Storia di Bida

Contento cu Mi Aporte na e Obra Mundial di Educacion Biblico

SEGUN E RELATO DI ANNA MATHEAKIS

E ferry tawata na candela. Si e barco aki di 171 meter lo a sink, e lo a hala mi abou y lama lo a bira mi graf. Mi a landa desesperadamente pa scapa mi bida, luchando contra olanan grandi. E unico manera cu mi por a keda riba awa tawata di tene duro na un salbabida cu un otro señora tawatin bisti. Mi a pidi Dios duna mi forsa y curashi. Esei tawata tur loke mi por a haci.

TAWATA aña 1971, y mi tawata bolbiendo na mi di tres asignacion como misionero, Italia. Den e naufragio ei, mi a perde casi tur cos. Pero e cosnan di mas importante si mi no a perde, esta, mi bida, e hermandad cristian amoroso y e privilegio di sirbi Yehova. E sirbishi ei a hiba mi tres continente caba y e naufragio tawata djis un incidente di e cantidad di cosnan cu a pasa den mi bida.

Mi a nace na 1922. Mi famia tawata biba na Rām Allāh, rond di 16 kilometer nort di Herusalem. Tur mi dos mayornan tawata di e isla di Creta, pero mi tata a lanta na Nazaret. Nos tawata cinco ruman, tres homber y dos mohe, y ami tawata esun di mas chikito. Nos famia a haya un sla duro dia cu mi di dos ruman homber a hoga den Riu Yordan durante un excursion di scol. Despues di e tragedia aki mi mama no kier a keda biba mas na Rām Allāh, y nos a muda bai Atenas, tempo cu mi tawatin tres aña di edad.

E Berdad di Bijbel Ta Alcansa Nos Famia

Un poco despues cu nos a yega Grecia, mi ruman homber mayo, Nikos, cu e tempo ei tawatin 22 aña, a drenta den contacto cu e Studiantenan di Bijbel, manera Testigonan di Yehova tawata conoci e tempo ei. E conocemento  di Bijbel cu el a haya a dun’e un gran goso y un entusiasmo enorme pa e sirbishi cristian. Esaki a haci mi tata furioso, y el a saca Nikos for di cas. Sinembargo, ora mi tata tawata bai Palestina, ami cu mi mama y mi ruman mohe tawata compaña Nikos bai e reunionnan cristian. Ainda mi por corda con mi mama tawata papia yen di entusiasmo tocante e cosnan cu e tawata tende na e reunionnan ei. Pero un poco despues, el a haya cancer y a muri cu 42 aña di edad. Durante e tempo dificil ei, mi ruman mohe, Ariadne, a percura amorosamente pa nos famia. Apesar cu e mes tawata jong ainda, pa hopi aña e tawata manera un mama pa mi.

Tempo cu mi tata tawata na Atenas, semper e tawata hiba mi Iglesia Ortodox, y despues cu el a muri mi a sigui bai misa, aunke cu menos regularidad. Mi a mira cu e hendenan no tawata realmente deboto na Dios, pesei cu tempo mi a stop di bai misa.

Despues cu mi tata a muri, mi por a haya un trabou stabil na e ministerio di finanza. En cambio, mi ruman homber a dedica su bida na e obra di predica e Reino, y el a sirbi pa hopi aña na Grecia. Na 1934 el a muda bai Chipre. E tempo ei no tawatin Testigo di Yehova batisa riba e isla ei, di manera cu e tawatin e privilegio di promove e trabou di predica einan. Despues cu el a casa, su esposa, Galatia, tambe a sirbi pa hopi aña como predicado di tempo completo. * Hopi biaha Nikos tawata manda buki y revista basa riba Bijbel pa nos, pero casi nunca nos no tawata ni habri nan. El a keda Chipre te na su morto.

Mi A Haci e Berdad di Mi Mes

Na 1940, George Douras, un Testigo celoso na Atenas y un amigo di Nikos, a bishita nos y a invita nos pa join un grupo chikito pa un estudio di Bijbel na su cas. Gustosamente nos a acepta e invitacion. Un poco despues nos tawata conta otro hende di e cosnan cu nos a siña. E conocemento di Bijbel cu ami y mi ruman mohe a haya a motiva nos pa dedica nos bida na Yehova. Ariadne a batisa na 1942 y ami na 1943.

Ora Segundo Guera Mundial a termina, Nikos a invita nos pa bini Chipre, di manera cu na 1945 nos a muda bai Nicosia. Contrario cu e situacion na Grecia, na Chipre si no tawatin obstaculo pa e trabou di predica. Nos a participa no solamente den e sirbishi di cas pa cas, sino tambe den e trabou di duna testimonio riba caya.

Dos aña despues, Ariadne tawatin cu bai Grecia bek. Ei el a topa su futuro casa, un adorado di Yehova, pues el a keda Atenas. No a tarda mucho cu mi sua y ruman mohe a anima mi pa regresa Grecia y cuminsa e sirbishi di tempo completo den e capital. Ya cu semper mi meta tawata pa traha pionero, mi a bai Atenas bek, caminda e necesidad tawata mas grandi.

Porta Nobo di Oportunidad A Habri

Dia 1 di november 1947, mi a cuminsa traha pionero, dedicando 150 ora pa luna den e trabou di predica. E teritorio di nos congregacion tawata inmenso, y mi tawatin cu cana bastante. Toch mi a haya hopi bendicion. Hopi bes polis tawata aresta cualkier Testigo cu nan a haya ta predica of ta asisti na reunion cristian. Pues, no a dura hopi pa nan a aresta mi.

Nan a acusa mi di ta cana comberti hende, locual e tempo ei tawata un pica serio. Nan a  sentencia mi na dos luna den e Prizon di Averof pa Hende Mohe na Atenas. Tawatin un otro ruman Testigo caba einan, y nos dos a disfruta di un compañerismo cristian deleitabel y edificante apesar cu nos tawata encarsela. Despues cu mi a cumpli cu mi condena, mi a sigui traha yen di goso como pionero. Hopi di e personanan cu mi a studia Bijbel cu ne e tempo ei ainda ta sirbiendo Yehova fielmente, y esei ta duna mi un gran satisfaccion.

Na 1949, mi a ricibi un invitacion pa asisti na e di 16 klas di e Scol Biblico di Galad di Watchtower na Merca, caminda nan ta prepara sirbidonan di tempo completo pa e trabou di misionero. Tanto ami como mi famia a keda masha encanta. Mi a plania pa asisti na un congreso internacional na New York den e zomer di 1950 pa despues drenta Galad.

Despues cu mi a yega Merca, mi tawatin e privilegio di haci trabou di limpiesa pa un par di luna na e sede mundial di Testigonan di Yehova na New York. E luga tawata limpi, placentero y edificante, y mi tawata meimei di e caranan contento di mi rumannan cristian. Semper lo mi keda cu grato recuerdo di e seis lunanan cu mi a pasa einan. Despues a yega e tempo pa asisti na e Scol di Galad caminda cinco luna di instruccion y estudio intenso a pasa manera nada. Como studiante, nos a bin realisa con precioso y bunita conocemento di Bijbel ta, y esei a aumenta nos goso y nos deseo pa comparti cu otro hende e conocemento di e berdad cu por duna hende bida.

Mi Prome Asignacion Como Misionero

Na Scol di Galad, nan a permiti nos scohe nos futuro partner prome cu nos a ricibi nos asignacion. Mi partner tawata Ruth Hemmig (awor Bosshard), un excelente ruman mohe. Ami cu Ruth a keda sumamente contento ora nos a ricibi nos asignacion pa Istanbul, Turkia—un crusada entre Asia y Europa! Nos tawata sa cu ainda nos trabou di predica no a haya reconocemento legal den e pais ei, pero nos no a duda cu Yehova lo a sostene nos.

Istanbul ta un bunita stad cosmopolita. E luga ta yen di tienda y pacus, un mescla di e restaurantnan mas exkisito na mundo, museonan interesante, bunita areanan di biba, y tur esei, pega cu un lama semper fasinante. Pero mas importante, nos a haya hende sinsero cu kier a siña tocante Dios. E grupo chikito di Testigo na Istanbul a consisti principalmente di Armenio, Griego y Hudiu. Sinembargo, tawatin hopi otro nacionalidad, y ta bon cu mi tawata sa algo di un variedad di idioma, incluso Turco. Algo cu nos a gusta hopi tawata di por a topa hende di diferente nacionalidad cu tawatin sed di e berdad. Te awe hopi di e personanan aki ta sirbiendo Yehova fielmente.

Ta lastima cu Ruth no por a renoba su permit di residencia, y el a haya su mes obliga di sali for di e pais. Ainda e ta den sirbishi di tempo completo na Suisa. Despues di tur e añanan aki, te awe mi ta sinti falta di su compania agradabel y edificante.

Mi A Muda Bai un Otro Hemisferio

Na 1963 autoridadnan na Turkia no a renoba mi permit di residencia. Tawata duro pa bai laga rumannan cristian cu mi a mira lucha pa vence hopi obstaculo y progresa spiritualmente. Pa por a lanta mi animo, mi famianan tawatin e bondad di paga mi pasashi pa bai New York pa mi por a asisti na un congreso einan. Ainda mi no a ricibi mi siguiente asignacion.

 Despues di e congreso, mi a ser asigna na Lima, Peru. Hunto cu un ruman mohe jong kende mester a bira mi partner, for di New York mi a bai direct na mi asignacion nobo. Mi a siña Spaño y a biba den e cas di misionero situa riba e sucursal di Testigonan di Yehova. Tawata hopi dushi pa predica ei y pa conoce e rumannan local.

Un Otro Asignacion, un Otro Idioma

Cu tempo, mi famianan aya na Grecia a cuminsa sinti e efectonan di biehes y kebranto di salud. Nunca nan no a pidi mi pa stop cu mi sirbishi di tempo completo y bai bek na un asina yama bida normal pa por a yuda nan. Sinembargo, despues di a pensa hopi y haci hopi oracion, mi a realisa cu lo tawata miho pa mi sirbi mas pega cu mi famia. E rumannan na sucursal a compronde pa mi y nan a asigna mi na Italia, y mi famianan a ofrece pa cubri e gastonan di e mudansa. A resulta cu tawatin un gran necesidad di evangelisado na Italia.

Atrobe mi tawatin cu siña un idioma nobo, e biaha aki, Italiano. Mi prome asignacion tawata den e stad Foggia. Despues nan a cambia mi pa Napoli, caminda tawatin mas necesidad. Mi teritorio tawata Posilipo, un di e partinan mas bunita di Napoli. El a cubri un area grandi, y tawatin apenas un publicado di Reino. Mi a gusta e trabou masha tanto, y Yehova a yuda mi cuminsa hopi estudio di Bijbel. Cu tempo a forma un congregacion grandi den e area ei.

Entre e prome hendenan local cu ken mi a studia Bijbel tawatin un mama y su cuater yiunan. Te awe e cu su dos yiu mohenan ta Testigo di Yehova. Tambe mi a studia cu un pareha casa cu tawatin un yiu mohe chikito. Henter e famia a progresa den e berdad y a simbolisa nan dedicacion pa medio di bautismo bou di awa. Awor e yiu mohe ta casa cu un fiel sirbido di Yehova, y hunto nan ta sirbiendo Dios yen di celo. Tempo cu mi tawata studia Bijbel cu un famia grandi, mi a mira cuanto poder e Palabra di Dios tin, y esaki a impresiona mi. Ora nos a lesa varios texto cu ta mustra cu Dios no ta aproba adoracion di imagen, e mama no a ni warda te ora e estudio a caba. Mesora el a elimina tur e imagennan cu e tawatin den cas!

Den Peliger Riba Lama

Tempo cu mi tawata biaha entre Italia cu Grecia, semper mi tawata bai cu boto. Por lo general, e biahe tawata masha placentero. Pero cu un di e biahenan ei si, den e zomer di 1971, cosnan no a bai bon. Mi tawata regresando Italia riba e ferry Heleanna. Tempran riba e mainta di 28 di augustus, a start un candela den e cushina di e barco. E candela a plama y e pasaheronan a drenta un panico formal. Hende mohe a bai flou, muchanan tawata yora, y e hombernan tawata keha fuertemente y reclama na bos halto. E hendenan a core bai na e botonan salbabida na cada banda di e dek. Pero no tawatin suficiente salbabida, y e mecanismo pa baha e botonan salbabida den lama no tawata traha bon. Ami no tawatin salbabida, pero e vlamnan tawata birando mas grandi, pues e unico cos sensato cu mi por a haci ta di bula na lama.

Manera cu mi a bula na awa, mi a mira un señora cu tawatin un salbabida bisti ta drif banda di mi. Aparentemente e no por a landa, pues mi a gar’e na su brasa y hal’e for di e  barco cu tawata sink. E lama a bira mas bruto y e lucha pa keda riba awa a echt cansa mi. A parce cu no tawatin speransa, pero mi a sigui roga Yehova pa e duna mi curashi, y esaki a fortalece mi. Mi no por a keda sin corda riba e naufragio cu apostel Pablo a experimenta.—Echonan, capitulo 27.

Cu e señora duro teni, mi a lucha cu e olanan cuater ora largo, landando ora mi tawatin e forsa pa haci esei y invocando e yudansa di Yehova. Finalmente, mi a mira un boto chikito yega serca. Nan a rescata mi, pero e señora si a muri caba. Ora nos a yega e stad di Bari, Italia, nan a hiba mi un hospital caminda mi a ricibi atencion medico. Mi tawatin cu keda den e hospital un par di dia, y hopi Testigo a bin bishita mi, y a ofrece mi bondadosamente tur tipo di yudansa. E amor cristian cu nan a manifesta a haci un impresion profundo riba tur cu a observa esaki. *

Despues cu mi a recupera completamente, e rumannan di sucursal a asigna mi na Roma. Nan a pidi mi traha e teritorio di negoshi den e centro di e stad, locual mi a haci pa cinco aña, cu yudansa di Yehova. Mi a disfruta 20 aña largo di sirbishi na Italia, y mi a bin haya un amor pa e Italianonan.

Bek Caminda Mi A Cuminsa

Cu tempo e salud di Ariadne y su casa a bai mas atras. Mi a realisa cu si mi tawata biba mas serca di nan, lo mi por a paga nan bek maske ta algo di tur loke nan a haci amorosamente pa mi. Mi tin cu admiti cu tawata duro pa bandona Italia. Sinembargo, e rumannan di sucursal a aproba e asunto, y for di zomer di 1985, mi ta trahando pionero na Atenas, caminda mi a cuminsa e sirbishi di tempo completo na 1947.

Mi a predica den e teritorio asigna na mi mes congregacion, y mi a puntra e rumannan na sucursal si mi por a predica tambe den e teritorio di negoshi den e centro di e stad. Mi a haci esaki tres aña largo hunto cu un partner cu tambe tawata pionero. Nos por a duna un testimonio cabal na hende cu masha poco biaha sa ta na cas.

Segun cu tempo ta pasa mi deseo pa sirbi ta bira mas y mas fuerte, pero forsa fisico si ta bai atras. Mientrastanto mi sua a fayece y Ariadne, kende tawata manera un mama pa mi, a perde su bista. Pa loke ta ami, mi salud tawata bon durante e añanan cu mi a dedica den e sirbishi di tempo completo. Sinembargo, resientemente mi a cai for di un trapi di marmer y kibra mi man drechi. Despues mi a cai y kibra mi pelvis. Mi mester a opera y a keda na cama pa hopi tempo. Awor mi no por move libremente mas. Mi ta cana cu garoti y mi por sali solamente si un hende compaña mi. No obstante, mi ta haci mi best, sperando cu mi condicion fisico lo mehora. E echo cu mi por participa den e obra di educacion biblico, asta den un forma limita, ta sigui ser e fuente principal di mi felicidad y satisfaccion.

Ora mi corda bek riba e añanan gososo cu mi a pasa den e sirbishi di tempo completo, mi curason ta yena di gratitud na Yehova. Tanto Yehova como e parti di su organisacion aki riba tera consistentemente a percura guia sano y yudansa balioso, locual a permiti mi alcansa mi potencial completo segun cu mi a dedica mi bida na su sirbishi. Mi deseo sinsero ta pa Yehova fortalece mi pa sigui den su sirbishi. Mi ta contento cu mi por a duna un aporte chikito na e obra mundial di educacion biblico cu e ta dirigi.—Malakias 3:10.

[Nota]

[Plachi na pagina 9]

Ami cu mi ruman mohe, Ariadne y su casa Michalis dia cu mi tawata bayendo Galad

[Plachi na pagina 10]

Nan a asigna ami cu Ruth Hemmig na Istanbul, Turkia

[Plachi na pagina 11]

Italia, cuminsamento di e decada di 1970

[Plachi na pagina 12]

Awe, ami cu mi ruman mohe Ariadne