Pregunta di Lector

Con bin 1 Corintionan 10:8 ta bisa cu 23.000 Israelita a perde nan bida riba un solo dia pa motibo di a comete fornicacion, mientras cu Numbernan 25:9 ta papia di 24.000?

Tin varios factor cu por splica e diferencia entre e cifranan di e dos versiculonan aki. Esun di mas simpel lo por ta cu e cantidad real ta entre 23.000 pa 24.000, y door di esei por rond e af den ambos direccion.

Pensa riba e otro posibilidad aki. Apostel Pablo a cita e relato di e Israelitanan na Sitim como un spiertamento pa e cristiannan den Corinto di antiguedad, un stad notorio pa su bida inmoral. El a skirbi: “No laga nos comete inmoralidad sexual, manera algun di nan a haci, y bintitres mil a cai riba un solo dia.” Papiando unicamente di esnan cu Yehova a mata pa motibo cu nan a comete inmoralidad, Pablo a menciona un cantidad di 23.000.—1 Corintionan 10:8.

Pero Numbernan capitulo 25 ta bisa nos cu “Israel a uni [su] mes cu Baal di Peor, y SEÑOR tawata rabia cu Israel.” E ora ei, Yehova a manda Moises ehecuta “tur e cabesantenan di e pueblo.” Moises, na su turno a manda e huesnan cumpli cu e ordo ei. Finalmente, ora Finehas a actua mesora matando e Israelita cu a trece un mohe Madianita den e campamento, ‘e plaga a para.’ E relato ta caba cu e declaracion: “Esnan cu a muri di e plaga tawata binticuater mil.”—Numbernan 25:1-9.

Ta obvio anto cu e cantidad menciona den Numbernan a inclui “e cabesantenan di e pueblo” cu e huesnan a ehecuta, y esnan mata directamente door di Yehova. Por ta masha bon cu tawatin mil di e cabesantenan ei cu a muri na man di e huesnan, poniendo e total yega na 24.000. Sea e cabesantenan aki a comete fornicacion, a participa den fiestanan of a consenti cu esnan cu tawata haci e cosnan aki, nan tawata culpabel di a “uni nan mes cu Baal di Peor.”

Encuanto e palabra “uni”, un buki cu ta duna comentario riba Bijbel ta splica cu e por kiermen “pega bo mes na un persona.” E Israelitanan tawata un pueblo dedica na Yehova, pero ora nan a “uni nan mes cu Baal di Peor”, nan a kibra nan relacion di dedicacion na Dios. Rond di 700 aña despues, pa medio di profeta Oseas, Yehova a bisa di Israelitanan: “Nan a bin na Baal-peor y a dedica nan mes na e idolo bergonsoso ei, y nan a bira mes abominabel cu loke nan tawata stima.” (Oseas 9:10) Tur esnan cu a haci esei a merece un huicio desfaborabel di Dios. Pesei, Moises a recorda e yiunan di Israel: “Boso wowonan a mira loke SEÑOR a haci den e caso di Baal-peor, pasobra tur homber cu tawata sigui Baal-peor, SEÑOR bo Dios a destrui nan for di meimei di boso.”—Deuteronomio 4:3.