo bo compronde.” Pedro a contesta Hesus: “Hamas lo bo no laba mi pia!” Ripara Pedro su reaccion enfatico pero impulsivo. Con Hesus a responde?

E di: “Si mi no laba bo, bo no tin parti cu mi.” Simon Pedro a bis’e: “Señor, no mi pianan so, ma tambe mi mannan y mi cabes!” Awor Pedro a bai na e otro extremo! Pero semper bo tawata sa kico bo tin na Pedro. No tawatin nada di astucia of engaño.—Huan 13:6-9.

Pedro ta wordo recorda tambe pa su debilidadnan humano. Por ehempel, el a nenga Cristo tres bes dilanti hende cu a acus’e di ta un di e siguidonan di e Hesus condena di Nazaret. Ora Pedro a realisa su eror, el a yora amargamente. E no tawatin miedo di expresa su duele y tristesa. Ta notabel tambe cu probablemente ta e mes a informa e escritornan di Evangelio con el a nenga Hesus! E tawata suficiente humilde pa admiti su fayonan. Abo tin e mesun humildad ei?—Mateo 26:69-75; Marco 14:66-72; Lucas 22:54-62; Huan 18:15-18, 25-27.

Un par di siman despues cu Pedro a nenga Cristo, spirito santo a impuls’e pa e predica cu curashi na un multitud di Hudiu na Pentecoste. Esaki tawata un indicacion bon cla  cu e Hesus resusita tawatin confiansa den dje.—Echonan 2:14-21.

Na un otro ocasion, Pedro a cai den un trampa distinto. Apostel Pablo a splica cu prome cu algun ruman Hudiu a yega Antiokia, Pedro a asocia libremente cu e creyentenan di e nacionnan. Sinembargo, el a separa su mes for di esakinan “pa miedo di esnan cu tawata di sircuncision” cu a caba di yega for di Herusalem. Pablo a mustra abiertamente cu Pedro tawatin dos norma.—Galationan 2:11-14.

Toch, ta cua di e disipelnan a papia cu curashi na un momento crucial ora cu aparentemente hopi di e disipelnan di Hesus tawata cla pa bandon’e? Tawata na e ocasion cu Hesus a revela algo nobo relaciona cu e nificacion di comemento di su carni y bebemento di su sanger. El a bisa: “Si boso no come e carni di e Yiu di hende y bebe su sanger, boso no tin bida den boso.” Mayoria di Hesus su disipelnan a trompica y bisa: “E discurso aki ta ofensivo; ken por scuch’e?” [NW] Kico a sosode despues? “Como resultado di esaki hopi di su disipelnan a retira y no tawata cana cu ne mas.”—Huan 6:50-66.

N’e momento crucial aki, Hesus a bira wak e 12 apostelnan y haci nan un pregunta masha al caso: “Boso tambe kier bai anto?” Pedro a contesta: “Señor, serca ken nos lo bai? Abo tin e palabranan di bida eterno. Y nos a kere y a haya sa cu abo ta Esun Santo di Dios.”—Huan 6:67-69.

Ki clase di reputacion Pedro a establece? Ora bo lesa e relatonan tocante dje, bo no por keda sin ser impresiona pa su honestidad, su frankesa, su lealtad y e echo cu e tawata dispuesto pa reconoce su mes debilidadnan. El a traha un hopi bon nomber!

Kico Hende A Corda di Hesus?

Hesus su ministerio riba tera a dura apenas tres aña y mei. Apesar di esei, con su siguidonan ta record’e? E tawata un persona seco y inacercabel debi cu e tawata perfecto y sin pica? El a uza su autoridad na un manera cuestionabel door cu e tawata sa cu e ta e Yiu di Dios? El a intimida su siguidonan y obliga nan pa obedec’e? El a tuma su mes asina na serio te cu e no tawatin sentido di humor? E tawata asina ocupa te cu e no tawatin tempo pa hende debil, enfermo of pa mucha? El a menosprecia hende di otro rasa y hende mohe, manera hende homber tawatin custumber di haci e tempo ei? Kico historia ta siña nos?

Hesus tawatin interes den hende. Un estudio di su ministerio ta revela cu na hopi ocasion el a cura hende lam y malo. El a uza su energia pa yuda hende den necesidad. El a mustra interes den mucha, ora el a instrui su disipelnan: “Laga e muchanan bin serca mi; no stroba nan.” Anto Hesus “a tuma nan den su brasa y a bendiciona nan, poniendo su mannan riba nan.” Abo ta dedica tempo na mucha, of bo ta mucho ocupa asta pa tuma nota di nan presencia?—Marco 10:13-16; Mateo 19:13-15.

Tempo Hesus tawata riba tera, reglanan religioso cu a bai mas aya cu e rekisitonan di e Lei a forma un carga pa e pueblo Hudiu. Nan lidernan religioso a oprimi hende cu carga pisa cu nan mes no kier a move ni cu un dede. (Mateo 23:4; Lucas 11:46) Pesei Hesus tawata un contraste grandi! El a bisa: “Bin serca mi tur cu ta cansa y carga, y lo mi duna boso sosiego [“refrescamento”, NW].”—Mateo 11:28-30.

Hende a sinti nan refresca ora nan tawata den compania di Hesus. E no a intimida su disipelnan y duna nan miedo di expresa nan mes. De echo, el a haci pregunta pa anima nan pa duna nan opinion. (Marco 8:27-29) Superintendentenan cristian mester puntra nan mes: ‘Ami ta causa e mesun impresion riba mi rumannan spiritual? Otro ancianonan ta echt bisa mi loke nan ta pensa, of  nan ta duda pa duna nan opinion?’ Ki refrescante ta ora ancianonan ta acercabel, ta scucha otro y ta keda flexibel! En cambio, personanan irasonabel ta desanima expresion franco y liber.

Aunke Hesus tawata e Yiu di Dios, nunca el a maluza su poder of autoridad. Mas bien, el a rasona cu su oyentenan. Esei tawata e caso ora e Farizeonan a purba coh’e den trampa cu e pregunta astuto: “Lei ta permiti pa paga belasting na Cesar, si of no?” Hesus a pidi nan mustr’e un moneda y a puntra nan: “Ta ken su imagen y inscripcion esaki ta?” Nan a contesta: “Di Cesar.” E ora ei el a bisa nan: “Anto duna Cesar loke ta di Cesar, y Dios loke ta di Dios.” (Mateo 22:15-21) Un contesta simpel y logico tawata suficiente.

Hesus tawatin sentido di humor? Kisas algun lector ta sinti un toke di humor ora nan topa e pasashi caminda Hesus a bisa cu tawata mas facil pa un camel pasa door di wowo di hangua cu pa un homber rico drenta e Reino di Dios. (Mateo 19:23, 24) E idea so di un camel cu ta purba pasa door di un hangua di cose literal ta algo exagera. Otro ehempel di tal exageracion ta esun di mira e stof den wowo di bo ruman sin ripara e balki den bo mes wowo. (Lucas 6:41, 42) No, Hesus no a duna disiplina na un manera rigido. E tawata un persona cariñoso y amigabel. Ta bon pa cristiannan djawe tambe tin un sentido di humor. Esei por lanta e animo den tempo di ansiedad.

Hesus Su Compasion pa Hende Mohe

Con hende mohe a sinti nan den presencia di Hesus? En berdad tawatin hopi hende mohe cu a siguie fielmente. Su mama Maria mes tawata un di nan. (Lucas 8:1-3; 23:55, 56; 24:9, 10) Hende mohe a sinti nan asina liber pa acerca Hesus te cu na un ocasion un mohe cu tawata conoci como “un pecado” a laba su pianan cu su lagrimanan y a hunta nan cu azeta perfuma. (Lucas 7:37, 38) Un otro hende mohe cu a sufri di un derame di sanger pa hopi aña a pusha bai dilanti den un multitud pa mishi cu Hesus su paña pa asina e por a cura. Hesus a elogi’e pa su fe. (Mateo 9:20-22) Si, pa hende mohe, Hesus tawata acercabel.

Na un otro ocasion, Hesus a papia cu un mohe Samaritano na un pos. E mohe a keda asina sorprendi cu el a bisa: “Con por ta cu abo, siendo un Hudiu, ta pidi ami, un mohe Samaritano, pa duna bo di bebe?” Hudiu no tawatin lei cu Samaritano, pero Hesus si a sigui papia cu ne y a siñ’e un berdad maraviyoso tocante e “awa cu ta brota pa bida eterno.”  El a sinti su mes comodo den compania di hende mohe, sin pensa cu e tawata haci algo cuestionabel.—Huan 4:7-15.

Hesus ta ser recorda pa su tantisimo cualidadnan di bondad, manera su spirito di sacrificio propio. E tawata e ehempel perfecto di e amor di Dios. Hesus ta pone e modelo pa tur hende cu kier bira su siguido. Abo ta sigui su ehempel estrechamente?—1 Corintionan 13:4-8; 1 Pedro 2:21.

Con e Cristiannan Djawe Ta Ser Recorda?

Den e tempo actual, miles di cristian fiel a muri, hopi den nan biehes, otronan relativamente jong. Pero nan a laga un bon reputacion atras. Algun, manera Crystal, kende a muri den su biehes, ta ser recorda pa nan amor y caracter agradabel pa anda cu ne. Otronan, manera Dirk, kende a muri ora e tawatin 40 y pico aña, ta ser recorda pa nan caracter alegre y bon spirito di cooperacion.

Tuma tambe por ehempel e caso di José di Spaña. Den añanan 60, tempo cu e obra di predica di Testigonan di Yehova tawata bou di prohibicion den e pais ei, José tawata casa y tawatin tres yiu mohe. E tawatin un bon trabou na Barcelona. Pero e tempo ei tawatin mester di ancianonan cristian maduro den suit di Spaña. José a laga su bon trabou y a muda bai Málaga hunto cu su famia. Nan a haya nan den situacion economico dificil y hopi bes sin trabou.

Apesar di esei, José tawata un homber confiabel. Tambe e tawata conoci pa su ehempel fiel den sirbishi y pa e manera ehemplar cu el a lanta su yiunan, locual el a logra cu yudansa y cooperacion di su casa, Carmela. Ora tawatin mester di hende pa organisa congresonan cristian den e region, semper José a pone su mes disponibel. Lamentablemente, tempo cu e tawatin 50 y pico aña, un malesa serio a causa su morto. Pero el a laga atras e reputacion di ta un anciano confiabel y trahado, y un esposo y tata amoroso.

Pues con abo lo wordo recorda? Si bo a muri ayera, kico hende lo bisa di bo awe? Esei ta un pregunta cu lo por motiva nos tur pa mehora den loke nos ta haci.

Kico nos por haci pa establece un bon reputacion? Semper nos por mehora den manifesta e fruta di spirito, manera amor, gran pasenshi, bondad, suavidad y dominio propio. (Galationan 5:22, 23) Si, definitivamente, “un bon nomber ta miho cu un bon enguente, y e dia di un hende su morto ta miho cu e dia di su nacemento.”—Eclesiastes 7:1; Mateo 7:12.

[Plachi na pagina 5]

Abigail ta ser recorda como un mohe huicioso

[Plachi na pagina 7]

Pedro ta ser recorda como un homber impulsivo pero honesto

[Plachi na pagina 8]

Hesus a dedica tempo na mucha