Bo Circunstancianan Ta Controla Bo Bida?

CIRCUNSTANCIANAN angustioso y problema ta comun den e “temponan trabahoso” aki. (2 Timoteo 3:1) Algun problema kisas ta temporal y pues cu tempo nan ta pasa bai. Otro problemanan ta persisti pa lunanan of asta añanan largo. Como resultado, hopi hende ta sinti manera e salmista David, kende a sclama na Yehova: “E angustianan di mi curason ta aumenta; saca mi for di mi anshanan.”—Salmo 25:17.

Abo ta luchando cu problemanan aplastante? Si ta asina, bo por haya yudansa y animacion den Bijbel. Laga nos considera bida di dos fiel sirbido di Yehova kendenan tawatin exito den trata cu dificultad: Yosef y David. Door di analisa con nan a reacciona den situacionnan dificil, nos por siña lesnan practico cu lo yuda nos trata cu retonan similar awe.

Confronta cu Dificultadnan Serio

Pa ora Yosef tawatin 17 aña, e tawatin un problema serio den su propio famia. Su ruman hombernan grandi a mira cu Yacob, nan tata, “tawata stima [Yosef] mas cu tur su otro ruman hombernan.” Consecuentemente, “nan a odi’e y no por a papia cu ne cu cariño.” (Genesis 37:4) Nos por imagina e ansha y tension cu e situacion aki a causa Yosef. Cu tempo, e odio di e rumannan di Yosef a bira asina intenso cu nan a bend’e como catibo.—Genesis 37:26-33.

Como catibo den Egipto, Yosef tawatin cu resisti e proposicionnan inmoral di esposa di su shon. Rabia pasobra Yosef a rechas’e, e mohe a acusa Yosef falsamente di a purba viol’e. Nan a cohe Yosef “ser’e den prizon”, caminda “nan a lastima su pianan cu bui, y su nek nan a sera den hero.” (Genesis 39:7-20; Salmo 105:17, 18) Esta dificil esaki lo mester tawata p’e! Pa mas o menos 13 aña, Yosef tawata sea catibo of preso debi na inhusticia cu el a sufri na man di otro hende, incluso miembronan di su propio famia.—Genesis 37:2; 41:46.

 David di antiguo Israel tambe a confronta prueba tempo e tawata jong. Pa varios aña el a hay’e obliga ta biba como fugitivo, persigui manera un bestia door di Rei Saul. David su bida tawata constantemente den peliger. Na un ocasion, el a bai serca Ahimelek e sacerdote pa busca cuminda. (1 Samuel 21:1-7) Ora Saul a haya sa cu Ahimelek a yuda David, el a ordena pa ehecuta no solamente Ahimelek sino tambe tur e sacerdotenan y nan famia. (1 Samuel 22:12-19) Bo por imagina e dolor cu David lo mester a sinti como cu indirectamente el a causa e tragedia aki?

Pensa riba e añanan di dificultad y maltrato cu Yosef y David a soporta. Nos por siña lesnan balioso door di analisa con nan a maneha nan situacionnan dificil. Laga nos considera tres manera cu e hombernan aki ta digno di imitacion.

Stop di Carga Rencor y Amargura

Na prome luga, e hombernan fiel aki a nenga di cai den e trampa di amargura y rencor. Mientras cu Yosef tawata den prizon, facilmente lo e por a sinta pensa cu amargura riba e manera cu su rumannan a traicion’e, kisas planiando con lo e tuma vengansa contra nan si un dia e bolbe mira nan. Pero con nos por sa cu Yosef a resisti tal manera di pensa destructivo? Wak con el a reacciona ora cu el a haya chens di tuma vengansa contra su rumannan cu a bin Egipto pa cumpra grano. E relato ta bisa: “Hose (Yosef) a kita bai for di [su rumannan] y a yora. . . . E ora ei Hose a duna ordo pa yena nan saco cu maishi y pa pone cada un su placa bek den su saco, y pa duna nan provision pa na caminda.” Despues, ora cu Yosef a manda su rumannan bai busca nan tata pa trec’e Egipto, el a anima nan cu e palabranan: “No pleita na caminda.” Cu palabra y accion, Yosef a duna prueba cu e no a laga amargura y rencor venena su bida.—Genesis 42:24, 25; 45:24.

Di igual manera, David tampoco no a carga rencor contra Rei Saul. Na dos ocasion David a haya oportunidad pa mata Saul. Sinembargo, ora cu David su hombernan a curash’e pa haci esei, el a bisa: “Cu esaki sea leu di mi di haci un cos asin’aki cu mi señor, [Yehova] su ungi, di lanta mi man contra dje, siendo cu e ta [Yehova] su ungi.” David a laga e asunto den man di Yehova, y a bisa su hombernan: “Manera SEÑOR ta biba, siguramente SEÑOR lo dal e, of su dia di muri lo yega, of e lo bai den bataya y perece.” Mas despues, David a asta compone un cantica di lamento pa yora e morto di Saul y di Saul su yiu homber Yonatan. Mescos cu Yosef, David no a laga rencor absorb’e.—1 Samuel 24:3-6; 26:7-13; 2 Samuel 1:17-27.

 Nos ta carga rencor y amargura ora cu algun inhusticia causa nos dolor? Esaki por sosode facilmente. Si nos permiti nos emocionnan domina nos, e resultado por ta mas dañino pa nos cu e inhusticia mes. (Efesionan 4:26, 27) Aunke kisas nos no tin masha control riba loke otro hende ta haci, nos reaccion si nos por controla. Ta mas facil pa stop di carga rencor y amargura ora cu nos tin fe cu Yehova lo atende e asunto na su debido tempo.—Romanonan 12:17-19.

Saca Lo Miho for di Bo Situacion

E di dos les cu nos por siña ta pa no laga nos circunstancianan paralisa nos bida. Nos por bira asina precupa pa loke nos no por haci, cu nos ta perde for di bista loke si nos por haci. De echo, nos circunstancianan ta cuminsa controla nos. Esaki lo por a pasa cu Yosef. Pero na luga di esei, Yosef a scohe pa saca lo miho for di su situacion. Mientras cu Yosef tawata sirbi como catibo pa Potifar, el “a haya gracia den [Potifar] su bista y a bira su sirbido personal; y el a hacie mayordomo di su cas, y tur loke cu e tawatin el a pone na su encargo.” Den prizon tambe Yosef tawatin mesun actitud. Debi na Yehova su bendicion y Yosef su actitud diligente, “e hefe di prizon a pone tur e presonan cu tawata den prizon bou di encargo di Yosef, asina cu e tawata responsabel pa tur loke tawata pasa ayanan.”—Genesis 39:4, 21-23.

Durante e añanan cu David a biba como fugitivo, e tambe a saca lo miho for di su circunstancia. Mientras e tawata biba den e desierto di Paran, e cu su hombernan a proteha e tou di Nabal contra bandido. Un di Nabal su wardadonan di carne a bisa: “Nan tawata un muraya pa nos di dia y anochi.” (1 Samuel 25:16) Mas despues, durante su estadia na Ziklag, David a invadi stadnan cu tawata den poder di enemigonan di Israel den suit, y asina a tuma pocesion di e fronteranan di Huda.—1 Samuel 27:8; 1 Cronicanan 12:20-22.

Kisas den nos caso, nos lo tin cu haci mas esfuerso pa saca lo miho for di nos circunstancia? Aunke esei podise ta un reto, nos por tin exito. Ora apostel Pablo tawata reflexiona riba su bida, el a skirbi: “Mi a siña di ta contento den ki circunstancia cu mi haya mi aden. . . . Den cualkier y den tur circunstancia mi a siña e secreto di ta bariga yen y di pasa hamber, tanto di tin abundancia como di pasa necesidad.” Con Pablo a logra cultiva e actitud aki pa cu bida? Door di depende continuamente riba Yehova. El a reconoce: “Tur cos mi por den [“Esun”, NW], kende ta duna mi fortalesa.”—Filipensenan 4:11-13.

Spera Riba Yehova

E di tres les ta cu nos mester spera riba Yehova, en bes di uza medionan cu no ta cuadra cu Bijbel pa cambia nos circunstancia. Disipel Santiago a skirbi: “Laga perseverancia tin su resultado perfecto, pa boso por ta perfecto y completo, sin falta di nada.” (Santiago 1:4) Nos mester laga perseverancia “tin su resultado perfecto” of completo, door di permiti un prueba sigui su rumbo sin recori na medionan cu no ta cuadra cu Bijbel pa pone un fin rapido na dje. E ora ei nos fe lo ser getest y refina, y esei lo revela su poder di sostene nos. Yosef y David tawatin e tipo di perseverancia aki. Nan no a purba bin cu un solucion cu lo por a haci Yehova malcontento. Al contrario, nan a traha pa saca lo miho for di nan situacion. Nan a spera riba Yehova, y a ricibi bendicionnan grandi door di a haci esei. Yehova a uza nan tur dos pa libra y dirigi su pueblo.—Genesis 41:39-41; 45:5; 2 Samuel 5:4, 5.

Kisas nos tambe ta confronta situacionnan pa cua nos lo por sinti e tentacion pa busca solucionnan cu no ta cuadra cu Bijbel. Por ehempel, bo ta sinti bo desanima pasobra ainda bo no a haya un bon casa? Si ta asina, evita cualkier tentacion pa desobedece Yehova su mandamento di casa “basta ta den  Señor.” (1 Corintionan 7:39) Bo tin problema den bo matrimonio? En bes di entrega na e spirito di mundo cu ta promove separacion y diborcio, haci esfuerso pa resolve e dificultadnan hunto. (Malakias 2:16; Efesionan 5:21-33) Bo tin problema pa percura pa bo famia debi na bo situacion economico? Spera riba Yehova ta encera cu bo ta evita actividadnan cuestionabel of ilegal den bo intento pa haya placa. (Salmo 37:25; Hebreonan 13:18) Si, nos tur tin cu traha duro pa saca lo miho for di nos circunstancia y haci esfuerso pa duna Yehova algo cu e por bendiciona. Segun cu nos ta haci esei, laga nos ta dicidido pa spera riba Yehova pa trece e solucion perfecto.—Mikeas 7:7.

Yehova Lo Sostene Bo

Meditando riba con personahenan biblico manera Yosef y David a trata cu decepcion y situacionnan dificil cu exito por tin un efecto positivo riba nos. Aunke Bijbel ta relata nan storia den simplemente un par di pagina, nan pruebanan a dura hopi aña. Puntra bo mes: ‘Con e sirbidonan ei di Dios a siña acepta nan circunstancia? Con nan a mantene nan goso? Ki cualidadnan nan a desaroya?’

Tambe ta bon pa nos considera e perseverancia di sirbidonan di Yehova den nos tempo. (1 Pedro 5:9) Tur aña ta sali hopi storia di bida den e revistanan Toren di Vigilancia y Spierta! Bo ta lesa nan y medita riba e ehempel di e cristiannan fiel aki? Ademas, den nos congregacionnan tin ruman cu fielmente ta soporta circunstancia desagradabel. Bo ta asocia regularmente cu nan y siña for di nan na reunionnan di congregacion?—Hebreonan 10:24, 25.

Ora bo ta confronta circunstancianan dificil, bo por tin sigur cu Yehova ta interesa den bo y lo sostene bo. (1 Pedro 5:6-10) Haci esfuerso pa no laga bo circunstancia controla bo bida. Sigui e ehempel di Yosef, David y otro rumannan door di stop di carga rencor, saca lo miho for di bo situacion y spera riba Yehova pa e solucion perfecto. Hala serca Yehova pa medio di oracion y actividadnan spiritual. Den e manera aki, bo tambe lo mira cu bo por tin goso y felicidad asta den tempo dificil.—Salmo 34:8.

[Plachi na pagina 20, 21]

Yosef a haci esfuerso pa saca lo miho for di su circunstancia

[Plachi na pagina 23]

David a spera riba Yehova pa haya solucion pa su problemanan