E Pueblo di Dios Mester Stima Bondad

“Kico SEÑOR ta exigi di bo, si no ta pa haci husticia, pa stima misericordia [“stima bondad”, NW], y pa cana humildemente cu bo Dios?”—MIKEAS 6:8.

1, 2. (a) Dicon no mester straña nos cu Yehova ta spera di su pueblo pa nan desplega bondad? (b) Ki pregunta relaciona cu bondad ta merece nos atencion?

YEHOVA ta un Dios di bondad. * (Romanonan 2:4; 11:22) E prome pareha, Adam cu Eva, lo mester tawata gradicido pa e echo ei! Den e hofi di Eden, nan tawata rondona pa creacion visibel cu a duna prueba di Dios su bondad na hende, kende a ser crea cu e capasidad pa disfruta di nan. Anto Dios ta sigui mustra bondad na tur hende, asta na hende malagradecido y malbado.

² Siendo traha den e imagen di Dios, hende tin e capasidad di refleha e tipo di cualidadnan cu Dios ta desplega. (Genesis 1:26) Pues no mester straña nos cu Yehova ta spera di nos pa nos mustra bondad. Manera Mikeas 6:8 [NW] ta declara, e pueblo di Dios mester “stima bondad.” Pero kico ta bondad? Con e ta liga cu otro cualidadnan produci pa Dios su spirito? Siendo cu hende tin e capasidad pa desplega bondad, dicon mundo ta un luga asina duro y cruel? Dicon como cristian nos mester haci esfuerso pa mustra bondad den nos trato cu otro hende?

Kico Ta Bondad?

3. Con lo bo defini bondad?

³ Nos ta desplega bondad door di mustra un interes activo den e bienestar di otro hende. Bondad ta ser expresa door di haci cos pa yuda hende y door di papia cu nan cu consideracion. Ser bondadoso ta nifica haci bon en bes di haci loke ta perhudicial. Un persona bondadoso ta cariñoso, suave, simpatico y cortes. E ta trata otro hende cu generosidad y consideracion. Apostel Pablo a conseha cristiannan: “Bisti un curason di compasion, cariño, humildad, mansedumbre y pasenshi.” (Colosensenan 3:12) Pues, bondad ta un parti di e bisti figurativo di tur cristian berdadero.

4. Con Yehova a tuma e iniciativa den mustra bondad na humanidad?

⁴ Yehova Dios a tuma e iniciativa den mustra bondad. Manera Pablo a bisa, tawata ora cu e bondad of “cariño di Dios nos Salbador y su amor pa humanidad a aparece”, cu “el a salba nos . . . pa medio di e labamento di regeneracion y renobacion pa medio di spirito santo.” (Tito 3:4, 5) Dios ‘ta laba’ (of limpia) cristiannan ungi den e sanger di Hesus, loke ta nifica cu e ta aplica e merito di Cristo su sacrificio di rescate na nan fabor. Tambe nan ta ser renoba pa medio di spirito santo, y ta bira “un criatura nobo” como yiunan di Dios engendra pa spirito. (2 Corintionan 5:17) Ademas, Dios su bondad y amor ta extende na “un multitud grandi”, cu “a laba nan pañanan y a haci nan blanco den e sanger di e Lamchi.”—Revelacion 7:9, 14; 1 Huan 2:1, 2.

5. Dicon esnan cu ta ser guia pa Dios su spirito mester mustra bondad na otro hende?

⁵ Tambe bondad ta un parti di e fruta di Dios su spirito santo of forsa activo. Pablo a bisa: “Fruta di e spirito ta amor, goso, pas, pasenshi, cariño, bondad, fieldad, mansedumbre, dominio propio; contra cosnan asina no tin lei.” (Galationan 5:22, 23) Pues anto, esnan cu ta ser guia pa Dios su spirito no mester mustra bondad na otro hende?

 Berdadero Bondad No Ta un Debilidad

6. Ki ora bondad ta un debilidad, y dicon?

⁶ Tin hende ta considera bondad como un debilidad. Nan ta haya cu un persona mester ta severo, tin biaha asta cu mal manera, ya asina hende por mira su caracter fuerte. Pero en realidad, un hende mester tin berdadero fortalesa pa e ta realmente bondadoso y evita di mustra bondad ekiboca. Siendo cu berdadero bondad ta parti di e fruta di Dios su spirito, e no por ta un actitud suak of negligente, cu ta pasa por halto di mal conducta. Di otro banda, bondad ekiboca si ta un debilidad cu ta pone hende tolera malecho.

7. (a) Con Eli a duna prueba di ta negligente? (b) Dicon ancianonan mester tene cuidou pa no mustra bondad ekiboca?

⁷ Tuma por ehempel e sumo sacerdote di Israel, Eli. El a neglisha di disiplina su yiu hombernan Ofni cu Finehas (Finees), kendenan tawata fungi como sacerdote na e tabernakel. Su yiunan no tawata satisfecho cu e porcion di sacrificio cu e Lei di Dios a stipula cu nan mester haya, pesei nan tawata laga un sirbido exigi carni curu for di personanan cu tawata ofrece sacrificio prome cu e vet di ofrenda kima riba altar. Tambe e yiu hombernan di Eli tawata tene relacion inmoral cu e mohenan cu tawata sirbi na entrada di e tabernakel. Sinembargo, en bes di kita Ofni cu Finehas for di nan puesto, Eli simplemente a scual nan suavemente. (1 Samuel 2:12-29) Nada straño cu “palabra cu tawata bin di SEÑOR tawata scars den e dianan ei”! (1 Samuel 3:1) Ancianonan cristian mester tene cuidou pa nan no cede na mustra bondad ekiboca na malechornan cu lo por pone e spiritualidad di e congregacion na peliger. Berdadero bondad no ta ciego pa palabra ni echo malbado cu ta viola e normanan di Dios.

8. Con Hesus a desplega berdadero bondad?

⁸ Nos Gran Ehempel, Hesucristo, nunca a haci su mes culpabel di mustra bondad ekiboca. E tawata e miho ehempel di berdadero bondad. Por ehempel, ‘el a sinti compasion pa e hendenan, pasobra nan tawata cansa y plama, manera carne sin wardado.’ Hende di curason honrado no tawatin miedo di acerca Hesus, y nan a asta trece nan yiunan chikito serca dje. Pensa riba e bondad y compasion cu el a desplega ora cu ‘el a tuma e muchanan den su brasa y a bendiciona nan.’ (Mateo 9:36; Marco 10:13-16) Aunke Hesus tawata bondadoso, toch e tawata firme pa loke ta recto den bista di su Tata celestial. Hesus nunca a tolera maldad; e tawatin e curashi cu Dios a dun’e pa denuncia e lidernan religioso hipocrita. Manera nos por nota na Mateo 23:13-26, varios biaha el a ripiti e declaracion: “Ai di boso, escribanan y Farizeonan, hipocritanan!”

Bondad y Otro Cualidadnan Produci pa Dios Su Spirito

9. Con bondad ta liga cu pasenshi y cariño?

⁹ Bondad ta liga cu otro cualidadnan produci pa Dios su spirito. Por ehempel, e persona cu ta cultiva bondad ta demostra e cualidad ei door di tin pasenshi. E tin pasenshi asta cu hende cu  no ta bondadoso. Bondad ta conecta tambe cu cariño door cu hopi bes hende ta desplega bondad door di haci cosnan util na beneficio di otronan. Tin biaha e palabra Griego cu Bijbel ta uza pa bondad por ser traduci como cariño. E bondad aki cu e prome cristiannan tawata desplega na otro a asombra e paganonan asina tanto, cu segun e escritor di antiguedad Tertuliano, nan a yama e siguidonan ei di Hesus ‘hende traha di bondad.’

10. Con bondad y amor ta conecta cu otro?

¹⁰ Tin un conexion entre bondad y amor. Hesus a bisa tocante su siguidonan: “Na esaki tur hende lo sa cu boso ta mi disipel, si boso tin amor un pa otro.” (Huan 13:35) Y relaciona cu e amor aki, Pablo a bisa: “Amor tin pasenshi, amor ta cariñoso.” (1 Corintionan 13:4) Bondad ta conecta tambe cu amor den e expresion “bondad amoroso”, un expresion hopi uza den e Scritura na e idioma original. Esaki ta bondad cu ta origina for di amor leal. E sustantivo Hebreo traduci “bondad amoroso” ta encera mas cu cariño. E ta bondad cu ta pega su mes amorosamente na un obheto te ora cu su proposito en conexion cu e obheto ei ser realisa. Yehova ta desplega su bondad amoroso, of amor leal, den varios manera. Por ehempel, nos ta mira esei den su actonan di liberacion y proteccion. *—Salmo 6:4; 40:11; 143:12.

11. Ki garantia Dios su bondad amoroso ta duna nos?

¹¹ Yehova su bondad amoroso ta atrae hende na dje. (Yeremias 31:3) Ora Dios su sirbidonan fiel tin mester di liberacion of yudansa, nan sa cu Yehova di berdad lo mustra bondad amoroso na nan. Nan sa cu su amor leal lo no laga nan na caya. Pesei nan por haci oracion cu confiansa, mescos cu e salmista cu a bisa: “Mi a confia den bo misericordia; mi curason lo regociha den bo salbacion.” (Salmo 13:5) Siendo cu Dios su amor ta leal, Su sirbidonan por confi’e completamente. Nan tin e garantia aki: “SEÑOR no ta bandona su pueblo, ni e no ta bai laga su herencia.”—Salmo 94:14.

Dicon Mundo Ta Asina Cruel?

12. Na ki tempo y den ki manera gobernacion opresivo a cuminsa?

¹² E contesta riba e pregunta aki tin di haci cu loke a sosode den hofi di Eden. Un poco despues cu historia humano a cuminsa, un criatura spiritual cu a bira egoista y arogante a bin cu un complot p’e bira gobernante mundial. Y debi na su complot, en berdad el a bira gobernante of “prins di e mundo aki”, anto uno masha opresivo mes. (Huan 12:31) El a bira conoci como Satanas e Diabel, e opositor principal di Dios y hende. (Huan 8:44; Revelacion 12:9) Satanas su complot egoista pa establece un gobernacion igual na Yehova su reinado bondadoso a sali na cla poco despues cu Eva a ser crea. Pues, mal gobernacion a cuminsa ora cu Adam a scohe e caminda di independencia for di Dios su gobernacion, rechasando Dios su bondad completamente. (Genesis 3:1-6) En bes di bira realmente independiente, Adam cu Eva de echo a bin bou di e influencia egoista y orguyoso di Diabel, y a bira subdito di su gobernacion.

13-15. (a) Kico tawata algun consecuencia ora cu hende a rechasa Yehova su gobernacion husto? (b) Dicon e mundo aki ta un luga cruel?

¹³ Laga nos considera algun di e consecuencianan. Dios a saca Adam cu Eva for di e parti di e tera cu tawata un paradijs. Nan situacion a cambia for di bida den un parke bunita y berde, caminda facilmente nan por a haya berdura y fruta saludabel, pa un situacion dificil pafo di e hofi di Eden. Dios a bisa Adam: “Pasobra bo a scucha na bos di bo esposa y a come for di e palo di cual mi a ordena bo, bisando: ‘Lo bo no come di dje’, maldiciona e tera ta pa bo motibo; cu trabou duro lo bo come di dje tur e dianan di bo bida. Mata di sumpiña y bringamosa lo e produci pa bo.” E maldicion contra e tera a nifica cu awor lo a bira hopi dificil pa cultiva e  tera. E efectonan di e tera maldiciona, cu su sumpiña y bringamosa, tawata asina pisa pa e desendientenan di Adam cu e tata di Noe, Lamek, a papia di e dolor of ‘trabou duro di nan mannan, pa motibo di e tera cu SEÑOR a maldiciona.’—Genesis 3:17-19; 5:29.

¹⁴ Tambe Adam cu Eva a cambia trankilidad pa angustia. Dios a bisa Eva: “Lo mi multiplica masha hopi mes bo dolor na ora di parto; cu dolor lo bo haya yiu; toch bo deseo lo ta pa bo esposo, y e lo manda riba bo.” Despues Cain, e prome yiu di Adam cu Eva, a comete e acto cruel di asesina su ruman homber Abel.—Genesis 3:16; 4:8.

¹⁵ Apostel Huan a declara: “Henter mundo ta bou di control di e malbado.” (1 Huan 5:19) Awe mundo, mescos cu su gobernante, ta manifesta caracteristicanan malbado cu ta inclui egoismo y orguyo. Pesei no ta straño cu mundo ta yen di crueldad y hostilidad! Pero lo no keda asina pa semper. Yehova lo percura pa bondad y compasion prevalece bou di su Reino, en bes di crueldad y hostilidad.

Bou di e Reino di Dios Bondad Lo Prevalece

16. Dicon bondad ta caracterisa Dios su gobernacion den man di Cristo Hesus, y kico esaki ta obliga nos na haci?

¹⁶ Yehova y Cristo Hesus, e Rei apunta pa Su Reino, ta rekeri di nan subditonan pa nan ta conoci pa nan bondad. (Mikeas 6:8, NW) Hesucristo a duna nos un bista di antemano di e manera cu bondad lo a caracterisa e gobernacion cu su Tata a confia na dje. (Hebreonan 1:3) Nos por ripara esaki na e palabranan di Hesus cu a desenmascara e lidernan religioso falso, kendenan a oprimi e pueblo cu carganan pisa. Hesus a bisa: “Bin serca mi tur cu ta cansa y carga, y lo mi duna boso sosiego. Tuma mi yugo riba boso, y siña di mi, pasobra mi ta manso y humilde di curason; y boso lo haya sosiego pa boso alma. Pasobra mi yugo ta suave y mi carga ta lihe.” (Mateo 11:28-30) Masha hopi hende cu kisas ta gobernante religioso of otro tipo di gobernante riba tera, ta agota pueblo cu e carga pisa di un cantidad sin fin di regla y cu tareanan pa cua e hendenan lo no haya ni un clase di recompensa. Sinembargo, loke Hesus ta rekeri di su siguidonan ta satisface nan necesidadnan y ta na nan alcanse. En berdad un yugo refrescante y bondadoso! Nos no ta ser conmovi pa ta mescos cu ne den mustra bondad na otro hende?—Huan 13:15.

17, 18. Dicon nos por tin confiansa cu esnan cu ta goberna cu Cristo den shelo y tambe su representantenan riba tera lo desplega bondad?

¹⁷ Hesus su comentarionan remarcabel cu el a dirigi na su apostelnan ta resalta e manera cu e Reino di Dios ta distingui su mes bon cla for di gobernacion humano. Bijbel ta declara: “Tambe a lanta un discusion entre [e disipelnan] tocante cual di nan tawata wordo considera di ta esun di mas grandi. Y el a bisa nan: ‘E reinan di e paganonan ta goberna nan; y esnan cu tin autoridad riba nan ta wordo yama  “Shonnan bondadoso.” Ma entre boso no mester t’asina; al contrario, laga esun di mas grandi meimei di boso ta manera esun di mas hoben, y esun cu ta goberna manera esun cu ta sirbi. Pasobra ta ken ta mas grandi: esun cu ta sinta na mesa of esun cu ta sirbi? No ta esun cu ta sinta na mesa? Ma ami ta meimei di boso manera esun cu ta sirbi.’”—Lucas 22:24-27.

¹⁸ Gobernantenan humano ta purba establece nan grandesa door di manda riba e pueblo y door di busca titulonan halto, como si fuera e titulonan ei ta haci nan superior na esnan cu nan ta goberna riba dje. Pero Hesus a bisa cu berdadero grandesa ta bin di sirbi otro hende, si, haciendo esfuerso diligente y persistente pa sirbi. Tur esnan cu lo goberna cu Cristo den shelo of sirbi como su representante riba tera mester haci esfuerso pa imita su ehempel di humildad y bondad.

19, 20. (a) Con Hesus a splica e alcanse di Yehova su bondad? (b) Con nos por imita Yehova den desplega bondad?

¹⁹ Laga nos wak un otro conseho amoroso cu Hesus a duna. Mustrando con leu Yehova su bondad ta bai, Hesus a bisa: “Si boso stima esnan cu ta stima boso, ki merito esei ta pa boso? Pasobra asta pecadonan ta stima esnan cu ta stima nan. Y si boso haci bon na esnan cu ta haci bon na boso, ki merito esei ta pa boso? Pasobra asta pecadonan ta haci mescos. Y si boso fia esnan for di kendenan boso ta spera di ricibi, ki merito esei ta pa boso? Asta pecadonan ta fia pecadonan, pa ricibi mescos bek. Ma stima boso enemigonan, y haci bon, y fia sin spera di haya nada bek; y boso recompensa lo ta grandi, y boso lo ta yiunan di e Haltisimo; pasobra e mes ta cariñoso pa cu ingratonan y malbadonan. Sea misericordioso, mescos cu boso Tata ta misericordioso.”—Lucas 6:32-36.

²⁰ Bondad produci pa Dios su spirito no ta egoista. E no ta pidi nada y no ta spera un recompensa. Yehova bondadosamente “ta haci su solo sali riba mal hende y riba bon hende, y ta laga awa yobe riba hende husto y riba hende inhusto.” (Mateo 5:43-45; Echonan 14:16, 17) Imitando nos Tata celestial, nos no solamente  lo keda sin haci daño na hende malagradecido of ingrato sino mas bien lo haci bon na nan, asta na esnan cu a actua como nos enemigo. Door di desplega bondad, nos ta mustra Yehova y Hesus cu nos tin deseo di biba bou di e Reino di Dios, ora cu den tur relacion humano lo reina bondad y otro cualidadnan produci pa Dios su spirito.

Dicon Nos Mester Mustra Bondad?

21, 22. Dicon nos mester mustra bondad?

²¹ Pa un cristian berdadero, ta masha importante pa desplega bondad. Esei ta un prueba cu e spirito di Dios ta obra den nos. Ademas, ora nos ta desplega berdadero bondad, nos ta imita Yehova Dios y Cristo Hesus. Tambe bondad ta un rekisito pa esnan cu lo ta subdito di e Reino di Dios. Pues anto, nos mester stima bondad y siña despleg’e.

²² Cua ta algun manera practico cu nos por mustra bondad den nos bida diario? E siguiente articulo lo trata e tema ei.

[Nota]

Con Bo Ta Contesta?

• Kico ta bondad?

• Dicon mundo ta un luga cruel y hostil?

• Con bin nos sa cu bondad lo reina bou di Dios su gobernacion?

• Dicon ta importante pa esnan cu tin deseo di biba bou di e Reino di Dios mustra bondad?

[Preguntanan di Estudio]

[Plachi na pagina 13]

Ancianonan cristian ta haci esfuerso pa trata e tou cu bondad

[Plachi na pagina 15]

Yehova su bondad amoroso lo no laga su sirbidonan na caya den tempo dificil

[Plachi na pagina 16]

Bondadosamente Yehova ta laga tur hende haya solo y awasero