Rumannan di Edad Ta Miembronan Balioso di Nos Hermandad Cristian

“Planta den e cas di SEÑOR, nan lo florece . . . Asta den nan biehes nan lo duna fruta.”—SALMO 92:13, 14.

1. Con hopi hende ta mira personanan di edad?

YEHOVA stima tur su sirbidonan fiel, incluso esnan di edad avansa. Sinembargo, segun un calculo nacional, na Merca tur aña nan ta abusa di casi mei miyon persona di edad of ta neglisha nan. Informenan similar for di tur parti di mundo ta indica cu abuso di hende di edad ta un problema mundial. Segun un organisacion, e causa fundamental di e problema ta “e actitud cu ta reina den hopi hende . . . cu personanan di edad ya no ta util mas, tambe nan ta improductivo y ta depende mucho di otro hende.”

2. (a) Con Yehova ta mira su sirbidonan fiel di edad? (b) Ki descripcion alentador nos ta haya na Salmo 92:12-15?

² Yehova Dios si ta balora su sirbidonan fiel di edad. E ta consentra riba e “hende interior”—nos condicion spiritual—en bes di riba nos limitacionnan fisico. (2 Corintionan 4:16) Den su Palabra, Bijbel, nos ta haya e siguiente garantia alentador: “E hende husto lo florece manera palma, e lo crece manera palo di seda na Libano. Planta den e cas di SEÑOR, nan lo florece den e plenchinan di nos Dios. Asta den nan biehes nan lo duna fruta; nan lo ta yen di vigor y berde-berde, pa declara cu SEÑOR ta recto.” (Salmo 92:12-15) Un analisis di e versiculonan aki lo revela varios aspecto di e aporte balioso cu boso, rumannan di mas edad, por duna na e hermandad cristian.

“Den Nan Biehes Nan Lo Duna Fruta”

3. (a) Dicon hende husto ta ser compara cu palma di dader? (b) Con rumannan di mas edad por ‘duna fruta asta den nan biehes’?

³ E salmista ta compara hende husto cu palma—manera por ehempel palma di dader—‘planta den e plenchinan di nos Dios.’ “Asta den nan biehes nan lo duna fruta.” Bo tambe no ta haya esaki un pensamento animador? Den tempo biblico, palmanan di dader elegante y stret tawata un bista comun riba plenchinan. Fuera di nan balor como decoracion, hende tawata balora palma di dader pa e abundancia di fruta cu nan tawata pari, y tawatin palma ta sigui pari pa mas cu shen aña. * Door  di keda firmemente planta den adoracion berdadero, bo tambe por sigui ‘duna fruta den tur bon obra.’—Colosensenan 1:10.

4, 5. (a) Ki fruta importante cristiannan tin cu produci? (b) Menciona algun ehempel biblico di personanan di edad cu a produci “e fruta di lipnan.”

⁴ Yehova ta spera di cristiannan cu nan ta produci “e fruta di lipnan”, esta, palabranan cu ta expresa alabansa na dje y na su proposito. (Hebreonan 13:15) Esaki ta aplica na abo como un persona di mas edad? Sigur cu si.

⁵ Den Bijbel tin ehempel di personanan di edad cu sin miedo a duna testimonio di Yehova su nomber y proposito. Moises tawata riba “setenta aña” ora cu Yehova a nombr’e como su profeta y representante. (Salmo 90:10; Exodo 4:10-17) Edad avansa no a stroba profeta Daniel di duna testimonio tocante Yehova su soberania, y el a hacie sin miedo. Daniel probablemente tawatin 90 y pico aña ora cu Belsasar a manda yam’e pa interpreta e skirbimento misterioso riba muraya. (Daniel, capitulo 5) Y kico di apostel Huan den su biehes? Na final di su bida largo di sirbishi fiel, e tawata encarsela riba e isla di Patmos “pa motibo di e palabra di Dios y e testimonio di Hesus.” (Revelacion 1:9) Muy probablemente bo ta corda hopi personahe biblico mas cu a produci “e fruta di lipnan” den nan biehes.—1 Samuel 8:1, 10; 12:2; 1 Reinan 14:4, 5; Lucas 1:7, 67-79; 2:22-32.

6. Con Yehova a uza “ancianonan” pa profetisa den e ultimo dianan aki?

⁶ Citando e profeta Hebreo Joel, apostel Pedro a declara: “‘Lo sosode den e ultimo dianan’, Dios ta bisa, ‘cu lo mi basha di mi spirito riba henter humanidad [incluso riba hende di edad, e “ancianonan”]; . . . y nan lo profetisa.’” (Echonan 2:17, 18; Joel 2:28) Na harmonia cu esei, den e ultimo dianan aki Yehova a uza miembronan di edad di e unginan y di e “otro carnenan” pa declara su proposito. (Huan 10:16) Algun di nan ya pa varios decada ta produciendo fruta di Reino fielmente.

7. Duna un ehempel con rumannan di edad por sigui produci fruta di Reino apesar di limitacionnan fisico.

⁷ Tuma por ehempel Sonia, kende a bira un publicado di Reino di tempo completo na aña 1941. Apesar di un lucha largo cu malesa cronico, el a conduci studionan di Bijbel cu regularidad na su cas. Sonia a splica: “Predicacion di e bon nobo ta parti di mi bida. De echo, esei ta mi bida. Mi ta nenga di bai cu pension.” No mucho tempo pasa, Sonia cu su ruman mohe, Olive, a comparti e mensahe di speransa cu tin den Bijbel cu Janet. Janet tawata un pashent cu un malesa terminal cu nan a topa den sala di espera na hospital. Mama di Janet, un catolico deboto, a keda asina impresiona cu e interes amoroso aki cu nan a mustra den su yiu mohe, cu e mama a acepta un studio di Bijbel y awor e ta haciendo excelente progreso. Abo lo por probecha di oportunidadnan similar pa produci fruta di Reino?

8. Con Caleb den su biehes a demostra confiansa den Yehova, y con cristiannan di edad por imita su ehempel?

⁸ Door di sigui persisti den e predicacion di Reino apesar di e limitacionnan di edad avansa, cristiannan di mas edad ta imitando ehempel di e fiel Israelita Caleb, cu pa 40 aña largo a compaña Moises den desierto. Caleb tawatin 79 aña ora cu el a crusa Riu Yordan y  a drenta den e Tera Priminti. Despues di a lucha pa seis aña como solda den e ehersito victorioso di Israel, lo e por a keda satisfecho cu su logronan y no haci nada mas. Pero no, cu curashi el a pidi un asignacion dificil. Esta, pa captura e “stadnan grandi y fortifica” den e seronan di Huda, un area habita pa e Anakeonan, hombernan di tamaño extraordinario. Cu yudansa di Yehova, Caleb a “core cu nan manera SEÑOR a papia.” (Hosue 14:9-14; 15:13, 14) Bo por tin sigur cu Yehova ta cu bo, mescos cu e tawata cu Caleb, segun cu bo ta sigui produci fruta di Reino den bo biehes. Y si bo keda fiel, lo e duna bo un luga den su mundo nobo priminti.—Isaias 40:29-31; 2 Pedro 3:13.

“Nan Lo Ta Yen di Vigor y Berde-Berde”

9, 10. Con cristiannan di mas edad por keda sano den fe y mantene nan vigor spiritual? (Wak e cuadro na pagina 13.)

⁹ Halando atencion na e productividad di Yehova su sirbidonan di edad avansa, e salmista a canta: “E hende husto lo florece manera palma, e lo crece manera palo di seda na Libano. Asta den nan biehes nan lo duna fruta; nan lo ta yen di vigor y berde-berde.”—Salmo 92:12, 14.

¹⁰ Con bo por mantene bo vigor spiritual apesar di edad avansa? E secreto di e palma su beyesa continuo ta un fuente constante di awa dushi. Di igual manera, abo por saca sosten for di e awanan di berdad biblico door di studia e Palabra di Dios y door di asocia cu su organisacion. (Salmo 1:1-3; Yeremias 17:7, 8) Bo vitalidad spiritual ta haci bo un fuente di yudansa balioso pa otro rumannan den fe. Ban wak con esaki tawata e caso cu Sumo Sacerdote Joiada ora cu ya e tawata un homber di edad avansa.

11, 12. (a) Ki papel importante Joiada a hunga den e historia di e reino di Huda? (b) Con Joiada a uza su influencia pa promove adoracion berdadero?

¹¹ Joiada tawatin probablemente mas cu shen aña ora cu Reina Atalia, un reina ambicioso, a tuma control di Huda door di asesina su propio nietonan. Kico e homber bieu Joiada por a haci? Pa seis aña largo e cu su casa a sconde Joas den e tempel. Joas tawata e unico heredero real cu a sobrevivi. Anto ora Joas tawatin shete aña, Joiada a dal un paso dramatico, y a proclam’e como rei, y a laga ehecuta Atalia.—2 Cronicanan 22:10-12; 23:1-3, 15, 21.

¹² Como tutor di e Rei, Joiada a uza su influencia pa promove adoracion berdadero. El “a sera un aliansa entre su mes y henter e pueblo y Rei, cu nan lo ta e pueblo di SEÑOR.” Riba ordo di Joiada, e pueblo a basha e cas di e dios falso Baal abou y a elimina su altarnan, su imagennan y su sacerdote. Tambe ta bou di guia di Joiada cu Joas a restaura e servicionan di tempel y a haci e reparacionnan tan necesario di e tempel. “Joas a haci bon den bista di SEÑOR tur e dianan cu sacerdote Joiada tawata instru’e.” (2 Cronicanan 23:11, 16-19; 24:11-14; 2 Reinan 12:2) Ora cu Joiada a muri na edad di 130 aña, el a haya e honor excepcional di ser dera hunto cu e reinan pasobra “el a haci loke ta bon den Israel y na Dios y Su cas.”—2 Cronicanan 24:15, 16.

13. Con cristiannan di edad por ‘haci loke ta bon na Dios y su cas’?

¹³ Podise problema cu salu y otro circunstancianan ta limita loke bo por haci pa promove adoracion berdadero. Asta si ta asina, bo tin chens pa ‘haci loke ta bon na Dios y su cas.’ Bo por desplega celo pa Yehova su cas spiritual door di asisti y participa na reunionnan di congregacion y door di sali den sirbishi di veld ki ora cu ta posibel. E echo cu bo ta acepta conseho biblico di buena gana y ta duna fiel apoyo na “e esclabo fiel y prudente” y na e congregacion, lo contribui na fortalece e hermandad cristian. (Mateo 24:45-47) Tambe bo por stimula rumannan den fe “pa stima y haci bon obra.” (Hebreonan 10:24, 25; Filemon 8, 9) Anto lo bo ta un bendicion pa otro hende si bo actua na harmonia  cu e siguiente conseho di apostel Pablo: “Hombernan di edad mester ta modera, digno, huicioso, sano [“vigoroso”, An American Translation] den fe, den amor, den perseverancia. Di e mesun manera, mohenan di edad mester ta reverente den nan comportacion, no calumniado, ni esclabisa na biña, siñando loke ta bon.”—Tito 2:2-4.

14. Kico superintendentenan cristian cu ta sirbi pa hopi aña por haci pa promove adoracion berdadero?

¹⁴ Bo tin hopi aña ta sirbi como anciano di congregacion? “E sabiduria cu bo a acumula atrabes di añanan uz’e desinteresadamente”, ta e conseho di un ruman cu tin hopi aña como anciano di congregacion. Tambe el a bisa: “Delega responsabilidad, y comparti bo experencia cu otro rumannan cu ta ansioso pa siña . . . Wak e potencial cu otro rumannan tin. Expande y cultiva e potencial ei. Prepara pa futuro.” (Deuteronomio 3:27, 28) Bo interes sinsero den e trabou di predica e Reino, un trabou cu ta creciendo constantemente, lo resulta den hopi bendicion pa otro rumannan den nos hermandad cristian.

‘Declara Cu Yehova Ta Recto’

15. Con cristiannan di edad ta ‘declara cu Yehova ta recto’?

¹⁵ Dios su sirbidonan di edad cu goso ta cumpli cu nan responsabilidad di “declara cu SEÑOR ta recto.” Si bo ta un cristian di edad, bo palabra- y echonan por mustra otro hende cu Yehova ‘ta bo Baranca, y no tin inhusticia den dje.’ (Salmo 92:15) E palma di dader ta duna testimonio silencioso di e cualidadnan sobresaliente di su Creador. Pero Yehova a duna abo e privilegio di duna testimonio cu boca tocante dje na hende cu awor ta acepta adoracion berdadero. (Deuteronomio 32:7; Salmo 71:17, 18; Joel 1:2, 3) Dicon esaki ta importante?

16. Ki ehempel biblico ta ilustra e importancia di ‘declara cu Yehova ta recto’?

¹⁶ Ora cu e lider Israelita Hosue “tawata bieu y di edad avansa”, el “a manda yama henter Israel, nan ancianonan, nan cabesantenan, nan huesnan y nan oficialnan”, y a recorda nan di Dios su trato recto. El a bisa: “Ni un palabra di tur e bon palabranan cu SEÑOR boso Dios a papia tocante  di boso no a faya; tur a keda cumpli pa boso.” (Hosue 23:1, 2, 14) Pa un tempo, e palabranan aki a fortalece e pueblo su determinacion pa keda fiel. Sinembargo, despues di Hosue su morto, “a lanta un otro generacion . . . cu no tawata conoce SEÑOR, ni e obra cu el a haci pa Israel. Anto e yiunan di Israel a haci maldad den bista di SEÑOR y a sirbi e Baalnan.”—Huesnan 2:8-11.

17. Con Yehova a trata cu su pueblo den tempo moderno?

¹⁷ E integridad di e congregacion cristian djawe no ta depende di e testimonio oral di Dios su sirbidonan. Sinembargo, nos fe den Yehova y den su promesanan ta ser reforsa ora cu nos tende relatonan personal di e “gran obra” cu Yehova a haci pa su pueblo den e ultimo dianan aki. (Huesnan 2:7; 2 Pedro 1:16-19) Si bo tin hopi aña ta asocia cu Yehova su organisacion, kisas bo ta corda tempo cu tawatin masha tiki proclamado di Reino den bo region of pais of tempo cu e trabou di predica tawata confronta varios problema. Cu tempo, bo a mira con Yehova a elimina cierto obstaculonan y a acelera of “pura” crecemento di e cantidad di publicadonan. (Isaias 54:17; 60:22) Tambe bo a mira con berdadnan biblico a wordo clarifica y bo tawata testigo di e refinamentonan progresivo di e parti visibel di Dios su organisacion. (Proverbionan 4:18; Isaias 60:17) Bo sa purba curasha otro rumannan door di conta nan con bo a experencia Yehova su trato recto? Esei por tin un efecto hopi positivo y fortalecedor riba e hermandad cristian!

18. (a) Duna un ehempel di e efecto riba termino largo di ‘conta otro hende cu Yehova ta recto.’ (b) Con abo personalmente a experencia Yehova su rectitud?

18 Kico di e ocasionnan cu bo a experencia Yehova su cuido y guia amoroso den bo bida personal? (Salmo 37:25; Mateo 6:33; 1 Pedro 5:7) Un ruman mohe di edad cu yama Martha tawatin custumber di curasha otro hende cu e palabranan: “Kico cu pasa, nunca bandona Yehova. Lo e sostene bo.” E conseho aki tawatin un efecto profundo riba Tolmina, un di Martha su studiantenan di Bijbel cu a batisa na principio di decada di 1960. Tolmina a conta: “Ora cu mi casa a muri, mi a sinti mi hopi desanima, pero e palabranan ei a haci mi dicidido pa no falta ni un solo reunion. Y Yehova realmente a fortalece mi pa sigui padilanti.” Atrabes di añanan Tolmina a duna e mesun conseho ei na hopi di su propio studiantenan di Bijbel. Si, door di duna animacion y conta tocante Yehova su trato recto, bo por contribui masha hopi na edifica e fe di e rumannan.

 Yehova Ta Balora Rumannan Fiel di Edad

19, 20. (a) Con Yehova ta mira e actividad di su sirbidonan di edad? (b) Kico nos lo considera den e siguiente articulo?

19 E mundo ingrato djawe, no ta tene masha consideracion cu hende di edad. (2 Timoteo 3:1, 2) Asta si nan corda mes riba hende di edad, hopi bes ta debi na nan logronan di pasado; pa loke nan tawata, en bes di pa loke nan ta. Na contraste, Bijbel ta bisa: “Dios no ta inhusto pa lubida boso trabou y e amor cu boso a mustra pa su nomber, door cu boso a sirbi y ainda ta sirbi e santonan.” (Hebreonan 6:10) Claro cu Yehova Dios ta corda bo registro di obranan fiel cu bo a haci den pasado. Pero tambe e ta balora bo pa loke bo ta sigui haci den su sirbishi. Si, Yehova ta mira rumannan fiel di edad como cristiannan productivo, spiritualmente sano y vigoroso, un testimonio bibo di su poder.—Filipensenan 4:13, NW.

20 Abo ta mira e miembronan di mas edad di nos hermandad cristian manera Yehova ta mira nan? Si bo ta hacie, anto lo bo sinti bo motiva pa demostra bo amor pa nan. (1 Huan 3:18) Den e siguiente articulo nos lo considera algun manera practico pa demostra tal amor door di percura pa nan necesidadnan.

[Nota]

Kico Ta Bo Contesta?

• Con rumannan di edad ta “produci fruta”?

• Dicon e vitalidad spiritual di cristiannan di edad ta un fuente di yudansa balioso?

• Con esnan di edad por ‘declara cu Yehova ta recto’?

• Dicon Yehova ta balora su sirbidonan cu tin hopi tempo ta sirbie?

[Preguntanan di Estudio]

[Cuadro na pagina 13]

Con Nan A Keda Sano den Fe

Kico a yuda cristiannan cu tin hopi tempo den e berdad, pa keda sano den fe y mantene nan vigor spiritual? At’aki loke algun di nan a bisa:

“Ta masha importante pa lesa textonan biblico cu ta enfoca riba nos relacion cu Yehova. Casi tur anochi mi ta resita Salmo 23 y 91.”—Olive, batisa na 1930.

“Mi tawata haci sigur pa mi ta presente na tur discurso di bautismo y pa mi scucha nan bon, como si fuera ta mi propio bautismo. Manteniendo mi dedicacion fresco den mi mente tawata un paso importante cu a yuda mi keda fiel.”—Harry, batisa na 1946.

“Ta sumamente importante pa haci oracion tur dia, pidiendo Yehova tur ora bai pa su yudansa, proteccion y bendicion, y ‘tumando nota di dje den tur nos camindanan.’” (Proverbionan 3:5, 6)—Antônio, batisa na 1951.

“Ora mi scucha experencia di rumannan cu ainda ta sirbi Yehova fielmente despues di asina tanto aña, esei ta renoba mi determinacion pa keda fiel na dje.”—Joan, batisa na 1954.

“Ta importante pa nos no pensa mucho di nos mes. Tur loke nos tin ta debi na Dios su bondad inmereci. Si nos tin e punto di bista aki, nos lo sigui busca den e direccion corecto pa haya e alimento spiritual necesario pa persevera te na fin.”—Arlene, batisa na 1954.

[Plachi na pagina 11]

Rumannan di edad ta produci fruta di Reino balioso

[Plachi na pagina 14]

E vitalidad spiritual di e rumannan di edad ta un fuente di yudansa balioso