Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Kico un cristian por haci si e ta sintie emocionalmente of spiritualmente cansa?

Nos tin cu identifica e causa di nos cansancio. Kisas ta bon pa haci un inventario di nos custumbernan y pocesionnan, y pone un banda tur peso innecesario. Nos por pone metanan realistico segun nos circunstancia. Ta importante pa nos cuida nos salu spiritual y esei ta encera cu nos mester haci oracion y medita regularmente.—15/8, pagina 23-6.

• Pakico Testigonan di Yehova ta mira e cifra 144.000 como algo literal?

Despues cu apostel Huan a tende tocante e 144.000, el a mira “un multitud grandi cu ningun hende no por a conta.” (Revelacion 7:4, 9) Si e cifra 144.000 tawata simbolico, e efecto di e contraste ei lo a bai perdi. Hesus a yama esnan cu lo reina cu ne un “tou chikito.” (Lucas 12:32)—1/9, pagina 30.

• Dicon un Israelita tawatin mag di bende un bestia morto cu no a sangra cu un stranhero?

Un stranhero y un residente stranhero cu no a bira proselito, no tawata bou di e Lei. Pesei un Israelita tawatin mag di duna of bende e bestianan ei cu nan. (Deuteronomio 14:21) Pero un proselito si tawata mara na e Lei y lo no a come carni di bestia cu no a sangra. (Levitico 17:10)—15/9, pagina 26.

• Kico ta biomimetica, y dicon lo e por ta di interes pa cristiannan?

Esei ta e campo di ciencia cu ta purba imita diseñonan cu tin den naturalesa. Por ehempel, e ruman hombernan Wright a diseña un avion despues di a studia con parhanan grandi ta bula. Pues, biomimetica por motiva un cristian pa duna gloria na e Creador.—1/10, pagina 9.

• Ta ken ta e persona cu 2 Corintionan 12:2-4 ta bisa cu a wordo hiba den paradijs?

E pasashi ei ta bini un poco despues di e versiculonan den cua Pablo a defende su posicion como apostel. Siendo cu Bijbel no ta papia di ni un otro persona cu tawatin un experencia asina, y ya cu ta Pablo ta esun cu ta conta nos di dje, probablemente ta e mes tawatin e vision aki.—15/10, pagina 8.

• Cua ta algun caracteristica di Hesus cu ta cualifica’e como Lider scohi door di Dios?

Hesus a mantene integridad perfecto, siendo honesto y recto den su conducta. E tawata completamente dedica na Dios. Hesus tawatin interes profundo den hende y tawata dispuesto pa traha.—1/11, pagina 6-7.

• Unda e demoñonan lo ta durante e Mil Aña?

Nos por yega na e conclusion logico cu durante Cristo su Reinado di Mil Aña lo mara nan y tira nan hunto cu Satanas den e abismo. (Revelacion 20:1-3) Genesis 3:15 a predeci cu lo herida e colebra su cabes, y esaki ta encera e seramento di Satanas den abismo durante e Mil Aña. Su simiña ta inclui e angelnan malbado, esta, e demoñonan. E echo cu nan a mustra cu nan tin miedo di e abismo ta indica cu nan ta conciente di e benidero restriccion aki. (Lucas 8:31)—15/11, pagina 30-1.

• Dicon un persona mester tene cuidou cu bebemento di alcohol, asta si e ta evita di yega te na e punto cu hende ta mira cu e ta burachi?

Tin persona ta duna masha tiki señal di ta burachi maske nan a dal varios drinks. Sinembargo, pocopoco pero sigur un persona por cuminsa depende di alcohol y bira “esclabisa na biña.” (Tito 2:3) Hesus a spierta nos pa no bira carga “pa causa di paranda y buracheria [of, “comemento di mas y bebemento di mas”, NW].” (Lucas 21:34, 35) Un hende no mester a bebe te bira burachi pa e cuminsa sinti su mes groggy y floho tanto den sentido fisico como spiritual.—1/12, pagina 19-21.