Fin di Guera

‘Nos tin 12 aña so. Nos no por influencia politica ni guera, pero nos kier biba! Nos ta warda riba pas. Lo e bin ora nos ta na bida ainda?’—Muchanan di un vijfde klas

‘Nos tin gana di bai scol y bishita nos amigonan y famianan sin temor di wordo secuestra. Mi ta spera cu gobierno lo haci caso. Nos kier tin un miho bida. Nos kier pas.’—Alhaji, di 14 aña

E PALABRANAN conmovedor aki ta transmiti e deseo di curason di hobennan cu a sufri pa añanan largo pa motibo di combatenan civil. Nan unico deseo ta pa hiba un bida normal. Pero no ta nada facil pa comberti un speransa den realidad. Nos lo biba pa mira un mundo sin guera?

Den añanan resiente, esfuerso internacional a wordo haci pa resolve algun guera civil door di presiona gruponan cu ta contra otro pa firma acuerdo di pas. Pa efectua tal tratado algun pais a manda trupanan militar cu mester mantene ordo y pas. Pero masha poco nacion tin e placa of e deseo pa monitor e paisnan leu ei. Den e paisnan ei cualkier tratado entre gruponan cu ta den guera contra otro, ta masha fragil debi na desconfiansa y odio cu ta profundamente hancra. Frecuentemente, un par di siman of luna despues cu nan a caba di firma un tregua, e chispa di e conflicto ta sende atrobe. Manera e Instituto pa Investigacion pa Pas Internacional di Stockholm ta indica: “Ta masha dificil pa logra pas ora esnan cu ta den combate tin e deseo y e capasidad pa sigui bringa.”

Na mes momento, e conflictonan aki cu ta hopi dificil pa soluciona y cu ta plaga asina hopi parti di mundo ta pone cristiannan corda riba un profecia di Bijbel. E buki di Revelacion ta papia di un periodo critico den historia durante cua un hinete simbolico lo “kita pas for di riba tera.” (Revelacion 6:4) E cuadro aki di guera continuo ta parti di un señal componi cu ta indica cu nos ta bibando awor den un tempo describi den Bijbel como “e ultimo dianan.” * (2 Timoteo 3:1) Sinembargo, e Palabra di Dios ta sigura nos cu e ultimo dianan aki ta loke lo hiba na pas.

Bijbel ta splica na Salmo 46:9 cu pa por tin berdadero pas ta necesario pa pone un fin na guera, no djis den un parti di e tera so, sino rond mundo. Ademas, e mesun salmo aki ta papia spesificamente tocante e destruccion di armanan di temponan biblico: e boog y e lansa. Di igual manera e cantidad creciente di armanan djawe mester wordo destrui pa un dia humanidad por yega di tin pas.

Pero al fin y al cabo ta odio y golosidad ta loke ta basha gasolin riba e candela, esta stimula guera, y no bala cu rifle. Cudishi of golosidad, ta un causa fundamental di guera, y  odio hopi bes ta hiba na violencia. Pa elimina e sintimentonan destructivo aki, hende mester cambia nan manera di pensa. Nan mester wordo educa pa hiba un bida pacifico. Pues, e profeta Isaias di antiguedad a declara realisticamente cu guera lo stop solamente ora hende ‘lo no train pa guera mas.’—Isaias 2:4.

Sinembargo, actualmente nos ta biba den un mundo cu ta siña tanto hende grandi como mucha, no e balor di pas sino e gloria di guera. Ta tristo cu asta mucha ta wordo entrena pa mata.

Nan A Siña Mata

Tempo Alhaji tawatin 14 aña, e no tawata un solda den sirbishi militar mas. E tawatin solamente dies aña ora trupanan rebelde a captur’e y a train e pa bringa cu rifle automatico AK-47. Despues cu el a wordo forsa pa bira solda, e tawata atraca luganan pa e haya cuminda y kima casnan. Tambe e tawata mata y mutila hende. Awor, Alhaji ta haya cu ta masha dificil pa e lubida guera y adapta na bida civil. Abraham, un otro mucha cu ta solda, tambe a siña mata y no kier a entrega su arma. El a bisa: “Si nan bisa mi bai sin mi arma, mi no sa kico mi tin cu haci pa mi haya mi cuminda.”

Mas cu 300.000 mucha cu ta solda, tanto mucha mohe como mucha homber, ainda ta bringa y ta perde nan bida den conflictonan civil interminabel cu ta plaga nos planeta. Un lider rebelde a splica: “Nan ta sigui ordo; nan no tin e precupacion di bai bek serca nan casa of famia y nan no tin miedo.” Sinembargo, e muchanan aki ta desea y ta merece un miho bida.

Den paisnan desaroya, e imagen repugnante di un mucha cu ta solda ta dificil pa imagina. Pero toch, hopi mucha cu ta biba den paisnan desaroya a siña con pa bringa guera na nan propio cas. Con asina?

Ban wak e ehempel di José di suitost Spaña. E tawata un teenager cu ta gusta train arte marcial. Su spada samurai cu su tata a regal’e pa Pasco tawata su pocesion mas balioso. Y e tawata gusta video game, specialmente esnan violento. Dia 1 di april di aña 2000, el a imita su heroe di video game cu ta hopi violento. Den un explosion descontrola di violencia, el a mata su tata, su mama y su ruman mohe cu e mesun spada cu su tata a regal’e. El a splica polis: “Mi tawata kier ta mi so den mundo; Mi no tawata kier pa mi mayornan busca mi.”

Comentando riba e efecto di entretenimento violento, autor y oficial di ehersito Dave Grossman a remarca: “Nos ta yegando un etapa cu nos a bira asina sin heful, cu dolor y sufrimento di otro hende a bira un fuente di entretenimento; y en bes di haya asco pa e cosnan aki, nos ta gosa mas ainda ora nos imagina cu nos mes ta den e esena. Nos ta siña mata, y ta siña disfruta di dje.”

Tanto Alhaji como José a siña mata. Ningun di nan dos tawatin intencion di bira matado, pero un of otro tipo di entrenamento a troce nan pensamento. Tal training—sea pa mucha of hende grandi—ta planta e simiñanan di violencia y guera.

Siña Biba na Pas en bes di Train pa Guera

Tanten cu hende ta siña mata, pas duradero no por wordo logra. Hopi siglo pasa, profeta Isaias a skirbi: “Mara bo a pone atencion na mi mandamentonan! E ora ei bo pas lo tawata manera un riu.” (Isaias 48:17, 18) Ora hende haya conocemento exacto di e Palabra di Dios y siña stima e lei di Dios, nan ta haya un asco pa guera y violencia. Asta for di awor, ta bon pa mayornan haci sigur cu e weganan cu nan yiunan ta hunga no ta promove violencia. Hende grandi tambe por siña vence odio y golosidad. Bes tras bes Testigonan di Yehova a descubri cu e Palabra di Dios tin poder pa cambia personalidad di hende.—Hebreonan 4:12.

Considera e ehempel di Hortêncio. E tawata  un yoncuman ora el a wordo recluta pa bira un solda contra su boluntad. E ta splica cu training militar tawata diseña pa: “Inculca den nos e deseo pa mata otro hende y pa no tene niun tiki miedo di mata.” El a bringa den un guera civil na Africa cu ya tawata andando pa hopi tempo caba. E ta admiti: “Guera a afecta mi personalidad. Te awe ainda mi ta corda tur cos cu mi a haci, y mi ta sinti mi hopi malo tocante loke nan a forsa mi pa haci.”

Ora un di e otro soldanan a papia cu Hortêncio tocante Bijbel, e palabra a touch su curason. E promesa di Dios na Salmo 46:9 pa pone un fin na tur forma di guera a impresion’e. Mas el a studia Bijbel, menos gana e tawatin pa bringa den guera. No a dura hopi cu tanto e como dos otro compañero di dje a wordo saca for di ehersito, y nan a dedica nan bida na Yehova Dios. Hortêncio ta splica: “Berdad di Bijbel a yuda mi haya amor pa mi enemigo. Mi a realisa cu door di bringa den guera, eigenlijk mi tawata peca contra Yehova, pasobra Dios ta bisa cu nos no mester mata nos enemigo. Pa desplega e amor aki, mi mester a cambia mi manera di pensa y no considera hende como mi enemigo.”

E experencianan ei ta mustra cu educacion biblico sin duda ta promove pas. Esaki no ta nada straño. Profeta Isaias a declara cu tin un relacion direct entre educacion dibino y pas. El a predeci: “Tur bo yiunan lo ta personanan siña pa Yehova, y e pas di bo yiunan lo ta abundante.” (Isaias 54:13, NW) E mesun profeta a premira un tempo ora hende di tur nacion lo basha bai na adoracion puro di Yehova Dios pa siña di su camindanan. Cu ki resultado? “Nan lo bati nan spadanan traha ploeg cu nan, y nan lo bati nan lansanan traha sker-pa-snui cu nan. Nacion lo no lanta spada contra nacion, y nunca mas nan lo train pa guera.”—Isaias 2:2-4.

Na harmonia cu e profecia ei, Testigonan di Yehova ta participando den un obra di educacion mundial cu ya caba a yuda miyones di hende pa vence odio cu ta e raiz di guera.

Un Garantia pa Pas Mundial

Ademas di percura pa educacion, Dios a establece un gobierno, of “reino”, cu por sigura pas mundial. Interesantemente, Bijbel ta describi e Gobernante cu Dios a scohe, esta, Hesucristo como e “Prins di Pas.” Tambe Bijbel ta sigura nos cu “lo no tin fin na e aumento di su gobernacion y di pas.”—Isaias 9:6, 7.

Ki garantia nos tin cu Cristo su gobernacion lo elimina tur tipo di guera cu exito? Profeta Isaias ta agrega: “E celo di e SEÑOR di ehersitonan lo haci esaki.” (Isaias 9:7) Dios tin e deseo y e habilidad pa preserva pas duradero. Hesus tin pleno confiansa den e promesa aki. Ta pesei el a siña su siguidonan pa pidi den oracion pa e Reino di Dios bin y pa Dios su boluntad sosode na tera. (Mateo 6:9, 10) Ora e peticion sinsero ei finalmente haya contesta, nunca mas guera lo asota e superficie di tera.

[Nota]

[Plachi na pagina 7]

Educacion biblico ta promove berdadero pas