Bo Mester Ta Miembro di un Religion?

‘MI NO tin nodi pertenece na ningun religion ni bai misa tur ora pa mi kere den Dios!’ Esei ta e pensamento cu hopi hende tin; nan no ta haya cu nan mester ta miembro di un grupo religioso. De echo, algun ta bisa cu nan ta sinti nan mas serca Dios ora nan ta disfruta pafo den naturalesa, cu ora nan ta den un servicio religioso den misa. E opinion general cu ta reina awe ta cu bo no tin nodi afilia na un grupo of organisacion religioso pa kere den Dios.

Otro hende si tin henteramente un otro opinion, y nan ta hopi sinsero den esei. Nan ta haya cu si bo kier ta bon mira den bista di Dios, ta necesario y asta vital pa bo ta miembro di un iglesia y pa bo bai misa. Pues e cuestion cu si ta realmente necesario pa afilia na un religion no ta djis un asunto di si bo ta haya esei interesante of laga. Siendo cu esaki tin di aber cu nos relacion cu Dios, no ta logico pa busca pa sa kico ta su punto di bista riba e asunto aki? Kico nos por siña for di su Palabra, Bijbel, relaciona cu e topico aki?

Dios Su Trato cu Hende den Pasado

Casi 4.400 aña pasa, tawatin un dilubio catastrofico cu a tapa tera completamente bou di awa. Un suseso asina lo no a pasa facilmente pa olvido, y rond mundo pueblonan tin nan cuentanan tocante dje den nan leyendanan di antaño. Kisas e detayenan ta varia, pero e cuentanan aki tin hopi cos en comun, incluso e echo cu ta apenas un par di hende y algun animal a logra scapa.

Ta simplemente suerte e sobrevivientenan di e Dilubio tawatin of ta ‘di bon’ nan tawata cu nan a scapa for di e destruccion? Segun e relato biblico, esei no ta asina. Ta bon pa remarca cu Dios no a informa cada hende individualmente tocante e benidero Dilubio. Mas bien, el a bisa Noe, kende na su turno a spierta e  hendenan di su tempo di e Dilubio cu tawata na caminda.—Genesis 6:13-16; 2 Pedro 2:5.

Pa hende por a sobrevivi nan mester tawatin laso estrecho cu e grupo di Noe y tambe nan mester tawata dispuesto pa acepta e instruccion cu Dios a duna Noe. Si no tawata pa e grupo aki, ni e animalnan cu tawata den e arca lo no a sobrevivi e Dilubio. Noe a haya instruccion spesifico encuanto e medidanan apropiado cu e tawatin cu tuma pa conserva bida di animal.—Genesis 6:17–7:8.

Siglonan despues, desendientenan di Noe cu a bini for di su yiu Sem a bira catibo na Egipto. Pero e proposito di Dios tawata pa libra nan y trece nan na e tera cu el a priminti nan antepasado Abraham. Den e caso aki tambe nos ta mira cu esaki no a wordo revela na cada persona individualmente. Mas bien, Dios a revel’e prome na e personanan cu el a scohe como nan lider, esta Moises y su ruman Aron. (Exodo 3:7-10; 4:27-31) Despues cu e excatibonan a ser libra como grupo for di Egipto, nan a haya e Lei di Dios na Sero Sinai y a ser forma den e nacion di Israel.—Exodo 19:1-6.

E unico manera cu e Israelitanan por a haya nan liberacion ta door cu nan tawata forma parti di un grupo estableci pa Dios y a sigui e guia di e lidernan nombra di e grupo aki. Tawatin asta e posibilidad pa e Egipcionan individualmente forma parti di e grupo aki, cu obviamente tawatin e aprobacion di Dios. Ora e Israelitanan a bandona Egipto, e personanan aki a bai hunto cu nan, y door di esei nan tambe a haya e oportunidad di ricibi e bendicion di Dios.—Exodo 12:37, 38.

Despues, den prome siglo, Hesus a cuminsa su actividad di predica, reuniendo un grupo di hende como su disipelnan. Aunke el a mustra interes amoroso den algun di e personanan aki individualmente segun nan necesidad, el a trata nan como grupo. Hesus a bisa e 11 fiel apostelnan: “Boso ta esnan cu a permanece cu mi henter ora durante mi pruebanan; y mi ta sera un pacto cu boso, mescos cu mi Tata a sera un pacto cu mi, pa un reino.” (Lucas 22:28, 29, NW) Poco tempo despues, ora e disipelnan tawata hunto como grupo, spirito santo di Dios a baha riba nan.—Echonan 2:1-4.

E ehempelnan aki ta mustra bon cla cu den pasado semper Dios a trata cu su pueblo como un grupo organisa. El a uza e poco personanan cu e tawatin un trato personal cu ne—Noe, Moises, Hesus y otro hende—pa comunica cu un grupo estrechamente uni. No tin ningun motibo pa kere cu Dios ta trata su sirbidonan djawe na un manera diferente. Awor, esaki ta hiba na e siguiente preguntanan: Ta na cua grupo religioso bo tin cu afilia? Tur ta bon? Nos lo considera e preguntanan vital aki den e siguiente articulo.

[Plachi na pagina 4]

Pa hopi tempo Dios a trata cu su pueblo como un grupo organisa