Creacion Ta Declara e Gloria di Dios!

“E shelonan ta conta di e gloria di Dios; y e firmamento ta proclama e obra di su mannan.”—SALMO 19:1.

1, 2. (a) Dicon hende no por mira e gloria di Dios directamente? (b) Con e 24 ancianonan ta duna gloria na Dios?

“BO NO por mira mi cara, pasobra ningun hende no por mira mi y keda na bida!” (Exodo 33:20) Asina Yehova a spierta Moises. Como cu hende ta traha di carni delicado, nan no por mira e gloria di Dios directamente y sobrevivi esei. Sinembargo, den un vision apostel Huan a ricibi un bista espectacular di Yehova sinta riba Su trono glorioso.—Revelacion 4:1-3.

² Distinto for di hende, fiel criaturanan spiritual si por mira Yehova su cara. Entre nan tin e ‘binticuater ancianonan’ cu Huan a mira den su vision celestial y cu ta representa e 144.000. (Revelacion 4:4; 14:1-3) Con nan ta reacciona ora nan ta mira e gloria di Dios? Segun Revelacion 4:11, nan ta declara: “Digno bo ta, nos Señor y nos Dios, pa ricibi gloria y honor y poder; pasobra abo a crea tur cos, y pa motibo di bo boluntad nan tawata existi, y a wordo crea.”

Dicon “Nan No Tin Excuse”

3, 4. (a) Dicon no ta asina cu fe den Dios no ta cuadra cu ciencia? (b) Den algun caso, kico tin tras di e echo cu hende ta nenga di kere den Dios?

³ Abo ta ser motiva pa duna gloria na Dios? E gran mayoria di humanidad no, y algun asta ta nenga cu Dios ta existi. Por ehempel, un astronomo a skirbi: “Acaso ta Dios ta esun cu a interveni y di un manera masha providencial a traha e universo pa nos beneficio? . . . Ki un perspectiva excitante. Desafortunadamente mi ta kere cu esei ta puro ilusion. . . . Dios no ta un splicacion [satisfactorio].”

⁴ Investigacion cientifico ta limita, pasobra por hacie solamente a base di loke hende por observa of studia. Fuera di esei e ta puro teoria y reimento. Siendo cu “Dios ta Spirito”, ta imposibel pa observ’e y studi’e cu metodonan cientifico. (Huan 4:24) Pesei ta un muestra di arogancia pa rechasa fe den Dios pasobra supuestamente e no ta cuadra cu ciencia. Cientifico Vincent Wigglesworth di Universidad di Cambridge a remarca cu e metodo cientifico riba su mes ta “un metodo religioso”, es decir, cu e ta depende  di fe. Con asina? El a bisa: “E ta basa riba un fe absoluto cu tur fenomeno natural [cosnan den naturalesa manera awasero y temblor] ta sosode conforme ‘leinan di naturalesa.’” Pues, ora un hende rechasa creencia den Dios, acaso e no ta simplemente nenga fe den Dios pa na su luga e pone fe den e metodo cientifico? Den algun caso, ta parce cu hende ta nenga di kere den Dios deliberadamente, ya nan no tin cu acepta e berdad. E salmista a skirbi: “E malbado, cu su cara yen di orguyo, no ta busca Dios. Tur su pensamentonan ta: ‘No tin Dios.’”—Salmo 10:4.

5. Dicon no tin excuse pa esnan cu no kier kere den Dios?

⁵ Sinembargo, fe den Dios no ta djis kere ciegamente, pasobra tin evidencia abrumador cu Dios ta existi. (Hebreonan 11:1, NW) Astronomo Allan Sandage a bisa: “Mi ta haya cu ta sumamente improbabel cu un areglo asina harmonioso [den universo] a origina di caos. Mester tin un fuente principal di ordo y organisacion. Pa mi, Dios ta un misterio, pero e ta e splicacion di e milager di existencia, dicon cosnan ta existi.” Apostel Pablo a bisa cristiannan na Roma cu Dios su “atributonan invisibel, su poder eterno y naturalesa dibino, a wordo mira claramente, siendo comprendi door di loke a wordo traha, asina cu nan [esnan cu no kier kere] no tin excuse.” (Romanonan 1:20) “Door di loke a wordo traha”—spesificamente desde creacion di criaturanan humano inteligente, cu por a compronde existencia di Dios—ta evidente cu tin un Creador cu poder inmenso, un Dios digno di debocion. Pues no tin excuse pa esnan cu keda sin reconoce Dios su gloria. Pero ta ki evidencia creacion ta duna?

Universo Ta Declara e Gloria di Dios

6, 7. (a) Con shelo ta declara e gloria di Dios? (b) Pa ki proposito shelo a manda “liña di midi”?

⁶ Salmo 19:1 ta contesta bisando: “E shelonan ta conta di e gloria di Dios; y e firmamento ta proclama e obra di su mannan.” David a ripara cu e streya- y planetanan cu ta briya den “firmamento”, of atmosfer, ta duna prueba irefutabel cu ta existi un Dios glorioso. El a sigui bisa: “Dia ta emiti palabra na otro dia, y nochi ta revela conocemento na otro nochi.” (Salmo 19:2) Dia tras dia y nochi tras nochi, shelo ta manifesta Dios su sabiduria y poder di crea. Ta como si fuera shelo ta expresa alabansa na Dios cu ‘palabranan’ cu nos por tende.

⁷ Sinembargo, nos mester tin discernimento pa tende e alabansa aki cu shelo ta duna. “No tin ni papiamento ni idioma caminda nan bos no ta wordo tendi.” Sinembargo, e testimonio silencioso di shelo ta potente. “Nan liña ta sali bai riba henter tera, y nan palabranan te na e finnan di mundo.” (Salmo 19:3, 4) Ta como si fuera  shelo a manda “liña di midi” [NW] pa haci sigur cu nan testimonio silencioso a yena tur skina di mundo.

8, 9. Menciona algun echo extraordinario relaciona cu solo.

⁸ Siguientemente David ta describi un otro maraviya di Yehova su creacion: “Den nan [e shelo cu nos ta mira] el a lanta un tent pa solo, cual ta mescos cu un bruidegom cu ta sali for di su camber; e ta regociha manera un campion, cla pa core careda. Su salida ta for di esun extremo di e shelonan, y su gira te na e otro extremo; y no tin nada cu ta keda scondi pa su calor.”—Salmo 19:4-6.

⁹ Compara cu otro streya, solo ta djis un streya di tamaño mediano. Sinembargo, e ta un streya remarcabel cu ta laga e planetanan cu ta drei rond di dje parce masha chikito mes. Segun un fuente, e masa di solo expresa na tonelada ta e cifra 2 sigui pa 27 sero, locual ta 99,9 porshento di e masa di nos sistema solar! E efecto di solo su gravedad (zwaartekracht) ta permiti e mundo drei na un distancia di 150 miyon kilometer for di solo sin kita bai mas leu of hala mas serca. Ta un parti hopi chikito di e energia di solo ta yega nos planeta, pero esei ta suficiente pa sostene bida.

10. (a) Con solo ta drenta y sali di su “tent”? (b) Con e ta core manera “un campion”?

¹⁰ E salmista ta papia di solo uzando palabranan figurativo, y ta describie como “un campion” cu den dia ta core for di un extremo di shelo pa e otro extremo y cu anochi ta bai den “un tent.” Ora e streya poderoso ei baha na horizonte—mira for di tera—ta parce manera solo ta drenta den “un tent”, como si fuera pa bai sosega. Mainta, ta parce cu e ta bula sali, radiante “mescos cu un bruidegom cu ta sali for di su camber.” David, como wardado di carne, tawata conoce e friu extremo di anochi. (Genesis 31:40) El a corda con lihe e rayonan di solo tawata keinta su curpa y e paisahe rond di dje. Claramente, solo no tawata keda agota di su “careda” diario di oost pa west, pero manera “un campion”, e tawata cla pa ripiti e careda.

Streya- y Galaxianan Sumamente Impresionante

11, 12. (a) Kico ta remarcabel tocante e echo cu Bijbel ta compara e cantidad di streya cu santo canto di lama? (b) Con inmenso e universo kisas ta?

¹¹ Sin telescop, David por a mira solamente un par di mil streya. Sinembargo, segun un estudio resien, e cantidad di streya den universo cu hende por mira via telescopnan moderno ta 70.000 triyon, esta, 7 sigui pa 22 cero! Yehova a indica cu tawata trata di cantidadnan enorme ora cu el a conecta e cantidad di streya cu “e santo cu tin canto di lama.”—Genesis 22:17.

¹² Pa hopi aña, astronomonan a observa den shelo loke a ser describi como “regionnan chikito briyante cu un aparencia nubla y wazig.” Cientificonan a asumi cu e “neblinanan den forma di spiral” aki tawata obhetonan den nos galaxia Via Lactea. Pero na aña 1924, nan a descubri cu e neblina di mas serca, yama Andromeda, tawata en realidad un galaxia riba su mes, y e tawata situa na un distancia cu lo a tuma lus for di nos galaxia Via Lactea dos miyon aña pa yega te aya! * Awor, cientificonan ta calcula cu tin mas cu shen mil miyon galaxia, y cu cada un ta contene miles—tin biaha miles di miyones—di streya. Sinembargo, Yehova “ta determina e cantidad di e streyanan; e ta yama nan tur na nan nomber.”—Salmo 147:4.

13. (a) Kico ta remarcabel tocante constelacionnan di streya? (b) Na kico ta bisto cu cientificonan no conoce “e ordenansanan di e shelonan”?

¹³ Yehova a puntra Job: “Bo por mara e cadenanan di Pleyades, of los e cabuyanan di Orion?” (Job 38:31) Cu e palabranan aki Yehova a referi na e constelacionnan di streya. Un constelacion ta un grupo di streya cu ta parce di forma un cierto patronchi. Aunke e streyanan por ta keda masha leu mes for di otro, nan posicion relativo no ta cambia, mira for di e perspectiva di tera. Debi cu nan posicion ta asina precis, streyanan ta ‘util como guia den nabegacion, tambe pa yuda astronautnan den navenan espacial orienta y pa identifica streyanan.’ (The  Encyclopedia Americana) Sinembargo, ningun hende no ta compronde bon bon “e cadenanan” cu ta tene e constelacionnan hunto. Si, ainda cientificonan no por contesta e pregunta cu Yehova a haci na Job 38:33: “Bo conoce e ordenansanan di e shelonan?”

14. Con e manera cu lus ta wordo dividi ta un misterio?

¹⁴ Tin un pregunta mas cu Yehova a haci Job, cu cientificonan no por contesta: “Unda e luga ta, caminda lus ta wordo dividi?” (Job 38:24) Un escritor a yama e pregunta aki tocante lus “un pregunta cientifico masha moderno.” Na contraste, algun filosofo Griego tawata di opinion cu lus a sali for di e wowo humano. Den temponan mas moderno, cientificonan a pensa cu lus tawata consisti di particulanan hopi chikito. Otronan a pensa cu lus ta move den onda. Awe, cientificonan ta kere cu lus ta tanto un onda como un particula. Pero te ainda, nan ta leu di compronde e naturalesa di lus y con e “ta wordo dividi.”

15. Mescos cu David, con nos mester sinti ora nos contempla e shelonan?

¹⁵ Ora nos para keto y contempla tur esaki, nos no por keda sin sinti mescos cu David, kende a bisa: “Ora mi contempla bo shelonan, e obra di bo dedenan, e luna y e streyanan cu abo a establece, ta kico hende ta, cu bo ta corda di dje? Y e yiu di hende, cu bo ta haci caso di dje?”—Salmo 8:3, 4.

Tera y Su Criaturanan Ta Glorifica Yehova

16, 17. Con criaturanan den “profundidad” di lama ta alaba Yehova?

¹⁶ Salmo 148 ta menciona otro maneranan den cua creacion ta declara e gloria di Dios. Versiculo 7 ta bisa: “Alaba SEÑOR for di tera, monster di lama y tur profundidad.” Si, e “profundidad” di lama ta yen di maraviya cu ta resalta Dios su sabiduria y poder. E bayena blou ta pisa como promedio 120 tonelada, mes tanto cu 30 olifanti! Su curason so ta pisa mas cu 450 kilo y por pomp un 6.400 kilo di sanger door di su curpa! Acaso e monsternan gigantesco aki di lama ta lento y torpe den awa? Absolutamente cu no. Nan ta “biaha rond den e oceanonan” na velosidadnan impresionante, segun e informe di un organisacion Europeo pa proteha bayena. Rastreo via satellite a mustra cu un bayena blou “a imigra mas cu 16.000 kilometer den 10 luna.”

¹⁷ Normalmente e dolfijn bottle-nosed (of, tuimelaar) ta sambuya bai na un profundidad di 45 meter, pero e profundidad mas hundo cu nan a registra pa un dolfijn ta 547 meter! Con e dolfijn aki ta sobrevivi un profundidad asina? Su curason ta cuminsa bati mas slow segun cu e ta bai hundo, y sanger ta desvia bai na su curason, pulmon y celebro. Tambe su musculonan ta contene un kimico cu ta almacena oxigeno. Zeeolifant (un tipo di cacho di awa) y bayena cachalote (potvis) por bai asta mas hundo ainda. Segun e revista Discover, “en bes di resisti e presion di awa, nan ta laga e presion sera nan pulmonnan completamente.” Nan ta almacena mayoria di e oxigeno cu nan tin mester den nan musculonan. Claramente, e criaturanan aki ta testimonio bibo di e sabiduria di un Dios Todopoderoso!

18. Con awa di lama ta demostra Yehova su sabiduria?

¹⁸ Asta awa di lama ta refleha Yehova su sabiduria. Segun e revista Scientific American: “Cada gota di awa den e prome capa di 100 meter di oceano ta contene miles di mata microscopico cu ta drif rond yama fytoplankton.” E matanan microscopico aki ta fungi manera un “selva invisibel” cu ta limpia nos aire door di elimina for di dje miles di miyones di tonelada di gas kooldioxide, y a cambio ta genera mas cu mitar di e oxigeno cu tin riba tera.

19. Con candela y sneu ta cumpli cu Yehova su boluntad?

¹⁹ Salmo 148:8 ta bisa: “Candela y hagel, sneu y nubia; biento di tempestad, cumpliendo [cu] su  palabra.” Si, Yehova ta uza tambe forsanan di naturalesa sin bida pa cumpli cu su boluntad. Tuma por ehempel candela. Den decadanan pasa, hende tawata considera candela di mondi solamente como un cos destructivo. Awor investigadonan ta kere cu candela ta hunga un papel constructivo y importante den medioambiente, door di cu e ta elimina palonan cu ta bieu of muriendo, ta stimula spruitmento di hopi simiña, ta recycle substancianan nutritivo y de echo ta reduci e riesgo di candela di mondi feros cu ta plama lihe. Sneu tambe ta vital, pasobra e ta muha y fertilisa suela, yena riunan cu awa y proteha mata y bestia contra temperaturanan extremadamente friu.

20. Con sero y palo ta beneficia humanidad?

²⁰ Salmo 148:9 ta sigui menciona: “Sero y tur serito; palo di fruta y tur palo di seda.” Seronan mahestuoso ta un testimonio di Yehova su gran poder. (Salmo 65:6) Pero tambe nan ta sirbi un proposito practico. Un informe di e Instituto di Geografia na Bern, Suisa, ta bisa: “Tur e riunan principal na mundo ta origina for di den sero. Mas cu mitar di humanidad ta depende di e awa dushi cu ta acumula den seronan . . . E ‘tankinan di awa’ aki ta crucial pa e bienestar di humanidad.” Asta un palo comun y coriente ta un gloria pa su Creador. Un informe di e Programa di Nacionnan Uni pa Medioambiente ta bisa cu palo “ta importante pa e bienestar di hende den tur pais . . . Tin hopi sorto di palo cu ta di gran importancia economico como fuente di productonan manera palo pa construccion, fruta, noot, hars y gom. Mundialmente, 2 mil miyon hende ta depende di palo pa cushina cu ne y como combustibel.”

21. Splica con un simpel blachi ta duna evidencia di diseño.

²¹ Asta e diseño di un palo ta duna evidencia di un Creador sabi. Tuma por ehempel e simpel blachi di un palo. Pafo e blachi tin manera un capa di vet cu ta evita cu e ta seca. Bou di e capa di vet na e banda ariba di e blachi tin un cantidad di cel cu ta contene partinan microscopico cu yama cloroplast. Esakinan ta contene un substancia berde cu yama clorofil, locual ta absorba energia for di lus. Mediante un proceso cu yama fotosintesis, e blachinan ta bira “fabrica di cuminda” pa e mata. E palo ta tuma awa via su raiz y ta transporta e awa pa e blachinan mediante un “sistema di distribucion di awa” masha sofistica. Parti abou di e blachi tin miles di porio of “boca” hopi chikito, cu ta habri y sera pa laga e gas kooldioxide drenta. Lus ta suministra e energia pa awa y kooldioxide combina y produci carbohidrato. Awor e mata por alimenta su mes cu e cuminda cu e mes a produci. Sinembargo, e “fabrica” aki ta silencioso y bunita. En bes di polucion, e ta saca oxigeno como producto secundario!

22, 23. (a) Ki habilidadnan remarcabel algun parha y bestia di tera tin? (b) Ki preguntanan mas nos tin cu considera?

²² Salmo 148:10 ta bisa: “Baca [“bestianan feros”, Beibel na papiamentu koriente] y tur bestia di cria; bestia cu ta lastra y parha cu ta bula.” Hopi bestia di tera y criatura cu ta bula ta desplega habilidadnan asombroso. E albatros di Laysan por bula distancianan enorme (den un caso un di nan a bula 40.000 kilometer den apenas 90 dia). E paharito blackpoll warbler ta bula for di Norte America pa Sur America, kedando den laira pa mas cu 80 ora nonstop. Camel ta almacena awa, no den e bulto riba su lomba manera mayoria hende ta kere, sino den su sistema digestivo, locual ta permitie pasa periodonan largo sin deshidrata. Nada straño anto cu  ingenieronan ta observa e mundo di animal cuidadosamente ora nan ta diseña mashin- y materialnan nobo. E escritora Gail Cleere a bisa: “Si bo kier traha un cos cu ta funciona bon . . . y cu ta pas den su medioambiente sin causa daño, anto muy probablemente lo bo haya un bon ehempel un caminda den naturalesa.”

²³ Si, creacion realmente ta declara e gloria di Dios! For di e shelonan yen di streya te na mata y bestia, cada un den su manera ta duna alabansa na su Creador. Pero kico di nos como hende? Con nos por join naturalesa y alaba Dios?

[Nota]

Bo Ta Corda?

• Dicon no tin excuse pa hende cu ta nenga cu Dios ta existi?

• Con e streya- y planetanan ta glorifica Dios?

• Con bestia di lama y di tera ta duna evidencia di un Creador amoroso?

• Con forsanan di naturalesa sin bida ta cumpli cu Yehova su boluntad?

[Preguntanan di Estudio]

[Plachi na pagina 10]

Cientificonan ta calcula cu e cantidad di streya cu hende por mira ta 70.000 triyon!

[Reconocemento]

Frank Zullo

[Plachi na pagina 12]

Dolfijn bottle-nosed

[Plachi na pagina 13]

Sneuvlok

[Reconocemento]

snowcrystals.net

[Plachi na pagina 13]

Un puyito di albatros di Laysan