Pregunta di Lector

Dicon Eliseo a pidi “dobel porcion” di e spirito di Elias?

Un poco prome cu Elias a termina su asignacion como profeta den Israel, e profeta mas hoben, Eliseo, a pidie: “Pa fabor, laga un dobel porcion di bo spirito ta riba mi.” (2 Reinan 2:9) Den sentido spiritual, Eliseo evidentemente tawata pidi pa haya un porcion dobel manera ta wordo duna na un yiu homber cu ta e prome yiu, esta, e primogenito. (Deuteronomio 21:17) Un consideracion breve di e relato lo aclara esaki y lo yuda nos siña algun les for di loke a tuma luga.

Na harmonia cu e instruccion di Yehova, profeta Elias a ungi Eliseo como su susesor. (1 Reinan 19:19-21) Durante mas o menos seis aña, Eliseo a fungi como Elias su fiel sirbido y tawata determina pa haci esaki te na final. Asta riba Elias su ultimo dia como profeta den Israel, Eliseo no a kita for di banda di su maestro y consehero. Aunke Elias a urgi Eliseo pa stop di siguie, e profeta mas hoben a declara tres biaha: “Lo mi no laga bo.” (2 Reinan 2:2, 4, 6; 3:11) Sin duda, Eliseo a considera e profeta cu tawata mas bieu cu ne como su tata spiritual.—2 Reinan 2:12.

Sinembargo, Eliseo no tawata e unico yiu spiritual di Elias. Elias cu Eliseo a asocia cu un grupo di homber conoci como “e yiu hombernan di e profetanan.” (2 Reinan 2:3) E relato den Segundo Reinan ta indica cu e “yiu hombernan” aki tambe tawatin un relacion pega cu nan tata spiritual, Elias. (2 Reinan 2:3, 5, 7, 15-17) Sinembargo, como cu Eliseo tawata e susesor ungi, e tawata esun principal entre e yiu hombernan spiritual di Elias. E tawata manera e primogenito. Den Israel di antiguedad, un yiu homber primogenito a haya dobel porcion di e herencia di su tata, mientras cada un di e otro yiu hombernan a ricibi un solo porcion. Pesei Eliseo a pidi dobel porcion di e herencia spiritual di Elias.

Dicon Eliseo a haci e peticion aki na e tempo spesifico ei? Debi cu e tawata a punto di cuminsa cu un tarea pisa: ser Elias su susesor como profeta den Israel. Eliseo a realisa cu pa e por a cumpli cu e responsabilidadnan relaciona cu e asignacion sumamente dificil aki, e tawatin mester di poder spiritual cu tawata fuera di su propio capasidad, poder cu solamente Yehova por a percura. E mester tawata sin miedo mescos cu Elias tawata. (2 Reinan 1:3, 4, 15, 16) Ta pesei el a pidi pa dobel porcion di e spirito di Elias: un spirito di curashi y e spirito di ta “absolutamente yalurs pa Yehova”—cualidadnan deseabel cu e spirito di Dios ta produci. (1 Reinan 19:10, 14, NW) Con Elias a reacciona?

Elias tawata sa cu Eliseo a pidi algo cu Elias no tawatin derecho di duna, sino Dios so. Pesei modestamente Elias a contesta: “Bo a pidi un cos dificil. Sinembargo, si bo mira mi ora mi wordo kita for di bo, lo t’asina pa bo.” (2 Reinan 2:10) Y en berdad, Yehova a permiti Eliseo mira Elias bai laira den un warwaru. (2 Reinan 2:11, 12) Pues, Eliseo su peticion a ser concede. Yehova a dun’e e spirito cu e tawatin mester pa cuminsa cu su tarea nobo y pa enfrenta e pruebanan su dilanti.

Awe, cristiannan ungi (cu tin biaha ta wordo yama e clase di Eliseo) y sirbidonan di Dios en general por haya hopi animacion for di e relato biblico aki. Tin biaha, nos por sinti nos mes inadecua y un poco desespera ora nos ricibi un asignacion nobo. Of kisas nos ta perdiendo un poco di nos curashi pa sigui cu e trabou di predica e Reino segun cu nos ta topa cada bes mas indeferencia of oposicion den nos teritorio. Sinembargo, si nos roga Yehova pa sostene nos, lo e duna nos spirito santo segun cu nos tin mester di dje pa trata cu dificultad y cu circunstancia cu ta cambia. (Lucas 11:13; 2 Corintionan 4:7; Filipensenan 4:13, NW) Si, mescos cu Yehova a fortalece Eliseo pa e por a cumpli cu su responsabilidadnan mas pisa, asina lo e yuda nos tur, hoben y bieu, pa cumpli cu nos sirbishi.—2 Timoteo 4:5.