Bo Por Haci Dios Contento

NOS realmente por tin efecto riba Dios su sintimentonan? Dios por ta contento? Un diccionario ta defini e palabra “Dios” como “e realidad supremo of absoluto.” Ke tal si e realidad asombroso ei ta simplemente un forsa? Un forsa cu no tin personalidad por ta contento? Claro cu no. Pero tuma nota kico Bijbel ta bisa di Dios.

Hesucristo a bisa: “Dios ta spirito.” (Huan 4:24) Un spirito ta un forma di bida cu ta distinto di ser humano. Aunke un spirito ta invisibel pa wowo di hende, e tin un curpa—“un curpa spiritual.” (1 Corintionan 15:44; Huan 1:18) Uzando idioma simbolico, Bijbel ta bisa asta cu Dios tin wowo, horea, man, etcetera. * Dios tin un nomber tambe—Yehova. (Salmo 83:18, NW) Pues e Dios di Bijbel ta un persona spiritual. (Hebreonan 9:24) “E ta e Dios bibo y e Rei eterno.”—Yeremias 10:10.

Como un persona bibo y real, Yehova por pensa y actua. E ta manifesta cualidadnan y sintimentonan, loke e ta gusta y loke e no ta gusta. De echo, den Bijbel tin masha hopi expresion cu ta revela kico ta agrad’e of desagrad’e. Mientras e diosnan y idolonan cu hende a traha ta djis refleha e caracteristicanan of cualidadnan di nan inventornan humano, e Dios todopoderoso, Yehova, ta e Originador di e emocionnan cu el a hinca den hende.—Genesis 1:27; Isaias 44:7-11.

Sin duda, Yehova ta “e Dios felis.” (1 Timoteo 1:11, NW) No ta den su obranan di creacion so e ta alegra, sino tambe e tin deleite den cumpli cu su proposito. Yehova ta declara mediante profeta Isaias: “Lo mi cumpli cu tur loke ta agrada mi . . . Di berdad mi a papia; di berdad lo mi cumpli cu ne. Mi a plania esaki, siguramente lo mi hacie.” (Isaias 46:9-11) E salmista a canta: “Laga SEÑOR regociha den su obranan.” (Salmo 104:31) Ma tin algo mas cu ta un fuente di alegria pa Dios. E ta bisa: “Sea sabi, mi yiu, y haci mi curason contento.” (Proverbionan 27:11) Imagina bo, nos por haci Dios contento!

Con Nos Por Haci Dios Su Curason Contento

Pensa riba con e cabes di famia, Noe, a haci Yehova su curason contento. Noe “a haya gracia den bista di SEÑOR” pasobra e “tawata un homber . . . perfecto den su generacionnan.” Distinto di e malbadonan di e tempo ei, Noe su fe y obediencia a agrada Dios asina tanto cu manera e Scritura ta bisa, “Noe tawata cana cu Dios.” (Genesis 6:6, 8, 9, 22) “Pa medio di fe Noe . . . cu  temor di Dios a prepara un arca pa salbacion di e hendenan di su cas.” (Hebreonan 11:7) Yehova tawata masha contento cu Noe y el a bendicion’e hunto cu su famia cu e oportunidad di sobrevivi e periodo turbulento ei di historia humano.

E patriarca Abraham tambe tawata masha conciente di Yehova su sintimentonan. Su conocemento intimo di Dios su manera di pensa tawata hopi bisto ora Yehova a inform’e cu lo e destrui Sodoma y Gomora pa motibo di nan degeneracion. Abraham tawata conoce Yehova suficiente bon pa e conclui cu tawata impensabel di parti di Dios pa mata e hustonan hunto cu e malbadonan. (Genesis 18:17-33) Añanan despues, Abraham a obedece un ordo di Yehova y el a casi “ofrece Isaak”, pasobra “el a considera cu Dios ta poderoso pa lanta hende asta for di morto.” (Hebreonan 11:17-19; Genesis 22:1-18) Abraham tawata asina conciente di Dios su sintimentonan y el a desplega un fe y obediencia asina grandi cu den Bijbel el a wordo yama “amigo di Dios.”—Santiago 2:23.

Un otro homber cu a haci esfuerso pa haci Dios su curason contento tawata Rei David di antiguo Israel. Yehova a bisa di dje: “Mi a haya David, yiu homber di Isai [Yese], un homber conforme mi curason, kende lo haci henter mi boluntad.” (Echonan 13:22) Prome cu David a confronta e gigante Goliat, el a pone su pleno confiansa den Dios y a bisa Rei Saul di Israel: “E SEÑOR, kende a libra mi for di gara di leon y for di gara di beer, e lo libra mi for di man di e Filisteo aki.” Yehova a bendiciona David su confiansa den Dje, loke a permiti David caba cu Goliat. (1 Samuel 17:37, 45-54) David tawata kier pa no solamente su accionnan sino tambe ‘e palabranan di su boca y e meditacion di su curason ta aceptabel den bista di SEÑOR.’—Salmo 19:14.

Kico di nos? Con nos por haci Yehova contento? Mas nos siña di Dios su sintimentonan, mas conciente nos lo bira cu nos por haci Dios su curason contento. Pues segun cu nos ta lesa Bijbel, ta esencial pa nos haci esfuerso pa siña tocante Dios su sintimentonan pa nos por wordo ‘yena cu e conocemento di su boluntad den tur sabiduria spiritual y comprondemento pa nos cana na un manera digno di Señor, pa agrad’e den tur sentido.’ (Colosensenan 1:9, 10) Conocemento, na su turno, ta yuda nos edifica fe. Esaki ta vital pasobra “sin fe ta imposibel pa agrada [Dios].” (Hebreonan 11:6) Si, door di haci esfuerso pa edifica un fe firme y door di harmonisa nos bida cu e boluntad di Yehova, nos por haci su curason contento. Na mes momento, nos mester tene cuidou pa nos no haci Yehova su curason tristo.

No Haci Dios Tristo

Den e relato tocante e dianan di Noe nos ta haya un ehempel di con hende por haci Yehova tristo. Na e tempo ei “tera tawata yen di violencia. Anto Dios a tira un bista riba tera, y mira, e tawata corupto, pasobra tur carni a corumpi nan caminda riba tera.” Con Dios a sinti ora el a mira e degeneracion y e violencia? Bijbel ta bisa cu “a duel SEÑOR cu el a traha hende riba tera y e tawata tristo den su curason.” (Genesis 6:5, 6, 11, 12) E comportacion di hende a bira asina malo cu esaki a duel Dios y su actitud pa cu e generacion malbado prome cu Dilubio a cambia. Pa motibo cu Dios tawata disgusta cu nan maldad, su actitud pa cu nan a cambia for di uno di Creador di hende pa Ehecutor di hende.

 Yehova a sinti su mes tristo tambe ora su propio pueblo, e antiguo nacion di Israel, continuamente tawata ignora su sintimentonan y su guia amoroso. E salmista a bisa den forma di lamento: “Cuanto biaha nan a bira rebelde contra dje den e tera seco, y a hacie tristo den desierto! Bes tras bes nan a tenta Dios, y a proboca Esun Santo di Israel.” Ma “e, siendo misericordioso, a pordona nan inikidad, y no a destrui nan; hopi biaha el a kita su rabia for di riba nan, y no a lanta tur-tur su furia.” (Salmo 78:38-41) Aunke cu ta pa nan mes falta e Israelitanan rebelde a sufri e consecuencianan di nan pica, Bijbel ta bisa nos cu “den tur nan afliccion [Dios] tawata afligi.”—Isaias 63:9.

Yehova tawatin sintimento tierno pa e pueblo di Israel y el a duna muestra amplio di esei. Apesar di esei, “continuamente nan tawata haci bofon di e mensaheronan di Dios, y tawata desprecia su palabranan y haci bofon di su profetanan, te ora cu e furia di SEÑOR a lanta contra su pueblo, te ora cu no tawatin remedi mas.” (2 Cronicanan 36:16) Finalmente, nan rebeldia terco a “haci su spirito santo [asina] tristo” cu nan a perde Yehova su aprobacion. (Isaias 63:10) Cu ki resultado? Dios a eherce husticia door di kita su proteccion for di nan, locual a pone nan sufri calamidad ora e Babilonionan a conkista Huda y a destrui Herusalem. (2 Cronicanan 36:17-21) Ta hopi tristo ora hende opta pa hiba un bida di pica cu ta ofende y angustia nan Creador!

Bijbel ta mustra bon cla cu mal conducta ta pone Dios pena profundamente. (Salmo 78:41) Cosnan cu ta disgusta Dios y cu e ta asta odia ta entre otro orguyo, gañamento, asesinato, practica di magia, miramento di destino, adoracion di antepasado, inmoralidad, homosexualidad, infieldad matrimonial, incest y opresion di hende pober.—Levitico 18:9-29; 19:29; Deuteronomio 18:9-12; Proverbionan 6:16-19; Yeremias 7:5-7; Malakias 2:14-16.

Kico Yehova ta pensa di idolatria? Exodo 20:4 y 5 ta bisa: “No traha ningun imagen graba pa bo mes, ni nada semehante na loke tin ariba den shelo, ni abou riba tera, ni den e awa bou di tera. No adora nan ni sirbi nan.” Pakico no? Pasobra un dios falso “ta un abominacion pa SEÑOR.” (Deuteronomio 7:25, 26) Apostel Huan a spierta: “Yiu chikitonan, warda boso di idolonan.” (1 Huan 5:21) Y apostel Pablo a skirbi: “Mi stimanan, hui for di idolatria.”—1 Corintionan 10:14.

Busca e Aprobacion di Dios

Dios su “comunion intimo [ta] cu e hende recto.” “Esnan perfecto den nan caminda ta su delicia.” (Proverbionan 3:32; 11:20) Di otro banda, hende cu na un manera terco ta sigui ofende Dios door di ignora of desafia su sintimentonan husto, pronto lo paga pa nan echonan. (2 Tesalonicensenan 1:6-10) Si, no ta falta mucho pa e pone fin na tur e maldad cu ta reina awe.—Salmo 37:9-11; Sofonias 2:2, 3.

Sinembargo, Bijbel ta mustra bon cla cu Yehova “no kier pa ningun hende bai perdi, ma pa tur bin na repentimento.” (2 Pedro 3:9) Lo e prefera di mustra su cariño pa hende husto cu ta stim’e en bes di expresa su disgusto contra esnan cu no kier cambia. Yehova tin placer no “den e morto di e malbado, ma mas bien cu e malbado bira for di su caminda y biba.”—Ezekiel 33:11.

 Pues ningun hende no tin nodi bira e blanco di Yehova su rabia. Yehova “ta yen di compasion y ta misericordioso.” (Santiago 5:11) Cu pleno confiansa den e sintimentonan di Dios, bo por ‘tira tur bo precupacion riba dje, pasobra e ta percura pa bo.’ (1 Pedro 5:7) Bo por ta sigur cu esnan cu ta haci Dios su curason contento tin e perspectiva maraviyoso di disfruta di su aprobacion y amistad. Pesei, aworaki ta mas urgente cu nunca pa ‘trata di siña loke ta agradabel na Señor.’—Efesionan 5:10.

Ta algo sumamente maraviyoso cu Dios den su bondad inmereci a revela su cualidad- y sintimentonan glorioso! Y ta den bo alcanse pa haci su curason contento. Si bo ta desea di haci esei, nos ta anima bo pa tuma contacto cu Testigonan di Yehova den bo bicindario. Gustosamente nan lo mustra bo e cosnan practico y realistico cu nan a haya den nan esfuerso pa agrada Dios.

[Nota]

[Cuadro na pagina 7]

Pakico Bijbel Ta Describi Dios den Terminonan Humano?

Siendo cu “Dios ta spirito”, nos no por mir’e cu nos wowo literal. (Huan 4:24) Pesei Bijbel ta uza idioma simbolico, manera comparacion, metafora y antropomorfismo pa yuda nos compronde e poder, mahestad y actividadnan di Dios. Antropomorfismo ta nifica atribui caracteristicanan humano na algo no humano. Pues maske nos no sa con e curpa spiritual di Dios ta, Bijbel ta bisa cu Dios tin wowo, horea, man, brasa, dede, pia y curason.—Genesis 8:21; Exodo 3:20; 31:18; Job 40:9; Salmo 18:9; 34:15.

E idioma descriptivo ei no ta nifica cu e curpa spiritual di Dios tin e mesun miembronan cu curpa humano tin. No mester interpreta e expresionnan ei den sentido literal. Nan ta djis pa yuda hende haya un miho comprondemento di Dios. Sin idioma simbolico, lo ta dificil, pa no bisa imposibel, pa simpel hende compronde cualkier descripcion di Dios. Sinembargo, esei no kiermen si cu ta hende a inventa e personalidad di Yehova Dios. Bijbel ta splica bon cla cu ta hende a ser crea den imagen di Dios, y no Dios den imagen di hende. (Genesis 1:27) Door cu escritornan di Bijbel tawata “inspira pa Dios”, e descripcion cu nan a duna di e personalidad di Dios, en realidad ta e manera cu Dios mes a describi su cualidadnan—e mesun cualidadnan cu el a hinca den diferente grado den su creacion humano. (2 Timoteo 3:16, 17) No ta trata aki di cualidad di hende den Dios, sino realmente di cualidad di Dios den hende.

[Plachi na pagina 4]

Cortesia di Anglo-Australian Observatory, potret saca door di David Malin

[Plachi na pagina 4]

Noe a haya fabor den bista di Dios

[Plachi na pagina 5]

Abraham tawata masha conciente di Dios su sintimentonan

[Plachi na pagina 6]

David a pone su pleno confiansa den Yehova

[Plachi na pagina 7]

Ora bo ta lesa Bijbel, bo por siña con pa haci Dios contento