Demasiado Conocemento pa Nos?

Un pareha misionero sinta na un beach na West Africa tawata contempla e splendor suave di luna. E homber a puntra: “Kico hende sa di luna y cuanto mas nan falta pa siña di dje?”

Su esposa a agrega: “Awor imagina bo cu nos por a mira tera pasa nos dilanti asin’aki. Kico hende sa caba di tera, y cuanto mas nan falta pa siña di dje? Anto pensa riba esaki, ademas di cu tera ta drei den su orbita rond di solo, henter nos sistema solar ta moviendo. Esaki ta nifica cu probablemente nunca mas nos lo ta exactamente na e mesun punto aki den universo. Ademas, nos por calcula nos posicion actual den universo solamente en relacion cu solo y e streyanan cu nos conoce. Nos tin masha hopi conocemento di cierto cosnan, pero den un sentido, nos no sa mes unda nos ta!”

E PENSAMENTONAN ei tin di aber cu algun berdad fundamental. Ta parce cu tin masha hopi cos di siña y tur dia nos ta siña algo nobo. Pero, maske cuanto cos nos siña, ta parce cu nos no por caba di siña tur loke nos kier, ni siña nan mes lihe cu nos lo a desea.

Nos tin cu reconoce si cu ademas di nos capasidad pa siña cos nobo, e capasidad pa warda informacion a aumenta masha hopi. Uzo di tecnologia ta permiti hende graba un enorme cantidad di informacion. Hard disk di e computernan di actualidad tin capasidadnan asina grandi cu mester a inventa palabranan matematico nobo pa describi nan. Un simpel CD-ROM por contene un enorme cantidad di informacion; su capasidad ta di 680 megabyte of mas. Un DVD normal por contene casi shete biaha mas tanto informacion cu esei, y den futuro lo tin algun cu tin capasidad mas grandi ainda.

Otro cos cu casi nos no por caba di compronde ta e medionan moderno cu hende ta uza pa haci e informacion disponibel. Imprentanan di rotacion pa produci corant, revista y buki ta drei riba velosidadnan haltisimo. Un persona cu ta uza Internet por haya informacion pa no caba door di djis primi un boton. Den e maneranan aki y den hopi otro mas, e distribucion di informacion ta tuma luga mucho mas lihe cu cualkier hende por asimila. Nan a yega di compara e cantidad di informacion aki cu un lama; e ta asina extenso cu nos tin cu siña landa den dje, na moda di papia, pero sin purba bebe tur. E inmenso  cantidad na nos disposicion ta obliga nos pa ta selectivo.

Un motibo mas pakico nos mester ta selectivo ta cu hopi di e informacion disponibel no semper ta beneficioso. Tin biaha e ta asta indeseabel y no ta bale la pena pa sa mes. Corda cu conocemento tin di aber cu informacion—sea bon of malo, positivo of negativo. Piyo ainda, algun cos cu hopi hende ta acepta como echo simplemente no ta cuadra cu berdad. Cuanto biaha e declaracionnan di asta autoridadnan respeta a resulta despues di ta incorecto? Pensa por ehempel riba e secretario di e stad antiguo di Efeso, sin duda reconoci einan como un funcionario bon informa. El a declara: “Ken no sa cu e stad di e Efesionan ta wardado di e tempel di e gran diosa Artemis y di e imagen cu a cai for di shelo?” (Echonan 19:35, 36) Aparentemente tur hende tawata sa esaki y pa hopi e tawata asta incuestionabel. Pero no ta berdad cu e imagen a cai for di shelo. Cu bon motibo anto, e Scritura Santo ta spierta Cristiannan pa tene cuidou cu “loke falsamente ta wordo yama ‘conocemento.’”—1 Timoteo 6:20.

Un motibo fuerte pa ta selectivo tocante conocemento ta cu nos bida actual ta masha cortico. Sea cual sea bo edad, sin duda tin hopi area di conocemento cu lo bo tin gana di explora, pero bo sa cu lo bo no biba suficiente largo pa haci esei.

E problema basico aki lo cambia algun dia? Por tin un ramo di conocemento disponibel cu lo prolonga bida pa hopi tempo mas, asta pa semper? Tin posibilidad cu e conocemento ei ta existi caba? Si ta asina, lo e ta disponibel pa tur hende? Lo yega e dia ora cu tur conocemento lo consisti di loke nos ta spera, esta, e berdad? E pareha misionero menciona anteriormente a haya contestanan satisfactorio riba e preguntanan aki. Bo tambe por. Pesei nos ta invita bo pa lesa e siguiente articulo cu ta bai mustra bo cu lo yega e dia cu bo por sigui gana conocemento pa semper.