Confiansa Ta Vital pa un Bida Felis

SHIWATAMENTO ta masha desagradabel. Un hende cu ta shiwata cada bes tin cu wak bon kico e ta come. Pero lo no ta realistico pa e stop di come djis pa e no shiwata. Esei lo causa mas problema, pasobra sin cuminda ningun hende no por keda na bida pa hopi tempo.

Di igual manera, ta masha doloroso ora un hende traiciona nos confiansa. Ora esei sosode na varios ocasion, kisas nos lo tene mas cuidou ta ken nos ta scohe pa anda cu ne. Sinembargo, aleha completamente for di hende djis pa no core riesgo cu nan ta laga nos na caya no ta e solucion. Dicon no? Pasobra si nos no por confia hende nos no por ta felis. Nos tin mester di amistad cu otro hende basa riba confiansa mutuo pa nos por ta contento den bida.

“Confiansa ta un di e elementonan basico den nos trato normal di tur dia cu otro hende”, e buki Jugend 2002 ta comenta. “Tur hende ta desea di tin un hende cu nan por confia”, e corant Neue Zürcher Zeitung ta informa. “Confiansa ta mehora e calidad di bida” asina tanto cu e “ta vital pa sobrevivencia.” Si, e corant ta sigui bisa cu “hende no por biba na drechi” sin confiansa.

Ya cu nos tin un necesidad basico di pone nos confiansa den un hende, ta ken nos por confia sin core riesgo di wordo laga na caya?

Confia den Yehova cu Henter Bo Curason

Bijbel ta bisa nos pa “confia den SEÑOR cu henter bo curason.” (Proverbionan 3:5) Si, bes tras bes e Palabra di Dios ta anima nos pa confia nos Creador, Yehova Dios.

Dicon nos por pone nos confiansa den Dios? Na prome luga, pasobra Yehova Dios ta santo. Profeta Isaias a skirbi: “Santo, santo, santo, ta e SEÑOR.” (Isaias 6:3) Bo ta sinti cu e idea di santidad no ta atrae bo? Eigenlijk e mester atrae bo pasobra Yehova su santidad ta nifica cu e ta puro, e no ta consenti mes cu maldad y ta absolutamente confiabel. Nunca e por bira corupto ni abusa di su poder, y piyo ainda, traiciona nos confiansa.

Ademas, nos por pone nos confiansa den Dios pa motibo di su habilidad  y deseo pa yuda hende cu ta sirbie. Por ehempel, su poder supremo ta pone cu e por actua. Su husticia y sabiduria perfecto ta guia e manera cu e ta actua. Y su amor inigualabel ta motiv’e pa actua. Apostel Huan a skirbi: “Dios ta amor.” (1 Huan 4:8) Dios su amor ta influencia tur cos cu e ta haci. Yehova su santidad y su otro cualidadnan sobresaliente ta hacie un Tata ideal, un persona den ken nos por pone tur nos confiansa. Nunca nada ni ningun hende lo no por ta mas digno di nos confiansa cu Yehova.

Confia den Yehova y Biba Felis

Un otro motibo valido pa confia den Yehova ta cu e ta compronde nos miho cu cualkier otro hende. E sa cu tur hende tin e necesidad basico di un relacion di confiansa, duradero y sigur cu e Creador. Esnan cu tin un relacion asina cu ne ta sinti nan mes mas sigur. Rei David a yega na e siguiente conclusion: “Bendiciona ta e hende cu ta pone su confiansa den SEÑOR.” (Salmo 40:4) Awe, di curason, miyones di hende ta bisa mescos cu David.

Laga nos ban wak algun ehempel. Doris a biba na Alemania, Grecia, Merca y Republica Dominicana. El a bisa: “Mi ta sinti mi masha contento di por pone mi confiansa den Yehova. E sa con pa cuida mi fisicamente, spiritualmente y emocionalmente. E ta e miho amigo cu un hende por yega di tin.” Wolfgang, un consehero huridico, ta splica: “Ta masha dushi ora bo por confia den un persona cu tin bo bienestar shen porshento na pecho, un persona cu por, y eigenlijk lo haci loke ta miho pa bo!” Ham, kende a nace na Asia pero cu awor ta biba na Europa, ta conta: “Mi tin confiansa cu tur asunto ta den man di Yehova, y e no ta haci fout, pues mi ta contento cu mi por depende riba dje.”

Ta claro cu cada un di nos mester confia no den nos Creador so pero tambe den otro hende. Pesei, Yehova, como un amigo sabi y experencia, ta conseha nos encuanto ki clase di hende nos por confia. Door di lesa Bijbel cuidadosamente nos por haya sa kico ta su conseho den e asunto aki.

Hende Cu Nos Por Confia

E salmista a skirbi: “No confia den prinsnan, den yiu di hende, den kende no tin salbacion.” (Salmo 146:3) E declaracion inspira aki ta yuda nos mira cu hopi hende no ta digno di nos confiansa. No ta automaticamente “prinsnan” of hende cu den bista di mundo ta importante, manera expertonan riba cierto tereno of den cierto actividad, ta digno di nos confiansa. Nan guia hopi bes ta falibel, y ora bo pone confiansa den “prinsnan” asina, ta masha facil pa bo keda decepciona.

Naturalmente esaki no mester pone nos desconfia di tur hende. Sinembargo, no cabe duda cu nos mester wak bon ora nos ta scohe ken nos kier confia. Ki criterio nos mester uza ora nos ta scohe? Kisas un ehempel di e nacion di Israel di pasado lo por yuda nos. Ora a surgi e necesidad pa nombra hombernan pa carga  responsabilidad pisa den Israel, Moises a haya conseho pa “scohe for di den henter e pueblo hombernan capas cu ta teme Dios, hombernan confiabel, esnan cu ta odia ganashi deshonesto.” (Exodo 18:21) Kico nos por siña di esaki?

E hombernan cu a haya posicionnan di responsabilidad tawata hombernan cu ya caba tawata desplega cierto cualidadnan cu ta agrada Dios. Nan a duna prueba caba cu nan tawata teme Dios; nan tawatin un respet profundo y saludabel pa e Creador y tawatin miedo di desagrad’e. Tur hende por a mira bon cla cu e hombernan aki tawata haci nan maximo esfuerso pa mantene Dios su normanan na halto. Nan tawata odia ganashi deshonesto, locual a indica cu nan tawatin fortalesa moral pa no laga poder corumpi nan. Nan lo no a abusa di confiansa cu a ser poni den nan door di busca nan propio interesnan of esnan di nan famianan y amigonan.

No ta sabi pa nos uza un criterio similar awe ora nos ta scohe esnan den ken nos kier pone nos confiansa? Nos conoce hende cu ta demostra pa medio di nan conducta cu nan ta teme Dios? Nan ta determina pa sigui su normanan di conducta? Nan ta para firme na momento cu nan tin cu evita di haci cosnan cu no ta bon? Nan ta suficiente honesto pa no manipula un situacion y purba saca probecho personal for di dje of pa haya nan kier? Sin duda homber- y mohenan cu ta desplega tal cualidadnan ta digno di nos confiansa.

No Laga un of Otro Decepcion Kibra Bo

Ora di dicidi den ken nos por confia, nos mester tin pasenshi ya cu ta tuma tempo pa bo haya confiansa den otro hende. Ta sabi pa confia un hende gradualmente, paso a paso. Con nos por haci esei? Wel, kisas nos por observa un persona su conducta pa un tempo y wak con e ta reacciona den cierto situacion. E persona ta confiabel den cosnan chikito? Por ehempel, e ta debolbe cosnan cu el a fia y e ta puntual na su afspraaknan? Si ta asina, e ora ei nos por sinti nos mes liber pa confi’e den asuntonan mas serio. Esaki ta na harmonia cu e principio: “Esun cu ta fiel den un cos masha chikito, ta fiel tambe den hopi.” (Lucas 16:10) Loke por yuda nos preveni di haya nos cu decepcionnan grandi ta door di wak bon ken nos ta scohe y tene pasenshi.

Pero kico nos mester haci si un hende laga nos na caya? Studiantenan di Bijbel probablemente lo corda cu riba e anochi cu nan a aresta Hesucristo, su apostelnan a lag’e completamente na caya. Hudas Iscariot a traicion’e, y e otro disipelnan a hui di miedo. Pedro asta a neng’e tres bes. Pero Hesus a discerni cu ta solamente Hudas a actua di mala fe. E echo cu nan a lag’e na caya na un momento asina crucial no a stroba Hesus di confirma su confiansa den e sobra 11 apostelnan djis un par di siman despues. (Mateo 26:45-47, 56, 69-75; 28:16-20) Di igual manera, si nos ta sinti cu un hende a traiciona nos confiansa, ta bon pa nos puntra nos mes si e supuesto traicion ta evidencia cu e persona mes no ta confiabel of cu ta djis un debilidad pasahero.

Ami Mes Ta Confiabel?

Un hende cu dicidi di wak bon ta ken e ta confia mester puntra su mes francamente: ‘Ami mes ta confiabel? Kico ta rasonabel pa mi spera tanto di mi mes como di otro hende, pa loke ta trata norma di confiabilidad?’

No cabe duda cu un persona cu ta confiabel semper bai ta papia berdad. (Efesionan 4:25) E no ta cambia su palabranan djis pa e agrada esnan cu ta scuch’e y di e manera ei saca bentaha personal. Anto si e haci un promesa, un homber confiabel ta haci tur loke ta den su alcanse pa e cumpli cu su palabra. (Mateo 5:37) Si un hende confi’e algo, e persona confiabel ta tene esaki pa su mes y e no ta cana haci redo. Un persona confiabel ta fiel na su casa. E no ta wak pornografia, e no ta keda pensa riba fantasianan sensual, ni e no ta flirt. (Mateo 5:27, 28) Un hende cu ta digno di nos confiansa ta traha duro pa gana su pan di cada dia pa e cria su  famia, anto e no ta busca pa haya placa di un manera facil door di biba riba custia di otro hende. (1 Timoteo 5:8) Cu tal normanan biblico rasonabel na mente nos lo por distingui ta ken nos por confia. Ademas, si nos mes biba na harmonia cu e mesun normanan di comportacion, otro hende lo por confia nos.

Lo ta masha dushi pa biba den un mundo caminda tur hende ta digno di confiansa y caminda decepcion pa motibo di traicion lo ta cos di pasado! Esei ta djis un fantasia? No pa hende cu ta tuma e promesanan di Bijbel na serio, pasobra e Palabra di Dios ta predeci cu pronto lo bin un bunita “tera nobo” caminda lo no tin traicion, mentira ni abuso y tampoco lo no tin tristesa, malesa ni morto! (2 Pedro 3:13; Salmo 37:11, 29; Revelacion 21:3-5) Lo no ta bale la pena pa haya sa mas tocante e speransa aki? Cu mucho gusto Testigonan di Yehova lo duna bo mas informacion tanto riba e topico aki como riba otro topiconan importante.

[Plachi na pagina 4]

Si nos no por confia hende nos no por ta felis

[Plachi na pagina 5]

Yehova ta e persona mas digno di nos confiansa

[Plachinan na pagina 7]

Nos tur tin mester di amistad cu otro hende basa riba confiansa mutuo