Dios of Hende?

“AMI ta e lus di mundo; esun cu sigui mi lo no cana den scuridad, ma lo tin e lus di bida.” (Huan 8:12) Esakinan tawata palabranan di Hesucristo. Relaciona cu ne, un homber educa di prome siglo a skirbi: “Den [dje] tur e tesoronan di sabiduria y conocemento ta scondi.” (Colosensenan 2:3) Ademas, Bijbel ta bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Conocemento exacto tocante Hesus ta masha importante pa nos por satisface nos necesidad spiritual.

Hende rond mundo a yega di tende di Hesucristo. No tin duda cu e tawatin influencia riba historia di humanidad. De echo, e kalender cu mayoria parti di mundo ta uza ta basa riba e aña cu nan ta pensa cu el a nace. The World Book Encyclopedia ta splica: “Hopi hende ta referi na fechanan prome cu e aña ei como P.C., of prome cu Cristo. Pa fechanan despues di e aña ei, nan ta uza A.D., of anno Domini (den e aña di nos Señor).”

Sinembargo, hende tin ideanan contradictorio tocante ken Hesus tawata. Pa algun e tawata djis un homber sobresaliente cu a marca historia. Sinembargo, tin otronan cu ta ador’e como Dios Todopoderoso. Algun miembro di e religion hindu a compara Hesucristo cu e dios hindu, Krishna, cu segun hopi hende tawata un dios den curpa di hende. Hesus tawata simplemente un hende, of e tawata un persona cu otronan mester adora? Ken exactamente e tawata? Di unda el a bini? Ki clase di persona e tawata? Y unda e ta aworaki? Manera nos lo mira den e siguiente articulo, e buki cu tin hopi di bisa di Hesus ta duna contestanan veridico riba e preguntanan aki.