Pregunta di Lector

Dicon David, un fiel sirbido di Yehova, a permiti pa su casa Mical tin un idolo of imagen [“di terafin”, NW; “di e dios di cas”, BPK], manera 1 Samuel 19:12 y 13 ta indica?

Prome, laga nos considera brevemente e contexto. Ora cu e casa di David a tende di e complot di Rei Saul pa mata David, el a actua mesora. Bijbel ta bisa: “Mical a laga David baha door di un bentana; y el a hui y a scapa. Y Mical a cohe e imagen [cu nan a yama terafin y cu aparentemente tawatin e tamaño y forma di un hende] pon’e riba e cama, y a pone un clechi di lana di cabrito na cabes di e cama y a habri un paña riba dje.” Ora e mensaheronan di Saul a bin pa cohe David, Mical a bisa nan: “E ta malo.” E tactica aki a duna David extra tempo, y el a logra scapa.—1 Samuel 19:11-16.

Descubrimentonan arkeologico ta indica cu posiblemente den tempo di antiguedad, hende tawatin e imagennan di terafin no solamente pa uzo religioso sino tambe pa propositonan legal. Mescos cu awe ta acta di propiedad y testament ta determina ken tin derecho riba herencia, den pasado e imagennan di terafin tawatin e funcion ei. Evidentemente, den cierto circunstancia pocesion di e terafin por a duna un yerno e derecho di hereda e propiedad di su defunto suegro. Esaki kisas ta splica dicon, na un ocasion mas prome, Raquel a coi e imagennan di terafin di su tata y dicon e tata tawata asina ansha pa haya nan bek. Den e caso ei, Yacob, casa di Raquel, no tawata sa cu Raquel a coi e imagennan.—Genesis 31:14-34.

Ora e Israelitanan a bira un nacion, nan a haya e Dies Mandamentonan, y e di dos mandamento spesificamente a prohibi pa traha imagen of idolo. (Exodo 20:4, 5) Despues, profeta Samuel a referi indirectamente na e lei aki ora el a papia cu Rei Saul. El a bisa: “Rebeldia ta manera e pica di bruheria, y capricho ta manera inikidad y idolatria [of, “terafin”, NW].” (1 Samuel 15:23) Pa e motibo aki, no ta probabel cu terafin a sirbi pa e proposito di herencia den Israel. No obstante, ta parce cu e forma antiguo aki di supersticion Hudiu a sigui existi den algun famia Israelita. (Huesnan 17:5, 6; 2 Reinan 23:24) E echo cu Mical tawatin un imagen di terafin den su pocesion ta indica cu posiblemente su curason no tawata completo pa cu Yehova. Podise David no tawata sa tocante e imagen di terafin of el a permitie pasobra Mical tawata yiu mohe di Rei Saul.

Pero David su punto di bista di rindi debocion exclusivo na Yehova ta ser expresa den e palabranan: “[Yehova] ta grandi y digno di supremo alabansa; tambe mester tin temor di dje mas cu di tur dios. Pasobra tur e diosnan di e pueblonan ta idolo, ma SEÑOR a traha e shelonan.”—1 Cronicanan 16:25, 26.

[Plachi na pagina 29]

E di dos mandamento di e Dies Mandamentonan a prohibi pa traha imagen, manera e terafin aki

[Reconocemento]

For di e buki The Holy Land, Vol. II, 1859