Ken Hesucristo Ta?

IMAGINA bo con emociona e hoben Hudiu Andres lo tawata ora cu pa prome bes el a tende e palabranan di Hesus di Nazaret! Bijbel ta bisa cu Andres a core bai serca su ruman homber y a bis’e: “Nos a haya e Mesias [of, Cristo].” (Huan 1:41) Na e idiomanan Hebreo y Griego, e palabranan cu generalmente ta ser traduci como “Mesias” y “Cristo” ta nifica “E Ungi.” Hesus tawata E Ungi, of E Scohi di Dios, e Lider priminti. (Isaias 55:4) Den e Scritura tawatin profecianan cu a papia di dje y e tempo ei e Hudiunan, yen di expectativa, tawata spera riba dje.—Lucas 3:15.

Con nos por sa cu Hesus realmente tawata E Scohi di Dios? Laga nos considera loke a sosode na aña 29 di nos era, tempo cu Hesus tawatin 30 aña di edad. El a bai serca Huan Bautista pa Huan batis’e den e awa di Riu Yordan. Bijbel ta bisa: “Y despues di a wordo batisa, Hesus a sali mesora for di awa; y ata, e shelonan a wordo habri y el a mira e spirito di Dios baha manera un paloma y keda riba dje. Y ata, un bos for di e shelonan, bisando: ‘Esaki ta mi Yiu stima, den kende mi tin goso.’” (Mateo 3:16, 17) Despues cu Huan a tende e palabranan di aprobacion ei lo e no por tawatin ningun duda cu Hesus tawata E Scohi di Dios, no ta berdad? Door di a drama Su spirito santo riba Hesus, Yehova Dios a ungie of nombr’e como esun cu lo bira Rei di Su benidero Reino. Asina Hesus a bira Hesucristo of Hesus E Ungi. Pero den ki sentido Hesus tawata e Yiu di Dios? Di unda el a bin?

Su Origen Tawata “for di Hopi Tempo Pasa”

Nos por dividi Hesus su bida den tres etapa. Esun di prome a cuminsa hopi tempo prome cu el a nace como hende. Mikeas 5:2 ta bisa cu su origen ta “for di hopi tempo pasa, for di e dianan di eternidad.” Hesus mes a bisa: “Ami ta di ariba”, esta di shelo. (Huan 8:23) E tawata biba den shelo como un persona spiritual poderoso.

Siendo cu tur cos cu a ser crea tawatin un principio, tawatin un tempo cu Dios so tawata existi. Sinembargo, un cantidad incontabel di siglonan pasa, Dios a bira Creador. Ken el a crea prome? E ultimo buki di Bijbel ta identifica Hesus como “e principio di e creacion di Dios.” (Revelacion 3:14) Hesus ta “e primogenito di henter creacion.” Esei ta asina “pasobra pa medio di dje tur cos a wordo crea, tanto den e shelonan como riba tera, visibel y invisibel.” (Colosensenan 1:15, 16) Si, Hesus tawata e unico cu Dios a crea directamente. Pesei Bijbel ta yam’e Dios su “Yiu unigenito.” (Huan 3:16) E Yiu primogenito tin tambe e titulo “e Palabra.” (Huan 1:14) Dicon? Pasobra prome cu el a nace como hende, el a sirbi den shelo como un persona cu a papia pa Dios.

“E Palabra” tawata hunto cu Yehova Dios “na principio” ora cu “shelonan y tera” a ser crea. E tawata e persona cu Dios a bisa: “Laga nos traha hende segun nos imagen.” (Huan 1:1; Genesis 1:1, 26) Yehova su Yiu primogenito tawata einan na lado di su Tata, trahando activamente hunto cu ne. Como tal, e ta ser representa na Proverbionan 8:22-31, bisando: “Mi tawata na [e Creador] su lado, manera un trahado experto, y dia tras dia mi tawata su delicia, regocihando semper su dilanti.”

Yehova Dios y su Yiu unigenito lo mester a sera un relacion estrecho cu otro segun cu nan tawata traha hunto! E asociacion es trecho ei cu Yehova pa un cantidad incontabel di siglo tawatin un influencia profundo riba e Yiu di Dios. E Yiu obedecido aki a bira precis manera su Tata, Yehova. De echo, Colosensenan 1:15 ta yama Hesus “e imagen di e Dios invisibel.” Esaki ta un motibo pakico conocemento di Hesus ta masha importante den satisface nos necesidad spiritual y nos deseo natural di conoce Dios. Tur loke Hesus a haci ora e tawata riba tera tawata exactamente loke Yehova a spera di dje. Pesei, conoce Hesus ta nifica tambe aumenta nos conocemento di Yehova. (Huan 8:28; 14:8-10) Pero con Hesus a bini na tera?

Su Bida Como Hende

E segundo etapa di Hesus su bida a cuminsa ora Dios a manda su Yiu riba tera. Yehova a haci esaki efectuando un milager pa transferi e bida di Hesus for di shelo pa e matris di un birgen Hudiu fiel cu yama Maria. Door cu Hesus no tawatin un tata humano e no a hereda imperfeccion. Yehova su spirito santo of forsa activo a bini riba Maria, y e poder di Dios a cubrie milagrosamente manera un ‘sombra’ pa asina e sali na estado. (Lucas 1:34, 35) Pesei Maria a duna lus na un yiu perfecto. Como e yiu di criansa di e carpinte Hose, Hesus a lanta den un cas humilde y tawata e yiu mayo di e varios yiunan di e famia.—Isaias 7:14; Mateo 1:22, 23; Marco 6:3.

Aunke hende no sa hopi di Hesus su infancia, ta bon pa menciona un incidente cu ta remarcabel. Tempo cu Hesus tawatin 12 aña di edad, su mayornan a hib’e hunto cu nan durante nan bishita anual na Herusalem pa e celebracion di Pasco Hudio. Einan el a pasa ratonan largo den e tempel “sinta meimei di e siñadonan, ta scucha nan y ta haci nan pregunta.” Ademas, “tur esnan cu a tend’e a keda straña di su comprondemento y su contestanan.” Si, e hoben Hesus no solamente por a haci pregunta tocante cosnan spiritual cu a pone hende pensa, sino tambe e por a duna contestanan inteligente cu a pone otro hende keda asombra. (Lucas 2:41-50) Segun cu el a crece den e stad Nazaret, el a siña e trabou di carpinte, sin duda serca su tata di criansa, Hose.—Mateo 13:55.

Hesus a biba na Nazaret te cu su 30 aña. E ora ei el a bai serca Huan pa Huan batis’e. Despues cu Hesus a batisa el a cuminsa cu su ministerio vigoroso. Pa tres aña y mei el a biaha rond su tera natal declarando e bon nobo di e Reino di Dios. El a duna evidencia cu ta Dios a mand’e. Con asina? Door di a haci hopi milager, esta, obranan poderoso cu hende no por haci.—Mateo 4:17; Lucas 19:37, 38.

Hesus tawata tambe un homber tierno y cu sintimentonan profundo. Bo por a mira su ternura specialmente den e manera cu e ta considera y trata otro hende. Door cu Hesus tawata acercabel y cariñoso, e hendenan tawata sinti nan atrai na dje. Asta mucha  tawata sinti nan mes comodo den su presencia. (Marco 10:13-16) Aunke algun hende den Hesus su tempo tawata menosprecia hende mohe, Hesus si a trata nan cu respet. (Huan 4:9, 27) El a yuda hende pober y oprimi haya refrescamento of ‘sosiego pa nan alma.’ (Mateo 11:28-30) Su manera di siña hende tawata cla, simpel y practico. Y loke el a siña su oyentenan a refleha su deseo sinsero pa nan siña conoce e Dios berdadero, Yehova.—Huan 17:6-8.

Uzando e spirito santo di Dios pa haci milager, cu compasion Hesus a cura hende malo y afligi. (Mateo 15:30, 31) Por ehempel, un persona cu lepra a bini serca dje y a bis’e: “Si bo kier, bo por haci mi bira limpi.” Kico Hesus a haci? El a saca su man y a mishi cu e homber, y a bis’e: “Mi kier! Sea limpi!” Y e homber enfermo a cura!—Mateo 8:2-4.

Pensa tambe riba e ocasion cu un multitud a bini serca Hesus y a keda hunto cu ne tres dia largo sin nada pa come. El a sinti duele di e hendenan y milagrosamente el a alimenta “cuater mil hende homber, sin conta hende mohe y mucha.” (Mateo 15:32-38) Na un otro ocasion Hesus a calma un tempestad cu tawata menasa siguridad di su amigonan. (Marco 4:37-39) El a resusita of lanta hende cu a muri. * (Lucas 7:22; Huan 11:43, 44) Hesus tawata asta dispuesto pa entrega su bida humano perfecto pa asina hende imperfecto por tin un speransa pa futuro. Esta un amor profundo Hesus tawatin pa hende!

Unda Hesus Ta Awe?

Hesus a muri na un staca di tormento na e edad di 33 aña y mei. * Pero morto no a caba cu su bida. E di tres etapa di su bida a cuminsa rond di tres dia despues ora Yehova Dios a resusita su Yiu como un persona spiritual. Despues cu Hesus a resusita, el a aparece na centenares di hende cu a biba e tempo ei. (1 Corintionan 15:3-8) Despues di esei, el “a sinta na man drechi di Dios” y a spera te ora e ricibi poder real. (Hebreonan 10:12, 13) Ora e tempo ei a yega, Hesus a cuminsa goberna como Rei. Pesei anto, con nos mester imagina Hesus awe? Nos mester imagina nos cu e ta un homber sufriendo mientras cu e ta wordo mata? Of nos mester mir’e como un persona cu otronan mester adora? Awe, Hesus no ta un hende ni e no ta Dios Todopoderoso. Mas bien, e ta un criatura spiritual poderoso, un Rei na mando. Y pronto lo e manifesta su gobernacion riba nos tera yen di problema.

Uzando un idioma simbolico, Revelacion 19:11-16 ta describi Hesucristo como un rei sinta riba un cabai blanco y cu ta bini pa husga y bringa un guera den husticia. E tin “un spada skerpi pa e dal e nacionnan cu ne.” Si, Hesus lo uza su gran poder pa destrui e malbadonan. Y kico lo sosode cu esnan cu ta haci esfuerso pa sigui e ehempel cu el a pone tempo e tawata riba tera? (1 Pedro 2:21) E y su Tata lo conserva nan bibo atrabes di e benidero “guera di e gran dia di Dios Todopoderoso”—cu hopi bes ta ser yama Armagedon—pa asina nan por biba pa semper como subditonan terenal di e Reino celestial di Dios.—Revelacion 7:9, 14; 16:14, 16; 21:3, 4.

Durante Hesus su reinado di pas lo e haci hopi milager na fabor di humanidad. (Isaias 9:6, 7; 11:1-10) Lo e cura hende malo y caba cu morto. Dios lo uza Hesus pa resusita miles di miyones di hende, dunando nan un oportunidad pa biba pa semper riba tera. (Huan 5:28, 29) Nos no por ni imagina con maraviyoso nos bida lo ta bou di e gobernacion di Reino. Pesei anto, ta importante pa nos sigui adkiri conocemento di Bijbel y siña conoce Hesucristo mihor.

[Nota]

 [Cuadro na pagina 7]

HESUS TA DIOS TODOPODEROSO?

Hopi hende religioso ta bisa cu Hesus ta Dios. Algun ta pretende cu Dios ta un Trinidad. Segun e siñansa aki “e Tata ta Dios, e Yiu ta Dios y e Spirito Santo ta Dios, sinembargo nan no ta tres Dios sino un solo Dios.” Supuestamente nan tres “ta mesun eterno y mesun igual.” (The Catholic Encyclopedia) E puntonan di bista ei ta corecto?

Yehova Dios ta e Creador. (Revelacion 4:11) E no tin principio ni fin, y e ta todopoderoso. (Salmo 90:2) Di otro banda, Hesus si tawatin un principio. (Colosensenan 1:15, 16) Referiendo na Dios como su Tata, Hesus a bisa: “E Tata ta mas cu mi.” (Huan 14:28) Hesus a splica tambe cu tawatin algun cos cu ni e ni e angelnan no tawata sa sino su Tata so.—Marco 13:32.

Ademas, Hesus a haci oracion na su Tata, bisando: “No mi boluntad, ma di bo sosode.” (Lucas 22:42) Hesus mester tawata haciendo oracion na un Persona superior, no ta berdad? Fuera di esei, ta Dios a resusita Hesus for di morto y no Hesus mes. (Echonan 2:32) Ta obvio anto cu e Tata y e Yiu no tawata igual prome cu Hesus a bini na tera ni durante e tempo cu el a biba riba tera. Kico di e tempo despues cu Hesus a resusita y a bai shelo? Prome Corintionan 11:3 ta declara: “Dios ta e cabes di Cristo.” De echo, semper e Yiu lo keda sumiso na Dios. (1 Corintionan 15:28) Pesei e Scritura ta mustra cu Hesus no ta Dios Todopoderoso. Mas bien, e ta e Yiu di Dios.

E supuesto tercer persona den e Trinidad—spirito santo—no ta un persona. Dirigiendo su mes na Dios den oracion, e salmista a bisa: “Bo ta manda bo spirito, nan ta wordo crea.” (Salmo 104:30) E spirito aki no ta Dios mes; e ta un forsa activo cu Dios ta manda of uza pa cumpli cu loke cu E kier. Mediante e spirito aki Dios a crea e shelo literal, tera y tur cos bibo. (Genesis 1:2; Job 33:4) Dios a uza su spirito santo pa inspira e hendenan cu a skirbi Bijbel. (2 Pedro 1:20, 21) Pues anto, Trinidad no ta un siñansa biblico. * Bijbel ta bisa: “Yehova nos Dios ta un solo Yehova.”—Deuteronomio 6:4, NW.

[Nota]

[Plachi na pagina 5]

Ora Hesus a batisa el a bira E Ungi di Dios

[Plachi na pagina 7]

Hesus a uza su energia pa haci e trabou cu Dios a dun’e

[Plachi na pagina 7]

Awe, Hesus ta un Rei poderoso