“E Temor di Señor, Ta Esei Ta Sabiduria”

“E CONCLUSION di tur loke cu a wordo tendi, ta: teme Dios y warda su mandamentonan, pasobra esaki ta aplicabel na cada persona.” (Eclesiastes 12:13) Na e conclusion profundo ei rei Salomon di Israel di antiguedad a yega bou di inspiracion divino! E patriarca Job tambe a compronde e importancia di teme Dios, pasobra el a bisa: “Mira, e temor di SEÑOR, ta esei ta sabiduria; y pa aparta for di maldad ta comprondemento.”—Job 28:28.

Bijbel ta duna hopi importancia na teme Yehova. Pakico ta sabi pa nos cultiva un temor respetuoso di Dios? Den ki manera e temor ei ta beneficia nos—como persona y como un grupo di adoradonan berdadero? Versiculo 26 pa 35 di Proverbionan capitulo 14 ta contesta e preguntanan aki. *

Fuente di “Confiansa Fuerte”

Salomon ta declara: “Den e temor di SEÑOR tin confiansa fuerte, y su yiunan lo tin un luga di refugio.” (Proverbionan 14:26) E fuente di confiansa di un hende cu tin temor di Dios ta Yehova, e Dios leal y todopoderoso. Nada straño cu e hende ei ta enfrenta futuro cu un confiansa fuerte! E tin un futuro largo y bendiciona su dilanti.

Pero kico nos por bisa di e futuro di e personanan cu ta pone nan confiansa den mundo—su plannan, su organisacionnan, su ideologianan y su pocesionnan? Cualkier futuro cu nan ta spera di haya lo ta cortico, pasobra Bijbel ta declara: “E mundo ta pasa bai y su deseonan tambe, ma esun cu haci e boluntad di Dios ta permanece pa semper.” (1 Huan 2:17) Tin cualkier motibo anto pa nos “stima mundo [y] e cosnan cu tin den mundo”?—1 Huan 2:15.

Ki medida mayornan cu tin temor di Dios por tuma pa garantisa cu “lo tin un luga di refugio” pa nan yiunan? E salmista a canta: “Bin, yiunan, scucha mi; lo mi siña boso e temor di SEÑOR.” (Salmo 34:11) Ora yiunan siña teme Dios a base di e ehempel y instruccion di nan mayornan, nan tin mas chens di crece bira homber- y mohenan cu tin confiansa fuerte den Yehova.—Proverbionan 22:6.

Salomon ta continua: “E temor di SEÑOR ta un fuente di bida, pa evita e trampanan di morto.” (Proverbionan 14:27) E temor di Yehova ta “un fuente di bida” pasobra e Dios berdadero ta “e fuente di awa bibo.” (Yeremias 2:13) E conocemento cu nos ta haya di Yehova y di Hesucristo por hiba nos na bida eterno. (Huan 17:3) Ademas, temor di Dios ta yuda nos evita e trampanan di morto. Con asina? Proverbionan 13:14 ta declara: “Siñansa di e hende sabi ta un fuente di bida, pa evita e trampanan di morto.” Ora nos teme Yehova, obedece su lei y laga su Palabra guia nos pasonan, nos lo ta proteha contra practica- y emocionnan dañino cu por hiba na un morto prematuro, no ta berdad?

 “Gloria di un Rei”

Durante e mayor parti di su reinado, Salomon tawata un rei temeroso di Dios cu a obedece Yehova. Esaki a resulta den un gobernacion exitoso. Kico ta determina con bon un rei ta goberna? Proverbionan 14:28 ta contesta: “Un poblacion grandi ta gloria di un rei, ma scarsedad di hende ta ruina di un prins.” Loke ta determina e exito di un rei ta e bienestar di su subditonan. Si un parti grandi di e poblacion ta desea di keda bou di su liderato, esei ta recomend’e como un bon gobernante. Salomon tawatin “subditonan di lama [Cora] te lama [Mediteraneo] y di e Riu [Eufrates] te na e finnan di tera.” (Salmo 72:6-8, NW) Su gobernacion tawata caracterisa pa un pas y prosperidad sin precedente. (1 Reinan 4:24, 25) E reinado di Salomon tawata un exito. Di otro banda, falta di respaldo di parti di e poblacion ta indica berguensa pa un prins of gobernante.

Den e contexto aki, kico nos por bisa tocante e gloria di e Salomon Mayor, e Rei Mesianico, Hesucristo? Pensa riba e subditonan cu e tin te awe. For di un extremo te na otro extremo di e tera aki, mas cu seis miyon homber y mohe cu ta teme Dios a scohe caba pa biba bou di e liderato di Cristo. Nan tin fe den Hesus y ta uni den adoracion berdadero di e Dios bibo. (Huan 14:1) Pa fin di e Reino di Mil Aña, tur e personanan cu ta den e memoria di Dios lo a ser resusita. Pa e tempo ei lo tin un paradijs riba tera yen di hende contento y husto cu a manifesta gratitud pa nan Rei. Esei sigur lo duna prueba di e exito di Cristo su gobernacion! Laga nos tene duro na nos maraviyoso speransa di Reino.

Beneficionan Spiritual y Fisico

Temor respetuoso di Dios por duna nos un curason trankil y pas mental. Nos por bisa esaki pasobra dos di e tantisimo fasetanan di sabiduria ta bon huicio y discernimento. Proverbionan 14:29 ta declara: “Esun cu no ta rabia lihe tin gran comprondemento, ma esun cu ta rabia lihe ta halsa bobedad.” Comprondemento of discernimento ta yuda nos realisa cu rabia descontrola tin un efecto perhudicial riba nos spiritualidad. E obranan cu lo por stroba nos di “hereda e reino di Dios” ta entre otro “hostilidad, bringamento, yalursheid, rabiamento, pleitamento.” (Galationan 5:19-21) Segun e conseho di Bijbel, asta ora nos tin motibo pa rabia, nos no mester keda den e estado ei. (Efesionan 4:26, 27) Y falta di pasenshi por pone nos papia y comete un ke otro bobedad cu lo duel nos despues.

Mustrando riba e efectonan fisico negativo di rabia, e rei di Israel ta bisa: “Un curason trankil ta bida pa e curpa, ma envidia ta putrimento di weso.” (Proverbionan 14:30) Rabia y furia por causa varios enfermedad, manera problema cu halamento di rosea, presion halto, mal funcionamento di higra y daño na pancreas. Ademas, docternan ta bisa cu rabia y furia ta emocionnan cu ta empeora of asta causa enfermedadnan manera ulcera, asma, iritacion y malesa di cuero y problema cu digestion. Di otro banda, “un curason trankil ta bida pa e curpa.” (Proverbionan 14:30) Ta sabi anto pa nos “busca e cosnan cu ta trece pas y edificacion di otro.”—Romanonan 14:19.

Temor di Dios Ta Yuda Nos pa Ta Imparcial

Salomon ta bisa: “Esun cu oprimi e pober [“e persona di condicion humilde”, NW] ta insulta Esun cu a trah’e, ma esun cu tene misericordia di esun den necesidad ta honr’e.” (Proverbionan 14:31) Un hende cu tin temor di Dios ta realisa cu ta e mesun persona, Yehova Dios, a traha tur hende. Pesei, e persona di condicion humilde ta nos prohimo, y e manera cu nos ta trat’e tin su refleho riba e Creador di humanidad. Pa nos glorifica Dios, nos tin cu trata otro na un manera husto y imparcial. E cristian di poco recurso  mester ricibi atencion spiritual sin parcialidad. Nos tin cu alcansa tanto pober como rico cu e bon nobo di e Reino di Dios.

Referiendo na un otro beneficio di temor di Dios, e rei sabi ta bisa: “E malbado ta keda benta abou den su maldad, ma e husto tin un refugio na ora di su morto [“den su integridad”, NW].” (Proverbionan 14:32) Con e malbado ta keda benta abou den su maldad? Algun erudito ta bisa cu esaki ta nifica cu e persona aki no tin ni un posibilidad pa recupera ora e haya su mes den un calamidad. Di otro banda, ora e hende cu ta teme Dios haya su mes cu contratiempo, e ta busca refugio den su integridad na Dios. Cu pleno confiansa den Yehova te na morto, e ta demostra e mesun determinacion cu Job tawatin, kende a bisa: “Te na mi morto lo mi no bandona mi integridad.”—Job 27:5.

Pa un persona mantene integridad, e mester tin temor di Dios y sabiduria. Y unda e por haya sabiduria? Proverbionan 14:33 ta contesta: “Sabiduria ta reposa den curason di esun cu tin comprondemento, y asta entre e bobonan e ta haci su mes conoci.” Si, sabiduria por ser haya den curason di e hende cu tin comprondemento. Pero den ki manera e ta haci su mes conoci entre e bobonan? Segun un buki di consulta, “e persona bobo, ansioso pa laga parce cu e ta sabi, ta papia pura pura loke e ta kere ta sabiduria pero e mes ta bira combirtie den bobedad.”

‘Loke Ta Halsa un Nacion’

Cambiando di enfoke, e rei di Israel ta hala nos atencion awor riba con temor di Dios ta afecta henter un nacion, y no un solo individuo: “Husticia ta halsa un nacion, ma pica ta un berguensa pa cualkier nacion.” (Proverbionan 14:34) E principio aki a keda demostra bon cla den e caso di e nacion di Israel! Tempo cu Israel a pega na e normanan halto di Dios, el a ser halsa riba e nacionnan rond di dje. Sinembargo, e frecuente actonan di desobediencia a hiba na berguensa, y cu tempo, Yehova a asta rechasa Israel. E principio aki ta conta pa e pueblo di Dios awe tambe. E congregacion cristian ta diferente for di mundo pa motibo cu e ta pega na e principionan husto di Dios. Sinembargo, pa nos mantene e posicion eleva ei, cada un di nos personalmente tin cu hiba un bida decente. Si nos practica pica, esei ta trece solamente berguensa pa nos mes y tambe reproche riba e congregacion y riba Dios.

Relaciona cu loke ta duna un rei placer, rei Salomon ta bisa: “Rei tin delicia den un sirbido sabi, ma su rabia ta contra esun cu ta causa berguensa.” (Proverbionan 14:35) Y Proverbionan 16:13 ta declara: “Lipnan husto ta e delicia di reinan, y nan ta stima esun cu ta papia loke ta corecto.” Si, nos Lider y Rei, Hesucristo, tin delicia ora nos ta actua na un manera husto y sabi, y tambe ora nos ta uza nos lipnan den e actividad di predica e Reino y haci disipel. Si, laga nos keda ocupa anto den e obra ei segun cu nos ta disfruta di e bendicionnan cu ta bini pa hende cu ta teme e Dios berdadero.

[Nota]

[Plachi na pagina 15]

Temor di Dios ta algo cu hende por siña