Amigonan di Dios Riba e Islanan di Tonga

Na 1932 un barco di bela a trece algun simiña di hopi balor na Tonga. E capitan di e boto a duna Charles Vete e foyeto “Unda e Mortonan Ta?” Charles tawata combenci cu el a haya e berdad. Poco tempo despues, e sede di Testigonan di Yehova a aproba Charles su peticion pa e traduci e foyeto den su idioma natal. Despues cu el a caba e trabou, el a ricibi 1.000 foyeto imprimi y a cuminsa reparti nan. Asina e simiñanan di e berdad tocante e Reino di Yehova a cuminsa plama den e reino di Tonga.

RIBA un mapa di Sur Pacifico, bo por haya Tonga djis west di caminda e datumgrens internacional ta topa e asina yama Steenbokskeerkring. Su isla mas grandi, Tongatapu, ta situa rond di 2.000 kilometer nortost di Auckland, Nueva Zelandia. Tonga ta consisti di 171 isla, di cua 45 ta habita. E famoso explorado Britanico di siglo 18, James Cook, a yama e islanan isola aki Friendly Islands.

Cu un poblacion di mas o menos 106.000 hende, Tonga ta consisti di tres grupo di isla. E tres gruponan principal ta Tongatapu, Ha’apai y Vava’u. Di e cinco congregacionnan local di Testigonan di Yehova, tres ta den e grupo mas pobla, esta Tongatapu, un ta na Ha’apai y e otro ta na Vava’u. Pa yuda e hendenan bira amigo di Dios, Testigonan di Yehova tin un cas di misionero y un oficina di traduccion banda di e capital Nuku’alofa.—Isaias 41:8.

For di e decada di 1930 bini dilanti Charles Vete tawata ampliamente conoci como un Testigo di Yehova, aunke ta te na aña 1964 el a batisa. Mas hende a join e den e trabou di predica y na 1966 nan a construi un Salon di Reino cu tawatin capasidad di 30 persona. Na 1970 nan a forma un congregacion di 20 publicado di Reino na Nuku’alofa.

Djei padilanti por mira bon cla con e palabranan di profeta Isaias a cumpli riba e islanan  di Tonga: “Laga nan honra SEÑOR, y laga hende riba e islanan canta su gloria.” (Isaias 42:12, BPK) E obra di Reino a sigui prospera, y esei a yuda hopi hende drenta den un relacion cu Yehova. Na e congreso di districto na Nuku’alofa na 2003, tawatin un asistencia maximo di 407 persona y 5 persona a batisa. E cantidad di 621 persona cu a asisti na e Memorial na 2004 ta indica cu tin bon prospecto pa mas crecemento.

Nan Ta Hiba un Bida Simpel

Sinembargo, leu for di e capital ta bisto cu ainda tin mester di mas proclamado di Reino. Por ehempel, e 8.500 hendenan cu ta biba riba e 16 islanan habita di e grupo Ha’apai mester tende mas tocante e berdad di Bijbel. Gran parti di Ha’apai ta consisti di islanan plat yen di pal’i coco cu beachnan largo di santo. Lama ta cristalino y hopi bes e visibilidad bou di awa ta mas cu 30 meter. Landa entre e coralnan y e mas cu shen sorto di pisca tropical colorido ta un experencia extraordinario. Por lo general e comunidadnan ta chikito. Aunke e casnan ta simpel, nan ta masha resistente contra ciclon tropical.

Palo di un tipo di fruta di pan y di mango ta duna sombra y cuminda. Gran parti di e bida di tur dia ta wordo dedica na busca y prepara cuminda. Ademas di porco, e isleñonan ta gusta come pisca y otro bestia di lama cu tin na abundancia. Hofinan di famia ta produci batata y berdura. Palo di lamunchi y apelsina ta crece den mondi; tambe tin palo di coco y di bacoba na granel. E conocemento local di yerba, blachi, casca y raiz medicinal ta pasa di un generacion pa otro.

Claro cu e recurso mas agradabel di Ha’apai ta su hendenan amigabel, cu ta adapta nan mes facilmente den nan ambiente trankil. Aki, bida ta simpel. Mayoria hende mohe ta haci obra di man; nan ta traha macutu, un paña tipico cu yama ‘tapa’ y tambe mat. Ora e mohenan di Tonga ta traha, nan ta sinta, canta, papia y hari cu otro bou di un palo cu ta duna sombra, hopi bes cu nan yiunan y babynan hungando of drumi banda di nan. Y por lo general ta e mohenan ta bai lama ora tin marea abou pa cohe paluli y otro bestia di lama, y tambe e zeewier bros cu nan ta prepara un salada delicioso cu ne.

Mayoria hende homber ta dedica nan na sea traha den hofi, pisca, traha obheto, construi boto y drecha reda. Tanto homber como mohe y mucha ta biaha entre e islanan den boto di piscado chikito cu capa pa bai bishita famia, bai docter y bende y cumpra cos.

No Tin Luga Cu Ta Mucho Leu pa e Bon Nobo

Ta e ambiente pacifico aki dos misionero y dos minister pionero a bin topa ora nan a yega den e dianan prome cu e Memorial di 2002. Anteriormente tawatin algun contacto caba cu e hendenan di Ha’apai y esakinan a ricibi literatura publica door di Testigonan di Yehova y asta a studia Bijbel cu e Testigonan.

E cuater maestronan di Bijbel cu a yega tawatin tres obhetivo: laga literatura biblico, cuminsa estudio di Bijbel y invita personanan interesa pa asisti na e celebracion di e Cena di Señor. Nan a logra tur tres. Nobentishete persona a responde na e invitacion pa asisti na e Conmemoracion di e morto di Hesus. Algun  di nan a biaha den botonan sin capa apesar di e awasero pisa y bientonan fuerte. Pa motibo di mal tempo, hopi hende a pasa anochi caminda a tene e Memorial, y nan a bai cas bek e dia siguiente.

Pa e orado pa Memorial tampoco cosnan no tawata facil. E misionero cu tawata e orado a bisa: “Mi no tin nodo di bisa bo con dificil ta pa duna dos discurso di Memorial den un idioma straño riba e mesun anochi. Bo por imagina bo con nervioso mi tawata. Ta oracion a yuda! Mi a corda palabranan y structuranan di frase cu casi mi no a realisa mes cu mi tawata sa.”

Como resultado di e interes cu e evangelisadonan a cultiva riba e islanan di Ha’apai, dos pareha casa di e area ei a batisa. Den un caso, e esposo a mustra interes den e literatura di e Testigonan tempo cu e tawata hayando preparacion pa bira lider den e iglesia local.

Aunke e homber cu su casa ta hende di poco recurso, nan tawata duna hopi placa na contribucion ora nan nomber ser anuncia na misa durante un sirbishi anual pa recauda fondo. Un Testigo cu a yega di bishita e esposo anteriormente a pidie habri su Bijbel y lesa 1 Timoteo 5:8. Ei apostel Pablo a skirbi: “Si un hende no provee pa su mes hendenan, y specialmente pa esnan di su cas, el a nenga e fe y ta piyo cu un incredulo.” E principio di Bijbel aki a conmove e esposo. El a realisa cu door di cede na e exigencianan pisa di iglesia, e no por a cumpli cu e necesidadnan basico di su famia. Na e siguiente misa anual cu tawatin e colecta, aunke e tawatin e placa den su saco, e no por a lubida 1 Timoteo 5:8. Ora su nomber a ser yama, cu curashi el a bisa e pasto cu e necesidadnan di su famia tawata mas importante. Door di esei, e ancianonan di iglesia a menosprecia y ridiculisa e pareha publicamente.

Despues di a studia Bijbel cu Testigonan di Yehova, e homber cu su casa a bira publicado di e bon nobo. E esposo ta bisa: “E berdad di Bijbel a cambia mi. Mi no ta trata mi famia malo mas. Tambe mi a stop di bebe di mas. E hendenan di mi comunidad por mira e diferencia cu e berdad a haci den mi bida. Mi ta spera cu un dia nan lo stima e berdad mescos cu mi.”

Uzo di Quest den e Buskeda

Un par di luna despues di e Memorial di 2002, un otro barco di bela a trece algun carga balioso pa e islanan remoto di Ha’apai. E yate Quest di 18 meter cu a bini di Nueva Zelandia a nabega entre e islanan di Tonga. A bordo tawatin Gary cu Hetty, hunto cu nan yiu mohe Katie. Nuebe ruman di Tonga y dos misionero a compaña nan riba dos biahe. E Testigonan local a yuda nabega e boto habilmente, algun biaha pasando riba refnan desconoci. No tawata trata aki di biahenan di placer. E personanan a bordo tawat’ei pa bai siña otro hende e berdad di Bijbel. Nan a pasa 14 isla, cubriendo distancianan grandi riba lama. Algun di e islanan ei nunca a yega di tende di e bon nobo di Reino.

Con e hendenan a reacciona? Por lo general, e predicadonan cu a bini cu barco a topa cu hende curioso, cariñoso y cu e hospitalidad tradicional di e islanan aki. Unabes e isleñonan a compronde e proposito di e bishita, nan a keda hopi gradicido. Tawata bisto pa e Testigonan bishitante cu e isleñonan tawatin respet pa e Palabra di  Dios y cu nan tawata conciente di nan necesidad spiritual.—Mateo 5:3.

Hopi biaha, e bishitantenan tawata sinta bou di palonan tropical rondona pa hende cu tawatin varios pregunta tocante Bijbel. Despues cu a bira anochi, e combersacionnan riba Bijbel tawata sigui den e casnan. Ora e Testigonan mester a despedi di e hendenan riba un di e islanan, esakinan a bisa e Testigonan: “No bai! Ken lo contesta nos preguntanan ora boso bai?” Un Testigo a remarca: “Semper tawata dificil pa bai laga asina tanto hende semehante na carne cu tawatin hamber pa e berdad. Nos a planta hopi simiña di e berdad.” Ora e barco Quest a yega un di e islanan, e Testigonan a haya tur hende bisti na luto. E esposa di e oficial di e pueblo a caba di muri. El a gradici e rumannan personalmente pa a trece un mensahe di consuelo for di Bijbel.

No tawata facil pa yega na algun di e islanan. Hetty ta splica: “Un isla no tawatin un luga cumbiniente pa baha, y tur caminda tawatin baranca ta sali varios centimeter for di awa. Ta cu nos boto chikito di rubber so nos por a yega. Prome, nos tawatin cu tira nos tasnan pa e cantidad di mannan boluntario na costa. Despues, segun cu ola tawata hisa e boto chikito na haltura di e terras di un baranca, nos tawatin cu bula riba esaki prome cu e boto a baha atrobe den e ola.”

Sinembargo, no ta tur hende a bordo tawata nabegantenan intrepido. Despues di a nabega pa dos siman, e capitan a skirbi relaciona cu e biahe di regreso pa e isla principal di Tongatapu: “Awor nos tin cu bai nabega 18 ora largo. Pero nos no por haci e trayecto den un tiro pasobra a bordo tin hende cu a marea. Nos ta contento di por bai cas bek pero alabes masha tristo pa laga atras asina tanto hende cu awor a tende e mensahe di Reino. Nos ta laga nan den man di Yehova; cu su spirito santo y angelnan lo e yuda nan crece spiritualmente.”

Islanan cu Hopi Perspectiva

Rond di seis luna despues cu e barco Quest a sali, a asigna dos evangelisado cu ta pionero special, Stephen y Malaki, pa predica den e grupo di isla di Ha’apai. Ei nan a join e dos parehanan casa resien batisa den e obra di siñansa biblico. E publicadonan ta haya nan den combersacionnan interesante tocante asuntonan di doctrina y nan ta haci bon uzo di Bijbel.

Dia 1 di december 2003 a forma un congregacion na Ha’apai, e di cinco na Tonga. Den e grupo tin hopi mucha. Nan a siña scucha cu atencion. Nan ta sinta keto y ta ansioso pa duna comentario ora e oportunidad presenta. E superintendente di sircuito a comenta cu “nan conocemento di Mi buki di relato bíblico ta mustra cu mayornan ta tuma masha na serio nan responsabilidad pa inculca e berdad di Bijbel den nan yiunan.” Tur cos ta mustra cu tin bon perspectiva riba e islanan ei pa loke ta aumento den e cosecha di mas amigo di Yehova.

Mas cu 70 aña pasa, ora Charles Vete a traduci e foyeto Unda e Mortonan Ta? den su idioma natal, Tongano, e no por a imagina su mes te na ki grado e simiña di Reino lo a saca raiz den curason di su paisanonan. For di e principio humilde ei Yehova a sigui bendiciona e proclamacion creciente di e bon nobo den e parti lehano ei di nos planeta. Awe, di berdad nos por bisa cu Tonga ta entre e islanan remoto di lama cu, na moda di papia, ta acudiendo na Yehova. (Salmo 97:1; Isaias 51:5) Awor nan ta birando e hogar di hopi amigo di Yehova.

[Plachi na pagina 8]

Charles Vete, 1983

[Plachi na pagina 9]

Trahando un paña ‘tapa’

[Plachi na pagina 10]

A uza “Quest” pa plama e bon nobo na Tonga

[Plachi na pagina 11]

Team di traduccion, Nuku’alofa

[Reconocemento pa Potret na pagina 9]

Trahando un paña ‘tapa’: © Jack Fields/CORBIS; fondo di pagina 8 y 9, y piscamento: © Fred J. Eckert