Storia di Bida

Recompensa Abundantemente door di A Mantene e Spirito di Misionero

SEGUN E RELATO DI TOM COOKE

E zonido di arma di candela diripiente a interumpi e trankilidad di atardi. Bala tawata skeiro door di e palonan di nos hardin. Kico tawata pasando? Un poco despues nos a haya sa cu un golpi di estado a tuma luga y cu Uganda awor tawata bou di mando di General Idi Amin. E cosnan aki a tuma luga na 1971.

CON bin ami cu mi casa Ann, a muda for di Inglatera cu ta un luga relativamente pacifico, pa bai biba na e parti di Africa aki cu ta instabil y kisas peligroso? Mi ta pensa cu di naturalesa mi ta un tiki aventurero, pero principalmente ta e celo cu mi mayornan a desplega den sirbishi di Reino ta loke a planta den mi e spirito di misionero.

Mi ta corda cu e prome bes cu mi mayornan a papia cu Testigonan di Yehova tawata na augustus 1946, un dia cu a haci hopi calor. Nan a para papia na porta cu dos bishitante y a parce mi cu esei a dura oranan largo. E dos bishitantenan aki, Fraser Bradbury y Mamie Shreve, a bin bek basta biaha, y durante e lunanan cu a sigui, e bida di nos famia a cambia drasticamente.

E Ehempel di Curashi di Mi Mayornan

Mi mayornan tawata envolvi den diferente actividad di comunidad. Por ehempel, poco prome cu nan a cuminsa studia Bijbel, tawatin poster grandi di Winston Churchill tur caminda den nos cas. Durante e eleccionnan nacional despues di guera, nos cas tawata ser uza como centro local di e Comite di Partido Conservativo.  Tambe nos famia tawatin hopi conoci prominente tanto den iglesia como den comunidad. Maske e tempo ei mi tawatin nuebe aña so, mi a sinti con sorprendi nos famianan a keda ora nan a realisa cu nos lo bira Testigo di Yehova.

E entusiasmo di curason y e curashi di e Testigonan cu nos tawata asocia cu ne a motiva mi mayornan pa bira activo den e trabou di predica. No mucho tempo despues mi tata tawata duna discurso na aire liber cu yudansa di un amplifier den e area principal pa haci compras den e pueblo di Spondon, caminda nos tawata biba. Anto ami cu mi otro rumannan tawata para na luganan strategico cu E Toren di Vigilancia y Spierta! teni pa hende mira. Mi tin cu admiti si cu ora muchanan cu mi tawata bai scol cu ne a acerca mi, mi a desea pa tera habri y guli mi.

E ehempel di mi mayornan a anima mi ruman mohe mayo, Daphne, pa cuminsa traha pionero. Na 1955, el a asisti na e Scol Biblico di Galad di Watchtower y a wordo asigna pa traha como misionero na Japon. * Pero Zoe, mi ruman mohe mas chikito a stop di sirbi Yehova.

Entretanto mi a caba mi estudio di arte grafico. Un topico importante cu e studiantenan di e tempo ei tawata papia riba dje, tawata sirbishi militar obligatorio. Ora mi a bisa nan cu esei ta contra mi principionan y cu lo mi no participa, nan a kere cu ta wega mi ta haci. E topico aki a duna mi hopi oportunidad pa papia tocante Bijbel cu algun di e studiantenan. Un poco tempo despues, mi a wordo sentencia na 12 luna di prizon door cu mi no kier a bai den dienst. Un di e studiantenan na e academia di arte cu a mustra interes den e mensahe di Bijbel a bira mi esposa despues. Pero lo mi laga Ann mes conta con el a conoce e berdad.

Ann Ta Haya e Berdad

“Mi famia no tawata religioso, y mi no a batisa nunca. Pero mi tawata interesa den e topico di religion y tawata compaña mi amigonan ora nan tawata bai nan misa. Mi interes den Bijbel a lanta ora mi a tende un combersacion hopi anima cu Tom y un otro Testigo tawatin cu otro studiantenan di universidad. Ora Tom y e otro Testigo a bai prizon pa motibo cu nan a nenga di bai dienst, mi a keda sorprendi.

Mi a sigui skirbi Tom tempo e tawata den prizon, y mi a bira mas interesa den Bijbel. Tempo mi a muda bai Londen pa sigui cu mi estudionan, mi a acepta pa Muriel Albrecht studia Bijbel cu mi. Muriel tawata un misionero na Estonia, y tanto e como su mama tawata un fuente di gran animacion pa mi. Despues di un par di siman, ya mi tawata asisti na reunion y tawata para pafo di e stacion di trein Victoria pa ofrece E Toren di Vigilancia y Spierta!

Mi tawata asisti na e Congregacion Southwark cu ta keda den parti suit di Londen. E congregacion tawata consisti di rumannan di diferente nacionalidad y hopi di nan tawatin masha poco cos material. Maske mi tawata un stranhero, nan a trata mi manera famia. Tawata e amor den e congregacion ei cu a combence mi cu esaki ta e berdad, y na 1960 mi a batisa.”

Mesun Metanan—Diferente Circunstancia

Mas despues na 1960 ami cu Ann a casa, y nos tawatin meta pa traha como misionero. Pero circunstancia a cambia ora nos a haya sa cu nos ta bai haya un yiu. Tempo cu nos yiu  mohe Sara a nace, ainda ami cu Ann tawatin e deseo pa sirbi den un pais caminda e necesidad pa publicado di Reino ta mas grandi. Mi a solicita pa trabou den varios pais, y finalmente, na mei di aña 1966, un carta a yega for di Ministerio di Educacion di Uganda pa confirma cu mi a haya un trabou. Sinembargo, pa e tempo ei Ann tawata na estado di nos di dos yiu. Algun hende tawata puntra nan mes si ta sabi pa sikiera considera pa bai un luga asina leu. Nos a consulta nos docter, kende a bisa: “Si boso kier bai, boso mester bula prome cu Ann haci shete luna na estado.” Pues nos a bai Uganda sin tarda. Debi na esei nos mayornan a mira nos di dos yiu mohe Rachel te ora e tawatin dos aña. Awor cu nos mes ta welo, nos ta compronde e sacrificio propio cu nos mayornan stima a haci y ta aprecia esei masha hopi.

Ora nos a yega Uganda na 1966 nos a sinti nos emociona pero tambe un poco precupa. Ora nos a baha for di avion, mesora e colonan a impresiona nos. Nan tawata asina bibo. Nos prome cas tawata serca di e pueblo chikito di Iganga, cu ta keda 50 kilometer for di Jinja, e pueblo caminda Riu Nilo ta cuminsa. E Testigonan cu tawata biba mas serca di nos pueblo tawata pertenece na un grupo isola na Jinja. E misioneronan Gilbert y Joan Walters y Stephen y Barbara Hardy tawata percura pa e grupo. Mi a haci peticion na trabou pa nan traslada mi pa Jinja pa nos por a yuda e grupo aki. Un poco despues di Rachel su nacemento, nos a muda bai Jinja. Einan, nos tawatin e goso di sirbi hunto cu e grupo chikito di Testigonan fiel segun cu el a crece y bira e di dos congregacion na Uganda.

Sirbiendo Como Famia den un Teritorio Stranhero

Ami cu Ann ta pensa cu nos no por a scohe un miho ambiente pa lanta nos famia. Nos tawatin e goso di traha hunto cu misioneronan di diferente pais y di yuda e congregacion nobo crece. Nos a gusta e compania di nos rumannan di Uganda, cu hopi bes tawata bishita nos na cas. Stanley y Esinala Makumba a anima nos masha hopi mes.

Pero no ta e rumannan so tawata bishita nos, ya cu nos tawata rondona pa un variedad impresionante di animalnan den naturalesa. Anochi, hipopotamo tawata sali for di Riu Nilo y tawata pasa masha serca di nos cas. Te ainda mi ta corda bon bon con un dia nos a haya un piton di 6 meter den nos hofi. Tin biaha nos tawata bai den parkenan di bestia caminda tin leon y otro bestianan salbahe ta cana rond libremente.

Den sirbishi, e hendenan local tawata keda wak nos straño; nunca nan no a yega di mira un stroller. Ora nos tawata bai di cas pa cas, hopi bes boshi di mucha tawata sigui nos. Hende tawata keda wak nos respetuosamente y caba tawata mishi cu e baby blanco. Tawata un goso  pa predica pasobra e hendenan tawata masha amabel. Nos tawata pensa cu tur hende lo bin den e berdad door cu tawata asina facil pa cuminsa studio di Bijbel. Sinembargo, hopi studiante tawata haya cu ta masha dificil pa bandona tradicionnan antibiblico. Pero toch, hopi di nan a scohe pa biba na harmonia cu e normanan moral halto di Bijbel, y e congregacion a crece. Nos prome asamblea di sircuito na Jinja na 1968 tawata un momento importante den historia di e congregacion ei. Y nos tin grato recuerdo di e momento cu algun di nos studiantenan di Bijbel a batisa den Riu Nilo. Pero pronto nos lo no tawatin pas mas.

E Prohibicion—Un Test di Fe y Creatividad

Na 1971, General Idi Amin a tuma poder. Tawatin confusion pisa na Jinja, y mientras nos tawata disfruta di un copi di te den nos hofi, e esena describi na principio di e articulo aki a tuma luga. Durante e siguiente dos añanan, nan a saca un gran cantidad di Asiatico for di e pais. Mayoria stranhero a dicidi di bai, y scolnan y hospitalnan a sufri severamente. Despues di esei nan a laga haci e anuncio severo y bon cla cu e trabou di Testigonan di Yehova ta prohibi. Debi cu e Departamento di Educacion tawata precupa pa nos siguridad nan a evacua nos y hiba nos na e capital, Kampala. E evacuacion aki tawata beneficioso den dos sentido. Debi cu nos tawata desconoci na Kampala tawata mas facil pa nos cana libremente. Ademas tawatin hopi trabou den e congregacion y den sirbishi di veld.

Brian cu Marion Wallace y nan dos yiunan tawata den un situacion similar cu nos, y nan tambe a dicidi di keda Uganda. Nos a disfruta masha hopi mes di nan compania segun cu nos tawata sirbi hunto cu nan den e Congregacion di Kampala durante e tempo dificultoso ei. Na e momento ei, e relatonan cu nos a lesa tocante nos rumannan den paisnan caminda e trabou di predica ta prohibi, a bira un fuente di animacion special pa nos. Nos tawata reuni den grupo chikito, y un bes pa luna, nos tawata tene un reunion grandi na e Botanical Gardens di Entebbe. Nos tawata haci como si fuera ta un get-together. Nos yiu mohenan a haya cu esaki tawata un tremendo idea.

Nos mester a tene masha cuidou con nos ta anda den e trabou di predica. Lo tawata un cos masha riparabel si hende blanco ta bishita casnan na Uganda. Pa e motibo ei tiendanan, flatnan y algun campus a bira nos teritorio. Un metodo cu mi a uza den tienda tawata di puntra pa un producto cu no tawata disponibel mas,  manera sucu of aros. Si e bendedo tawata keha pa motibo di e situacion, mi tawata introduci e mensahe di Reino. E metodo aki a funciona bon. Tin bes mi tawata sali for di e tienda no solamente cu un posibel rebishita sino tambe cu un suministro chikito di un producto scars.

Entretanto, tawatin violencia tur caminda rond di nos. Door cu e relacion entre Uganda y Gran Bretania a sigui bai atras, e autoridadnan no a renoba mi contract. Pesei na 1974, despues di ocho aña na Uganda, tawata nos turno pa yama nos rumannan ayo. Sinembargo, nos spirito di misionero si nos no a perde.

Rumbo pa Nueva Guinea

Na januari 1975, nos a probecha di un oportunidad pa bai traha na Papua Nueva Guinea. Ta asin’aki ocho aña di sirbishi gososo den e region aki di Pacifico a cuminsa. Nos bida hunto cu e rumannan y den e sirbishi tawata enrikecedor y recompensador.

Nos famia ta corda e tempo cu nos tawata na Papua Nueva Guinea como un tempo di drama, un tempo cu nos tawata hunga den dramanan biblico. Tur aña nos tawata envolvi den preparacion di drama pa e congreso di districto y nos tawata pasa masha dushi mes! Nos a disfruta di e compania di hopi famianan cu ta spiritualmente fuerte, y nan a echt causa un impacto riba nos yiu mohenan. Nos yiu mohe mayo, Sara, a casa cu un pionero special cu yama Ray Smith, anto hunto nan a traha pionero special serca di e frontera di Irian Jaya (awor Papua, un provincia Indones). Nan tawata biba den un hut di pal’i maishi den e pueblo local, y Sara ta bisa cu durante e temporada cu e tawata den e asignacion ei el a siña masha hopi cos.

Adaptando na Circunstancia Cu Ta Cambia

P’e tempo ei mi mayornan tawatin mester di extra cuido. Pero nos no tawatin cu bai Inglatera bek ya cu mi mayornan a bai di acuerdo pa bin biba hunto cu nos, anto na 1983 nos tur hunto a bai biba na Australia. Tambe nan a keda un temporada serca mi ruman mohe Daphne, cu tawata na Japon ainda. Despues cu mi mayornan a fayece, ami cu Ann a dicidi di bira pionero regular, y esaki a habri caminda pa un privilegio cu mi no a haya dje facil ei.

Nos a caba di cuminsa traha pionero ora nos a haya invitacion pa bai traha den sircuito. For di tempo cu mi tawata mucha, mi a considera e bishita di e superintendente di sircuito como un ocasion special. Awor ami tawata e superintendente di sircuito. El a resulta di ta e asignacion di mas dificil cu nos a disfruta di dje te na e momento ei den nos bida, pero bes tras bes Yehova a yuda nos den maneranan cu nos no a yega di experencia.

Na 1990 durante un bishita di zona di Ruman Theodore Jaracz na Australia, nos a puntr’e si e ta kere cu nos ta mucho grandi caba pa traha den sirbishi di tempo completo na un otro pais. El a bisa: “Ke tal di Islanan Salomon?” Pues porfin, ora tanto ami como Ann tawatin 50 y pico aña, ata nos awor rumbo pa loke lo a bira nos prome asignacion di misionero oficial.

Sirbiendo na e “Islanan Felis”

Islanan Salomon ta conoci como e Islanan Felis, y nos sirbishi akinan durante e ultimo decada  sin duda tawata un temporada felis. Ami cu Ann a conoce e excelente generosidad di e rumannan na e Islanan Salomon caminda mi a traha como superintendente di districto. E hospitalidad cu nan a brinda nos a haci un impacto profundo riba nos curason, y tur hende a mustra hopi consideracion pa e esfuerso cu mi tawata haci pa splica cosnan den loke mi a kere tawata basta bon Pidgin di Islanan Salomon—un di e idiomanan na mundo cu un vocabulario di masha poco palabra.

Pronto despues di nos yegada na Islanan Salomon, opositornan a purba stroba nos di uza nos Salon di Asamblea. E iglesia anglicano a lanta un acusacion contra Testigonan di Yehova; nan acusacion tawata cu nos Salon di Asamblea nobo na Honiara tawata parcialmente riba nan tereno. Gobierno a apoya nan, pues nos a apela na Corte Supremo. E resultado di e caso lo a determina si nos tawatin cu desmantela nos Salon di Asamblea nobo cu tawatin un capasidad di 1.200 persona.

E caso a dura henter un siman den corte. Cu un aire di arogancia e abogado a presenta e caso cu masha confiansa contra nos. Despues di esei nos abogado, Ruman Warren Cathcart di Nueva Zelandia, cu argumentonan sumamente combencente a expone y desbarata cada acusacion. Pa diabierna, e noticia tocante e evento interesante a plama caba, y e sala di corte tawata yen yen di dignatarionan di iglesia, oficialnan di gobierno y nos rumannan cristian. Mi ta corda e fout cu tawatin riba e programa oficial di corte. Tawatin skirbi: “Gobierno di Islanan Salomon y e Iglesia di Melanesia versus Yehova.” Nos a gana e caso.

Sinembargo, e trankilidad relativo di e Islanan Felis no a dura hopi tempo. Atrobe ami cu Ann a haya nos rondona pa caos y violencia pa motibo di un golpi di estado. Enemistad etnico a hiba na guera civil. Dia 5 di juni di aña 2000, militarnan a logra tumba gobierno y e capital a bin cai bou di nan mando. Pa algun siman nos Salon di Asamblea a bira un centro di alohamento pa esnan cu a perde cas. Autoridadnan tawata sorprendi cu nos rumannan cristian cu ta pertenece na gruponan etnico cu ta contra otro, tawata biba hunto manera un famia pacifico bou di e dak di e Salon di Asamblea. Esaki tawata un tremendo testimonio!

Asta e militarnan tawata respeta e neutralidad di Testigonan di Yehova. Esaki a duna nos e oportunidad pa combence un di e comandantenan pa laga un truck hiba literatura y otro suministronan pa un grupo chikito di rumannan cu tawata den un area controla pa e ehersito opositor. Ora nos a logra haya e famianan cu no tawatin contacto cu nos pa algun luna, nos tur tawata cu awa na wowo.

Hopi Motibo pa Ta Gradicido

Pensando bek riba nos bida den e sirbishi di Yehova, nos tin hopi motibo pa ta gradicido. Como mayornan, nos tawatin e goso di mira nos dos yiu mohenan y nan casanan, Ray y John, sigui sirbi Yehova fielmente. Nan a echt sostene nos den nos trabou di misionero.

Durante e ultimo 12 añanan, ami cu Ann tawatin e privilegio di sirbi na e oficina di sucursal di Islanan Salomon, y durante e tempo ei, nos a mira e cantidad di proclamadonan di Reino bira dobel y alcansa mas cu 1.800 publicado. Resientemente, mi a haya e privilegio adicional pa asisti na e Scol pa Miembronan di Comite di Sucursal na Patterson, New York. Sin duda nos a disfruta di un bida productivo cu hopi recompensa door di a mantene e spirito di misionero.

[Nota]

[Plachi na pagina 23]

E dia cu nos a casa, 1960

[Plachi na pagina 24]

Na Uganda, Stanley y Esinala Makumba tawata un fuente di animacion pa nos famia

[Plachi na pagina 24]

Sara drentando hut di un biciña

[Plachi na pagina 25]

Mi tawata pinta dibuho pa mi siña e nativonan di Islanan Salomon

[Plachi na pagina 25]

Reuniendo cu un congregacion isola na Islanan Salomon

[Plachi na pagina 26]

Nos famia awe