Pregunta di Lector

Ya cu Rei Salomon di Israel di antiguedad a bira infiel na Dios den su biehes, nos por conclui cu lo e no ser resusita?—1 Reinan 11:3-9.

Aunke Bijbel ta menciona nomber di algun homber y mohe di fe cu sin duda lo ser resusita, e no ta comenta spesificamente riba e posibilidad di resureccion di delaster un persona cu e ta papia di dje. (Hebreonan 11:1-40) Sinembargo, den e caso di Salomon nos por haya un idea di Dios su huicio door di compara loke a pasa cu ne ora el a muri cu loke a pasa cu cierto personanan fiel ora nan a muri.

E Scritura ta papia di solamente dos posibilidad pa e mortonan: e estado temporal di no ta existi y e estado di morto eterno. Esnan cu Dios ta husga cu nan no ta digno di un resureccion ta ser tira den “Gehena” (traduci “candela di fierno” den Beibel Santu) of e “lago di candela”, y ambos palabra ta nifica morto eterno den Bijbel. (Mateo 5:22; Marco 9:47, 48; Revelacion 20:14) Entre e hendenan aki lo tin e prome pareha humano, Adam cu Eva, e traido Hudas Iscariot, y cierto personanan cu a muri ora Dios a ehecuta huicio riba nan, manera e hendenan den tempo di Noe y e habitantenan di Sodoma y Gomora. * Ora e hendenan cu lo haya resureccion muri, nan ta bai e graf comun di humanidad, cu yama “Seol” of “Hades” den e idiomanan original di Bijbel. Papiando di nan futuro, Bijbel ta declara: “Lama a entrega e mortonan cu tawata den dje, y morto y Hades a entrega e mortonan cu tawata den nan; y nan a wordo husga, cada un di nan segun nan obranan.”—Revelacion 20:13.

Pues anto, e personanan fiel cu Hebreonan capitulo 11 ta menciona, ta den Seol of Hades sperando resureccion. Entre nan tin Dios su sirbidonan leal Abraham, Moises y David. Considera awor kico Bijbel ta bisa di nan relaciona cu nan morto. Yehova a bisa Abraham: “Y abo, lo bo bai serca bo tatanan na pas; lo bo wordo dera na un edad hopi avansa.” (Genesis 15:15) Na Moises, Yehova a bisa: “Mira, bo ta serca di bai sosega serca bo tatanan.” (Deuteronomio 31:16) Encuanto David, e tata di Salomon, Bijbel ta bisa: “David a bai sosega serca su tatanan y a wordo dera den e Stad di David.” (1 Reinan 2:10) Pues, e expresion ‘bai sosega serca bo tatanan’ ta un otro manera pa bisa cu e persona a bai Seol, esta, e graf comun di humanidad.

Kico a pasa cu Salomon ora el a muri? Bijbel ta contesta: “E tempo cu Salomon a reina na Herusalem riba henter Israel tawata cuarenta aña. Y Salomon a bai sosega serca su tatanan y a wordo dera den e Stad di su tata David.” (1 Reinan 11:42, 43) Pues, ta parce rasonabel pa conclui cu Salomon ta den Seol, of Hades, for di cua lo e ser resusita.

E conclusion aki ta implica cu e posibilidad di ser resusita ta habri pa otro personanan cu e Scritura ta bisa spesificamente cu ‘nan a bai sosega serca nan tatanan.’ De echo, Bijbel ta bisa asina di hopi di e reinan cu a subi trono despues di Salomon, aunke nan tawata infiel. Esaki no ta irasonabel, ya cu “lo tin un resureccion di tanto e hustonan como e malbadonan.” (Echonan 24:15) Claro cu ta despues cu “tur cu ta den graf” ser resusita nos lo sa sigur ken a ser faboreci cu un resureccion. (Huan 5:28, 29) Pues en bes di duna un contesta absoluto tocante cua persona di pasado lo haya resureccion, nos ta warda pa wak, confiando den Yehova su decision perfecto.

[Nota]