Libra Bo di Engaño

“Mira pa ni un hende no cohe boso preso door di . . . engaño vano.” —COLOSENSENAN 2:8.

1-3. (a) Ki ehempelnan ta mustra cu engaño a alcansa casi tur actividad di bida djawe? (b) Pakico no mester ta un sorpresa pa nos cu tin hopi engaño den mundo?

“CUANTO di boso a yega di haya un cliente cu a gaña boso?” Algun aña pasa, un profesor di derecho a conduci un encuesta den cua el a haci e pregunta ei. Kico tawata e reaccion? E ta splica: “Di miles di abogado, un so nunca no a yega di hay’e cu un cliente cu a gañ’e.” E motibo? “E abogado a caba di cuminsa su praktijk na un oficina grandi y te ainda e no a papia cu ningun cliente.” E experencia aki ta ilustra un berdad lamentabel, esta, cu gañamento ta masha comun den e mundo djawe.

² Tin varios forma di gañamento y esaki a alcansa casi tur actividad di e bida djawe. Medionan di comunicacion ta trece hopi ehempel padilanti: politiconan cu ta gaña tocante nan accionnan, accountant- y abogadonan cu ta exagera ganashi di empresa, agencianan di publicidad cu ta engaña consumidonan, y intermediarionan cu ta busca moda di saca probecho di companianan di seguro, djis pa menciona un par. Tambe tin engaño religioso. Miembronan di clero ta engaña gran cantidad di hende door di siña nan doctrinanan falso, manera inmortalidad di alma, fierno di candela y Trinidad.—2 Timoteo 4:3, 4.

³ Tur e engañonan aki mester sorprende nos? Eigenlijk no. Relaciona cu “e ultimo dianan”, Bijbel ta spierta nos: “Hendenan malbado y gañadonan lo bai di malo pa piyo,  gañando y siendo gaña.” (2 Timoteo 3:1, 13) Como cristian, nos mester tene cuidou pa ideanan engañoso no desvia nos for di e berdad. Y esei ta hiba nos na dos pregunta: Pakico tin tanto engaño awe, y con nos por proteha nos mes pa nos no wordo engaña?

Pakico Tin Asina Tanto Engaño Awe?

4. Con Bijbel ta splica pakico tin yen di engaño den e mundo aki?

⁴ Bijbel ta splica bon cla pakico tin asina tanto engaño den e mundo aki. Apostel Huan a skirbi cu “henter mundo ta bou di control di e malbado.” (1 Huan 5:19) E “malbado” ei ta Satanas e Diabel. Hesus a bisa di dje: “[E] no ta para den e berdad, pasobra no tin berdad den dje. Ki ora cu e papia un mentira, e ta papia for di su mes naturalesa, pasobra e ta un gañado y e tata di mentira.” Pesei anto, ta algo straño cu e mundo aki ta refleha e spirito, e balornan y e caracteristicanan engañoso di su gobernante?—Huan 8:44; 14:30; Efesionan 2:1-3.

5. Con Satanas a intensifica su esfuersonan engañoso den e tempo di fin aki, y ken specialmente ta su blanco?

⁵ Den e tempo di fin aki, Satanas a intensifica su esfuersonan. El a ser tira akibou na tera. E sa cu su dianan ta conta y e tin un “gran furia.” E ta dicidido den su afan pa destrui mas tanto hende posibel, y pesei e “ta gaña henter mundo.” (Revelacion 12:9, 12) No ta de bes en cuando so Satanas ta gaña. Al contrario, e ta haci tur loke ta na su alcanse pa gaña humanidad. * E ta recori na tur tipo di metodo engañoso—entre otro triki y traicion—pa ciega mente di incredulo y tene nan leu for di Dios. (2 Corintionan 4:4) E experto di engaño aki ta specialmente determina pa devora esnan cu ta adora Dios “den spirito y berdad.” (Huan 4:24; 1 Pedro 5:8) Nunca lubida cu eigenlijk Satanas a pretende: ‘Mi por aparta ken cu mi kier for di Dios.’ (Job 1:9-12) Laga nos considera algun di Satanas su “trampanan” y mira con nos por evita di cai den nan.—Efesionan 6:11.

Libra Bo di Engaño di Apostata

6, 7. (a) Kico apostatanan por pretende? (b) Con e Scritura ta mustra bon cla loke apostatanan kier logra?

⁶ Satanas tin hopi tempo ta uza apostatanan den su esfuersonan pa seduci sirbidonan di Dios. (Mateo 13:36-39) Kisas e apostatanan ta pretende cu nan ta adora Yehova y cu nan ta kere den Bijbel, pero nan ta rechasa e parti visibel di su organisacion. Algun di nan asta ta recori na e doctrinanan di ‘Babilonia e Grandi’, e imperio mundial di religion falso, cu ta deshonra Dios. (Revelacion 17:5; 2 Pedro 2:19-22) Bou di inspiracion dibino, escritornan di Bijbel a uza palabranan fuerte pa expone e motivacion- y e metodonan di apostatanan.

⁷ Kico e apostatanan kier logra? Mayoria di nan no ta keda satisfecho cu djis bandona e fe cu podise un tempo nan a mira como esun berdadero. Hopi bes nan kier bai cu otronan tambe. En bes di sali busca nan mes disipelnan, hopi apostata ta busca moda di “desvia e disipelnan [esta, e disipelnan di Cristo] y haci nan bai nan tras.” (Echonan 20:29, 30) Relaciona cu maestronan falso, apostel Pablo a duna e siguiente spiertamento urgente aki: “Mira pa ni un hende no cohe boso preso.” (Colosensenan 2:8) Esei no ta describi net loke hopi apostata ta purba haci? Mescos cu un secuestrado ta ranca un victima, cu no ta sospecha nada, for di su famia, apostatanan ta yag riba miembronan di e congregacion cu tin tendencia di confia den nan sinseridad. Nan ta busca moda di aleha esakinan for di e tou.

8. Ki metodonan apostatanan ta uza pa logra nan meta?

⁸ Ki metodonan apostatanan ta uza pa logra nan meta? Hopi bes nan ta recori na cosnan troci, mita berdad y falsedad abierto. Hesus tawata sa cu su siguidonan lo bira victima di esnan cu lo “gaña tur clase di maldad riba  [nan].” (Mateo 5:11) E opositornan malicioso ei lo papia mentira cu e intencion di engaña otro hende. Apostel Pedro a spierta tocante apostatanan cu ta uza “palabranan di engaño”, cu ta plama “engañonan” y cu ta ‘troce e Scritura’ pa logra nan propio metanan. (2 Pedro 2:3, 13; 3:16) Lamentablemente, e apostatanan ta logra “trastorna fe di algun hende.”—2 Timoteo 2:18.

9, 10. (a) Con nos por libra nos mes di e engaño di apostatanan? (b) Pakico nos no ta sinti nos molestia si nos tin cu refina nos comprondemento di e proposito di Dios?

⁹ Con nos por libra nos mes di e engaño di apostatanan? Door di sigui e conseho di e Palabra di Dios, cu ta bisa: “Tene na bista esnan cu ta causa division y strobacion contrario na e siñansa cu boso a haya, y aparta boso for di nan.” (Romanonan 16:17) Nos ta “aparta [nos] for di nan” door di rechasa nan ideanan—presenta sea personalmente, riba papel of riba Internet. Pakico nos ta tuma e posicion ei? Na prome luga, pasobra e Palabra di Dios ta manda nos haci esei, y nos ta confia cu semper Yehova tin nos miho interesnan na pecho.—Isaias 48:17, 18.

¹⁰ Na di dos luga, nos ta stima e organisacion cu a siña nos e berdadnan precioso cu ta separa nos na un manera asina cla for di Babilonia e Grandi. Na mes momento nos ta reconoce cu nos conocemento di e proposito di Dios no ta perfecto; atrabes di añanan nos mester a haci diferente ahuste den nos manera di compronde cosnan. Y como cristiannan leal, nos ta spera trankil riba Yehova pa e sigui refina nos. (Proverbionan 4:18) Mientrastanto, nos lo no bandona e organisacion cu Dios tin e placer di uza, pasobra nos ta mira claramente cu su bendicion ta riba dje.—Echonan 6:7; 1 Corintionan 3:6.

Tene Cuidou pa Bo No Gaña Bo Mes

11. Con bin hende imperfecto tin un tendencia di gaña nan mes?

¹¹ Hende imperfecto tin un tendencia cu Satanas ta cla pa probecha di dje. Esei ta e tendencia di gaña bo mes. Yeremias 17:9 ta bisa: “E curason ta mas engañoso cu tur cos y ta totalmente corupto.” Y Santiago a skirbi: “Cada [hende] ta wordo tenta ora cu e wordo atrai y seduci door di su mes pasion.” (Santiago 1:14) Si nos curason wordo tenta, e por lanta den nos un deseo pa comete un pica cu por parce atractivo y inofensivo. Un punto di bista asina ta engañoso, y si nos cede na pica, e consecuencianan lo por ta desastroso.—Romanonan 8:6.

12. Den ki maneranan nos por cai den e trampa di gaña nos mes?

 ¹² Nos por cai facilmente den e trampa di gaña nos mes. Nos curason engañoso por haya un hustificacion pa un debilidad serio den nos personalidad of busca excuse pa un pica grave. (1 Samuel 15:13-15, 20, 21) Tambe nos curason engañoso lo por cuminsa busca maneranan pa hustifica un conducta cuestionabel. Tuma, por ehempel, e asunto di entretenimento. Algun entretenimento ta saludabel y agradabel. Sinembargo, hopi di loke e mundo aki ta ofrece—den pelicula y programa di television y tambe riba Internet—ta obsceno y inmoral. Ta facil pa combence nos mes cu nos por mira entretenimento insaludabel sin keda perhudica. Algun persona ta asta rasona, “E no ta molestia mi consenshi, pues ta kico ta e problema?” Pero e personanan ei ta ‘gañando nan mes cu rasonamento falso.’—Santiago 1:22, NW.

13, 14. (a) Ki ehempel di Bijbel ta mustra cu nos consenshi no ta semper un guia sigur? (b) Con nos por evita di gaña nos mes?

¹³ on nos por evita di gaña nos mes? Pa cuminsa, nos tin cu corda cu e consenshi humano  no ta semper confiabel. Considera e caso di apostel Pablo. Prome cu el a bira cristian, e tawata persigui e siguidonan di Cristo. (Echonan 9:1, 2) Kisas su consenshi no a molesti’e e tempo ei. Pero ta obvio cu su consenshi no tawatin e guia corecto. Pablo a bisa: “E tempo ei [mi] no tawata un creyente, [mi] no tawata sa kico mi tawata haci.” (1 Timoteo 1:13, BPK) Pues e simpel echo cu cierto entretenimento no ta molestia nos consenshi, riba su mes, no ta un garantia cu nos ta haciendo bon. Ta un consenshi sano so, educa adecuadamente den e Palabra di Dios, por ta un guia sigur.

¹⁴ Si nos kier evita di gaña nos mes, tin algun sugerencia util cu nos mester tene na mente. Analisa bo mes hunto cu oracion. (Salmo 26:2; 2 Corintionan 13:5) Un autoanalisis lo por laga bo mira unda bo tin cu haci algun cambio den bo punto di bista of manera di haci cosnan. Scucha otro. (Santiago 1:19) Ya cu ora bo ta analisa bo mes bo tin e tendencia di ta subhetivo, esta, di bai tras di bo mes ideanan, ta sabi pa bo scucha e comentarionan obhetivo di rumannan cristian maduro. Si na opinion di un ruman balansa, uno cu tin hopi experencia, bo ta tuma decision of actua na un manera cuestionabel, bo por puntra bo mes: ‘Tin posibilidad cu ta mi consenshi no ta bon entrena of ta mi curason ta gañando mi?’ Lesa y studia Bijbel y publicacionnan basa riba Bijbel regularmente. (Salmo 1:2) Esei lo yuda bo mantene bo pensamento-, actitud- y sintimentonan na harmonia cu principionan di Dios.

Libra Bo di Mentira di Satanas

15, 16. (a) Den su esfuersonan pa engaña nos, ki mentiranan Satanas ta uza? (b) Con nos por evita cu e mentiranan ei ta engaña nos?

¹⁵ Satanas ta uza un variedad di mentira den su esfuersonan pa engaña nos. E ta purba combence nos cu rikesa material ta trece felicidad y satisfaccion, pero hopi bes esei ta net contrario. (Eclesiastes 5:10-12) E kier laga nos kere cu e mundo malbado aki lo dura pa semper, aunke tur cos ta mustra cu nos ta bibando den “e ultimo dianan.” (2 Timoteo 3:1-5) Satanas ta promove e idea cu no tin nada malo den hiba un bida inmoral, maske e personanan cu ta loco tras di placer hopi bes ta cosecha consecuencianan amargo. (Galationan 6:7) Con nos por evita di laga e mentiranan ei engaña nos?

¹⁶ Beneficia di ehempelnan di Bijbel. Bijbel ta contene varios ehempel di personanan cu a ser engaña pa e mentiranan di Satanas, y nan ta sirbi como spiertamento pa nos. Nan a stima cos material, nan a perde for di bista e temponan den cua nan tawata biba, of nan a hiba un bida inmoral—tur cu mal resultado. (Mateo 19:16-22; 24:36-42; Lucas 16:14; 1 Corintionan 10:8-11) Siña for di ehempelnan djawe. Lamentablemente, de bes en cuando algun cristian ta perde nan sentido di urgencia y ta cuminsa kere cu nan sirbishi na Dios ta stroba nan di logra algo bon. Kisas nan ta bandona e berdad pa hiba un supuesto bida di placer. Sinembargo, e personanan ei ta riba “luganan cu ta slip”, y tardi of tempran nan lo cosecha e consecuencianan di nan mal conducta. (Salmo 73:18, 19) Ta sabi di nos parti pa siña for di e fayonan di otro hende.—Proverbionan 22:3.

17. Pakico Satanas ta promove e mentira cu Yehova no ta stima nos ni balora nos?

¹⁷ Tin un otro mentira cu Satanas a uza cu hopi eficacia: e mentira cu Yehova no ta stima nos ni balora nos. Satanas tin miles di aña caba ta studia hende imperfecto. E ta bon na haltura cu desanimacion por debilita nos. (Proverbionan 24:10) Pesei, e ta promove e mentira cu nos no tin balor den bista di Dios. Si nos wordo “tumba abou” y haya e sintimento fuerte cu Yehova no ta interesa den nos, nos por ser tenta pa entrega. (2 Corintionan 4:9) Esaki ta net loke e gran Gañado kier! Kico nos por haci anto pa e mentira satanico aki no engaña nos?

18. Con Bijbel ta garantisa nos di Yehova su amor?

¹⁸ Medita personalmente riba loke Bijbel ta bisa tocante e amor di Dios pa nos. E Palabra di  Dios ta uza algun ilustracion bibo pa garantisa nos cu Yehova ta tuma nota di nos y cu e ta stima nos como persona. E ta pone nos lagrimanan den su “butishi.” Esei ta nifica cu e ta mira y corda e lagrimanan cu bo a drama den bo lucha pa keda fiel. (Salmo 56:8) E sa ki ora bo tin un “curason kibra” y ta “serca” di bo na momentonan asina. (Salmo 34:18) E sa tur cos di bo, asta e cantidad di “drachinan di cabei riba [bo] cabes.” (Mateo 10:29-31) Y riba tur cos, Dios “a duna su Yiu unigenito” pa bo. (Huan 3:16; Galationan 2:20) Tin biaha, kisas ta dificil pa kere cu e textonan ei ta aplica na abo personalmente. Pero nos tin cu kere e palabra di Yehova. E kier pa nos kere cu e ta stima nos no solamente como grupo sino tambe como persona.

19, 20. (a) Pakico ta importante pa reconoce y rechasa e mentira satanico cu Yehova no stima bo? (b) Con un superintendente biahero a yuda personanan desanima?

¹⁹ Reconoce y rechasa mentira. Si bo sa cu un hende ta gaña, bo por proteha bo mes contra su mentiranan. Pues, mescos tambe, e solo echo cu bo sa cu Satanas kier gaña bo cu Yehova no ta stima bo, riba su mes caba, por ta un hopi bon yudansa. Como reaccion riba un articulo di un Toren di Vigilancia cu a spierta tocante e tacticanan di Satanas, un cristian a bisa: “Nunca mi a realisa cu Satanas ta purba uza mi propio sintimentonan pa desanima mi. Sabiendo esaki ta duna mi e motivacion pa lucha contra e sintimentonan aki.”

²⁰ Considera e experencia di un superintendente biahero den un pais Sur Americano. Ora e ta haci bishita di pastoreo serca rumannan cu ta desanima, hopi bes e ta puntra nan: ‘Bo ta kere den Trinidad?’ Por lo general, e ruman desanima ta contesta, ‘Claro cu no’, pasobra e sa cu esaki ta un di e mentiranan di Satanas. E ora ei e anciano ta puntr’e, ‘Bo ta kere den fierno?’ Atrobe e mesun contesta, ‘Claro cu no!’ Despues e anciano ta bisa nan cu Satanas tin un otro mentira cu hende no sa reconoce como tal. E ta dirigi nan atencion na pagina 249, paragraf 21, di e buki Hala Serca Yehova, * cu ta mustra cu ta un mentira pa bisa cu Yehova no stima nos como persona. E superintendente biahero aki a haya resultadonan positivo door di yuda personanan desanima reconoce y rechasa e mentira satanico aki.

Libra Bo di Engaño

21, 22. Pakico nos no ta den ignorancia relaciona cu e tacticanan engañoso di Satanas, y kico mester ta nos determinacion?

²¹ Durante e parti final aki di e ultimo dianan, nos por spera cu Satanas lo sigui lansa un avalancha di mentira y engaño. Afortunadamente, Yehova no a laga nos den ignorancia pa loke ta e tacticanan engañoso di Satanas. Bijbel mes y publicacionnan basa riba Bijbel di “e esclabo fiel y prudente” ta expone claramente e metodonan malbado di Diabel. (Mateo 24:45) Door cu nos ta conciente di esakinan, nos ta keda leu di problema!—2 Corintionan 2:11.

²² Pesei anto, laga nos keda leu di e ideanan di apostatanan. Laga nos ta determina pa evita e trampa sutil di gaña nos mes. Y laga nos reconoce y rechasa tur mentira di Satanas. Door di haci esei, nos lo proteha nos relacion cu ‘e Dios di berdad’, kende ta odia engaño.—Salmo 31:5, BPK; Proverbionan 3:32.

[Nota]

Bo Ta Corda?

• Pakico tin asina tanto engaño den e mundo djawe?

• Con nos por libra nos di e engaño di apostatanan?

• Con nos por libra nos di cualkier tendencia di gaña nos mes?

• Con nos por evita cu mentira satanico ta engaña nos?

[Preguntanan di Estudio]

[Plachi na pagina 17]

No gaña bo mes relaciona cu entretenimento

[Plachi na pagina 18]

Den bo esfuersonan pa libra bo mes di engaño, analisa bo mes hunto cu oracion, scucha otronan y lesa y studia e Palabra di Dios regularmente