Imita e Curashi di Yeremias

“Confia den SEÑOR, sea fuerte, bo curason tuma curashi. Si, confia den SEÑOR!”—SALMO 27:14, Beibel na papiamentu koriente.

1. Ki bendicion rico Testigonan di Yehova ta disfruta di dje?

TESTIGONAN DI YEHOVA ta biba den un paradijs spiritual. (Isaias 11:6-9) Den e mundo masha turbulento aki, nan ta biba den un ambiente spiritual unico hunto cu otro cristiannan, kendenan ta na pas cu Yehova Dios y cu otro. (Salmo 29:11; Isaias 54:13) Anto nan paradijs spiritual ta creciendo. Tur cu ta ‘haci e boluntad di Dios di curason’ ta yuda e paradijs ei bira mas grandi. (Efesionan 6:6) Con? Door di biba na harmonia cu principionan biblico y door di siña otro hende pa haci mescos y asina invita nan pa beneficia di e bendicionnan rico di e paradijs ei.—Mateo 28:19, 20; Huan 15:8.

2, 3. Kico cristiannan berdadero tin cu soporta?

² Sinembargo, e echo cu nos ta biba den un paradijs spiritual no ta nifica cu nos no ta haya nos cu prueba. Ainda nos ta imperfecto y ta sufri di e dolornan di malesa, biehes y cu tempo, morto. Ademas, nos ta mira e cumplimento di e profecianan relaciona cu “e ultimo dianan.” (2 Timoteo 3:1) Guera, crimen, malesa, hamber y otro problemanan severo ta asota henter humanidad, y Testigonan di Yehova no ta un excepcion.—Marco 13:3-10; Lucas 21:10, 11.

³ Fuera di tur e cosnan ei, nos ta bon conciente di e echo cu apesar di e siguridad di nos paradijs spiritual, toch nos ta confronta oposicion fuerte serca esnan cu no ta un parti di dje. Hesus a spierta su siguidonan: “Pasobra boso no ta di mundo, ma ami a scohe boso for di den mundo, pesei mundo ta odia boso. Corda riba e palabra cu mi a bisa boso: ‘Un esclabo no ta mas cu su shon.’ Si nan a persigui mi, boso tambe nan lo persigui.” (Huan 15:18-21) Awe tambe ta mescos. Mayoria hende ainda no ta compronde of aprecia nos forma di adoracion. Algun di nan ta critica nos, haci bofon di nos of asta odia nos, manera Hesus a spierta. (Mateo 10:22) Hopi bes hende ta haci esfuerso pa perhudica nos door di plama informacion falso y malicioso via medionan di comunicacion. (Salmo 109:1-3) Si, nos tur ta confronta situacionnan dificil, y algun di nos kisas ta cuminsa bira descurasha. Con nos por persevera?

4. Unda nos ta acudi pa haya yudansa pa persevera?

⁴ Yehova ta yuda nos. Bou di inspiracion, e salmista a skirbi: “Hopi ta e afliccionnan di e husto, ma SEÑOR ta libr’e for di nan tur.” (Salmo 34:19; 1 Corintionan 10:13) Hopi di nos por confirma e echo cu ora nos pone nos pleno confiansa den Yehova, e ta duna nos e fortalesa pa soporta cualkier situacion dificil. Nos amor pa Yehova y e goso cu tin poni nos dilanti ta yuda nos lucha contra desanimacion y miedo. (Hebreonan 12:2) Pues, apesar di dificultad, nos ta sigui para firme.

E Palabra di Dios A Fortalece Yeremias

5, 6. (a) Ki ehempelnan nos tin di adoradonan berdadero cu a logra persevera? (b) Con Yeremias a reacciona ora cu Yehova a yam’e pa bira profeta?

⁵ Atrabes di henter historia, sirbidonan fiel di Yehova a haya goso apesar di circunstancianan dificil. Algun di nan a biba durante temponan di huicio ora cu Yehova a ehecuta  su furia riba esnan infiel. Entre e adoradonan fiel ei tawatin Yeremias y algun di su contemporaneonan, y tambe e cristiannan di prome siglo. E ehempelnan historico ei ta para den Bijbel pa curasha nos, y nos por siña hopi door di studia nan. (Romanonan 15:4) Por ehempel, laga nos considera Yeremias.

⁶ Na un edad hoben Yeremias a haya e yamada pa sirbi como profeta den Huda. Esaki no tawata un asignacion facil. Mayoria di e pueblo tawata adora diosnan falso. Ora cu Yeremias a cuminsa su sirbishi, Yosias tawata rei, y aunke e si tawata fiel, tur e otro reinan cu a siguie tawata infiel. Ademas, mayoria di esnan responsabel pa instrui e pueblo—e profetanan y e sacerdotenan—no tawata na banda di e berdad. (Yeremias 1:1, 2; 6:13; 23:11) Pues, con Yeremias a sinti ora cu Yehova a yam’e pa bira profeta? E tawatin miedo! (Yeremias 1:8, 17) Yeremias ta corda su prome reaccion: “Mi a bisa: ‘Ai, Señor DIOS! Mira, mi no sa con pa papia, pasobra mi ta un mucha.’”—Yeremias 1:6.

7. Con e hendenan den Yeremias su teritorio a reacciona, y con e mes a reacciona?

⁷ Mayoria di e hendenan den Yeremias su teritorio no a reacciona faborabel, y hopi bes el a confronta oposicion feros. Na un ocasion Pasur, un sacerdote, a golpia Yeremias y a pon’e den sepa. Yeremias a conta con el a sinti e biaha ei: “Lo mi no corda riba [Yehova], ni papia mas den su nomber.” Podise bo tambe tin biaha a sinti mescos, cu gana di entrega. Tuma nota ta kico a yuda Yeremias persevera. El a bisa: “E ora ei esei [e palabra of mensahe di Dios] ta bira manera candela den mi curason, sera den mi wesonan; mi ta cansa di ten’e paden, y mi no por mas.” (Yeremias 20:9) E palabranan di Dios tin e mesun efecto riba bo?

E Compañeronan di Yeremias

8, 9. (a) Ki debilidad profeta Urias a desplega, y cu ki resultado? (b) Dicon Baruk tawata descurasha, y con el a ser yuda?

⁸ Yeremias no tawata su so den su trabou como profeta. E tawatin compañero, y esaki lo mester a curash’e. Pero tawatin ocasion cu su compañeronan no a actua sabi. Por ehempel, un otro profeta cu yama Urias tawata ocupa dunando spiertamentonan contra Herusalem y Huda, “palabranan similar na tur esnan di Yeremias.” Sinembargo, ora cu Rei Joakim a duna ordo pa mata Urias, e profeta a haya miedo y a hui bai Egipto. Pero esei no a scap’e. E hombernan di e Rei a persiguie, captur’e y trec’e bek na Herusalem, caminda nan a mat’e. Esei lo mester tawata un shock grandi pa Yeremias!—Yeremias 26:20-23.

⁹ Un otro compañero di Yeremias tawata su secretario Baruk. Baruk tawata un bon ayudante pa Yeremias, pero na un ocasion e tambe a stop di wak su circunstancia for di un punto di bista spiritual. El a cuminsa keha, bisando: “Ai di mi! Pasobra SEÑOR a añadi tristesa na mi dolor; mi ta cansa di  mi kehamento y mi no a haya descanso.” Baruk, tur descurasha, a cuminsa perde aprecio pa cosnan spiritual. Pero toch Yehova bondadosamente a duna Baruk conseho sabi, y Baruk a corigi su manera di pensa. E ora ei Dios a sigur’e cu lo e sobrevivi e destruccion di Herusalem. (Yeremias 45:1-5) Yeremias lo mester a sintie hopi curasha ora cu Baruk a recupera su balansa spiritual.

Yehova A Sostene Su Profeta

10. Ki sosten Yehova a priminti Yeremias?

¹⁰ Loke ta mas importante ta cu Yehova no a bandona Yeremias. El a compronde con su profeta a sinti y a dun’e e fortalesa y sosten cu e tawatin mester. Por ehempel, na principio di Yeremias su sirbishi ora cu Yeremias a expresa duda cu lo e ta cualifica, Yehova a bis’e: “‘No tene miedo di nan, pasobra ami ta cu bo pa libra bo’, SEÑOR ta declara.” Anto despues di a duna su profeta informacion tocante su asignacion, Yehova a bisa: “‘Nan lo bringa contra bo, ma nan lo no vence bo, pasobra ami ta cu bo pa libra bo’, SEÑOR ta declara.” (Yeremias 1:8, 19) Ki un gran consuelo! Y Yehova a cumpli cu su palabra.

11. Con nos sa cu Yehova a cumpli cu su promesa di sostene Yeremias?

¹¹ Pues, despues di tawata sera den sepa y exponi na bofon publico, Yeremias a bisa cu confiansa: “SEÑOR ta cu mi manera un guerero poderoso; pesei esnan cu ta persigui mi lo trompica y nan lo no prevalece. Nan lo keda masha brongosa.” (Yeremias 20:11) Añanan despues ora cu hende a purba mata Yeremias, Yehova a sigui ta cu ne, y mescos cu Baruk, Yeremias a sobrevivi e destruccion di Herusalem como un homber liber, mientras cu su persiguidonan y esnan cu a ignora su spiertamentonan  a muri of ser hiba como catibo na Babilonia.

12. Apesar di tin motibonan pa ta descurasha, kico nos mester keda corda?

¹² Mescos cu Yeremias, tin hopi Testigo di Yehova awe ta soporta afliccion. Manera a keda menciona caba, algun afliccion ta ser causa door di nos propio imperfeccionnan, tin ta debi na e situacion caotico cu mundo ta aden, y otronan ta door di hende cu ta opone nos trabou di predica. E afliccionnan ei por descurasha nos. Mescos cu Yeremias, nos por yega na e punto cu nos ta puntra nos mes si nos por sigui cu nos sirbishi. De echo, nos por spera cu de bes en cuando nos ta sinti nos mes descurasha. Desanimacion ta test con profundo nos amor pa Yehova ta. Pesei laga nos ta dicidido pa no laga desanimacion pone nos kita for di Yehova su sirbishi manera Urias a haci. Mas bien, laga nos imita Yeremias y sea sigur di Yehova su sosten.

Con pa Lucha Contra Desanimacion

13. Con nos por imita e ehempel di Yeremias y David?

¹³ Yeremias tawata den contacto regular cu Yehova Dios, y a cont’e su sintimentonan di mas profundo y a rog’e pa fortalesa. Esei ta un excelente ehempel pa nos imita. David di pasado, cu tambe a acudi na e mesun Fuente di fortalesa, a skirbi: “Scucha mi palabranan, o SEÑOR, considera mi meditacion. Paga atencion na e bos di mi clamor, mi Rei y mi Dios, pasobra ta na bo mi ta haci oracion.” (Salmo 5:1, 2) E relato inspira di e bida di David ta mustra cu bes tras bes Yehova a reacciona riba e oracionnan cu David a haci pa pidi yudansa. (Salmo 18:1, 2; 21:1-5) Den un manera similar, ora cu nos ta bou di presion pisa of nos problemanan ta parce insuperabel, nos por haya un gran consuelo door di acudi na Yehova den oracion y desahoga nos curason na dje. (Filipensenan 4:6, 7; 1 Tesalonicensenan 5:16-18) Yehova no ta nenga di scucha nos. Al contrario, e ta sigura nos cu ‘e ta percura pa nos.’ (1 Pedro 5:6, 7) Sinembargo, lo no ta rasonabel pa haci oracion na Yehova anto caba keda sin scucha loke e tin di bisa, toch?

14. Ki efecto e palabranan di Yehova tawatin riba Yeremias?

¹⁴ Con Yehova ta papia cu nos? Laga nos ban bek na Yeremias. Como cu Yeremias tawata un profeta, Yehova a comunica cu ne directamente. Yeremias ta describi e efecto cu e palabranan di Dios tawatin riba su curason: “Bo palabranan a wordo haya y mi a come nan, y bo palabranan a bira un goso pa mi y e delicia di mi curason; pasobra mi a wordo yama na bo nomber, o SEÑOR Dios di ehersitonan.” (Yeremias 15:16) Si, Yeremias tawata hopi contento pa e echo cu el a wordo yama na Yehova su nomber, y Yehova su palabranan tawata precioso pa e profeta. Pesei, mescos cu apostel Pablo, Yeremias tawata ansioso pa declara e mensahe confia na dje.—Romanonan 1:15, 16.

15. Con nos por inculca e palabranan di Yehova den nos curason, y door di medita riba kico nos lo ta dicidido pa no keda keto?

¹⁵ Yehova no ta comunica directamente cu ningun hende awe. Sinembargo, nos tin e palabranan di Dios den Bijbel. Pesei, si nos ta serio den nos studio di Bijbel y ta medita profundamente riba loke nos ta siña, e palabranan di Dios lo bira pa nos curason tambe ‘un goso y delicia.’ Y ta masha emocionante cu nos ta carga Yehova su nomber ora cu nos ta bai comparti e palabranan ei cu otro hende. Laga nos no lubida nunca cu no tin ningun otro hende na mundo awe cu ta declara e nomber di Yehova. Ta solamente su Testigonan ta anuncia e evangelio of bon nobo di Dios su Reino estableci y ta siña hende manso pa bira disipel di Hesucristo. (Mateo 28:19, 20) Esta bendiciona nos ta! En bista di loke Yehova amorosamente a confia na nos, con nos por keda keto?

 Tene Cuidou cu Nos Asociacion

16, 17. Kico tawata Yeremias su punto di bista di asociacion, y con nos por imit’e?

¹⁶ Yeremias ta menciona un cos mas cu a yud’e tin curashi. El a bisa: “Mi no a sinta hunto cu esnan cu ta haci bofon, ni mi no a regociha. Mi tawata sinta mi so, pasobra bo man tawata riba mi, y bo a yena mi cu indignacion.” (Yeremias 15:17) Yeremias a prefera di ta su so, cu ser corumpi door di mal amigo. Awe nos tambe ta mira e asunto mescos cu Yeremias. Nos no ta lubida nunca e spiertamento di apostel Pablo cu “mal compania ta daña bon custumber”, asta custumbernan bon cu nos por tawatin pa hopi aña.—1 Corintionan 15:33.

¹⁷ Mal compania por permiti e spirito di mundo contamina nos manera di pensa. (1 Corintionan 2:12; Efesionan 2:2; Santiago 4:4) Pues laga nos entrena nos mente pa identifica kico ta mal asociacion y laga nos evita nan completamente. (Hebreonan 5:14) Si Pablo tawata na bida awe, kico bo ta pensa lo el a bisa un cristian cu ta wak peliculanan inmoral of violento of deportenan violento? Ki conseho lo el a duna na un ruman cu ta busca amistad cu hende totalmente desconoci riba Internet? Kico lo el a pensa di un cristian cu ta pasa oranan largo dilanti television of hungando video game, pero cu no tin bon custumbernan di studio personal?—2 Corintionan 6:14b; Efesionan 5:3-5, 15, 16.

Keda den e Paradijs Spiritual

18. Kico lo yuda nos keda spiritualmente fuerte?

¹⁸ Nos paradijs spiritual ta masha precioso pa nos. No tin nada den e mundo djawe cu por ser compara cu ne. Asta hende incredulo ta comenta tocante e amor, consideracion y bondad cu cristiannan tin pa otro. (Efesionan 4:31, 32) Toch mas cu nunca, nos tin cu lucha contra desanimacion. Bon asociacion, oracion y bon custumbernan di studia por yuda nos keda spiritualmente fuerte. E cosnan ei lo fortalece nos pa confronta cualkier prueba cu pleno confiansa den Yehova.—2 Corintionan 4:7, 8.

19, 20. (a) Kico lo yuda nos persevera? (b) Na ken e siguiente articulo ta dirigi, y pa ken tambe e ta di interes?

¹⁹ Nunca nos mester permiti esnan cu ta odia nos mensahe biblico intimida nos y pone nos debilita nos fe. Mescos cu e enemigonan cu a persigui Yeremias, esnan cu ta lucha contra nos ta luchando contra Dios. Nan lo no prevalece. Yehova, kende ta hopi mas fuerte cu nos oponentenan, ta bisa nos: “Confia den SEÑOR, sea fuerte, bo curason tuma curashi. Si, confia den SEÑOR.” (Salmo 27:14, BPK) Cu nos speransa den Yehova profundamente hancra den nos curason, laga nos ta determina pa no cansa di haci bon. Laga nos tin e confiansa cu—mescos cu Yeremias y Baruk—nos lo cosecha si nos no cansa.—Galationan 6:9.

²⁰ Bringa contra desanimacion ta un lucha constante pa hopi cristian. Pero hobennan ta confronta prueba- y dificultadnan special. Pero tambe nan tin gran oportunidadnan. E siguiente articulo ta dirigi directamente na e hobennan meimei di nos. Lo e ta di interes tambe pa mayornan y pa tur adulto dedica den congregacion cu pa medio di palabra, ehempel y sosten direct, ta den posicion pa yuda esnan mas jong den congregacion.

Con Lo Bo Contesta?

• Dicon nos por spera situacionnan cu lo descurasha nos, y na ken nos mester acudi pa yudansa?

• Con Yeremias a vence desanimacion apesar di tawatin un asignacion dificil?

• Kico lo laga nos curason tin ‘goso y delicia’ asta meimei di dificultad?

[Preguntanan di Estudio]

[Plachi na pagina 9]

Yeremias a pensa cu e tawata mucho jong y sin experencia pa ta un profeta

[Plachi na pagina 10]

Asta ora Yeremias tawata ser persigui, e tawata sa cu Yehova ta cu ne “manera un guerero poderoso”