Si, Ta Rasonabel pa Kere den un Paradijs Riba Tera

ATRABES di historia, miyones di hende a kere cu finalmente nan lo bandona tera y bai shelo. Tin hende a pensa cu nos Creador nunca tawatin intencion pa tera bira nos luga permanente di biba. Asceticonan (hende cu ta severo cu nan mes) a bai mas leu ainda. Pa hopi di nan, tera y tur cos material ta malo y ta un barera pa berdadero satisfaccion spiritual y un relacion intimo cu Dios.

Esnan cu a bin cu e ideanan aki sea no tawata conciente di loke Dios a bisa tocante un paradijs riba tera of a scohe pa ignor’e. De echo, awe hopi hende no ta interesa mes pa sa kico Dios a inspira hende pa skirbi tocante e topico aki den su Palabra, Bijbel. (2 Timoteo 3:16, 17) Pero no ta sabi pa confia den e Palabra di Dios en bes di acepta teoria di hende? (Romanonan 3:4) En realidad ta masha importante pa nos haci esei ya cu Bijbel ta spierta nos cu un criatura poderoso pero malbado y invisibel a ciega hende spiritualmente y awor “ta gaña henter mundo.”—Revelacion 12:9; 2 Corintionan 4:4.

Dicon Tin Confusion?

Ideanan contradictorio tocante alma a confundi hende encuanto kico ta Dios su proposito pa e tera. Hopi hende ta kere cu nos tin un alma inmortal cu ta sali for di e curpa humano despues di morto y ta sigui biba. Otro hende ta kere cu alma di cada hende a existi prome cu nan curpa humano a ser crea. Segun un obra di referencia, e filosofo Griego Plato a pensa cu e alma “ta encarsela den un curpa como castigo pa e picanan cu el a comete tempo e tawata den shelo.” Di igual manera teologo Origenes di siglo 3 a bisa cu “tur alma a peca [den shelo] prome cu nan a uni cu e curpa” y a wordo “encarsela [den e curpa ei riba tera] como castigo pa nan picanan.” Y miyones di hende ta kere cu tera ta simplemente un tipo di luga pa test hende durante nan biahe pa shelo.

Tambe tin diferente idea tocante kico ta pasa cu e alma ora un hende muri. Segun e buki History of Western Philosophy (Historia di Filosofia Occidental), e Egipcionan a desaroya e punto di bista “cu alma di e defuntonan ta baha bai den mundo di e mortonan.” Despues filosofonan a argumenta cu alma di e defuntonan no a baha den un mundo scur di mortonan pero cu eigenlijk nan a subi bai na un region di spirito superior. Nan ta bisa cu e filosofo Griego Socrates tawata di opinion cu ora un hende muri su alma “ta bai den [un] region invisibel . . . y ta pasa e resto di su bida cu e diosnan.”

Kico Bijbel Ta Bisa?

Niun caminda Bijbel, e Palabra cu Dios a inspira no ta bisa cu hende tin un alma inmortal. Lesa Genesis 2:7 pa bo mes. E ta bisa: “SEÑOR Dios a forma hende di e stof di tera y a supla e rosea di bida den su nanishi; y hende a bira un ser bibo.” Esei ta mas cla cu di dia y no por wordo mal interpreta. Ora Dios a crea e prome hende, esta, Adam, E no a hinca ningun ingrediente cu no ta fisico den dje. No, pasobra Bijbel ta bisa cu “hende a bira un ser bibo.” E homber no tawatin un alma sino tawata un alma.

Ora Yehova a crea tera y e famia humano, ningun ora su intencion no tawata pa hende muri. Dios su proposito tawata pa hende  biba pa semper den Paradijs riba tera. Adam a muri pasobra el a desobedece Dios su lei. (Genesis 2:8, 15-17; 3:1-6; Isaias 45:18) Unda e prome ser humano a bai ora el a muri? Na un region di spirito? No! E alma, Adam, a bolbe na stof for di cua el a wordo crea.—Genesis 3:17-19.

Nos tur a hereda pica y morto for di nos prome mayor Adam. (Romanonan 5:12) E morto aki cu nos a hereda ta un condicion den cua e persona ta stop di existi, mescos cu tawata e caso cu Adam. (Salmo 146:3, 4) Eigenlijk, den ningun di su 66 bukinan, Bijbel ta asocia e palabra “inmortal” of “eterno” cu e palabra “alma.” Al contrario, e Scritura claramente ta bisa cu e alma, esta, e persona, ta mortal. E alma ta muri.—Eclesiastes 9:5, 10; Ezekiel 18:4.

Cosnan Material Riba Nan Mes Ta Malo?

Tur cos material, incluso tera, ta malo? Siguidonan di manikeismo, un movemento religioso funda door di un tal Mani na Persia durante siglo 3 di nos era, tawatin e punto di bista ei. The New Encyclopædia Britannica ta bisa: “Manikeismo tawata un reaccion riba e angustia cu e condicion humano a causa.” Mani a opina cu bida humano “no ta natural, ta insoportabel y totalmente malo.” Tambe e tawata di opinion cu e unico manera pa scapa for di e “angustia” aki tawata si e alma sali for di e curpa, bandona tera y haya un bida spiritual den un mundo di spirito.

Na contraste, Bijbel ta bisa nos cu for di Dios su punto di bista “tur loke el a traha” ora el a crea tera y humanidad tawata “masha bon.” (Genesis 1:31) E tempo ei no tawatin barera entre hende cu Dios. Adam cu Eva tawatin un bon comunicacion y un relacion estrecho cu Yehova, mescos cu e homber perfecto Hesucristo a gosa di un relacion intimo cu su Tata celestial.—Mateo 3:17.

Si nos prome mayornan, Adam cu Eva, no a peca, pa semper nan lo a keda cu un relacion intimo cu Yehova Dios den un paradijs riba tera. Nan bida a cuminsa den Paradijs, pasobra e Scritura ta bisa nos: “SEÑOR Dios a planta un hofi parti pariba, na Eden; y ayanan el a pone e homber cu el a forma.”  (Genesis 2:8) Ta den e paradijs ei Eva a wordo crea. Si Adam cu Eva no a peca, tanto nan como nan yiunan perfecto lo por a traha hunto den felicidad te cu henter e tera lo a bira un paradijs. (Genesis 2:21; 3:23, 24) E Paradijs riba tera lo a bira humanidad su luga di biba pa semper.

Dicon Algun Hende Ta Bai Shelo?

Kisas lo bo bisa: ‘Pero, Bijbel ta bisa cu tin hende ta bai shelo, no ta asina?’ Si. Despues cu Adam a peca, Yehova su proposito tawata pa establece un Reino den shelo. Algun desendiente di Adam lo a forma parti di e Reino aki pa for di den shelo hunto cu Hesucristo nan “reina riba tera.” (Revelacion 5:10; Romanonan 8:17) Nan lo mester a wordo resusita pa haya bida inmortal den shelo. Hunto nan mester a forma un grupo di 144.000 persona, y e promenan entre nan tawata e disipelnan fiel di Hesus di prome siglo.—Lucas 12:32; 1 Corintionan 15:42-44; Revelacion 14:1-5.

Sinembargo, no tawata Dios su proposito original pa hende husto bandona tera y bai biba den shelo. De echo, ora Hesus tawata riba tera, el a bisa: “Ni un hende no a subi na shelo, sino esun cu a baha for di shelo, esta, e Yiu di hende.” (Huan 3:13) Mediante “e Yiu di hende”, Hesucristo, Dios a percura un rescate cu ta haci bida pa semper posibel pa esnan cu eherce fe den e sacrificio di Hesus. (Romanonan 5:8) Pero na unda e miyones di hendenan ei lo bai biba pa semper?

Dios Su Proposito Original Lo Cumpli

Dios su proposito tawata pa scohe algun hende di e famia humano pa sirbi como cogobernante cu Hesucristo den e Reino di shelo, pero esei no kiermen cu tur bon hende ta bai shelo. Yehova a crea tera pa e bira un paradijs pa e famia humano biba aden. Pronto, Dios lo cumpli cu e proposito original ei.—Mateo 6:9, 10.

Bou di liderato di Hesucristo y su cogobernantenan celestial, pas y felicidad lo reina na tur parti di mundo. (Salmo 37:9-11) Esnan cu ta den Dios su memoria lo wordo resusita y lo gosa di salu perfecto. (Echonan 24:15) Debi na nan fieldad na Dios, humanidad obediente lo haya loke nos mayornan original a perde, esta, perfeccion y bida eterno den paradijs riba tera.—Revelacion 21:3, 4.

Yehova Dios nunca ta keda sin cumpli cu su proposito. Mediante su profeta Isaias, el a declara: “Manera awasero y sneu ta cai for di shelo, y no ta bolbe ayanan sin muha tera, y ta haci tera produci y spruit, y ta duna simiña na e sembrado y pan na esun cu ta come, asina mi palabra cu ta sali for di mi boca lo ta; e lo no bolbe bashi serca mi, sin cumpli cu loke mi ta desea, y sin alcansa e proposito cu cual mi a mand’e.”—Isaias 55:10, 11.

E buki biblico di Isaias ta duna nos un idea con bida den Paradijs riba tera lo ta. Ningun hende cu ta biba den Paradijs lo bisa: “Mi ta malo.” (Isaias 33:24) Bestia lo no forma peliger pa hende. (Isaias 11:6-9) Hende lo construi casnan bunita y biba den nan y nan lo planta y come te keda satisfecho. (Isaias 65:21-25) Ademas, Dios “lo traga morto pa semper, y Señor DIOS lo seca awa di wowo for di tur cara.”—Isaias 25:8.

Pronto, humanidad obediente lo biba bou di condicionnan excelente. Nan ‘lo wordo libra for di sclabitud na corupcion pa drenta den e libertad glorioso di e yiunan di Dios.’ (Romanonan 8:21) Esta dushi lo ta pa biba pa semper den Paradijs riba tera manera Dios a priminti! (Lucas 23:43) Abo tambe lo por ta einan si bo actua na harmonia cu conocemento exacto di e Scritura y eherce fe den Yehova Dios y Hesucristo. Y bo por tin confiansa cu en berdad ta rasonabel pa kere den un paradijs riba tera.

[Plachi na pagina 5]

Adam cu Eva tawata diseña pa biba pa semper den un paradijs riba tera

 [Plachinan na pagina 7]

Den Paradijs riba tera . . .

nan lo construi casnan

nan lo planta wendruif

Yehova lo bendiciona nan

[Reconocemento pa Potret na pagina 4]

U.S. Fish & Wildlife Service, Washington, D.C./NASA