E Gobernacion di e Reino di Dios—Un Realidad Awe

“Con ta posibel pa asina tanto nacion, cu culturanan asina distinto y den diferente etapa di desaroyo, yega na un acuerdo cu otro? Aparentemente, e rasa humano lo uni solamente si un otro planeta atac’e.”—The Age, corant Australiano.

UN OTRO planeta atac’e? Sea cu esei lo uni tur nacion of no, profecia di Bijbel si ta papia di un crisis cu ta menasando y cu lo pone e nacionnan di mundo uni. Y ta podernan extraterestre lo causa e crisis aki.

Rei David di Israel di antiguedad a papia profeticamente di e situacion mundial aki. Bou di inspiracion dibino el a skirbi: “E reinan di mundo ta tuma nan posicion, y e gobernantenan ta consulta hunto [“reuni hunto manera uno”, NW] contra SEÑOR y contra su ungi, bisando: ‘Laga nos kibra nan cadenanan y tira nan cabuyanan for di nos!’” (Salmo 2:2, 3; Echonan 4:25, 26) Tuma nota cu e gobernantenan di mundo lo uni contra Yehova, e Creador di universo, y su ungi of su Rei nombra, Hesucristo. Con esei lo tuma luga?

Segun cronologia biblico y profecianan cu a cumpli, na aña 1914 e Reino di Dios a wordo estableci den shelo cu Hesucristo como Rei. * E tempo ei e nacionnan di mundo tawatin  un pensamento en comun. En bes di somete nan mes na e soberania di e Reino di Dios resien estableci, nan tawata meti den un lucha pa poder, esta, den e Guera Grandi of Prome Guera Mundial.

Kico Yehova Dios ta pensa di e reaccion di gobernantenan humano? “Esun cu ta sinta den e shelonan ta hari; Señor ta haci bofon di nan. Anto e lo papia cu nan den su rabia y terorisa nan den su furia.” Despues, Yehova lo bisa su Yiu, e Rei ungi di e Reino: “Pidi mi, y siguramente lo mi duna bo e nacionnan como bo herencia, y e finnan di tera como bo pocesion. Lo bo kibra nan cu bara di hero, lo bo kibra nan na pida-pida manera cos traha di klei.”—Salmo 2:4, 5, 8, 9.

E derota final aki di nacionnan enemigo cu un bara di hero lo tuma luga na Armagedon. E ultimo buki di Bijbel, Revelacion, ta describi e suseso culminante aki como “e guera di e gran dia di Dios Todopoderoso”, na cua “reinan di henter mundo” lo ser reuni hunto. (Revelacion 16:14, 16) Bou di influencia demoniaco, e nacionnan di tera finalmente lo uni cu un solo meta, esta, pa bringa contra e Dios Todopoderoso.

E momento cu hende lo uni forsa pa bringa contra Dios su soberania ta acercando rapidamente. Pero ta un ironia cu nan “unidad” lo no trece ningun beneficio personal pa nan. Na luga di esei nan accion lo habri caminda pa henter humanidad haya e pas tan anhela. Con asina? Den e bataya final ei, e Reino di Dios “lo garna y pone un fin na tur e reinonan [di e mundo] aki, ma e mes lo dura pa semper.” (Daniel 2:44) E Reino di Dios, y no cualkier organisacion humano, lo ta e gobierno cu lo cumpli cu humanidad su deseo pa pas mundial.

E Gobernante Principal di e Reino di Dios

Esei ta e Reino cu hopi hende sinsero ta pidi p’e den oracion. Nan ta resa: “Cu bo reino bin. Cu bo boluntad sosode na tera mescos cu den shelo.” (Mateo 6:10) E Reino di Dios no ta un condicion abstracto di e curason, mas bien e ta un gobierno real cu a logra obranan maraviyoso desde cu el a wordo estableci den shelo na 1914. Laga nos considera algun factor importante cu ta proba cu e Reino di Dios ta un realidad y cu e ta completamente activo awe.

Na prome luga, e tin un rei poderoso y eficiente, Hesucristo entronisa. Na aña 33 di nos era, Yehova Dios a nombr’e como Cabes di e congregacion cristian. (Efesionan 1:22) Desde e tempo ei, Hesus a eherce su autoridad como cabes, y di e manera ei a demostra su capasidad como gobernante. Por ehempel, tempo cu un hamber pisa a afecta Hudea den e prome siglo, mesora e congregacion cristian a yuda su miembronan. Nan a haci areglo pa percura yudansa, y for di Antiokia nan a manda Barnabas y Saulo cu un contribucion como un sosten pa e rumannan.—Echonan 11:27-30.

Awor cu e Reino di Dios ta gobernando nos por spera asta mas di Hesucristo. Ki ora cu sosode un desaster manera temblor, hamber, inundacion, horcan, mal tempo of erupcion di volcan, mesora e congregacion cristian di Testigonan di Yehova ta percura pa e  necesidadnan di nan compañeronan y di otro hende den e areanan afecta. Por ehempel, ora cu e temblor devastador a asota El Salvador na januari y februari di 2001, den tur parti di e pais ei a haci areglo pa duna yudansa, y gruponan di Testigonan di Yehova di Canada, Guatemala y Merca tambe a duna un man. Den un periodo di tempo masha cortico a reconstrui tres luga di adoracion y mas cu 500 cas.

Subditonan di e Reino di Dios

Desde cu e Reino a wordo estableci na 1914, Dios su Reino celestial ta organisando y reuniendo su subditonan rond mundo. Esaki ta un cumplimento di e profecia remarcabel skirbi door di Isaias: “Lo sosode den e ultimo dianan cu e sero di e cas di SEÑOR [su adoracion berdadero y eleva] lo wordo estableci como e sero principal, . . . y tur nacion lo basha bai na dje.” E profecia ta indica cu “hopi pueblo” lo subi bai na e sero ei y acepta Yehova su instruccion y lei.—Isaias 2:2, 3.

E actividad aki a forma e movemento mas notabel di tempo moderno, un hermandad internacional di mas cu 6.000.000 cristian den mas cu 230 nacion di e tera. Na congresonan internacional di Testigonan di Yehova hopi bes observadonan ta keda impresiona ora nan mira e amor, e pas, y unidad di e multitudnan inmenso di hende, surpasando e bareranan di nacionalidad, cultura y idioma. (Echonan 10:34, 35) Bo no ta eens cu pa un gobierno logra trece centenares di grupo etnico hunto den pas y harmonia, e mester ta efectivo, stabil y real?

E Reino di Dios y Educacion

Tur gobierno tin rekisitonan cu su ciudadanonan tin cu cumpli cu ne, y tur hende cu kier biba bou di e gobierno ei tambe mester cumpli cu su rekisitonan. Di igual manera, e Reino di Dios tin rekisitonan y tur hende cu kier ta un subdito di dje mester cumpli cu nan. Sinembargo, pa yuda asina hopi hende cu antecedentenan asina diferente acepta y biba na harmonia cu e mesun rekisitonan ta un tarea inmenso. Pues aki nos ta mira un otro prueba cu e Reino di Dios ta real, su programa efectivo di educacion cu ta touch y transforma no solamente e mente sino tambe e curason di hende.

Con e Reino ta logra cumpli cu e tarea dificil aki? Door di sigui e metodo apostolico di predica “di cas pa cas” y siña hende individual e Palabra di Dios. (Echonan 5:42; 20:20) Con efectivo e manera aki di educa hende ta? Jacques Johnson, un pasto catolico, a skirbi den un corant Canades kico a pasa ora el a purba combence un señora pa no studia cu Testigonan di Yehova. El a bisa: “Mi a keda basta pasma y a realisa cu mi tawata den un bataya perdi. . . . Mi a bin realisa cu  durante un par di luna e señoranan Testigo di Yehova aki a forma un relacion significativo cu e mama hoben aki cu no por a sali for di cas. Nan a forma un laso cu ne door di yud’e, bira su amiga, y di e manera aki a establece un amistad intimo. No a dura hopi cu el a bira un miembro activo den nan religion y mi no por a haci nada pa preveni esei.” Mescos cu e conducta cristian di Testigonan di Yehova y e mensahe di Bijbel cu nan ta siña hende a conmove e curason di e excatolico aki, asina tambe e ta touch curason di miyones di hende mas.

E tipo di educacion aki—educacion di Reino—ta basa riba Bijbel, y ta mantene su balor- y normanan encuanto moralidad na halto. E ta siña hende pa stima y honra otro hende sin importa nan background. (Huan 13:34, 35) Tambe e ta yuda hende pa haci caso di e instruccion: “No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.” (Romanonan 12:2) Pa motibo cu miyones di hende no ta biba manera antes mas y gustosamente ta biba segun e lei- y principionan di e Reino, nan a haya pas y felicidad awor y perspectivanan maraviyoso pa futuro.—Colosensenan 3:9-11.

Un excelente medio pa logra e unidad mundial aki ta mediante e revista aki, E Toren di Vigilancia. Door di uza metodonan di traduccion sistematico y ekipo di imprenta plurilingue, e articulonan principal den E Toren di Vigilancia ta sali simultaneamente den 135 idioma y, mas cu 95 porshento di e lectornan rond mundo por studia e informacion den nan mes idioma na e mesun momento.

Un escritor mormon a traha un lista di e misionnan exitoso mas excepcional fuera di su mes iglesia. El a clasifica E Toren di Vigilancia y Spierta! publica door di Testigonan di Yehova, como e miho revistanan pa predica e evangelio y a bisa: “Nunca ningun hende por acusa Toren di Vigilancia of Spierta! di fomenta indiferencia—al contrario nan ta haci hende conciente di nan necesidad spiritual; algo cu masha poco mi a yega di topa den otro publicacionnan religioso. E contenido di Toren di Vigilancia y Spierta! ta refrescante pa motibo cu nan ta realistico, basa riba echo y investigacion amplio.”

Tin masha hopi evidencia cu e Reino di Dios ta un realidad y ta activo. Testigonan di Yehova cu alegria y yen di energia ta papia cu otro hende tocante “e evangelio aki di e reino” y ta invita nan pa bira su subditonan. (Mateo 24:14) E idea ei ta atrae bo? Bo por disfruta di e bendicionnan cu bo ta haya ora bo asocia cu personanan cu ta siñando normanan di Reino y cu ta trata pa biba na harmonia cu nan. Pero mas miho ainda, lo bo por gosa di e perspectiva di biba bou di gobernacion di e Reino den e mundo nobo priminti den cua ‘husticia ta biba.’—2 Pedro 3:13.

[Nota]

[Plachi na pagina 4, 5]

Na 1914 e nacionnan tawata meti den un guera mundial

[Plachinan na pagina 6]

E trabou di duna yudansa boluntario ta un prueba di amor cristian

[Plachi na pagina 7]

Testigonan di Yehova rond mundo ta beneficia di e mesun programa di educacion