Bijbel Por Yuda Bo Matrimonio

MATRIMONIO. Pa algun hende e palabra ei ta trece dushi recuerdo. Pa otronan, e ta lanta dolor di curason. Un esposa a lamenta: “Mi ta sinti mi emocionalmente diborcia. Tur ora bai mi ta sinti mi neglisha y solitario.”

Kico ta pone cu dos persona cu un tempo a priminti solemnemente di stima y cuida otro, ta bira asina aleha for di otro? Un factor ta: falta di educacion tocante kico matrimonio ta encera. Un reportero medico a comenta: “Nos ta drenta den e boto matrimonial sin ningun tipo di entrenamento.”

De echo, un estudio dirigi pa e Proyecto Nacional di Matrimonio, cu ta un iniciativa di Universidad di Rutgers na New Jersey, Merca, a confirma cu ta poco hende awe tin e debido conocemento con pa trata cu matrimonio. E directornan di e proyecto a skirbi: “Hopi hende den e investigacion aki a lanta cu mayornan diborcia of infelis den nan matrimonio. Nan sa precis kico ta un mal matrimonio, pero nan no sa sigur con un bon matrimonio mester ta. Tin di nan solamente por describi un bon matrimonio como ‘lo contrario di esun di mi mayornan.’”

Acaso cristiannan si ta liber di problemanan matrimonial? No. De echo, algun cristian den prome siglo mester a haya conseho bon cla pa “no busca separacion.” (1 Corintionan 7:27) Ta claro cu cualkier matrimonio di dos hende imperfecto lo tin su problemanan, pero nos tin yudansa. Esposo y esposa por mehora nan relacion door di aplica principionan biblico.

Ta berdad cu Bijbel no ta un buki skirbi specialmente pa duna instruccion tocante matrimonio. Sinembargo, como cu e ta inspira door di Esun cu a origina matrimonio, nos por spera cu su principionan ta practico. Mediante profeta Isaias, Yehova Dios a declara: “Ami ta SEÑOR bo Dios, Kende ta siña bo, pa bo prospera, Kende ta guia bo den e caminda cu bo mester cana. Mara bo a pone atencion na mi mandamentonan! E ora ei bo pas lo tawata manera un riu, y bo husticia manera ola di lama.”—Isaias 48:17, 18.

E amor cu un tempo tawatin entre abo y bo casa a cuminsa fria? Bo ta sinti bo atrapa den un matrimonio sin amor? Un esposa cu tin 26 aña casa a bisa: “E dolor cu bo ta sinti den e tipo di relacion aki ta algo cu bo no por splica hende. E ta constante y semper presente.” En bes di conforma bo cu un matrimonio cu no ta duna bo ningun satisfaccion, pakico bo no ta tuma e determinacion pa haci algo al respecto? E siguiente articulo lo mustra esposo- y esposanan con principionan biblico por yuda nan matrimonio riba un tereno spesifico: nan determinacion pa conserva y mehora nan matrimonio.