E Palabra di Yehova Ta Bibo

Puntonan Sobresaliente di e Buki di Segundo Samuel

HENDE mester reconoce e soberania di Yehova. Pero esei ta exigi obediencia perfecto di nos parti? Un persona cu ta manifesta integridad semper ta haci loke ta corecto den bista di Dios? Ki tipo di hende ta ‘conforme e curason’ di e Dios berdadero? (1 Samuel 13:14) E buki biblico di Segundo Samuel ta duna contestanan satisfactorio riba e preguntanan aki.

E escritornan di Segundo Samuel ta Gad y Natan. Nan tawata dos profeta hopi pega cu Rei David di Israel di antiguedad. * Nan a completa e buki rond di aña 1040 prome cu nos era, casi na fin di David su reinado di 40 aña. E buki ta bai principalmente over di David y su relacion cu Yehova. E relato fasinante aki ta mustra con un nacion yen di conflicto a bira un reino prospero, uni bou di un rei balente. E drama fasinante aki ta yen yen di emocionnan humano hopi profundo.

DAVID A BIRA “MAS Y MAS PODEROSO”

(2 Samuel 1:1–10:19)

E reaccion di David riba e noticia di morto di Saul y Yonatan ta revela ki sintimento e tawatin pa nan y pa Yehova. Na Hebron, David a ser nombra como Rei riba e tribu di Huda. Is-boset, yiu di Saul, a ser nombra como Rei riba e resto di Israel. David a bira “mas y mas poderoso”, y un shete aña y mei despues nan a hacie Rei riba henter Israel.—2 Samuel 5:10.

David a conkista Herusalem for di e Jebuseonan y a hacie capital di su reino. Su prome intento pa transporta e arca di aliansa pa Herusalem a resulta desastroso. Ma e di dos intento si a bai bon, y David a balia di alegria. Yehova a sera un aliansa of pacto cu David pa un reino. David a domina su enemigonan pasobra Dios a sigui ta cu ne.

Contesta Riba Pregunta Biblico:

2:18—Pakico Joab y su dos ruman hombernan ta ser identifica como e tres yiu hombernan di Sarvia, nan mama? Den e Scritura Hebreo, por lo general tawata menciona e tata den genealogia. Kisas e esposo di Sarvia tawatin hopi tempo morto caba of podise nan no a haya cu e tawata digno pa ser inclui den e Santa Scritura. Posiblemente a menciona Sarvia pasobra e tawata ruman mohe di David. (1 Cronicanan 2:15, 16) E unico referencia na e tata di e tres rumannan ta en conexion cu su graf na Betlehem.—2 Samuel 2:32.

 3:29, NW—Kico e declaracion ‘un homber cu ta gara un mashin di hila cu ta drei’ ta nifica? Ta hende mohe tawatin custumber di weef paña. Pesei, e expresion aki por referi na hombernan cu no tawata den un posicion pa bai guera y cu pesei a haya nan obliga di haci trabou cu normalmente hende mohe ta haci.

5:1, 2—Cuanto tempo despues cu Is-boset a ser asesina, David a ser nombra como Rei riba henter Israel? Ta parce rasonabel pa conclui cu Is-boset a cuminsa su reinado di dos aña un poco despues di e morto di Saul, rond di e mesun tempo cu David a cuminsa esun di dje na Hebron. David a goberna riba Huda for di Hebron pa shete aña y mei. Un poco despues cu el a bira Rei riba henter Israel, el a muda su capital pa Herusalem. Pesei, a pasa mas o menos cinco aña despues di e morto di Is-boset prome cu David a bira Rei riba henter Israel.—2 Samuel 2:3, 4, 8-11; 5:4, 5.

8:2—Cuanto Moabita a ser ehecuta despues cu Israel a derota nan? Probablemente a determina e cantidad door di midi en bes di conta. Ta parce cu David a pone e Moabitanan drumi abou banda di otro den un rei. Despues el a laga midi e rei cu un liña of cabuya di cierto largura. Aparentemente, dos midi di cabuya, of dos tercera parti di e Moabitanan, a ser mata, y un midi di cabuya, o sea un tercera parti di nan, a keda na bida.

Les pa Nos:

2:1; 5:19, 23. Prome cu David a bai biba na Hebron y prome cu el a lanta contra su enemigonan, el a busca e guia di Yehova. Awe nos tambe mester busca e guia di Yehova prome cu nos tuma decisionnan cu por tin efecto riba nos condicion spiritual.

3:26-30. Vengansa ta hiba na consecuencianan tristo.—Romanonan 12:17-19.

3:31-34; 4:9-12. David a pone un bon ehempel di no venga ni keda cu rabia riba hende.

5:12. Nos no mester lubida nunca cu ta Yehova a educa nos den su camindanan y a haci posibel pa nos tin un bon relacion cu ne.

6:1-7. Aunke David tawatin bon intencion, su intento pa move e Arca riba un garoshi a viola e mandamento di Dios y a fracasa. (Exodo 25:13, 14; Numbernan 4:15, 19; 7:7-9) E echo cu Uza a saca man pa tene e arca ta mustra tambe cu bon intencion no ta cambia Dios su rekisitonan.

6:8, 9. Den un momento di dificultad, David a rabia prome y despues haya miedo—talbes asta culpando Yehova pa e tragedia. Nos tin cu tene cuidou pa no culpa Yehova pa problemanan cu nos ta cosecha ora nos falta cu su mandamentonan.

7:18, 22, 23, 26. David su humildad, su debocion exclusivo na Yehova y su interes den halsa e nomber di Dios ta cualidadnan cu nos tin cu imita.

8:2. Un profecia cu a ser expresa un 400 aña anterior a cumpli. (Numbernan 24:17) Semper Yehova ta fiel na su palabra.

9:1, 6, 7. David a cumpli cu su promesa. Nos tambe mester haci esfuerso pa cumpli cu nos palabra.

YEHOVA A LANTA MALDAD CONTRA SU UNGI

(2 Samuel 11:1–20:26)

Yehova a bisa David: “Mira, lo mi lanta maldad contra bo for di bo mes cas; lo mi tuma bo esposanan dilanti di bo bista y duna nan na bo compañero, y e lo drumi cu bo esposanan di dia cla.” (2 Samuel 12:11) Pa ki motibo Yehova a haci e declaracion aki? Esei ta pa motibo di David su pica cu Betsabe. Aunke David a repenti y a ser pordona, e no a sali liber si di e consecuencianan di su pica.

Pa di prome, e yiu cu Betsabe a haya a muri. Despues Amnon a viola su mitar ruman Tamar, kende tawata un yiu mohe  birgen di David. Pa vengansa, Absalon, ruman di Tamar, a mata Amnon. Absalon a conspira contra su mes tata y a proclama su mes Rei na Hebron. David a hay’e obliga ta hui for di Herusalem. Absalon a tene relacion sexual cu dies di e concubinanan di su tata cu a keda atras pa cuida e cas. Ta te despues cu Absalon a ser mata David a bolbe na su reinado. Un rebeldia cu e Benjaminita Seba a instiga a bin caba den Seba su morto.

Contesta Riba Pregunta Biblico:

14:7, NW—Kico “e briyo di mi carbon” a simbolisa? E briyo di carbon cu ta kimando pocopoco a simbolisa e desendientenan cu tawata na bida.

19:29—Pakico David a reacciona asina riba e splicacion di Mefi-boset? Despues cu David a tende Mefi-boset, e mester a realisa cu el a faya ora el a djis bai tras di palabra di Ziba. (2 Samuel 16:1-4; 19:24-28) Muy probablemente esaki a disgusta David y e no kier a tende mas di e asunto.

Les pa Nos:

11:2-15. E relato franco di David su fayonan ta duna prueba di e echo cu Bijbel ta e Palabra inspira di Dios.

11:16-27. Ora nos comete un pica serio, nos no mester purba scond’e manera David a haci. Mas bien, nos mester confesa nos pica na Yehova y busca yudansa di e ancianonan di congregacion.—Proverbionan 28:13; Santiago 5:13-16.

12:1-14. Natan a pone un bon ehempel pa ancianonan nombra den e congregacion. Nan mester yuda e rumannan cu cai den pica pa corigi nan pasonan. Ancianonan mester cumpli cu e responsabilidad aki na un manera habil.

12:15-23. Door cu David tawatin e punto di bista corecto di loke a sosode cu ne, e por a reacciona na un manera adecuado ora el a haya su mes den dificultad.

15:12; 16:15, 21, 23. Ora tur cos tawata mustra cu Absalon lo a haya e trono, orguyo y ambicion a pone e consehero sobresaliente Ahitofel bira un traido. Inteligencia sin humildad y lealtad por ta un trampa.

19:24, 30. Mefi-boset tawata masha gradicido na David pa su bondad amoroso. El a somete su mes di buena gana na e decision cu Rei a tuma relaciona cu Ziba. Aprecio pa Yehova y pa su organisacion mester impulsa nos pa ta sumiso.

20:21, 22. E sabiduria di un solo persona por evita un desaster pa hopi hende.—Eclesiastes 9:14, 15.

 LAGA NOS CAI “DEN MAN DI SEÑOR”

(2 Samuel 21:1–24:25)

Pa tres aña largo tawatin un scarsedad di cuminda pa motibo di culpa di sanger di parti di Saul, kende a laga mata e Gabaonitanan. (Hosue 9:15) Pa venga e culpa di sanger ei, e Gabaonitanan a pidi pa haya shete yiu homber di Saul pa nan ehecuta. David a entrega nan den man di e Gabaonitanan y un awasero a pone fin na e secura. Cuater gigante Filisteo a “cai na man di David y na man di su sirbidonan.”—2 Samuel 21:22.

David a comete un pica serio door di a laga tene un censo ilegal. El a repenti y a opta pa cai “den man di SEÑOR.” (2 Samuel 24:14) Como resultado, 70.000 Israelita a muri di un pest. David a sigui e mandamento di Yehova y e plaga a bin termina.

Contesta Riba Pregunta Biblico:

21:9, 10—Pa cuanto tempo Rispa a tene un warda pa su dos yiu hombernan y e cinco nietonan di Saul cu e Gabaonitanan a mata? E shete personanan aki a wordo horca “durante di e prome dianan di cosecha”—maart of april. Nan cadavernan a keda exponi riba un sero. Rispa a tene warda riba e shete curpanan di dia y anochi te dia Yehova a pone fin na e secura mustrando asina cu su rabia a pasa. No ta probabel cu lo tawatin awasero fuerte prome cu e temporada di cosecha a caba den october. Pesei Rispa lo a keda vigila pa casi cinco of seis luna. Despues di esei, David a laga dera e wesonan di e hombernan.

24:1, NW—Pakico e contamento di e pueblo tawata un pica serio di parti di David? Un censo riba su mes no tawata prohibi den e Lei. (Numbernan 1:1-3; 26:1-4) Einan Bijbel no ta bisa ken a instiga David pa conta e pueblo. Sinembargo, 1 Cronicanan 21:1 ta indica cu ta Satanas a instig’e. Sea loke sea, su hefe militar, Joab, tawata sa cu David su decision pa registra e pueblo tawata robes, y el a purba desconseha David pa sigui cu su plan.

Les pa Nos:

22:2-51. Den e cantica aki David ta duna un bunita descripcion di Yehova como e Dios berdadero cu merece nos pleno confiansa!

23:15-17. David tawatin un respet asina profundo pa e lei di Dios tocante bida y sanger cu na e ocasion aki el a keda sin haci loke a parce un violacion di e lei ei. Nos mester cultiva e mesun actitud pa cu tur mandamento di Dios.

24:10. David su consenshi a impuls’e pa e arepenti. Nos consenshi tin suficiente heful pa e reacciona den e manera ei?

24:14. David tawata combenci cu Yehova ta mas misericordioso cu hende. Nos tin e mesun conviccion?

24:17. David tawatin duele cu su pica a pone henter e nacion sufri. Un malechor arepenti mester sinti remordimento pa e berguensa cu su accion por a causa pa e congregacion.

Nos Tur Por Bira ‘Conforme Dios Su Curason’

E di dos Rei di Israel a demostra cu e tawata un homber ‘conforme Yehova su curason.’ (1 Samuel 13:14) Nunca David a cuestiona e normanan husto di Yehova, y e no a purba sigui un caminda di independencia for di Dios. Cada biaha cu David a faya, el a reconoce su pica, a acepta disiplina y a corigi su camindanan. David tawata un homber di integridad. Ta sabi pa nos sigui su ehempel, specialmente ora nos faya.

E storia di bida di David ta ilustra na un manera bibo cu reconoce e soberania di Yehova ta un asunto di acepta Su normanan di bon y malo y haci esfuerso pa cumpli cu nan como wardadonan di integridad. Esaki ta na nos alcanse. Nos ta hopi gradicido pa e lesnan cu nos ta siña for di e buki di Segundo Samuel! En berdad, e mensahe inspira cu e ta contene ta bibo y ta eherce poder.—Hebreonan 4:12.

[Nota]

[Plachi na pagina 16]

David a corda ken a establec’e firmemente como Rei, y esei a yud’e keda humilde

[Plachi na pagina 18]

“Mira, lo mi lanta maldad contra bo for di bo mes cas”

Betsabe

Tamar

Amnon