Pregunta di Lector

Dicon a permiti homber Israelita casa cu mohe stranhero cu tawata den cautiverio siendo cu e Lei di Moises a manda pa no sera aliansa matrimonial cu stranheronan?—Deuteronomio 7:1-3; 21:10, 11.

E motibo pakico a permiti esaki tin di aber cu circunstancianan special. Yehova a manda e Israelitanan pa destrui e stadnan di shete nacion na e tera di Canan, y mata tur nan habitantenan. (Deuteronomio 20:15-18) Den caso di otro nacionnan, e unico adultonan cu probablemente a sobrevivi tawata birgennan captura. (Numbernan 31:17, 18; Deuteronomio 20:14) Pero ta solamente si un mohe asina a dal cierto pasonan, un homber Israelita lo por a casa cu ne.

Relaciona cu e pasonan cu un hende mohe asina mester a dal, Bijbel ta bisa: “Lag’e feita su cabes y corta su huñanan, y kita e bisti di su cautiverio. Y despues cu el a keda den bo cas y a yora su tata y su mama henter un luna, bo mag drumi cu ne y bira su esposo, y e lo ta bo esposa.”—Deuteronomio 21:12, 13.

Si un Israelita kier a casa cu un birgen cu nan a captura, e birgen aki mester a feita su cabes. Feitamento di cabes tawata un forma di expresa luto y tristesa. (Isaias 3:24) Por ehempel, ora e patriarca Job a perde tur su yiunan y tur su pertenencianan, el a feita su cabes pa refleha su tristesa. (Job 1:20) Ademas un hende mohe stranhero mester a drecha su huñanan, kisas door di “corta” nan di tal manera cu asta si nan tawata pinta mes, su mannan lo no a parce atractivo. (Deuteronomio 21:12) Kico tawata “e bisti di su cautiverio” cu e hende mohe captura mester a kita? E hende mohenan di stadnan pagano, tawatin e custumber di bisti nan miho bisti ora enemigonan tawata a punto di captura nan stad. Nan tawata haci esei cu e speransa di atrae esnan cu a captura nan. Ta e bisti ei e hende mohe den cautiverio cu tawata di luto mester a kita.

Un hende mohe captura cu tawata bai bira esposa di un hende homber Israelita mester a tene luto pa su defuntonan pa un luna lunar. E destruccion di e stadnan derota mester tawata asina total cu ningun di su famia- y contactonan social lo no por tawata na bida mas. Siendo cu e soldanan Israelita lo a destrui tur e imagennan di su diosnan, su obhetonan di adoracion lo no tawat’ei mas. Tambe e luna lunar a sirbi como un periodo di purificacion durante cua un hende mohe den cautiverio tawata kibra tur laso cu e tawatin cu su religion anterior.

Pero e situacion tawata diferente den caso di hende mohe stranhero en general. Relaciona cu esaki, e siguiente principio tawata aplica: “No emparenta [‘sera aliansa matrimonial’, NW] cu nan; no duna bo yiu mohe na nan yiu homber, ni tuma nan yiu mohe pa bo yiu homber.” (Deuteronomio 7:3) Pa ki motibo nan a haya e restriccion aki? Deuteronomio 7:4 ta bisa: “Pasobra nan lo kita bo yiu homber di sigui mi pa sirbi otro diosnan.” Pues, e prohibicion tawata pa proteha e Israelitanan di contaminacion religioso. Sinembargo, un hende mohe den e circunstancianan describi na Deuteronomio 21:10-13 no tawata un menasa den e sentido ei. Tur su famianan tawata morto, y e imagennan cu ta representa su diosnan a wordo destrui. E no tawatin ningun contacto cu practicadonan di religion falso. Bou di tal circunstancia a permiti un homber Israelita casa cu un hende mohe stranhero.