Hoben—Laga Bo Mayornan Yuda Bo Proteha Bo Curason!

KICO bo ta kere ta e cos di mas dificil pa capitan di un barco haci? Crusa un oceano inmenso sano y salvo? Por lo general no. Mayoria biaha barconan ta sink pega cu costa, no den lama grandi. De echo, por ta asta mas peligroso pa mara un barco na waf cu baha un avion. Pakico?

Prome cu un capitan por mara su barco sano y salvo, e tin cu evita tur e peligernan cu un cierto haf ta trece cu ne. E tin cu tene cuenta cu corientenan bou di awa mientras cu e ta evita di dal den otro barco. Tambe e tin cu pasa rond di cai, baranca of botonan cu a sink y cu ta scondi bou di awa. Y pa complica e asuntonan mas, kisas ta prome bes cu e ta bishita e haf.

Pa yuda vence e problemanan aki, un capitan sabi por busca e servicionan di un loods cu conoce e awanan local manera su plant’i man. E loods ta para banda di e capitan den e stuurkamer y duna instruccion specialisa. Hunto nan ta considera e peligernan y ta stuur e barco pasa door di canalnan smal pa yega na e haf.

E conocemento specialisa di e loods ta ilustra e yudansa balioso disponibel pa hobennan cristian cu tin cu plania nan curso door di e awanan turbulento di bida. Kico e yudansa aki ta? Pakico teenagernan tin mester di dje?

Laga nos sigui cu e ilustracion di e barco. Si bo ta un adolecente, den un sentido bo ta manera capitan di un barco pasobra un dia bo tin cu cuminsa asumi responsabilidad den bida. Y mescos cu e loods di un barco, bo mayornan tin e tarea di guia bo atrabes di situacionnan hopi dificil cu un dia lo bo tin cu enfrenta den bida. Sinembargo, durante bo añanan como teenager, kisas bo ta haya cu ta dificil pa acepta conseho di bo mayornan. Pakico?

Hopi bes e problema ta bo curason. Bo curason figurativo por impulsa bo pa desea loke ta prohibi of pa protesta contra cualkier cos cu por parce di limita bo libertad. Bijbel ta bisa cu “e intencion di curason di hende ta malo for di su hubentud.” (Genesis 8:21) Yehova ta mustra bon cla cu bo tin un berdadero reto bo dilanti. E ta spierta bo cu “[bo] curason ta e cos di mas engañoso cu tin, y e ta peligrosamente ingobernabel.” (Yeremias 17:9, Rotherham) Ademas di cultiva mal deseo secretamente, e curason por gaña un hoben y lag’e kere cu e ta mas sabi cu su mayornan, aunke su mayornan  tin hopi mas experencia cu ne. Sinembargo, tin bon motibo pa bo busca e yudansa di bo mayornan ora bo ta nabegando den e añanan dificil como teenager.

Pakico Obedece Bo Mayornan?

Riba tur cos, Yehova, e Originador di famia, ta bisa bo cu bo tin cu scucha instruccion di bo mayornan. (Efesionan 3:15) Siendo cu Dios a nombra bo mayornan pa percura pa bo, e ta duna bo e conseho aki: “Muchanan, obedece boso mayornan manera ta agrada Señor, pasobra esei ta corecto.” (Efesionan 6:1-3, BPK; Salmo 78:5) Aunke bo por ta un teenager caba, ainda bo mayornan tin e responsabilidad pa guia bo, y abo tin e obligacion di scucha loke nan ta bisa bo. Ora apostel Pablo a skirbi cu mucha mester obedece nan mayornan, el a uza un palabra Griego cu por aplica na mucha di tur edad. Por ehempel, manera Mateo 23:37 ta bisa, Hesus a referi na e habitantenan di Herusalem como su “yiunan”, maske mayoria di nan tawata adulto.

Hopi hende fiel di antiguedad a sigui obedece nan mayornan basta tempo despues cu nan a bira adulto. Por ehempel, aunke Yacob tawata homber grandi caba, el a compronde cu e mester a obedece e mandamento di su tata pa evita di casa cu un persona cu no tawata adorado di Yehova. (Genesis 28:1, 2) Sin duda, Yacob a mira tambe con e decision di su ruman pa casa cu mohenan pagano Cananeo a causa su mayornan bastante dolor di curason.—Genesis 27:46.

Ademas di e echo cu ta Dios a duna nan e responsabilidad di guia bo, probablemente bo mayornan cristian ta e personanan mas capas pa actua como bo conseheronan. Esei ta principalmente asina pasobra nan conoce bo bon y indudablemente a demostra nan amor sin egoismo pa bo durante hopi aña. Mescos cu e loods di un barco, nan ta papia di experencia. Nan mes a experencia “e pasionnan di hubentud.” Y como cristian berdadero, nan a mira personalmente e balor di sigui principionan di Bijbel.—2 Timoteo 2:22.

Cu yudansa di e mayornan experencia ei den bo banda, bo ta den un miho posicion pa deal cu asta e situacionnan di mas dificil cu exito. Tuma por ehempel bo relacion cu personanan di e sexo opuesto. Con mayornan cristian por guia bo den e asunto delicado aki?

Atraccion na e Sexo Opuesto

Un loods lo conseha capitan di un barco pa keda leu for di un cai cu ta extende bou di awa. Cainan di santo ta moli pero tambe traicionero ya cu nan ta cambia di posicion constantemente. Mescos tambe bo mayornan kier pa bo keda leu for di situacionnan cu por bira un trampa emocional pa bo. Por ehempel, mayornan sa cu sintimento pa cu e sexo opuesto ta intenso y por ta dificil pa defini. Pero unabes nan lanta cabes, nan por sink bo.

E ehempel di Dina ta ilustra e risico di yega mucho serca di peliger. Podise curiosidad y un deseo pa gosa di bida a impulsa Dina pa busca amistad serca e mucha mohenan Cananeo, kende nan normanan moral siguramente a laga hopi di desea. Loke na prome instante a parce di ta dibirticion inocente pronto a hiba na un experencia tragico. El a ser viola sexualmente pa e yoncuman “di mas respeta” den e stad.—Genesis 34:1, 2, 19.

E enfasis constante riba sex den e mundo djawe ta haci e peligernan ei bira piyo. (Oseas 5:4) Mayoria hoben ta duna e impresion cu dibirticion cu e sexo opuesto ta e cos di mas excitante cu por tin. Bo curason por bira hopi  excita cu e idea di ta so cu un persona cu bo ta haya atractivo. Pero mayornan amoroso lo purba proteha bo for di asocia cu hobennan cu no ta respeta e normanan di Dios.

Laura ta admiti cu curiosidad por ciega teenagernan pa peliger. “Ora e mucha mohenan den mi klas bisa mi cu nan a balia te anochi laat cu algun mucha homber great, nan ta haci como si fuera esei ta un experencia inolvidabel. Mi sa cu hopi bes nan ta exagera, pero toch e ta lanta mi curiosidad y mi ta pensa cu podise mi ta perdiendo mitar di mi bida. Aunke mi sa cu mi mayornan tin rason di no laga mi bai e luganan ei, toch mi ta sinti e tentacion.”

Un barco no tin break, pues e ta tuma basta tempo pa e para. Mayornan sa cu den caso di pasion ta mescos. E buki di Proverbionan ta compara un homber cu ta laga su pasion domin’e cu un buey of toro cu ta bai pa wordo mata. (Proverbionan 7:21-23) Bo no kier pa un cos asina pasa cu bo pasobra esei por pone bo sink emocionalmente y spiritualmente. Bo mayornan por ripara mesora ora bo curason a cuminsa engaña bo den e area aki, y nan lo por duna bo conseho di acuerdo cu esei. Lo bo ta suficiente sabi pa scucha nan y asina evita calamidad?—Proverbionan 1:8; 27:12.

Tambe bo tin mester di apoyo di bo mayornan ora bo tin cu enfrenta presion di bo pareunan. Con nan por yuda bo?

E Influencia Fuerte di Bo Pareunan

Un marea of coriente fuerte por saca un barco for di su curso. Pa contraresta e forsa aki, mester stuur e barco den un otro direccion. Mescos tambe, si bo no tuma e medidanan necesario, e influencia persuasivo di otro hobennan por saca bo spiritualmente for di bo curso.

Manera e experencia di Dina ta ilustra, “ai di esun cu ta amigo di hende bobo.” (Proverbionan 13:20, BPK) Corda cu den contexto di Bijbel, un hende “bobo” ta un persona cu no conoce Yehova of cu no kier cana den su camindanan.

Sinembargo, kisas no ta facil pa rechasa puntonan di bista of custumbernan di bo compañeronan di klas. María José ta splica:  “Mi tawata kier pa otro hobennan acepta mi. Door cu mi no tawata kier pa nan pensa cu mi ta diferente for di nan, mi a imita nan mas tanto posibel.” Sin cu bo ta realisa esei, bo pareunan por ta afectando bo den bo escohencia di musica, den loke bo kier bisti, of asta den bo manera di papia. Podise bo ta sinti bo comodo ora bo ta den compania di hobennan di bo mes edad. Esei ta natural, pero bo ta keda vulnerable pa nan influencia fuerte, locual por ta destructivo.—Proverbionan 1:10-16.

Caroline ta corda e dificultad cu el a pasa aden un par di aña pasa: “For di 13 aña di edad, mayoria di e mucha mohenan rond di mi tawatin mucha homber, y pa hopi aña mi tawata bou di presion constante pa sigui nan ehempel. Sinembargo, mi mama a guia mi atrabes di e periodo dificil aki. E tawata dedica oranan largo pa scucha mi, rasona cu mi y yuda mi mira e necesidad pa pospone e tipo di relacionnan ei te ora mi tawata mas maduro.”

Mescos cu mama di Caroline, bo mayornan por sinti nan obliga pa spierta bo tocante presion di pareu of asta limita cierto actividad- of amistadnan. Nathan ta corda varios clash cu e tawatin cu su mayornan riba e asuntonan aki. E ta splica: “Hopi bes mi amigonan tawata invita mi pa sali hunto cu nan, pero mi mayornan no tawata kier pa mi sali ‘hang around’ den grupo grandi of bai fiestanan sin supervision. E tempo ei, mi no por a compronde pakico otro mayornan si tawata permiti nan yiunan haci e cosnan ei.”

Sinembargo, mas despues Nathan a bin compronde esei. E ta admiti: “Mi sa cu den mi caso ‘locura tawata mara den [mi] curason.’ Ta parce cu e locura aki ta bini ariba facilmente ora mucha hombernan ta sali ‘hang around’ den grupo. Un ta cuminsa cu algo malo, un otro ta bai un stap mas aleu, y un di tres ta haci cosnan piyo ainda. Den un rato di ora tur e otronan ta sinti nan tenta pa join nan. Asta hobennan cu ta bisa cu nan ta sirbi Yehova por cai den e trampa aki.”—Proverbionan 22:15.

Tanto Nathan como María José tawatin cu lucha cu nan curason ora nan mayornan no a laga nan haci e cosnan cu nan pareunan a bisa nan pa haci. Ma nan a scucha, y despues nan tawata contento cu nan a haci esei. E proverbio ta bisa: “Inclina bo horea y tende e palabranan di hende sabi, y dirigi bo curason na mi conocemento.”—Proverbionan 22:17.

Digno di Honor

Ta dificil pa stuur un barco cu ta kenter, y si e kenter demasiado, e por bolter facilmente. Pa motibo cu nos ta imperfecto, nos tur tin e tendencia di len na loke ta egoista y prohibi. Apesar di e tendencianan aki, toch hobennan por alcansa haf, na moda di papia, si nan sigui e guia di nan mayornan cuidadosamente.

 Por ehempel, bo mayornan por yuda bo rechasa e idea cu tin un caminda meimei entre esun smal cu ta hiba na bida y esun hancho cu ta hiba na destruccion. (Mateo 7:13, 14) No ta realista pa pensa cu bo por disfruta un poco di loke ta malo sin kibra e lei di Dios, como si fuera bo por “purba” kico ta pica sin gulie. Esnan cu ta purba hiba un bida asina ta “duda entre dos opinion”—sirbiendo Yehova te na cierto grado pero stimando tambe e mundo y e cosnan den e mundo—y por kenter y bolter facilmente den sentido spiritual. (1 Reinan 18:21; 1 Huan 2:15) Pakico esei ta sosode? Pa motibo di nos tendencianan pecaminoso.

Nos deseonan imperfecto ta bira mas fuerte ora nos entrega na nan. Nos ‘curason engañoso’ no ta keda contento cu djis purba pica. Lo e exigi mas. (Yeremias 17:9) Unabes nos cuminsa drif bai spiritualmente, e mundo lo eherce un influencia mas y mas grandi riba nos. (Hebreonan 2:1) Kisas bo no ta ripara cu bo ta bezig ta kenter spiritualmente, pero probablemente bo mayornan cristian si lo nota esei. Ta berdad cu kisas nan no ta mes lihe cu bo pa siña un programa di computer, pero nan sa hopi mas cu bo tocante e curason engañoso. Y nan kier yuda bo “dirigi bo curason riba e caminda” cu por hiba na bida.—Proverbionan 23:19.

Claro cu bo no mester spera cu bo mayornan ta husga cosnan perfectamente ora nan tin cu guia bo den areanan dificil, manera musica, entretenimento y areglo personal. Kisas bo mayornan no tin e sabiduria di Salomon of e pasenshi di Job. Mescos cu e loods di un barco, kisas tin biaha nan ta demasiado cauteloso. Pero di tur manera, si bo presta atencion na “e instruccion di bo tata, y no bandona e siñansa di bo mama”, nan guia lo ta di hopi balor pa bo.—Proverbionan 1:8, 9.

Talbes otro hobennan ta papia malo di nan mayornan. Pero si bo mayornan ta purba sigui e Scritura, nan ta para na bo lado, den tur tipo di tempo, na tur momento, apesar di tur contratiempo. Mescos cu un loods experencia ta guia e capitan di un barco, asina bo tin mester di bo mayornan pa guia bo, pa dirigi bo den e caminda di sabiduria. E recompensanan por ta hopi.

“Sabiduria lo bin den bo curason, y conocemento lo ta agradabel na bo alma. Discrecion lo warda bo; comprondemento lo cuida bo. Sabiduria lo libra bo for di e caminda di maldad, for di e hende cu ta papia cosnan perverso, for di esnan cu ta bandona e bereanan di rectitud, pa cana den e camindanan di scuridad . . . Pasobra e rectonan lo biba den e tera, y e perfectonan lo keda den dje.”—Proverbionan 2:10-13, 21.

[Plachi na pagina 22]

E influencia di otro hobennan por saca bo spiritualmente for di curso

[Plachi na pagina 23]

Corda e experencia di Dina

[Plachi na pagina 24]

Mescos cu capitan di un barco ta busca conseho di un loods experencia, asina hobennan mester busca e guia di nan mayornan

[Plachi na pagina 24]

Potret: www.comstock.com