“Hala Serca Dios y E Lo Hala Serca Boso”

Antes y Awor—Con Bijbel A Cambia e Homber Aki

MUSICA tawata Rolf-Michael su bida. Droga tawata su obsesion. Como hoben na Alemania, el a bebe pisa y a uza LSD, cocaina, hashish y otro droga cu a afecta su mente.

Un biaha Rolf-Michael a wordo aresta ora el a purba drenta un pais Africano cu droga, y el a pasa 13 luna den prizon. E periodo cu el a pasa den prizon a dun’e tempo pa pensa riba kico ta e berdadero proposito di bida.

Rolf-Michael cu su casa Ursula, desesperadamente a busca pa sa kico ta e proposito di bida y tambe nan a busca e berdad. Apesar cu nan a pasa den mal experencia cu iglesianan supuestamente cristian, nan tawatin un deseo fuerte pa siña conoce Dios. Nan tawatin pregunta, pero ningun grupo religioso cu nan a bishita no a duna nan contesta satisfactorio. Ademas, e religionnan aki no a duna nan ningun motivacion fuerte pa cambia nan bida.

Cu tempo, Rolf-Michael cu Ursula a bin den contacto cu Testigonan di Yehova. Despues cu Rolf-Michael a cuminsa studia Bijbel, el a ser conmovi profundamente pa e conseho: “Hala serca Dios y e lo hala serca boso.” (Santiago 4:8) E tawata determina pa ‘pone un banda e hende bieu cu tawata conforme su manera di biba di antes y bisti e hende nobo, crea segun Dios den husticia y santidad berdadero.’—Efesionan 4:22-24.

Con Rolf-Michael por a bisti e hende nobo, es decir, e personalidad nobo? Nan a mustr’e den Bijbel cu ta mediante “conocemento berdadero” un persona su personalidad por wordo ‘renoba segun e imagen di Esun cu a cre’e’, esta, Yehova Dios.—Colosensenan 3:9-11.

Segun cu Rolf-Michael tawata gana conocemento exacto, el a purba harmonisa su bida cu e principionan di e Palabra di Dios. (Huan 17:3) Tawata dificil pa e stop di uza droga, pero Rolf-Michael a reconoce e balor di acerca Yehova den oracion y asina a mira con e ta yud’e. (1 Huan 5:14, 15) El a haya mas yudansa door di asocia estrechamente cu personanan cu ya caba tawata Testigo di Yehova, y cu tawata traha duro pa haci e boluntad di Dios.

Un cos mas cu a yuda Rolf-Michael tawata di sa cu e mundo ta pasa bai pero cu esnan cu ta haci e boluntad di Dios lo keda pa semper. Esei a yud’e scohe, no e amor pasahero di mundo, sino e bendicion eterno di un relacion intimo cu e Dios amoroso, Yehova. (1 Huan 2:15-17) E siguiente palabranan di Proverbionan 27:11 a conmove Rolf-Michael profundamente: “Sea sabi, mi yiu, y haci mi curason contento, pa mi por contesta esun cu reprocha mi.” Cu gratitud el a comenta: “E versiculo aki ta  mustra con profundo Yehova su amor ta, ya cu e ta duna hende e chens di haci Su curason contento.”

Mescos cu Rolf-Michael, y su casa y nan tres yiunan, cientos di miles di hende a beneficia door di sigui principionan biblico. Nos ta haya e personanan ei den e congregacionnan di Testigonan di Yehova rond mundo. Lamentablemente, den algun pais hende a acusa e Testigonan eroneamente di ta un secta peligroso cu ta kibra famia. Rolf-Michael su experencia ta demostra net lo contrario.—Hebreonan 4:12.

Rolf-Michael a bisa cu Mateo 6:33, cu ta anima nos pa duna prioridad na actividadnan spiritual, ta e “compas” di su famia, y ta dirigi nan den e direccion corecto. E cu su famia ta masha gradicido na Yehova pa e bida di famia felis cu nan tin como cristian. Nan ta comparti e sintimento di e salmista cu a canta: “Kico lo mi duna SEÑOR pa tur su beneficionan na mi?”—Salmo 116:12.

[Comentario na pagina 9]

Dios ta duna hende e chens di haci Su curason contento

[Cuadro na pagina 9]

Principionan di Bijbel den Accion

E siguiente principionan di Bijbel a yuda hopi hende libra nan mes di adiccionnan mortal:

“Boso cu ta stima SEÑOR, odia maldad.” (Salmo 97:10) Unabes un persona ta combenci cu practicanan mortal ta realmente malo y ta cultiva berdadero odio pa nan, ta bira mas facil pa e haci loke ta agrada Dios.

“Esun cu anda cu hende sabi lo ta sabi, ma un compañero di hende bobo lo sufri daño.” (Proverbionan 13:20) Pa un persona por rechasa droga y otro substancianan adictivo, e tin cu scohe su amistadnan cuidadosamente. Un cos realmente probechoso ta di cultiva amistad cu cristiannan cu lo yud’e rechasa e adiccionnan ei.

“No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.” (Filipensenan 4:6, 7) No tin nada otro cu por iguala e pas ei di mente y curason. Y ora nos ta depende riba Dios mediante oracion, esei ta yuda nos trata cu problemanan di bida sin tin cu acudi na droga.