Informe di Proclamadonan di Reino

Buscando Hende Digno den Interior di Australia

ALGUN parti remoto di e inmenso interior di Australia tawatin 12 aña sin haya bishita di Testigonan di Yehova. Pesei Testigonan di Yehova na Darwin, ciudad capital di Teritorio di Nort, a organisa un campaña di nuebe dia di predicacion intensivo pa busca hende digno di scucha e bon nobo.—Mateo 10:11.

Planiamento cuidadoso a cuminsa 12 luna prome cu e campaña, y esei a encera trahamento di mapa pa un area di mas cu 800.000 kilometer cuadra, locual ta casi e tamaño di Venezuela. Pa haya un idea con aisla e teritorio inmenso aki ta, djis imagina cu por lo general e distancia for di porta di cura pa yega dilanti di porta di cas di un ganaderia of rancho ta mas cu 30 kilometer! Ademas, algun rancho ta keda 300 kilometer leu of mas for di otro.

Un total di 145 boluntario Testigo a participa den e campaña. Algun di nan a bin for di basta leu, asta for di Tasmania. Tin di nan a bin den vehiculonan four-wheel-drive carga cu ekipo di kampeer, piesanan di reserva y combustibel. Otronan a bin cu nan ekipo den trailer. Ademas, e rumannan a huur dos bus di 22 asiento pa hiba esnan cu no tawatin vehiculonan adecuado. Esnan cu a biaha den bus a predica principalmente na e habitantenan di pueblitonan den e teritorio selecta.

Prome cu e biahe a cuminsa, e rumannan encarga a haci areglo pa tene varios discurso y demostracion pa asina duna guia con pa presenta e bon nobo den e teritorio extraordinario aki. Por ehempel, pa predica na un manera efectivo den comunidadnan aborigen normalmente ta rekeri pa bo sigui cierto protocol y ta na haltura di custumbernan aborigen. Tambe nan a trata aspectonan di medioambiente pa yuda proteha bida den naturalesa.

E publicadonan tawatin hopi experencia sobresaliente. Por ehempel, den un comunidad  aborigen, e rumannan a haci areglo pa duna un discurso publico basa riba Bijbel. E lider femenino di e comunidad personalmente a bai informa e hendenan di e discurso. Despues, e publicadonan a laga 5 buki y 41 foyeto cu esnan presente. Den un otro comunidad, e rumannan a haya contacto cu un homber aborigen. E tawatin asta su propio Bijbel, un King James Version, pero e Bijbel tawata bieu y tur kibra. Ora nan a puntr’e si e sa e nomber di Dios, el a bisa si, anto a saca for di e saco di su bachi un edicion bieu di E Toren di Vigilancia. El a lesa un pida for di e revista, citando Marco 12:30 [NW], cu ta bisa: “Bo tin cu stima Yehova bo Dios cu henter bo curason.” E di: “Mi gusta e texto ei masha hopi.” Despues di un combersacion extenso, el a acepta un Bijbel nobo y otro literatura basa riba Bijbel.

Serca di Golfo di Carpentaria, e hefe di un ganaderia di 400.000 hectar a mustra un poco interes den e mensahe di Reino. Ora e publicadonan a mustr’e Mi buki di relato bíblico y Conocimentu cu Ta Hiba na Bida Eterno, * el a puntra nan si tawatin literatura disponibel na idioma Creol. Esaki tawata un peticion straño pasobra maske hopi aborigen ta papia Creol, poco di nan por les’e. A resulta cu tur e 50 empleadonan di e rancho ei por a lesa Creol. E hefe a keda hopi contento di por a haya literatura biblico na Creol, y gustosamente el a duna su number di telefon pa asina e rumannan por a tuma contacto cu ne.

Durante e nuebe dianan di predicacion intensivo, e rumannan a laga un total di 120 Bijbel, 770 buki, 705 revista y 1.965 foyeto. Ademas, nan a haci 720 rebishita y a cuminsa 215 estudio di Bijbel.

Si, porfin ta sacia e hamber spiritual di hopi hende digno cu ta biba plama den e area inmenso aki.—Mateo 5:6.

[Nota]

[Mapa na pagina 30]

(Pa e texto den su formato completo , wak e publicacion)

AUSTRALIA

TERITORIO DI NORT

Darwin

Golfo di Carpentaria

Sydney

TASMANIA