Riba Ki Fundeshi Bo Ta Edificando?

DURABILIDAD di un edificio ta depende principalmente di con fuerte su base of fundeshi ta. Tin bes Bijbel ta uza e principio aki den un sentido figurativo.

Profeta Isaias por ehempel, ta referi na Yehova Dios como esun cu ‘a pone e fundeshi di tera.’ (Isaias 51:13) E fundeshi aki ta consisti di leinan incambiabel di Dios cu ta controla e movecion di tera y ta ten’e na su luga. (Salmo 104:5) Bijbel, e Palabra di Dios, ta papia tambe di “e fundeshinan” riba cua sosiedad humano ta estableci. Nan ta husticia, lei y orden. Ora ‘destrui’ of debilita nan door di inhusticia, corupcion y violencia, e sosiedad ta perde su orden y stabilidad.—Salmo 11:2-6; Proverbionan 29:4.

E principio aki ta aplica tambe den caso di hende individual. Na final di Hesucristo su famoso Sermon Riba Sero, el a bisa: “Ken cu tende e palabranan aki di mi, y haci nan, lo wordo compara cu un homber sabi cu a traha su cas riba baranca. Y awasero a cai, dilubionan a bin, y bientonan a supla, y a suta duro contra e cas ei; y toch e no a cai, pasobra e tawata funda riba baranca. Y ken cu tende e palabranan aki di mi, y no haci nan, lo ta manera un homber bobo cu a traha su cas riba santo. Y awasero a cai, dilubionan a bin, y bientonan a supla, y a suta duro contra e cas ei; y el a cai, y su caida tawata grandi.”—Mateo 7:24-27.

Riba ki fundeshi abo ta edificando bo bida? Riba e santonan instabil di filosofia humano ateista cu lo resulta den un colapso structural? Of bo ta edificando riba e baranca solido di obediencia na e palabranan di Hesucristo, cu lo yuda bo pasa safe door di e tormentanan figurativo den bida?