“Keda Alerta”

DEN tempo antiguo, tawatin portero cu a traha na entrada di stad y di tempel y den algun caso, asta na entrada di casnan priva. Fuera di haci sigur cu e portanan tawata sera anochi, porteronan a fungi tambe como vigilante. Esaki tawata un asignacion masha responsabel, pasobra siguridad di e stad a depende di nan yamada pa spierta e hendenan di cualkier peliger inminente.

Hesucristo tawata conoci cu e papel di portero, cu nan a yama tambe wardado di porta. Na un ocasion, el a compara su disipelnan cu wardado di porta y a anima nan pa keda vigila y alerta relaciona cu e conclusion di e sistema di cosnan Hudiu. Hesus a bisa: “Tene cuidou, keda alerta, pasobra boso no sa ki ora e tempo ta yega. Ta manera un hende cu a bai haci un biahe, kende a laga su cas y ... a ordena e wardado di porta pa keda alerta. Pesei, keda alerta, pasobra boso no sa ki ora e señor di e cas ta bin.”—Marco 13:33-35.

Di igual manera, ya pa mas cu 125 aña e revista aki, E Toren di Vigilancia, ta transmiti Hesus su animacion pa “keda alerta.” Con? Manera tin para skirbi na pagina 2 di e revista aki: “E ta vigila susesonan di mundo segun cu esakinan ta cumpli cu profecia biblico. E ta consola tur hende cu e bon noticia di cu e Reino di Dios pronto lo destrui tur esnan cu ta oprimi nan prohimo y lo cambia e tera den un paradijs.” E Toren di Vigilancia, cu un circulacion mundial di mas cu 26.000.000 ehemplar na 150 idioma, ta e revista religioso mas ampliamente distribui na mundo. Mediante dje, Testigonan di Yehova, mescos cu e porteronan di antiguedad, ta urgi hende rond mundo pa “keda alerta” den sentido spiritual pasobra e Señor, Hesucristo, ta a punto di bolbe y ehecuta huicio riba e sistema di cosnan aki.—Marco 13:26, 37.