‘El A Siña Nos Respeta Su Religion’

UN Testigo di Yehova di e provincia di Rovigo, Italia, a haya sa cu e tawatin un tumor y cu su condicion tawata critico. Despues cu e tawata varios biaha den hospital, durante cua el a pidi pa trat’e sin dun’e transfusion di sanger, nursenan di e servicio di cuido pa pashent di cancer a sigui dun’e asistencia na cas.

E fe firme di e pashent aki di 36 aña y tambe su boluntad pa coopera, a impresiona e docter- y nursenan cu a trat’e profundamente. Un poco prome cu e cancer a causa morto di e pashent, un di e nursenan cu a asistie a skirbi den un revista di cuido medico tocante nan experencia cu e pashent aki cu yama Angela.

“Angela ta yen di bida y e kier biba. E ta masha conciente di su condicion y di su enfermedad serio, y mescos cu cualkier un di nos lo a haci, e ta buscando un solucion, un remedi. . . . Nos cu ta nurse pocopoco pero sigur a siña conoc’e. Nos no a topa ningun resistencia. Al contrario, como cu Angela tawata un persona habri cu tur hende, no tawata dificil pa cuid’e. Tawata un placer pa atende cu ne, ya cu nos tawata sa cu e ocasionnan ei lo tawata momentonan di berdadero contacto humano y beneficio mutuo. . . . Nos a realisa mesora cu su religion lo a bai bira un obstaculo pa trata cu su enfermedad.” Esei tawata opinion di e nurse aki, pasobra na su manera di mira e asunto Angela mester a haya un transfusion di sanger, locual Angela a rechasa.—Echonan 15:28, 29.

“Como profesionalnan den cuido di salu, nos a bisa Angela cu nos no ta di acuerdo cu su decision, pero el a yuda nos compronde kico bida a nifica p’e. Tambe nos a compronde e importancia di su religion tanto p’e como pa su famia. Angela no a entrega. E no a laga su enfermedad venc’e. E ta fuerte. E kier biba y lucha pa sigui biba. El a expresa su determinacion, su conviccion. E tin un determinacion cu hopi bes nos no tin, un fe, cu den nos caso no ta mes firme. . . . Angela a siña nos e importancia di respeta su religion, algo hopi distinto di nos etica profesional. . . . Nos ta kere cu loke Angela a siña nos ta di gran importancia, pasobra nos ta topa tur tipo di hende, tur tipo di circunstancia, y tur tipo di religion, y nos por siña for di tur hende y duna algo na ken cu nos topa.”

Despues e articulo di e revista a hala atencion na e Codigo di Etica Profesional pa Nursenan Italiano, aproba na 1999, cu ta bisa: “E nurse ta haci su trabou teniendo cuenta cu e pashent su religion, su balornan etico y cultural, y tambe su rasa y sexo.” Tin biaha kisas ta dificil pa docter- y nursenan respeta e conviccionnan religioso di un pashent. Nos sigur ta gradici esnan cu si ta dispuesto pa haci esei.

Testigonan di Yehova ta analisa cuidadosamente e decisionnan cu nan tin cu tuma relaciona cu nan salu y cuido medico. Nan ta tuma masha na serio loke e Scritura ta bisa, y manera e caso di Angela ta ilustra, nan no ta hende fanatico. (Filipensenan 4:5, NW) Rond mundo, mas y mas profesional di cuido di salu ta dispuesto pa respeta e consenshi di nan pashentnan cu ta Testigo di Yehova.