Pregunta di Lector

Con cristiannan mester considera piedra di nacemento?

Den algun cultura, cada hende tin un piedra di nacemento cu ta coresponde cu e luna den cua el a nace. Si un cristian kier bisti un renchi cu tin un cierto piedra precioso esei ta un asunto personal. (Galationan 6:5) Pero tin algun factor importante pa tene cuenta cu ne ora di tuma e decision ei.

Encyclopaedia Britannica ta splica cu un piedra di nacemento ta un “piedra precioso cu ta coresponde cu un hende su fecha di nacemento, y hopi hende ta pensa cu bistimento di piedra di nacemento ta trece suerte y bon salu pa nan.” E enciclopedia ta sigui bisa: “Pa hopi tempo caba astrologonan a pensa cu cierto piedranan precioso tin podernan sobrenatural.”

Specialmente antes hopi hende tawata kere cu bistimento di piedra di nacemento lo trece suerte pa nan. Un cristian berdadero ta kere esei? No, pasobra e ta compronde cu Yehova a condena esnan cu a bandon’e y cu a bai confia den “e dios di suerte.”—Isaias 65:11, BPK.

Durante Edad Medio, mirado di destino tawata scohe un piedra precioso pa cada luna di aña. Nan tawata anima hende pa bisti e piedra precioso di e luna di nan nacemento, y esei supuestamente mester a proteha esun cu a bistie di daño. Pero ta incorecto pa un cristian bai tras di e pronosticonan di mirado di destino ya cu Bijbel ta condena nan.—Deuteronomio 18:9-12.

Lo ta inapropiado tambe pa un cristian duna nificacion special na e echo cu un renchi tin un piedra di nacemento. Testigonan di Yehova no ta celebra cumpleaño. Esei ta pa motibo cu tal celebracion ta hala mucho atencion na e persona y e unico dos hacimento di aña cu Bijbel ta papia di dje ta esnan di gobernantenan cu no a sirbi Dios.—Genesis 40:20; Mateo 14:6-10.

Tin hende ta pensa cu bistimento di renchi cu tin un piedra di nacemento tin un bon influencia riba nan personalidad. Sinembargo, cristiannan berdadero no ta kere den esei, pasobra nan sa cu ta bou di influencia di e spirito santo di Dios y door di aplica principionan biblico nan por bisti “e hende [of, “personalidad”, NW] nobo.”—Efesionan 4:22-24.

Un factor masha importante pa tene cuenta cu ne ta motivacion. Prome cu un cristian dicidi si e ta bai bisti un renchi cu piedra di nacemento, ta bon pa e puntra su mes lo siguiente: ‘Mi kier bisti e renchi aki djis pasobra mi gusta e piedra precioso, apesar cu mi sa cu di otro banda e ta loke nan ta yama piedra di nacemento? Of mi a laga mi mes wordo influencia un tiki door di ideanan supersticioso cu cierto hende tin di e piedranan precioso ei?’

Un cristian mester examina su curason pa e determina ta kico ta su motivacion tras di e asunto. E Scritura ta bisa: “Warda bo curason riba tur cos, pasobra e ta e fuente di bida.” (Proverbionan 4:23) Ora di tuma un decision relaciona cu e asunto di piedra di nacemento, cada cristian ta haci bon di analisa ta kico ta su motivacion tras di e asunto y e posibel efectonan cu su decision lo por tin riba su mes y riba otro hende.—Romanonan 14:13.