Con Nos Ta Demostra Nos Amor pa Dios

CULTIVA amor pa Dios no ta simplemente siña tocante Dios. Manera sirbidonan di Dios rond mundo por testifica, berdadero amor pa Dios ta crece segun cu bo ta sera conoci cu su personalidad. E amor ei ta bira asta mas fuerte segun cu bo ta familiarisa bo mes cu loke Dios ta stima, loke e ta odia, y loke ta su preferencianan y su rekisitonan.

Amorosamente Yehova a duna nos su Palabra, Bijbel, den cua e ta revela su mes. For di Bijbel nos ta siña con Yehova a trata cu diferente situacion. Mescos cu un carta di un ser keri ta duna nos hopi placer, asina tambe Bijbel ta deleita nos segun cu nos ta mira con e ta revela aspectonan nobo di Yehova su personalidad.

Sinembargo, manera nos sa ripara den nos sirbishi publico, no ta tur biaha siña tocante Dios ta pone un hende stim’e. Hesus a bisa cierto Hudiunan desagradecido di su tempo: “Boso ta scudriña e Scrituranan, pasobra boso ta kere cu ta den nan boso tin bida eterno; ... ma mi conoce boso, cu boso no tin e amor di Dios den boso mes.” (Huan 5:39, 42) Tin hende ta dedica hopi aña na siña tocante Yehova su obranan amoroso y toch nan tin masha tiki amor pa Yehova. Dicon? Pasobra nan no ta medita riba e berdadnan conecta cu loke nan ta siña. Na contraste, tin miyones di hende sinsero cu nos ta studia Bijbel cu ne y cu ta sinti con nan amor pa Dios ta sigui crece. Dicon? Pasobra, mescos cu nos, nan ta sigui e ehempel di Asaf. Den ki manera?

Medita cu Aprecio

Asaf tawata determina pa cultiva amor pa Yehova den su curason. El a skirbi: “Mi ta medita den mi curason ... Lo mi corda e  echonan di SEÑOR; siguramente lo mi corda bo maraviyanan di prome aya. Lo mi medita riba tur bo obranan, y keda pensa riba bo echonan.” (Salmo 77:6, 11, 12) Amor pa Dios lo crece den curason di un persona cu ta medita riba e camindanan di Yehova manera e salmista a haci.

Ademas, cordando bek riba experencianan cu nos a disfruta di dje durante e tempo cu nos ta sirbi Yehova, ta fortalece nos relacion cu ne. Apostel Pablo a bisa cu nos ta Dios su “colaboradonan”, y e amistad cu por forma entre personanan cu ta traha hunto ta algo masha special. (1 Corintionan 3:9) Yehova ta aprecia ora nos ta expresa nos amor p’e y esaki ta haci su curason contento. (Proverbionan 27:11) Anto, ora nos pidi Yehova su yudansa y e yuda nos resolve un problema spesifico, nos sa cu e ta cu nos y nos amor p’e ta bira mas grandi.

Amistad entre dos persona ta desaroya segun cu nan ta expresa nan sintimentonan na otro. Asina tambe, ora nos ta bisa Yehova dicon nos ta fiel na dje, nos amor p’e ta bira mas fuerte. Nos lo bai reflexiona riba e palabranan di Hesus: “Stima SEÑOR bo Dios cu henter bo curason, y cu henter bo alma, y cu henter bo mente, y cu tur bo forsa.” (Marco 12:30) Kico nos por haci pa ta sigur cu nos lo sigui stima Yehova cu henter nos curason, henter nos alma, henter nos mente y henter nos forsa?

Stima Yehova cu Henter Nos Curason

E Scritura ta referi na e curason figurativo, esta, e persona cu nos ta di paden, nos deseo-, actitud- y sintimentonan. Pues anto, stima Yehova cu henter nos curason ta nifica cu nos kier agrada Dios mas cu tur otro cos. (Salmo 86:11) Nos ta demostra cu nos tin tal amor door di haci nos personalidad aceptabel pa Dios. Nos ta haci esfuerso pa imita Dios door di ‘aborece loke ta malo y tene firme na loke ta bon.’—Romanonan 12:9.

Nos amor pa Dios ta influencia loke nos ta opina di tur cos. Por ehempel, podise nos ta haya nos trabou hopi interesante of e ta ocupa gran parti di nos atencion, pero ta einan nos curason ta? No. Siendo cu nos ta stima Yehova cu henter nos curason, nos ta prome cu tur cos un sirbido di Dios. Asina tambe, nos kier agrada nos mayornan, nos casa y nos doño di trabou, pero nos ta duna prueba di nos amor di curason pa Yehova door di trata mas cu tur cos di agrad’e. Al fin y al cabo, e ta merece e prome luga den nos curason.—Mateo 6:24; 10:37.

Stima Yehova cu Henter Nos Alma

Den e Scritura e palabra “alma” ta referi basicamente na henter nos persona y tambe na e  bida cu nos tin. Pues anto, stima Yehova cu henter nos alma ta nifica cu nos ta uza nos bida pa alab’e y pa demostra nos amor p’e.

Ta claro cu nos lo por tin otro interesnan den bida, manera siña un ofishi, maneha un negoshi of lanta un famia. Pero na mesun tempo, nos ta duna prueba di nos amor di henter alma pa Yehova door di haci cosnan na su manera y door di tene otro cos na nan debido luga den nos bida, y asina nos ta “busca prome e reino di Dios y su husticia.” (Mateo 6:33) Rindi adoracion di henter alma ta nifica tambe haci cos cu celo of entusiasmo. Nos ta mustra Yehova cu nos stim’e door di predica e mensahe di Reino celosamente, door di duna comentarionan edificante na reunion of door di yuda nos rumannan cristian. Den tur cos, nos ta sigui ‘haci e boluntad di Dios di henter alma.’—Efesionan 6:6, NW.

Hesus a demostra amor di henter alma pa Dios door di nenga su mes. El a pone Dios su boluntad na prome luga y su necesidadnan personal na di dos luga. Hesus a invita nos pa sigui su ehempel. El a bisa: “Si un hende kier bin mi tras, lag’e nenga su mes, . . . y sigui mi.” (Mateo 16:24, 25) Nenga nos mes ta nifica haci un dedicacion. E ta nifica cu nos ta stima Dios asina tanto cu nos ta entrega nos mes den Dios su man y ta laga e bira nos doño; manera ora un Israelita den tempo biblico a stima su doño asina tanto cu el a mara su mes na dje permanentemente como un esclabo. (Deuteronomio 15:16, 17) Door di dedica nos bida na Yehova, nos ta duna prueba combencente cu nos ta stim’e.

Stima Yehova cu Henter Nos Mente

Stima Yehova cu henter nos mente ta nifica cu nos ta haci tur esfuerso necesario pa compronde Yehova su personalidad, propositonan y rekisitonan. (Huan 17:3; Echonan 17:11) Nos ta expresa nos amor na Yehova door di uza tur nos facultadnan mental pa yuda otro hende tambe stima Yehova y door di mehora nos arte di siña. Apostel Pedro a urgi pa “faha e heupnan di boso mente”, es decir, fortifica nos mente pa actividad. (1 Pedro 1:13) Tambe nos ta haci esfuerso pa mustra interes den otro hende, specialmente den otro sirbidonan di Dios. Nos ta pendiente di nan circunstancianan y ta wak ki ora ta na su luga pa duna nan elogio y ki ora nan tin mester di consuelo.

Nos ta mustra Yehova cu nos ta stim’e cu henter nos mente door di somete nos mes mentalmente na dje. Nos ta purba mira cosnan na su manera, y ta tene cuenta cu ne ora nos ta tuma decision y ta confia cu su manera ta esun miho. (Proverbionan 3:5, 6; Isaias 55:9; Filipensenan 2:3-7) Pero segun cu nos ta sigui demostra nos amor pa Dios, con nos por uza nos forsa?

Stima Yehova cu Henter Nos Forsa

Hopi hoben den e congregacion cristian ta uza nan forsa pa alaba Yehova. (Proverbionan 20:29; Eclesiastes 12:1) Un manera cu cantidad di hobennan cristian ta demostra cu nan ta stima Yehova cu henter nan forsa ta door di participa den sirbishi di tempo completo como pionero. Hopi mama ta participa den e sirbishi aki mientras cu nan yiunan ta na scol. Ancianonan fiel cu ta percura pa e bienestar di nan propio famia y tambe ta haci bishitanan di pastoreo, ta demostra cu nan ta stima Yehova cu henter nan forsa. (2 Corintionan 12:15) Yehova ta duna poder na esnan cu ta pone nan speransa den dje, di manera cu nan por demostra nan amor door di alab’e, uzando e energia cu nan tin, sea e ta hopi of tiki.—Isaias 40:29; Hebreonan 6:11, 12.

Amor lo crece si cultiv’e na e manera corecto. Pesei, nos tin cu sigui tuma tempo pa medita. Nos ta corda riba loke Yehova a haci pa nos y dicon e ta merece nos debocion. Como desendiente imperfecto di Adam, nunca nos por ta digno di “loke Dios a prepara pa esnan cu ta stim’e”, pero loke si nos por haci ta demostra cu nos ta stima Yehova cu henter nos ser. Laga nos sigui haci esei!—1 Corintionan 2:9.

[Plachi na pagina 20]

Nos ta expresa amor pa Dios mediante nos accionnan