Yehova Ta Revela Su Gloria na e Humildenan

“E recompensa di humildad y e temor di SEÑOR ta rikesa, honor y bida.”—PROVERBIONAN 22:4.

1, 2. (a) Con e buki di Echonan ta mustra cu Esteban tawata “un homber yen di fe y di spirito santo”? (b) Ki prueba tin cu Esteban tawata humilde?

ESTEBAN tawata “un homber yen di fe y di spirito santo.” Tambe e tawata “yen di gracia y di poder” [NW]. Como un di e prome disipelnan di Hesus, el a haci maraviyanan y milagernan grandi den e pueblo. Na un ocasion, algun homber a lanta pa discuti cu Esteban, sinembargo, “nan no tawata por a resisti e sabiduria y e spirito pa medio di cual e tawata papia.” (Echonan 6:5, 8-10) Claramente Esteban tawata un bon studiante di e Palabra di Dios, y el a defend’e maestralmente dilanti di e lidernan religioso Hudiu di su tempo. E testimonio detaya cu Esteban a duna, cu nos ta haya na Echonan capitulo 7, ta prueba cu e tawata intensamente interesa den Dios su proposito cu tawata ser revela gradualmente.

² Esteban tawata humilde. E tawata distinto for di e lidernan religioso ei, kende debi na nan puesto y conocemento, a sinti nan mas superior cu e pueblo comun. (Mateo 23:2-7; Huan 7:49) Aunke Esteban tawata versa den e Scritura, el a keda masha contento cu e tarea di “sirbi mesa” ya asina e apostelnan por a dedica nan mes “na oracion y na e ministerio di e palabra.” Esteban tawatin un bon nomber serca e rumannan y ta pesei nan a scoh’e como un di e shete hombernan di bon reputacion cu lo mester a atende e partimento aki di e cuminda di tur dia. Humildemente el a acepta e tarea.—Echonan 6:1-6.

3. Ki demostracion sobresaliente di Dios su bondad inmereci Esteban a experencia?

³ Yehova a tuma nota di Esteban su caracter humilde, combina cu su integridad y interes den asuntonan relaciona cu Dios. Ora cu Esteban tawata duna testimonio na e multitud di lidernan Hudiu rabia den e Consilio, su opositornan “a mira su cara manera cara di angel.” (Echonan 6:15) Su expresion di cara tawata manera di angel, un mensahero di Dios, cu tawatin e pas cu ta bin di e Dios di gloria, Yehova. Despues di duna testimonio cu curashi na e miembronan di e Consilio, Esteban a experencia un demostracion sobresaliente di Dios su bondad inmereci. “Siendo yen di spirito santo, el a fiha su bista na shelo y a mira e gloria di Dios, y Hesus para na man drechi di Dios.” (Echonan 7:55) Pa Esteban, e vision espectacular aki a reafirma Hesus su posicion como Yiu di Dios y Mesias. E vision a duna humilde Esteban fortalesa y a sigur’e cu e tawatin Yehova su aprobacion.

4. Na ken Yehova ta revela su gloria?

⁴ Manera e vision cu Esteban a ricibi ta mustra, Yehova ta revela su gloria y su proposito na personanan temeroso di Dios cu ta humilde y cu ta aprecia nan amistad cu ne. Bijbel ta bisa: “E recompensa di humildad y e temor di SEÑOR ta rikesa, honor [of, “gloria”, NW] y bida.” (Proverbionan 22:4) Pesei ta masha crucial pa nos compronde kico berdadero humildad ta, con nos por cultiva e cualidad importante aki, y con nos ta beneficia door di despleg’e den tur aspecto di bida.

 Humildad—Un Cualidad Cu Dios Ta Desplega

5, 6. (a) Kico ta humildad? (b) Con Yehova a desplega humildad? (c) Ki efecto Yehova su humildad mester tin riba nos?

⁵ Kisas pa algun hende ta un sorpresa cu Yehova Dios, e persona di mas eleva y glorioso den universo, ta e ehempel di mas grandi di humildad. Rei David a bisa Yehova: “Bo a duna mi e escudo di bo salbacion, y bo man drechi ta sostene mi, y bo gentilesa [of, “humildad”, NW] ta haci mi grandi.” (Salmo 18:35) Ora David a describi Yehova como humilde, el a uza un palabra Hebreo cu tin e nificacion basico di “baha cabes.” Fuera di e palabra “humildad”, tin mas expresion liga cu e palabra basico ei, entre otro, “mansedumbre”, y ‘baha bo mes na nivel di otro.’ Pues Yehova a desplega humildad ora cu el a baha su mes pa trata cu e homber imperfecto David y a uz’e como Su rei representativo. Manera e titulo di Salmo 18 ta mustra, Yehova a proteha y sostene David, y a libr’e “for di man di tur su enemigonan y for di man di Saul.” David na su turno, tawata sa cu cualkier grandesa of gloria cu lo e por logra como rei a depende di si Yehova ta actua humildemente na su fabor. E realisacion aki a yuda David keda humilde.

⁶ Con nos por aplica esaki? Yehova a haya ta bon pa siña nos e berdad, y podise el a duna nos privilegionan special di sirbishi mediante su organisacion, of el a uza nos den un of otro manera pa cumpli cu su boluntad. Con tur esaki mester laga nos sinti? Acaso esaki no mester haci nos humilde? Nos no mester ta gradicido pa Yehova su humildad y evita di halsa nos mes, locual siguramente lo hiba na desaster?—Proverbionan 16:18; 29:23.

7, 8. (a) Con Yehova su humildad a bin dilanti den su trato cu Manases? (b) Den ki manera tanto Yehova, como Manases, a pone un ehempel di humildad cu nos por imita?

⁷ Yehova no solamente a demostra gran humildad door di trata cu hende imperfecto, sino cu tambe el a demostra di ta dispuesto pa mustra misericordia na esnan di condicion humilde. E ta asta lanta of halsa, esnan cu humiya nan mes. (Salmo 113:4-7) Tuma por ehempel e caso di Rei Manases di Huda. El a haci mal uzo di su posicion privilegia como rei pa promove adoracion falso y “a haci hopi maldad den bista di SEÑOR y a proboc’e na rabia.” (2 Cronicanan 33:6) Finalmente, Yehova a castiga Manases door di permiti rei di Asiria kit’e for di riba trono. Den prizon, Manases “a roga na SEÑOR su Dios y a humiya su mes  grandemente”, di manera cu Yehova a pon’e atrobe riba e trono na Herusalem, y Manases ‘a reconoce cu Yehova ta e Dios berdadero.’ (2 Cronicanan 33:11-13) Si, na final, Manases su humildad a agrada Yehova, cu na su turno a demostra humildad door di pordona Manases y reinstal’e como rei.

⁸ E echo cu Yehova tawata dispuesto pa pordona, y e actitud repenti di Manases, ta sirbi como lesnan importante di humildad pa nos. Nos mester corda semper cu e manera cu nos ta trata hende cu kisas a ofende nos y e actitud cu nos ta desplega ora nos peca, por influencia e manera cu Yehova ta trata cu nos. Si di buena gana nos ta pordona e erornan di otro hende y humildemente ta admiti nos erornan, e ora ei Yehova por mustra misericordia na nos.—Mateo 5:23, 24; 6:12.

Gloria Dibino Revela na Esnan Humilde

9. Humildad ta un señal di debilidad? Splica.

⁹ Sinembargo, ta un ekibocacion pa pensa cu humildad y e cualidadnan liga cu ne ta un señal di debilidad of ta e tendencia di aproba loke ta robes. Manera e Santo Scritura ta proba, Yehova ta humilde, pero e ta desplega indignacion husto y poder extraordinario ora ta necesario. Como cu Yehova ta humilde, e ta duna atencion faborabel, of consideracion special, na hende humilde, mientras cu e ta distancia su mes for di hende orguyoso. (Salmo 138:6) Con Yehova a mustra consideracion special na su sirbidonan humilde?

10. Manera 1 Corintionan 2:6-10 ta indica, kico Yehova ta revela na hende humilde?

¹⁰ Na Yehova su debido tempo y mediante e canal di comunicacion cu el a scohe, el a revela na hende humilde detayenan relaciona cu e realisacion di su proposito. E detayenan glorioso aki ta keda scondi pa hende cu orguyosamente ta steun riba sabiduria y pensamento humano, of cu na un manera cabesura ta pega na nan. (1 Corintionan 2:6-10) Pero como cu hende humilde a ricibi un comprondemento exacto di Yehova su proposito, nan ta sinti nan motiva pa engrandece Yehova ya cu nan a haya mas aprecio ainda pa su gloria impresionante.

11. Den prome siglo, con algun hende a mustra falta di humildad, y con esaki a perhudica nan?

¹¹ Den prome siglo, hopi hende, entre nan algun cu a pretende di ta cristian, a mustra falta di humildad y a trompica pa motibo di loke apostel Pablo a revela na nan tocante e proposito di Dios. Pablo a bira “apostel di e paganonan”, pero esei no tawata debi na su nacionalidad, educacion, edad of registro largo di bon obra. (Romanonan 11:13) E cosnan ei ta loke hopi bes personanan cu tin nan mente fiha riba cos carnal ta considera como e factornan cu ta determina ken Yehova lo uza como su instrumento. (1 Corintionan 1:26-29; 3:1; Colosensenan 2:18) Sinembargo, ta Yehova a scohe Pablo, na harmonia cu Su bondad inmereci y proposito husto. (1 Corintionan 15:8-10) Tanto e personanan cu Pablo a describi como “super-apostelnan”, como otro opositor, a nenga di acepta Pablo y su rasonamento for di e Scritura. Nan falta di humildad a stroba nan di siña conoce y compronde e manera glorioso cu Yehova ta cumpli cu su proposito. Laga nos nunca balota of core husga esnan cu Yehova a scohe pa cumpli cu su boluntad.—2 Corintionan 11:4-6.

12. Con e ehempel di Moises ta mustra cu Yehova ta faborece hende cu ta humilde?

 ¹² Di otro banda, tin hopi ehempel biblico cu ta enfatisa con hende humilde ta haya e privilegio pa mira maske ta un punta di e gloria di Dios. Moises, kende “tawata masha humilde”, a mira e gloria di Dios y tawatin un amistad intimo cu Dios. (Numbernan 12:3) Moises a pasa 40 aña como un humilde wardado di carne, y mayor parti di e tempo ei el a pasa probablemente riba e Peninsula di Arabia. E Creador a faborece e homber humilde aki den hopi manera. (Exodo 6:12, 30) Cu e respaldo di Yehova, Moises a bira bosero y organisado principal di e nacion di Israel. Moises tawatin comunicacion cara cara cu Dios, na moda di papia. Mediante un vision, el a mira e “aparencia di SEÑOR.” (Numbernan 12:7, 8; Exodo 24:10, 11, NW) E hendenan cu a acepta e humilde sirbido y representante aki di Dios tambe a haya bendicion. Di igual manera, nos tambe lo haya bendicion si nos acepta y obedece e profeta mas grandi cu Moises, esta, Hesus, y “e esclabo fiel y prudente” cu Hesus a apunta.—Mateo 24:45, 46; Echonan 3:22.

13. Con Yehova su gloria a keda revela na wardadonan humilde den prome siglo?

¹³ Ta riba ken ‘e gloria di Yehova a resplandece’ na momento cu un angel a anuncia e bon noticia di e nacemento di “un Salbador, kende ta Cristo e Señor”? No tawata riba e lidernan religioso arogante ni riba e hendenan den puesto halto, sino riba e humilde wardadonan di carne cu “tawata keda den e sabananan, y cu anochi tawata tene warda riba nan tou di carne.” (Lucas 2:8-11) E personanan aki no a haya masha respet pa nan habilidad ni pa nan trabou. Sinembargo, ta nan tawata esnan cu Yehova a tuma nota di dje y a scohe pa notifica prome tocante e nacemento di e Mesias. Si, Yehova ta revela su gloria na hende humilde y temeroso di Dios.

14. Con Dios ta recompensa hende cu ta humilde?

¹⁴ Kico e ehempelnan aki ta siña nos? Nan ta mustra nos cu Yehova ta faborece y revela conocemento y comprondemento di su proposito na hende humilde. E ta scohe personanan cu kisas no tin e cualificacionnan cu cierto hende ta verwacht, y ta uza nan como su medio pa comunica su proposito glorioso na otronan. Esaki mester motiva nos pa sigui acudi na Yehova, na su Palabra profetico y na su organisacion pa haya guia. Nos por tin sigur cu Yehova lo mantene su humilde sirbidonan informa di e manera cu su proposito glorioso ta desaroya. Profeta Amos a declara: “Siguramente, SEÑOR Dios no ta haci nada, sin cu e revela su conseho secreto na su sirbidonan, e profetanan.”—Amos 3:7.

Cultiva Humildad y Ricibi Dios Su Aprobacion

15. Dicon nos tin cu haci esfuerso pa keda humilde, y con e caso di Rei Saul di Israel ta enfatisa esaki?

¹⁵ Pa nos tin Dios su aprobacion eterno, nos mester keda humilde. Unabes humilde no ta nifica semper humilde. Ta posibel pa un persona perde su humildad y entrega na orguyo y cuminsa halsa su mes, locual ta hiba na actonan di arogancia y desaster. Esei ta precis loke a pasa cu Saul, e prome persona ungi como rei di Israel. Na principio ora a scoh’e, e ‘tawata chikito den su mes bista.’ (1 Samuel 15:17) Sinembargo, despues di a goberna pa apenas dos aña, el a actua cu arogancia. El a pasa Yehova su areglo di ofrece sacrificio mediante profeta Samuel por halto, y a bin cu excuse pa hustifica dicon el a tuma asuntonan den su mes man. (1 Samuel 13:1, 8-14) Esaki tawata e comienso di un serie di acontecemento cu a revela inekibocablemente su falta di humildad. Como resultado Saul a perde Dios su spirito y aprobacion, locual cu tempo a hiba na su morto bergonsoso. (1 Samuel 15:3-19, 26; 28:6; 31:4) E les ta bon cla: Nos tin cu haci esfuerso pa keda humilde y sumiso, y domina e sintimento di cu nos ta masha importante. Di  e manera ei nos ta evita actonan di arogancia cu ta resulta den Yehova su desaprobacion.

16. Con meditando riba nos relacion cu Yehova y cu nos prohimo por yuda nos cultiva humildad?

¹⁶ Aunke humildad no ta ser menciona como un parti di e fruta di Dios su spirito, e ta un cualidad cu Dios ta desplega y cu nos mester cultiva. (Galationan 5:22, 23; Colosensenan 3:10, 12) Siendo cu humildad ta encera un condicion di nos mente—esta, con nos ta mira nos mes y otro hende—nos tin cu haci un esfuerso conciente pa nos por cultiv’e. Un cos cu por yuda nos keda humilde ta di rasona y medita riba nos relacion cu Yehova y cu nos prohimo. Den bista di Dios, tur carni imperfecto ta manera yerba berde cu ta crece pa un periodo di tempo, despues ta seca y marchita. Hende ta manera simpel tiracochi den un cunucu. (Isaias 40:6, 7, 22) Acaso un sprichi di yerba tin motibo pa e ta orguyoso djis pasobra e ta un tiki mas largo cu e otro sprichinan? Un tiracochi tin motibo pa broma cu su habilidad djis pasobra e por bula un tiki mas leu cu e otro tiracochinan? Djis pensa esei so ta absurdo. Pesei apostel Pablo a recorda su compañeronan cristian: “Ta ken ta considera bo superior? Y kico bo tin cu bo no a ricibi? Ma si bo a ricibie, pakico bo ta gaba como si fuera bo no a ricibie?” (1 Corintionan 4:7) Meditando riba textonan biblico manera esaki por yuda nos cultiva y desplega humildad.

17. Kico a yuda profeta Daniel cultiva humildad, y kico por yuda nos haci mescos?

¹⁷ Un angel a declara cu profeta Hebreo Daniel tawata un “homber masha stima” den bista di Dios door cu el a “humiya” su mes, esta, pa motibo di su humildad. (Daniel 10:11, 12) Kico a yuda Daniel cultiva humildad? Na prome luga, el a desplega un confiansa total den Yehova, y regularmente a acudi na dje den oracion. (Daniel 6:10, 11) Ademas, Daniel a studia e Palabra di Dios diligentemente y cu e motivacion corecto, locual a yud’e mantene un bista bon cla di Dios su proposito glorioso. Tambe Daniel tawata dispuesto pa admiti su propio faltanan, no solamente esnan di su  pueblo. Y e tawata realmente interesa den promove Dios su husticia, no su mes husticia. (Daniel 9:2, 5, 7) Nos lo por siña for di Daniel su ehempel sobresaliente y haci esfuerso pa cultiva y demostra humildad den tur aspecto di nos bida?

18. Ki gloria ta spera hende cu ta desplega humildad awe?

¹⁸ Proverbionan 22:4 ta declara: “E recompensa di humildad y e temor di SEÑOR ta rikesa, honor y bida.” Si, Yehova ta faborece esnan cu ta humilde, y e resultado ta gloria of honor y bida. E salmista Asaf a hera bandona su sirbishi na Dios, pero despues cu el a laga Yehova reahusta su manera di pensa, el a reconoce humildemente: “Cu bo conseho lo bo guia mi, y despues ricibi mi den gloria.” (Salmo 73:24) Con esaki ta aplica awe? Ki gloria ta spera esnan cu ta desplega humildad? Fuera di disfruta di un amistad privilegia y bendiciona cu Yehova, nan por anticipa di mira cumplimento di e palabranan inspira aki di Rei David: “E humildenan lo hereda e tera, y lo deleita nan mes den pas abundante.” Esei en berdad ta un futuro glorioso!—Salmo 37:11.

Bo Ta Corda?

• Con Esteban ta un ehempel di un persona humilde na ken Yehova a revela Su gloria?

• Den ki maneranan Yehova Dios a desplega humildad?

• Ki ehempelnan ta mustra cu Yehova ta revela su gloria na hende humilde?

• Con e ehempel di Daniel por yuda nos cultiva humildad?

[Preguntanan di Estudio]

[Cuadro na pagina 12]

Cu Conviccion Firme Pero Humilde

Na aña 1919 Studiantenan di Bijbel (conoci awe como Testigonan di Yehova) a tene un congreso na Cedar Point, Ohio, Merca. E tempo ei J. F. Rutherford di 50 aña tawata supervisa e trabou di predica, y gustosamente el a ofrece pa fungi como cargado di maleta y a escolta e delegadonan di congreso na nan cuartonan. Riba e ultimo dia di e congreso, el a causa gran emocion serca e 7.000 hendenan presente cu e palabranan: “Boso ta embahado di e Rei di reinan y Señor di señornan, anunciando na hende . . . e glorioso reino di nos Señor.” Aunke Ruman Rutherford tawata un homber cu conviccion firme, conoci pa su manera di papia cu curashi y sin compromete loke e tawata kere ta e berdad, e tawata tambe berdaderamente humilde dilanti di Dios. Esei a keda refleha hopi bes den e oracionnan cu e tawata haci na Betel durante e programa di adoracion di mainta.

[Plachi na pagina 9]

Esteban, versa den e Scritura, humildemente a parti cuminda

[Plachi na pagina 10]

Manases su humildad a agrada Yehova

[Plachi na pagina 12]

Kico a haci Daniel un “homber masha stima”?