Duna Bo Don di Bida e Balor Mereci

“E sanger di Cristo [lo] purifica boso consenshi di obranan morto pa sirbi e Dios bibo.”—HEBREONAN 9:14.

1. Den ki manera nos ta demostra cu nos ta duna hopi balor na bida?

SI UN hende puntra bo cuanto bo bida ta bal, kico lo bo contest’e? Nos ta duna hopi balor na tanto nos bida como bida di otro hende. E echo so cu nos ta bai un docter ora nos ta malo of pa haci checkup ta muestra di esei. Nos kier bida y salu. Por lo general, ni hende cu ta bieu of incapasita no kier muri; nan kier biba.

2, 3. (a) Proverbionan 23:22 ta hala atencion na ki obligacion? (b) Kico Dios tin di aber cu e obligacion menciona na Proverbionan 23:22?

² E manera cu bo ta balora bida tin efecto riba bo relacion cu otro hende. Por ehempel, e Palabra di Dios ta manda bo pa “scucha na bo tata cu a engendra bo, y no desprecia bo mama ora cu e bira bieu.” (Proverbionan 23:22) “Scucha” ta nifica mas cu djis tende otro hende papia; e proverbio aki ta nifica tende y obedece. (Exodo 15:26; Deuteronomio 7:12; 13:18; 15:5; Hosue 22:2; Salmo 81:13) Segun e Palabra di Dios, pa ki motibo bo tin cu scucha na bo mayornan? Esei no ta djis pasobra bo tata cu bo mama ta mas bieu cu bo of pasobra nan tin mas experencia cu bo. Bo ta scucha nan pa motibo cu ta bo tata a “engendra bo” y ta nan a trec’e bo na mundo. Den algun otro traduccion di Bijbel, e versiculo aki ta bisa: “Scucha na bo tata cu a duna bo bida.” Ta logico anto cu si bo ta balora bo bida, bo ta sinti un obligacion pa cu e fuente di e bida ei.

³ Claro cu si bo ta un cristian berdadero, bo ta reconoce cu ta Yehova ta e Fuente original di bo bida. Pa medio di dje bo “ta biba”; bo por “move”, esta comporta bo manera un criatura cu tin sintimento; y awor bo ta “existi” y por pensa y plania pa futuro, incluso pa bida eterno. (Echonan 17:28; Salmo 36:9; Eclesiastes 3:11) Na harmonia cu Proverbionan 23:22, ta corecto pa “scucha” na Dios obedientemente, cu e deseo di compronde y actua a base di con e ta mira bida en bes di con otro hende ta mira bida.

Mustra Respet pa Bida

4. Con respet pa bida a bira un asunto importante for di cuminsamento di historia humano?

⁴ For di cuminsamento di historia humano Yehova a mustra bon cla cu e no a laga na hende pa haci kico cu nan kier cu bida. Cain, kende tawata yen di rabia y envidia, a kita un bida inocente, esun di su ruman Abel. Bo ta kere cu Cain tawatin derecho di tuma un decision asina tocante bida? Pa Dios, e no tawatin e derecho ei. El a exigi cuenta di Cain: “Ta kico bo a haci? Bos di bo ruman su sanger ta sclama na mi for di suela.” (Genesis 4:10) Ripara cu e sanger di Abel riba suela a representa su bida, cu a ser kita cruelmente y cu a sclama na Dios pa vengansa.—Hebreonan 12:24.

5. (a) Kico Dios a prohibi den tempo di Noe, y pa ken esaki a conta? (b) Den ki sentido e prohibicion aki tawata un paso importante?

⁵ Despues di e Dilubio, humanidad a haya un comienso nobo cu apenas ocho alma. Den un declaracion cu ta conta pa henter humanidad, Dios a revela mas tocante con e ta mira bida y sanger. El a bisa cu hende por a come carni di bestia, pero el a agrega un prohibicion: “Tur loke ta move, cu ta biba, lo ta cuminda pa boso; mi ta duna boso tur, mescos cu  mi a duna e yerba berde. Solamente, boso no mag come carni cu su bida, esta, su sanger.” (Genesis 9:3, 4) Algun Hudiu ta bisa cu aki Dios tawata kiermen cu hende no mag come carni of sanger di un bestia cu ainda ta na bida. Pero tempo lo a demostra claramente cu aki Dios a prohibi hende di come sanger como cuminda. Ademas, e decreto cu Dios a duna mediante Noe tawata un paso importante den direccion di e realisacion di Su proposito magnifico cu a envolve sanger—un proposito cu lo a permiti hende haya bida eterno.

6. Pa medio di Noe, con Dios a enfatisa Su manera di mira e balor di bida?

⁶ Dios a continua: “Lo mi exigi boso sanger-di-bida; for di tur bestia lo mi exigi esaki. Y for di tur hende, for di ruman di tur hende lo mi exigi e bida di hende. Ken cu drama sanger di hende, pa medio di hende su sanger lo wordo drama, pasobra segun e imagen di Dios el a traha hende.” (Genesis 9:5, 6) For di loke Dios a declara aki na henter humanidad bo por mira cu den su bista sanger di un hende ta representa e bida di e hende ei. E Creador ta duna e persona bida, y ningun hende no tin derecho di kita e bida ei, cu ta representa pa su sanger. Si un hende comete asesinato, mescos cu Cain, e Creador tin derecho di “exigi” bida di e asesino.

7. Pakico nos mester ta interesa den loke Dios a declara na Noe tocante sanger?

⁷ Cu e declaracion aki, Dios a taha hende di haci mal uzo di sanger. Bo a yega di puntra bo mes pakico? Si, kico tawatin tras di Dios su punto di bista tocante sanger? En realidad, e contesta tin di aber cu un di e siñansanan mas importante den Bijbel. Y aunke hopi religion ta prefera di ignor’e, e ta e esencia di e mensahe cristian. Kico e siñansa ei ta, y ki efecto e tin riba bo bida, bo decisionnan y bo accionnan?

Con Por A Uza Sanger den Pasado

8. Den e Lei, ki limitacion Yehova a pone riba uzamento di sanger?

⁸ Yehova a percura mas detaye relaciona cu bida y sanger ora el a duna Israel e codigo di Lei. Cu esei, el a dal un stap mas den direccion di e realisacion di su proposito. Probablemente bo sa cu e Lei a rekeri pa hende haci ofrenda na Dios, manera ofrenda di grano, azeta y biña. (Levitico 2:1-4; 23:13; Numbernan 15:1-5) Tambe tawatin sacrificio di animal. Dios a bisa di esakinan: “Bida di e carni ta den e sanger, y mi a duna boso esaki riba altar pa haci expiacion pa boso alma; pasobra ta e sanger ta haci expiacion pa e alma. Pesei mi a bisa e yiunan di Israel: ‘Ningun persona meimei di boso no mag come sanger.’” Yehova a agrega cu si un hende, manera un yagdo of un cunukero, a mata un bestia pa come, e tawatin cu drama su sanger y tap’e cu tera. Tera ta e banki di Dios su pia, y door di basha e sanger riba tera, e persona a duna di conoce cu e ta debolbe e bida na e Dunador di Bida.—Levitico 17:11-13; Isaias 66:1.

9. Cua tawata e unico manera cu por a uza sanger segun e Lei, y kico tawata e proposito di esaki?

⁹ E lei ei no tawata djis un rito religioso sin ningun nificacion pa nos. Bo a ripara pakico e Israelitanan no mester a come sanger? Dios a bisa: “Pesei mi a bisa e yiunan di Israel: ‘Ningun persona meimei di boso no mag come sanger.’” Pa ki motibo? “Mi a duna boso esaki [esta, sanger] riba altar pa haci expiacion pa boso alma.” Esaki no ta yuda bo compronde miho pakico Dios a bisa Noe cu hende no tin mag di come sanger? E Creador a haya ta bon pa mira sanger como algo cu tin un balor haltisimo, y el a reserv’e pa un uzo special cu lo por salba bida di hopi hende. Lo e mester a hunga un papel importante den cubri (of expia) pica. Pues bou di e Lei, Dios a autorisa pa uza sanger unicamente riba altar pa haci expiacion pa e bida di e Israelitanan, cu a busca manera pa haya pordon serca Yehova.

10. Pakico sanger di animal no por a hiba na pordon completo, pero kico e sacrificionan bou di e Lei a pone hende corda?

¹⁰ Esaki no ta un concepto desconoci pa cristiannan. Referiendo na e caracteristica  aki di e Lei cu Dios a duna, e apostel cristian Pablo a skirbi: “Segun Lei, casi tur cos ta wordo purifica cu sanger, y sin dramamento di sanger no tin pordon.” (Hebreonan 9:22) Pablo a splica cu e sacrificionan exigi no a comberti e Israelitanan den sernan humano perfecto y sin pica. El a skirbi: “Den e sacrificionan ei tin un recordatorio di pica aña aden aña afo. Pasobra ta imposibel pa e sanger di toro y cabrito kita pica.” (Hebreonan 10:1-4) No obstante, e sacrificionan a cumpli cu un proposito. Nan a recorda e Israelitanan cu nan tawata pecado y tawatin mester di algo mas pa haya pordon completo. Pero si e sanger cu a representa e bida di animal no por a cubri pica humano completamente, otro sanger si lo tawata por?

Solucion di e Dunador di Bida

11. Con nos por sa cu e sacrificionan di sanger di bestia tawata señala na algo?

¹¹ En realidad e Lei a señala na algo hopi mas balioso pa cumpli cu e boluntad di Dios. Pablo a puntra: “Ta pakico tin Lei anto?” El a contesta: “El a wordo añadi pa motibo di transgresionnan, y a wordo ordena door di angelnan pa medio di man di un mediado [Moises], te ora cu e simiña lo a bin, na kende e promesa a wordo haci.” (Galationan 3:19) Mescos tambe, Pablo a skirbi: “E Lei . . . tin solamente un sombra di e bon cosnan cu ta bin y no e forma berdadero mes di cosnan.”—Hebreonan 10:1.

12. Con nos por mira e revelacion di e proposito di Dios relaciona cu sanger?

¹² Manera nos a mira te asina leu, corda cu den Noe su tempo Dios a declara cu hende por come carni di bestia como cuminda, pero nan no tawatin mag di come sanger. Despues, Dios a declara cu “bida di e carni ta den e sanger.” Si, Dios a haya ta bon pa mira sanger como algo cu ta representa bida y el a bisa: “Mi a duna boso esaki [esta, sanger] riba altar pa haci expiacion pa boso alma.” Sinembargo, mester tawatin un revelacion adicional di e proposito maraviyoso di Dios. E Lei tawata un sombra di e bon cosnan cu mester a bini. Kico exactamente?

13. Pakico e morto di Hesus tawata importante?

¹³ E realidad tawata basa riba e morto di Hesucristo. Bo sa cu Hesus a ser tortura y claba na un staca. El a muri manera un criminal. Pablo a skirbi: “Tempo cu nos tawata sin forsa ainda, na e tempo apropia, Cristo a muri pa e impionan. . . . Dios ta demostra su mes amor pa cu nos den esaki, cu tempo nos tawata pecado ainda, Cristo a muri pa nos.” (Romanonan 5:6, 8) Door di muri pa nos, Cristo a percura un rescate pa cubri nos picanan. E rescate ei ta e esencia di e mensahe cristian. (Mateo 20:28; Huan 3:16; 1 Corintionan 15:3; 1 Timoteo 2:6) Kico esaki tin di aber cu sanger y bida, y con bo bida ta relaciona cu esaki?

14, 15. (a) Con algun traduccion di Efesionan 1:7 ta pone enfasis riba e morto di Hesus? (b) Ki echo tocante Efesionan 1:7 por ser pasa por halto?

¹⁴ Algun religion ta enfatisa e morto di Hesus; por ehempel, nan miembronan tin lemanan manera “Hesus a muri pa mi.” Wak con algun Bijbel ta traduci Efesionan 1:7: “Ta den dje y mediante su morto nos tin liberacion, esta, kitamento di nos picanan.”  (The American Bible, di Frank Scheil Ballentine, 1902) “Pa medio di e morto di Cristo nos a ser libra, y nos picanan a ser pordona.” (Today’s English Version, 1966) “Ta den Cristo y mediante dje y e sacrificio di su bida nos a ser libra, un liberacion cu ta nifica pordon di pica.” (The New Testament, di William Barclay, 1969) “Ta mediante e morto di Cristo nos picanan a ser pordona y nos a ser libra.” (The Translator’s New Testament, 1973) Bo por mira den e traduccionnan aki cu e enfasis ta riba e morto di Hesus. Kisas un hende lo bisa: ‘Pero, en berdad Hesus su morto ta importante. Ta kico e traduccionnan aki falta anto?’

¹⁵ Realmente, si bo tawatin cu depende riba e traduccionnan aki, bo por pasa por halto un punto hopi importante, y esaki lo por stroba bo di compronde e mensahe di Bijbel. E traduccionnan ei ta sconde e echo cu e texto original di Efesionan 1:7 ta contene un palabra Griego cu ta nifica “sanger.” Pues, hopi Bijbel, manera Beibel Santu, ta traduci e texto original hopi mas exacto: “Den dje nos tin redencion pa medio di su sanger, e pordon di nos picanan, segun e rikesa di su gracia.”

16. Riba kico e traduccion “su sanger” mester pone nos pensa seriamente?

¹⁶ E traduccion “su sanger” tin un nificacion hopi profundo y e mester pone nos pensa seriamente riba e asunto aki. Riba su mes, e morto di un hende—asta di e homber perfecto Hesus—no tawata suficiente. Hesus a cumpli cu loke tawata prefigura den e Lei, particularmente riba e Dia di Expiacion. Riba e dia special ei nan tawata sacrifica e animalnan stipula den e Lei. Despues e sumo sacerdote tawata bai cu poco di e sanger den e compartimento Santisimo di e tabernakel of tempel, y present’e einan dilanti Dios, como si fuera e tawata den presencia di Dios.—Exodo 25:22; Levitico 16:2-19.

17. Con Hesus a cumpli cu loke e Dia di Expiacion a prefigura?

¹⁷ Manera Pablo a splica, Hesus a cumpli cu loke e Dia di Expiacion a prefigura. Na prome luga, el a bisa cu e sumo sacerdote den Israel tawata drenta e Santisimo un biaha pa aña cu sanger ofreci “pa su mes y pa e picanan di e pueblo cu nan a comete den ignorancia.” (Hebreonan 9:6, 7) Na harmonia cu loke a sosode riba e Dia di Expiacion, despues cu Hesus a ser resusita como un ser spiritual, el a bai shelo mes. Como un ser spiritual, sin un curpa di carni y sanger, e por a aparece “den e presencia di Dios pa nos.” Kico el a presenta na Dios? No algo literal sino algo di gran nificacion. Pablo a continua: “Ora Cristo a aparece como un sumo sacerdote . . . , el a drenta . . . no pa medio di e sanger di cabrito y bishe, ma pa medio di su mes sanger el a drenta den e luga santo un biaha pa semper, siendo cu el a obtene redencion eterno caba. Pasobra si e . . . sanger di cabrito y toro . . . ta santifica pa purificacion di e carni, cuanto mas e sanger di Cristo, kende, pa medio di e spirito eterno, a ofrece su mes sin defecto na Dios, lo purifica boso consenshi di obranan morto pa sirbi e Dios bibo?” Si, Hesus a presenta na Dios e balor di su sanger.—Hebreonan 9:11-14, 24, 28; 10:11-14; 1 Pedro 3:18.

18. Pakico e declaracionnan di Bijbel tocante sanger mester ta importante pa cristiannan awe?

 ¹⁸ E berdad dibino aki ta yuda nos compronde tur e aspectonan maraviyoso di loke Bijbel ta bisa tocante sanger; esta, pakico Dios ta mir’e manera e ta mir’e, kico nos punto di bista di dje mester ta, y pakico nos tin cu respeta e limitacionnan cu Dios a pone tocante uzo di sanger. Ora bo lesa e bukinan di e Scritura Griego Cristian, lo bo haya bastante referencia na e sanger di Cristo. (Mira e cuadro.) Esakinan ta mustra bon cla cu cada cristian mester eherce fe “den [Hesus] su sanger.” (Romanonan 3:25) Ta pa medio di “e sanger” cu Hesus a drama so hende por haya pordon y pas cu Dios. (Colosensenan 1:20) Esaki sigur ta conta pa esnan cu ken Hesus a sera un aliansa special pa reina cu ne den shelo. (Lucas 22:20, 28-30; 1 Corintionan 11:25; Hebreonan 13:20) E ta conta tambe pa e “multitud grandi” djawe, cu lo sobrevivi e benidero “gran tribulacion” y disfruta di bida eterno den un paradijs riba tera. Den un sentido simbolico, nan ta ‘laba nan pañanan y ta haci nan blanco den e sanger di e Lamchi.’—Revelacion 7:9, 14.

19, 20. (a) Pakico Dios a haya ta bon pa pone limitacion riba uzo di sanger, y con nos tin cu sinti tocante esei? (b) Kico nos mester ta interesa pa sa?

¹⁹ No tin duda anto cu sanger tin un nificacion special den bista di Dios. Nos tambe mester mir’e mescos. E Creador, cu ta interesa den bida, tin derecho pa limita loke hende ta haci cu sanger. Pa motibo di su gran interes den asta nos bida, el a determina pa reserva uzo di sanger den solamente un manera sumamente importante, e unico manera cu ta haci bida eterno posibel. Y esei a encera Hesus su sanger precioso. Nos por ta hopi gradicido cu Yehova  Dios tawatin nos bienestar na pecho ora el a uza sanger—e sanger di Hesus—den un manera cu por salba bida! Y nos mester ta hopi gradicido tambe na Hesus pa a drama su sanger den un sacrificio pa nos! Di berdad nos por compronde e sintimentonan cu apostel Huan a expresa: “Na esun cu ta stima nos, y cu a libra nos di nos picanan pa medio di su sanger—y el a haci nos bira un reino, sacerdotenan pa su Dios y Tata—na dje sea e gloria y e dominio pa semper y semper. Amen.”—Revelacion 1:5, 6.

²⁰ Pa hopi tempo nos Dios di tur sabiduria y Dunador di Bida tawatin na mente e papel cu sanger mester a hunga den salba bida. Nos por puntra anto: ‘Ki impacto esaki mester tin riba nos decisionnan y accionnan?’ E siguiente articulo lo contesta e pregunta aki.

Con Lo Bo Contesta?

• Kico nos por siña tocante Dios su punto di bista di sanger for di e relatonan di Abel y Noe?

• Den e Lei, ki limitacion Dios a pone riba uzo di sanger, y pakico?

• Con Hesus a cumpli cu loke e Dia di Expiacion a prefigura?

• Con e sanger di Hesus por salba nos bida?

[Preguntanan di Estudio]

[Cuadro na pagina 18]

KEN SU SANGER TA SALBA BIDA?

“Presta atencion na boso mes y na henter e tou, entre cua e spirito santo a nombra boso como superintendente, pa pastorea e congregacion di Dios, cua el a cumpra cu e sanger di su propio Yiu.”—Echonan 20:28, NW.

“Mucho mas anto, siendo hustifica awor pa medio di su sanger, nos lo ta salba for di e furia di Dios door di dje.”—Romanonan 5:9.

“Boso tawata . . . sin speransa y sin Dios den mundo. Ma awor den Cristo Hesus boso, kendenan antes tawata leu, a wordo treci serca pa medio di e sanger di Cristo.”—Efesionan 2:12, 13.

“A agrada e Tata pa henter e plenitud biba den dje [esta, Hesus], y door di dje reconsilia tur cos cu ne mes, siendo cu el a haci pas caba door di e sanger [“cu el a drama riba e staca di tormento”, NW].”—Colosensenan 1:19, 20.

“Pesei, rumannan, . . . nos tin confiansa pa drenta e luga santo pa medio di e sanger di Hesus.”—Hebreonan 10:19.

“Boso no a wordo redimi cu cosnan cu ta perece . . . for di boso manera vano di biba cu boso a hereda di boso antepasadonan, ma cu sanger precioso, como di un Lamchi sin defecto y sin mancha, e sanger di Cristo.”—1 Pedro 1:18, 19.

“Si nos ta cana den lus mescos cu e mes ta den lus, nos tin comunion cu otro, y e sanger di Hesus, Su Yiu, ta limpia nos di tur pica.”—1 Huan 1:7.

“Abo ta digno pa tuma e buki y pa kibra su seyonan; pasobra abo a wordo mata, y cu bo sanger bo a cumpra pa Dios hende for di tur tribu y lenga y pueblo y nacion.”—Revelacion 5:9.

“E acusado di nos rumannan . . . a wordo tira abou. Y nan a venc’e pa motibo di e sanger di e Lamchi y pa motibo di e palabra di nan testimonio.”—Revelacion 12:10, 11.

[Plachi na pagina 16]

Pa medio di e Lei, Dios a mustra bon cla cu pa via di sanger hende por haya pordon di pica

[Plachi na pagina 17]

Pa medio di e sanger di Hesus, hopi bida por a ser salba