Yehova Ta Proteha Hende Cu Ta Spera den Dje

“Bo misericordia y bo berdad lo warda mi continuamente.” —SALMO 40:11.

1. Kico Rei David a pidi Yehova, y con Yehova ta cumpliendo actualmente cu e peticion ei?

REI DAVID di Israel di antiguedad “a spera cu pasenshi” den Yehova y a ser conmovi pa bisa cu Yehova “a inclina su mes na [dje] y a scucha [su] sclamacion.” (Salmo 40:1) Bes tras bes David a mira personalmente con Yehova a proteha hende cu a stim’e. Pesei David por a pidi Yehova pa ward’e of proteh’e continuamente. (Salmo 40:11) Siendo cu David ta ser conta entre e homber- y mohenan fiel cu tawatin e promesa di “un miho resureccion”, actualmente e ta safe den Yehova su memoria como un di esnan cu lo ricibi e recompensa ei. (Hebreonan 11:32-35) Pues, su futuro ta sigura den e miho manera posibel. Su nomber ta skirbi den Yehova su “buki di memoria.”—Malakias 3:16.

2. Con e Scritura ta yuda nos compronde kico kiermen ser proteha door di Yehova?

² Aunke e sirbidonan fiel menciona na Hebreonan capitulo 11 a biba prome cu Hesucristo su estadia riba tera, toch nan a biba na harmonia cu loke Hesus a siña ora el a bisa: “Esun cu stima su bida ta perd’e, y esun cu odia su bida den e mundo aki lo ward’e pa bida eterno.” (Huan 12:25) Pues, ta bisto cu ser proteha door di Yehova no ta nifica cu un persona lo no sufri of hay’e cu persecucion. Loke si e ta nifica ta cu un persona ta ser proteha den un sentido spiritual pa asina e por mantene un posicion aproba dilanti di Dios.

3. Ki evidencia nos tin cu Yehova a proteha Cristo Hesus, y kico tawata e resultado?

³ Hesus mes tawata victima di persecucion cruel y reproche, y su enemigonan finalmente a logra mat’e na un manera sumamente bergonsoso y doloroso. Sinembargo, esaki no ta nifica cu Dios a kibra su promesa di proteha e Mesias. (Isaias 42:1-6) Hesus su resureccion riba e di tres dia despues di su morto bergonsoso ta proba cu Yehova a tende su sclamacion pa ausilio, mescos cu Yehova a tende e sclamacion di David. Anto como contesta, Yehova a duna Hesus e fortalesa pa mantene integridad. (Mateo 26:39) Siendo proteha di e manera aki, Hesus a obtene inmortalidad den shelo, y miyones di hende cu a eherce fe den e rescate ta bin na remarca pa haya bida eterno.

4. Ki siguransa Bijbel ta duna cristiannan ungi y e “otro carnenan”?

 ⁴ Nos por tin e confiansa cu Yehova ta mesun dispuesto y capasita pa proteha su sirbidonan awe cu e tawata den tempo di David y di Hesus. (Santiago 1:17) E cantidad relativamente chikito di rumannan ungi di Hesus cu ainda ta riba tera por confia den e promesa aki di Yehova: “Un herencia cu ta incoruptibel y sin mancha y cu lo no marchita ... ta reserva den shelo pa boso, kendenan ta proteha door di e poder di Dios pa medio di fe, pa un salbacion cu ta cla pa wordo revela den e ultimo tempo.” (1 Pedro 1:4, 5) E “otro carnenan”, kendenan tin e speransa di biba riba tera, tambe por pone nan confiansa den Dios y den su promesa haci mediante e salmista: “Stima SEÑOR, boso tur, su santonan! SEÑOR ta preserva e fielnan.”—Huan 10:16; Salmo 31:23.

Proteha Spiritualmente

5, 6. (a) Con Dios su pueblo a ser proteha den tempo moderno? (b) Ki relacion e unginan tin cu Yehova, y ki relacion esnan cu e speransa di biba riba tera tin cu ne?

⁵ Den tempo moderno, Yehova a haci areglo pa proteha su pueblo den un sentido spiritual. Aunke e no ta proteha nan di persecucion of di dificultad- y tragedianan comun den bida, lealmente el a duna nan e yudansa y motivacion necesario pa proteha nan relacion intimo cu ne. E fundeshi riba cua nan a edifica e relacion aki ta nan fe den Dios su amoroso percuracion di e rescate. Dios a ungi algun di e fiel cristiannan aki pa medio di su spirito pa nan bira coheredero cu Cristo den shelo. Dios a declara nan husto como su yiunan spiritual, y ta na nan e palabranan aki ta aplica: “El a libra nos di e poder di scuridad, y a traslada nos pa e reino di su Yiu stima, den kende nos tin redencion [of, “liberacion mediante e rescate”, NW], e pordon di picanan.”—Colosensenan 1:13, 14.

⁶ Miyones di otro cristian fiel ta haya e siguransa cu nan tambe por beneficia di Dios su percuracion di e rescate. Nos ta lesa: “E Yiu di hende no a bin pa wordo sirbi, ma pa sirbi, y pa duna su bida como prijs di rescate pa hopi.” (Marco 10:45) E cristiannan ei ta anticipa cu na e debido tempo nan lo disfruta di “e libertad glorioso di e yiunan di Dios.” (Romanonan 8:21) Mientrastanto, nan ta duna gran balor na nan amistad personal cu Dios y sinseramente ta haci esfuerso pa fortalece e relacion ei.

7. Ki medionan Yehova ta uza awe pa proteha e bienestar spiritual di su pueblo?

⁷ Un manera den cua Yehova ta proteha e bienestar spiritual di su pueblo ta door di percura un programa di educacion progresivo. Esaki ta duna nan e chens di obtene un conocemento cada bes mas exacto di e berdad. Tambe Yehova ta percura guia continuo pa  medio di su Palabra, su organisacion y su spirito santo. Bou di guia di “e esclabo fiel y prudente”, Dios su pueblo rond mundo ta manera un famia internacional. E esclabo ta atende e necesidadnan spiritual y ora ta necesario asta e necesidadnan material di e famia di sirbidonan di Yehova, anto sin importa nan origen nacional of posicion social.—Mateo 24:45.

8. Ki confiansa Yehova tin den su lealnan, y ki siguransa esei ta duna nan?

⁸ Mescos cu Yehova no a proteha Hesus fisicamente di e atakenan di su enemigonan, E no ta proteha cristiannan tampoco den e manera ei awe. Pero esaki no ta nifica cu Dios ta malcontento cu nan. Al contrario! Esei ta enfatisa mas bien Yehova su confiansa cu nan lo apoya su banda den e gran cuestion universal. (Job 1:8-12; Proverbionan 27:11) Nunca Yehova lo bandona hende leal na dje, “pasobra SEÑOR ta stima husticia y no ta bandona su santonan [of, “lealnan”, NW]. Nan ta keda preserva pa semper.”—Salmo 37:28.

Proteha Door di Bondad Amoroso y Berdad

9, 10. (a) Con Yehova su apego na berdad ta proteha su pueblo? (b) Con Bijbel ta mustra cu Yehova ta proteha su lealnan pa medio di su bondad amoroso?

⁹ Den David su oracion cu ta para skirbi na Salmo 40, el a pidi pa Yehova su misericordia [of, “bondad amoroso”, NW] y berdad ward’e. Yehova su apego na berdad y su amor pa husticia ta rekeri pa e declara bon cla kico su normanan ta. Hende cu ta biba segun e normanan aki pa gran parti ta ser proteha di e angustia-, temor- y problemanan cu otronan cu ta ignora e normanan ei ta experencia. Por ehempel, nos por proteha nos mes y nos sernan keri di hopi problema cu ta causa dolor di curason si nos evita droga, mal uzo di alcohol, relacion sexual cu diferente partner y un estilo di bida violento. Anto asta hende cu dual for di Yehova su caminda di berdad—manera a pasa cu David algun biaha—tin e siguransa cu Dios ta keda un “luga di sconde” pa malechornan arepenti. E personanan ei por declara cu goso: “Bo ta warda mi di angustia.” (Salmo 32:7) Ki un gran expresion di Dios su bondad amoroso!

¹⁰ Un otro ehempel di Dios su bondad amoroso ta cu e ta spierta su sirbidonan pa keda separa for di e mundo malbado cu pronto lo e bai destrui. Nos ta lesa: “No stima mundo, ni e cosnan cu tin den mundo. Si un hende ta stima mundo, e amor di e Tata no ta den dje. Pasobra tur loke cu tin den mundo, e deseo di carni y e deseo di wowo y e orguyo di bida, no ta bin di e Tata, sino di e mundo.” Door di haci caso di e spiertamento aki y actua di acuerdo cu ne, nos por proteha nos bida literalmente pa henter eternidad, pasobra e texto ta sigui bisa: “Mundo ta pasa bai y su deseonan tambe, ma esun cu haci e boluntad di Dios ta permanece pa semper.”—1 Huan 2:15-17.

 Proteha Door di Capasidad di Pensa, Comprondemento y Sabiduria

11, 12. Splica con capasidad di pensa, comprondemento y sabiduria ta proteha nos.

¹¹ Salomon, yiu di David, a skirbi bou di inspiracion na hende cu tin e speransa di gana Dios su aprobacion: “Discrecion lo warda bo; comprondemento lo cuida bo.” Tambe el a urgi: “Adkiri sabiduria! ... No bandona sabiduria, y e lo warda bo; stim’e, y e lo cuida bo.”—Proverbionan 2:11; 4:5, 6.

¹² Nos ta uza discrecion of e capasidad di pensa, si nos ta medita riba loke nos ta siña for di e Palabra di Dios. Esei ta yuda nos desaroya mas comprondemento di manera cu nos por fiha e prioridadnan corecto. Esaki ta masha importante, ya cu mayoria di nos sa—podise via experencia personal—cu problemanan ta surgi ora cu hende sea intencionalmente of no ta fiha prioridadnan cu no ta sabi. E metanan cu e mundo di Satanas ta pone nos dilanti ta rikesa material, prominencia y poder, mientras cu Yehova ta curasha nos pa enfoca riba metanan spiritual cu ta mas importante. Ora un persona keda sin duna prioridad na metanan spiritual sino ta dun’e mas bien na metanan material, esei por pone famianan desintegra, amistadnan kibra y metanan spiritual disparce. Como resultado, un persona por cosecha solamente e realidad tristo indica door di e palabranan di Hesus: “Ki probecho un hende tin si e gana henter mundo y perde su alma?” (Marco 8:36) Sabiduria ta prescribi pa nos haci caso di e conseho di Hesus: “Ma busca prome e reino di Dios y su husticia, y tur e cosnan aki lo wordo añadi na boso.”—Mateo 6:33.

E Peliger di Bira Egoista

13, 14. Kico kiermen ser egoista, y dicon no ta sabi pa bira asina?

¹³ Hende di naturalesa ta interesa den nan mes. Sinembargo, ora cu deseo- y interesnan personal bira lo mas importante den bida, esei ta resulta den problema. Pesei, pa proteha nos amistad cu Yehova, e ta instrui nos pa evita di ta egoista. Ser egoista ta nifica ser interesa solamente den bo propio deseonan, necesidadnan of interesnan. Esei ta un bon descripcion di hopi hende awe, no ta berdad? Ta bon pa tuma nota cu Bijbel ta predeci cu “den e ultimo dianan” di Satanas su sistema malbado, “hende lo ta stimado di nan mes”, es decir, nan lo bira egoista.—2 Timoteo 3:1, 2.

¹⁴ Cristiannan ta mira cu ta sabi pa cumpli cu e mandamento biblico di mustra interes den otro hende, y stima nan manera bo mes.  (Lucas 10:27; Filipensenan 2:4) Hende en general kisas ta considera esaki como algo cu no ta practico, sinembargo e ta masha importante si nos kier disfruta di matrimonionan exitoso, relacionnan familiar felis y amistadnan cu ta duna satisfaccion. Pues, un berdadero sirbido di Yehova no mester permiti nunca pa e interes natural cu hende tin den su mes, domina su bida di tal manera cu e ta exclui otro actividadnan mas importante. Mas cu tur cos, e trabou relaciona cu e adoracion di su Dios, Yehova.

15, 16. (a) Na kico un actitud egoista por hiba, y ken su ehempel ta demostra esei? (b) En realidad, kico un persona ta haci ora e ta cla pa husga otro hende?

¹⁵ Un actitud egoista por pone un hende bira husto den su propio bista, locual na su turno, por pone un persona bira mente sera, arogante. Bijbel ta bisa aptamente: “Bo no tin excuse, cada un di boso cu ta husga otro, pasobra den loke bo ta husga un otro, bo ta condena bo mes; pasobra abo cu ta husga ta practica e mesun cosnan.” (Romanonan 2:1; 14:4, 10) E lidernan religioso den tempo di Hesus tawata asina combenci di nan propio husticia cu nan a sinti nan mes cualifica pa censura Hesus y su siguidonan. Door di haci esei, nan a pone nan mes den posicion di hues. En realidad, nan a condena nan mes door cu nan no por a mira nan propio faltanan.

¹⁶ Hudas, e siguido di Hesus cu a traicion’e, a permiti su mes bira un persona cu ta husga otro hende. Na e ocasion na Betania ora cu Maria, ruman mohe di Lazaro, a ungi Hesus cu azeta perfuma, Hudas a protesta fuertemente. El a expresa su indignacion door di argumenta: “Pakico e perfume aki no a wordo bendi pa tresshen denario y duna na hende pober?” Pero e relato biblico ta sigui splica: “El a bisa esaki, no pasobra hende pober tawata import’e, ma pasobra e tawata un ladron, y como cu e tawatin e caha di placa, e tawatin custumber di cohe di loke tawata wordo tira aden.” (Huan 12:1-6) Laga nos nunca bira manera Hudas of e lidernan religioso, kendenan tawata cla pa husga otro hende, loke solamente a resulta den condenacion di nan mes.

17. Ilustra e peliger cu tin den ser bromado of den haya demasiado confiansa den bo mes.

¹⁷ Lamentablemente, algun cristian di prome siglo, aunke nan no tawata ladron manera Hudas, toch a bira victima di orguyo, door di bira bromado arogante. Santiago a skirbi relaciona cu nan: “Den boso arogancia boso ta gaba.” Anto el a agrega: “Tur sorto di gabamento asina ta malo.” (Santiago 4:16) Gaba of broma tocante loke nos a haci of tocante nos privilegionan den Yehova su sirbishi lo causa nos problema en bes di duna bon resultado. (Proverbionan 14:16) Nos ta corda loke a pasa cu apostel Pedro, kende den un momento di demasiado confiansa den su mes a broma: “Maske tur trompica pa bo motibo, ami nunca lo no trompica. ... Asta si mi tin cu muri hunto cu bo, lo mi no nenga bo.” En realidad, nos no tin nada di gaba tocante nos mes. Tur loke nos tin ta unicamente debi na Yehova su bondad amoroso. Si nos corda esaki, nos lo evita di bira bromado.—Mateo 26:33-35, 69-75.

18. Kico Yehova ta pensa di orguyo?

¹⁸ “Orguyo ta bin prome cu destruccion, y un spirito arogante prome cu caida”, Bijbel ta bisa nos. Dicon? Yehova ta contesta: “Orguyo [y] arogancia . . . mi ta odia.” (Proverbionan 8:13; 16:18) Ta pesei Yehova tawata furioso riba “e curason arogante di rei di Asiria y e mirada orguyoso di su wowonan”! (Isaias 10:12)  Yehova a regla cuenta cu ne. Pronto Yehova lo regla cuenta tambe cu henter e mundo di Satanas, hunto cu su lidernan orguyoso y importante den nan mes bista, tanto esnan visibel como esnan invisibel. Laga nos nunca refleha e actitud terco di Yehova su adversarionan!

19. Den ki aspecto e pueblo di Dios ta orguyoso y toch humilde?

¹⁹ Cristiannan berdadero tin tur motibo pa ta orguyoso di ta sirbidonan di Yehova. (Yeremias 9:24) Pero alabes nan tin tur motibo pa keda humilde. Dicon? Pasobra “tur a peca y ta falta e gloria di Dios.” (Romanonan 3:23) Pues pa proteha nos posicion como sirbidonan di Yehova, nos mester tin e actitud di apostel Pablo, kende a bisa cu “Cristo Hesus a bin na mundo pa salba pecado”, anto caba el a agrega: “Entre kendenan ami ta esun di prome.”—1 Timoteo 1:15.

20. Con Yehova ta proteha su pueblo awor, y con lo e proteha nan den futuro?

²⁰ Siendo cu Yehova su pueblo gustosamente ta pone nan interesnan personal na di dos luga afin di duna prioridad na e interesnan di Dios, nos por tin sigur cu Yehova lo sigui proteha nan spiritualmente. Tambe nos por tin sigur cu ora e gran tribulacion dal aden, Yehova lo proteha su pueblo no solamente den sentido spiritual sino tambe fisicamente. Ora nan drenta den Dios su mundo nobo, nan lo por grita: “Mira, esaki ta nos Dios, riba kende nos a spera pa e salba nos. Esaki ta e SEÑOR [Yehova], riba kende nos a spera; laga nos regociha y sea contento den su salbacion.”—Isaias 25:9.

Bo Ta Corda?

• Con Dios a proteha Rei David y Hesucristo?

• Con Yehova su pueblo ta ser proteha awe?

• Dicon nos mester evita di ta egoista?

• Dicon nos por ta orguyoso y alabes humilde?

[Preguntanan di Estudio]

[Plachi na pagina 9]

Con Yehova a proteha David y Hesus?

[Plachi na pagina 11]

Den ki maneranan Dios su pueblo ta ser proteha spiritualmente awe?

[Plachi na pagina 12]

Aunke nos ta orguyoso di ta sirbi Yehova, semper nos mester keda humilde