Bida—Balioso of Barata?

“Siendo cu hende ta crea den e imagen di Dios, kitamento di un hende su bida ta destruccion di e cos mas balioso y mas sagrado na mundo.”—The Plain Man’s Guide to Ethics, di William Barclay.

‘E COS mas balioso na mundo.’ Abo tambe ta considera bida asina? Pero e manera cu hende ta comporta nan mes ta mustra bon cla cu hopi di nan no ta di acuerdo cu e escritor ei. Personanan violento cu ta purba alcansa metanan egoista sin tene ningun tiki consideracion cu bienestar di nan prohimo, a kita miyones di bida cruelmente.—Eclesiastes 8:9.

Facil pa Remplasa y Desechabel

Prome Guera Mundial ta un ehempel clasico. Bes tras bes durante e conflicto teribel ei, “e curpanan di hende a ser sacrifica pornada”, segun historiado A.J.P. Taylor. Den nan empeño pa alcansa prestigio y gloria, lidernan militar a uza soldanan como si fuera nan no tawata bal nada y tawata masha facil pa remplasa. Den e bataya pa e stad Verdun na Francia, mas cu mei miyon hende a wordo mata. Taylor a skirbi relaciona cu esei: “No tawatin ningun premio [di un balor strategico] pa gana ni perde, solamente hende pa mata y gloria pa gana.”—The First World War (E Prome Guera Mundial).

Te awe ta reina tal falta di respet pa balor di bida. Academico Kevin Bales ta señala cu den ultimo tempo, un “aumento drastico di poblacion ... a inunda e mercadonan laboral di mundo cu miyones di hende pober y vulnerable.” Nan ta confronta un lucha cu lo dura henter nan bida, un lucha pa simplemente sobrevivi den un sistema comercial opresivo den cua “bida a perde balor.” Segun  Bales, e hendenan cu ta oprimi nan ta trata nan casi manera catibo, manera “instrumentonan completamente desechabel cu ta ser uza pa traha placa.”—Disposable People (Hende Desechabel).

“Coremento Tras di Biento”

Tin hopi motibo mas pakico miyones di hende ta sinti nan mes desespera, cu nan no ta bal absolutamente nada y cu ningun hende realmente tin cu nes si nan biba of muri. Fuera di guera y inhusticia, tin e dañonan causa door di secura, hamber, malesa, morto di sernan keri y cantidad di otro cos cu ta afligi henter humanidad, locual ta pone hende puntra nan mes si bida ta bale la pena.—Eclesiastes 1:8, 14.

Claro cu no ta tur hende ta pasa un bida di miseria y angustia extremo. Pero asta esnan cu no a pasa door di tal opresion severo, hopi bes ta expresa e mesun pensamento cu Rei Salomon di antiguo Israel, kende a puntra: “Kico hende ta haya den tur su trabou y den su lucha cu cual e ta traha duro bou di solo?” Despues di pensa riba e asunto, hopi hende ta realisa cu gran parti di loke nan a haci a resulta di ta “banidad y coremento tras di biento.”—Eclesiastes 2:22, 26.

“Ta esaki ta tur loke tin?” Asina hopi hende ta puntra ora nan wak bek riba nan bida. Si bo wak bon, ta cuanto hende tin cu na final di nan bida ta sinti nan mes berdaderamente ‘satisfecho di nan bida’, manera e patriarca Abraham a sinti? (Genesis 25:8) Mayoria hende ta cana cu e sintimento cu tur cos ta banidad. Pero bida no tin nodi ta banidad. Dios ta considera delaster un bida humano balioso y kier pa nos cada un hiba un bida realmente activo y satisfecho. Con esei lo ser realisa? Considera loke e siguiente articulo tin di bisa riba e topico aki.