Abraham cu Sara!​—Bo Por Imita e Fe di

E TA ser yama “tata di tur cu tin fe.” (Romanonan 4:11, BPK) Su esposa stima tambe tawatin e cualidad ei. (Hebreonan 11:11) Ta trata aki di Abraham, e patriarca temeroso di Dios, y su casa deboto, Sara. Dicon nan tawata asina bon ehempel di fe? Kico tawata algun di e pruebanan cu nan a soporta? Y di ki balor e storia di nan bida ta pa nos?

Abraham a desplega fe ora cu Dios a mand’e bandona su cas. Yehova a bisa: “Sali for di bo tera, y for di bo famianan y for di cas di bo tata, bai na e tera cu lo mi mustra bo.” (Genesis 12:1) E fiel patriarca a obedece, pasobra Bijbel ta bisa nos: “Pa medio di fe Abraham, ora cu el a wordo yama, a obedece door di sali bai na un luga cu e tawata pa ricibi como herencia; y el a sali bai, sin sa unda e tawata bai.” (Hebreonan 11:8) Ban wak kico e mudansa ei a encera.

Abraham tawata biba na Ur, cu awe ta keda den parti sur di Irak. Ur tawata un stad prospero di Mesopotamia cu tawata haci negoshi cu paisnan di Golfo Persico y probablemente di Vaye di Indus. Sir Leonard Woolley, kende a dirigi e cobamento sistematico di Ur, ta señala cu den tempo di Abraham mayoria cas tawata traha di bloki, y e murayanan tawata gepleister y blancha. Por ehempel, un ciudadano prospero tawatin un cas di dos piso cu un plenchi central cu su vloer traha di piedra. E piso abou a acomoda e cria- y huespetnan. E prome piso tawatin un balcon di palo cu ta pasa rond e muraya, y cu a duna acceso na cuartonan reserva pa e famia. Como cu e casnan ei tawatin 10 pa 20  camber, nan tawata “relativamente espacioso y a duna luga pa hende hiba un bida decente, comodo y—pa normanan oriental—luhoso”, segun Woolley. Nan tawata “principalmente e casnan di un pueblo civilisa y a satisface e necesidadnan di un bida urbano sumamente desaroya.” Si Abraham cu Sara a bandona un cas asina cu e prospecto di bai biba den tent, anto ta sacrificio grandi nan a haci pa obedece Yehova.

E mudansa di Abraham a hiba su famia prome na Haran, un stad den parti nort di Mesopotamia, y despues nan a drenta Canan. Esei tawata un distancia di mas o menos 1.600 kilometer. Un bon pida pa un pareha di edad! Ora nan a sali for di Haran,  Abraham tawatin 75 aña y Sara tawatin 65.—Genesis 12:4.

Con Sara lo a sinti ora cu Abraham a bis’e cu nan lo a bai for di Ur? Podise esei a precup’e, ya cu nan mester a bandona e siguridad di un cas comodo, muda pa un pais desconoci y posiblemente hostil y acepta un nivel di bida mas abou. No obstante, Sara tawata sumiso, y a pensa di Abraham como su “señor.” (1 Pedro 3:5, 6) Algun comentarista ta considera esaki un manifestacion di Sara su ‘actitud y comportacion respetuoso di custumber pa cu Abraham’, y un prueba di su “berdadero custumber di pensa y sinti.” Pero mas cu tur cos, Sara a confia den Yehova. Sara su sumision y fe ta sirbi como un excelente ehempel pa esposanan cristian.

Ta berdad cu Dios no ta pidi nos bandona nos cas pa obedec’e, aunke algun predicado di tempo completo si a bandona nan tera natal pa bai predica e bon nobo den otro pais. Pero, sin importa na unda nos ta sirbi Dios, tanten cu nos ta pone interesnan spiritual na prome luga den nos bida, Dios lo percura pa nos necesidadnan.—Mateo 6:25-33.

Ni Sara ni Abraham a lamenta e decision cu nan a tuma. Apostel Pablo a bisa: “Si nan tawata pensa riba e pais ei for di cual nan a sali, nan lo tawatin oportunidad pa bolbe.” Pero nan no a bolbe. Teniendo e confiansa cu Yehova “ta Esun cu ta recompensa esnan cu ta busc’e”, nan a eherce fe den su promesanan. Y nos tambe mester haci mescos pa nos por sigui rindi Yehova debocion di henter alma.—Hebreonan 11:6, 15, 16.

Rikesa Spiritual y Material

Despues cu Abraham a yega Canan, Dios a bis’e: “Bo desendientenan lo mi duna e tera aki.” Abraham a reacciona door di traha un altar pa Yehova y door di cuminsa ‘invoca e nomber di Yehova.’ (Genesis 12:7, 8)  Yehova a haci Abraham rico, y e hendenan den su campamento a bira masha hopi. Ya cu na un ocasion el a mobilisa 318 homber entrena, catibo cu a nace den su cas, expertonan ta sugeri cu “e cantidad total di su grupo lo mester tawata riba mil hende.” Sea cual sea e motibo, hende a considera Abraham como “un prins di Dios.”—Genesis 13:2; 14:14; 23:6, BPK.

Abraham a hiba delantera den adoracion, y a siña e hendenan di su cas pa “warda e caminda di SEÑOR, door di haci husticia y huicio.” (Genesis 18:19) E ehempel di Abraham por ta un animacion pa cabesnan di famia cristian di tempo actual. Abraham tawata un persona cu a logra siña miembronan di su cas pa depende riba Yehova y actua den un manera husto. Pesei no ta un sorpresa cu Sara su cria Egipcio Agar, tambe e sirbido mas bieu di e patriarca y Abraham su yiu homber Isaak, tur a depende riba Yehova Dios.—Genesis 16:5, 13; 24:10-14; 25:21.

Abraham A Busca Pas

Susesonan den e bida di Abraham ta revela cu Abraham tawatin un personalidad cu ta na harmonia cu esun di Dios. En bes di permiti un pleito sigui entre su wardadonan di bestia y esnan di su subrino Lot, Abraham a sugeri pa nan campamentonan separa. Anto el a invita Lot, cu tawata mas jong cu ne, pa scohe e tera cu el a prefera. Abraham tawata un hacido di pas.—Genesis 13:5-13.

Si un dia nos tin cu scohe entre para riba nos derecho of laga nos derecho para numa pa conserva pas, nos lo por tuma nota di e echo cu Yehova no a laga Abraham sufri pasobra el a mustra consideracion na Lot. Al contrario, despues di esei Dios a priminti Abraham y su desendientenan henter e tera cu Abraham por a mira den tur direccion. (Genesis 13:14-17) Hesus a bisa: “Bendiciona ta esnan cu ta haci pas, pasobra nan lo wordo yama yiunan di Dios.”—Mateo 5:9.

Ken Lo Ta Abraham Su Heredero?

Apesar di promesanan di un desendiente, Sara a keda steril. Abraham a presenta e asunto na Dios. Ta su sirbido Eliezer lo a hereda tur loke e tin? No, pasobra Yehova a bisa: “E homber aki lo no ta bo heredero, ma un cu lo sali for di bo mes curpa, esei lo ta bo heredero.”—Genesis 15:1-4.

Toch ainda no tawatin nada di yiu, y Sara di 75 aña a perde speransa di consebi. Pesei el a bisa Abraham: “SEÑOR no a laga mi haya yiu. Pa fabor, drumi cu mi cria; podise lo mi haya yiu pa medio di dje.” Anto Abraham a tuma Agar como un esposa secundario, el a drumi cu ne y Agar a sali na estado. Asina cu Agar a realisa cu e tawata na estado, el a cuminsa desprecia su shon. Sara a bai keha amargamente serca Abraham y a humiya Agar, loke a pone e cria hui bai.—Genesis 16:1-6.

Abraham cu Sara a actua di buena fe, y a sigui un proceder cu tawata na harmonia cu e custumbernan di nan tempo. Sinembargo, esei no tawata Yehova su manera pa produci e desendiente di Abraham. Kisas nos cultura tambe ta dicta cu den varios circunstancia cierto accionnan ta corecto, pero esaki no ta nifica necesariamente cu Yehova ta di acuerdo. Su punto di bista di nos situacion kisas ta completamente diferente. Pues, nos tin cu busca Dios su guia, y pidie den oracion pa indica e manera cu e kier pa nos actua.—Salmo 25:4, 5; 143:8, 10.

Nada No Ta ‘Mucho Dificil pa Yehova’

Cu tempo, Agar a duna lus na un yiu homber cu yama Ismael. Sinembargo, e no tawata e desendiente of Simiña priminti. Ta Sara mes, apesar di su edad avansa, lo mester a duna lus na e heredero ei.—Genesis 17:15, 16.

 Ora cu Dios a bisa spesificamente cu Sara ta bai haya un yiu homber cu su casa, “Abraham a tira su curpa abou cu su cara te na suela y a hari, y a bisa den su curason: ‘Lo nace un yiu pa un homber di shen aña? Y Sara, cu tin nobenta aña, lo haya yiu?’” (Genesis 17:17) Ora un angel a ripiti e mensahe caminda Sara por a tend’e, esei a pone Sara “hari den su mes.” Pero no tin nada cu ta ‘mucho dificil pa Yehova.’ Nos tambe por tin fe cu Yehova por haci tur loke cu e kier.—Genesis 18:12-14.

Tawata “pa medio di fe [cu] Sara mes tambe a ricibi habilidad pa consebi, asta despues cu su tempo a pasa, como cu el a considera fiel Esun cu a priminti.” (Hebreonan 11:11) Cu tempo, Sara a duna lus na Isaak, kende su nomber ta nifica “Hari.”

Confiansa Absoluto den e Promesanan di Dios

Yehova a identifica Isaak como e heredero tan spera. (Genesis 21:12) Pesei Abraham lo mester a keda pasma ora cu Dios a pidie sacrifica su yiu. Sinembargo, Abraham tawatin motibo valido pa e tin confiansa absoluto den Dios. Acaso Yehova lo no por a lanta Isaak for di morto? (Hebreonan 11:17-19) Dios no a duna prueba di su poder caba door di rebiba milagrosamente Abraham cu Sara su poder di reproduci pa asina Isaak por a nace? Combenci di Dios su habilidad di cumpli cu Su promesanan, Abraham tawata cla pa obedece. Y ta berdad cu Dios a strob’e di realmente mata su yiu. (Genesis 22:1-14) No obstante, e papel cu Abraham a hunga den esaki ta yuda nos mira con dificil lo mester tawata pa Yehova Dios “duna su Yiu unigenito, pa ken cu kere den dje no bai perdi, ma tin bida eterno.”—Huan 3:16; Mateo 20:28.

Como cu Abraham tawatin fe den Dios, e tawata sa cu e heredero di e promesanan di Yehova lo no por a casa cu un adorado di dios falso di e tera di Canan. Con un mayor temeroso di Dios por a aproba pa su yiu casa cu un hende cu no ta sirbi Yehova? Pues Abraham mester a busca un casa apropiado pa Isaak for di entre su famianan na Mesopotamia, mas cu 800 kilometer leu. Dios a bendiciona e esfuerso ei door di indica cu Rebeca tawata e mohe cu el a scohe pa bira esposa di Isaak y antepasado di e Mesias. Si, Yehova “a bendiciona Abraham den tur cos.”—Genesis 24:1-67; Mateo 1:1, 2.

Bendicion pa Tur Nacion

Abraham cu Sara tawata ehemplar den e manera cu nan a soporta prueba y eherce fe den e promesanan di Dios. Cumplimento di e promesanan ei tin efecto riba e speransanan eterno di humanidad, pasobra Yehova a sigura Abraham: “Den bo desendientenan  tur e nacionnan di e tera lo ta bendiciona, pasobra bo a obedece mi bos.”—Genesis 22:18.

Claro cu Abraham cu Sara tawata imperfecto, mescos cu nos. Sinembargo, ora cu nan a compronde ta kico ta Dios su boluntad, nan a cumpli cu ne umbes, sin importa e costo. Pesei Abraham ta ser recorda como “e amigo di Dios” y Sara como ‘un mohe santo cu tawata spera den Dios.’ (Santiago 2:23; 1 Pedro 3:5) Door di haci esfuerso pa imita e fe di Abraham cu Sara, nos tambe por tin un precioso relacion intimo cu Dios. Tambe nos por beneficia di e promesanan precioso cu Yehova a haci na Abraham.—Genesis 17:7.

[Plachi na pagina 26]

Debi na nan fe, Yehova a bendiciona Abraham cu Sara cu un yiu den nan biehes

[Plachi na pagina 28]

E ehempel di Abraham ta yuda nos mira kico el a nifica pa Yehova pa permiti su Yiu unigenito muri