Cristianismo Ta Plama Entre Hudiunan di Prome Siglo

UN REUNION importante a tuma luga na Herusalem rond di aña 49 di nos era. Huan, Pedro y Santiago, mitar ruman di Hesus, ‘kendenan a wordo considera pilar’ di e congregacion cristian, tawata presente. E otro dosnan cu a wordo menciona pa nomber y cu a asisti na e reunion tawata apostel Pablo y su compañero Barnabas. Den e reunion ei nan a papia riba con pa dividi e teritorio inmenso pa e trabou di predica. Pablo a splica: “Nan a duna ami y Barnabas e man drechi di comunion, pa nos bai serca e paganonan y nan serca esnan sircuncida.”—Galationan 2:1, 9. *

Con nos mester compronde e acuerdo aki? E teritorio den cua mester a predica e bon nobo a ser dividi den Hudiu y proselito na un banda y hende no Hudiu na e otro banda? Of e acuerdo tawata mas bien un division geografico di e teritorio? Pa haya un posibel contesta, nos mester tin algun informacion historico tocante e Diaspora, esta, Hudiunan cu tawata biba pafo di Palestina.

E Mundo Hudiu den Prome Siglo

Cuanto Hudiu tawata biba den e Diaspora den prome siglo? Ta parce cu hopi erudito ta di acuerdo cu e publicacion Atlas of the Jewish World: “Ta dificil pa yega na cifranan concreto, pero segun calculonan rasonabel, un poco prome cu aña 70 di nos era tawatin dos miyon y mei Hudiu na Hudea y hopi mas cu cuater miyon den e Diaspora Romano ... Probablemente e Hudiunan a representa mas o menos 10 porshento di henter e poblacion di e imperio, y den e luganan caminda tawatin mas consentracion [di Hudiu], den e stadnan di e provincianan oriental, un 25 porshento of mas di e habitantenan lo tawata Hudiu.”

E centronan principal tawata na Siria, Asia Menor, Babilonia y Egipto, den oost, cu comunidadnan mas chikito na Europa. Algun di e prome cristiannan Hudiu bon conoci, manera Barnabas di Cyprus, Pricila y Akila di Ponto y despues Roma, Apolos di Alehandria y Pablo di Tarso, tawata biba pafo di Israel.—Echonan 4:36; 18:2, 24; 22:3.

E comunidadnan di e Diaspora tawatin hopi relacion cu nan patria. Muestra di esei tawata e belasting anual cu nan a manda pa e tempel na Herusalem; den e forma ei nan a participa den e bida y adoracion di tempel. Relaciona cu esaki, e erudito John Barclay a remarca: “Tin suficiente evidencia di cu e comunidadnan di e Diaspora a efectua cabalmente e coleccion di placa aki, complementa cu donacionnan adicional di e riconan.”

Un otro conexion tawata e miles y miles di peregrinonan cu tawata bai Herusalem tur aña pa e fiestanan. E relato na Echonan 2:9-11 tocante Pentecoste di aña 33 ta ilustra esaki. E peregrinonan Hudiu presente a bini for di Partia, Media, Elam, Mesopotamia, Capadocia, Ponto,  Asia, Frigia, Pamfilia, Egipto, Libia, Roma, Creta y Arabia.

E lidernan di e tempel na Herusalem tawata comunica por escrito cu e Hudiunan den e Diaspora. Por ehempel, ta un echo estableci cu Gamaliel, e maestro di lei menciona na Echonan 5:34, tawata manda carta pa Babilonia y otro parti di mundo. Ora apostel Pablo a yega Roma como preso rond di aña 59, “e lidernan di e Hudiunan” a bis’e: “Nos no a ricibi ningun carta for di Hudea tocante di bo, ni ningun di e rumannan no a bini aki, ni a trece noticia, ni a papia nada malo di bo.” Esaki ta indica cu nan tawata ricibi carta- y informenan regularmente for di nan patria.—Echonan 28:17, 21.

E Bijbel di e Hudiunan di e Diaspora tawata un traduccion Griego di e Scritura Hebreo conoci como e Septuaginta. Un buki di consulta ta declara: “Ta rasonabel pa conclui cu nan tawata lesa y reconoce e LXX [Septuaginta] den henter e Diaspora como e Bijbel Hudiu of ‘santo escrito’ di e Diaspora.” E prome cristiannan tawata uza e mesun traduccion ampliamente den nan siñansa.

E miembronan di e cuerpo gobernante cristian na Herusalem tawata bon na haltura di e circunstancianan ei. Ya caba e bon nobo a yega na e Hudiunan di e Diaspora na Siria, incluyendo Damasco y Antiokia, y el a yega asta mas leu cu e luganan ei. (Echonan 9:19, 20; 11:19; 15:23, 41; Galationan 1:21) Na e reunion na aña 49, aparentemente esnan presente tawata planiando pa e trabounan cu nan tawatin nan dilanti. Laga nos considera e relatonan di Bijbel cu ta duna nos un idea di e expansion cu tawatin entre e Hudiu- y proselitonan.

E Biahenan di Pablo y e Hudiunan den e Diaspora

E asignacion original di apostel Pablo tawata “pa hiba [Hesucristo su] nomber na e paganonan y reinan y e yiunan di Israel.” * (Echonan 9:15) Despues di e reunion na Herusalem, Pablo a sigui trata pa alcansa e Hudiunan di e Diaspora na unda cu el a bai. (Mira e cuadro na pagina 14.) Esaki ta indica cu e acuerdo tocante teritorio probablemente tawata basa riba un division geografico. Pablo y Barnabas a expande nan trabou como misionero den direccion west, y e otronan a sirbi e tera natal di e Hudiunan y e comunidadnan grandi di Hudiu den e mundo oriental.

Ora Pablo y su compañeronan a cuminsa nan di dos biahe como misionero for di Antiokia di Siria, nan a haya instruccion pa bai direccion west atrabes di Asia Menor y yega te Troas. Djei nan a crusa bai Macedonia pasobra nan a conclui cu “Dios a yama [nan] pa predica evangelio na [e Macedonionan].” Despues, congregacionnan cristian a lanta den otro stadnan Europeo, incluso Atenas y Corinto.—Echonan 15:40, 41; 16:6-10; 17:1–18:18.

Rond di aña 56, na fin di su di tres biahe como misionero, Pablo a plania pa biaha bai mas leu den direccion west y expande e teritorio cu nan a asign’e na e reunion di Herusalem. El a skirbi: “Di mi parti, mi ta ansioso pa predica e evangelio na boso tambe cu ta na Roma”, y “lo mi pasa via boso bai Spaña.” (Romanonan 1:15; 15:24, 28) Pero kico di e comunidadnan grandi di e Diaspora den oost?

Comunidadnan Hudiu den Oost

Durante e prome siglo di nos era, Egipto tawatin e comunidad mas grandi di e Diaspora, specialmente den su capital, Alehandria. E centro di comercio y cultura aki tawatin un poblacion di cientos di miles di Hudiu, cu sinagoganan plama rond di e stad. Segun Filo, un Hudiu di Alehandria, e tempo ei na henter Egipto tawatin por lo menos un miyon Hudiu. Un cantidad basta grandi di nan a establece nan mes tambe na e pais biciña, Libia, den e stad di Sirene y bicindario.

Algun Hudiu cu a bira cristian tawata di e areanan aki. Nos ta lesa di “Apolos, naci na Alehandria”, “hombernan di Cyprus y Sirene” y  “Lucio di Sirene” kende a sostene e congregacion na Antiokia di Siria. (Echonan 2:10; 11:19, 20; 13:1; 18:24) Cu excepcion di e testimonio cu e evangelisado cristian Felipe a duna e eunuco Etiope, Bijbel no ta duna mas detaye tocante e trabou di e cristiannan di prome siglo na Egipto y bicindario.—Echonan 8:26-39.

Babilonia, cu su extensionnan na Partia, Media y Elam, tawata un otro centro importante. Un historiado a bisa cu “tur teritorio den e sabana di Tigris y Eufrates, for di Armenia te na e Golfo Persico, y tambe den direccion nortost te na Lama Caspio, y den direccion oost te na Media, tawatin poblacionnan Hudiu.” E Encyclopaedia Judaica ta calcula cu tawata trata aki di 800.000 Hudiu of asta mas. E historiado Hudiu di prome siglo, Yosefo, a conta cu miles y miles di Hudiu di Babilonia tawata biaha pa Herusalem pa e fiestanan anual.

Algun di e peregrinonan cu a bini for di Babilonia a batisa na Pentecoste di aña 33? Nos no sa, pero entre e Hudiunan cu a tende e discurso di apostel Pedro riba e dia ei tawatin algun di Mesopotamia. (Echonan 2:9) Loke si nos sa ta cu apostel Pedro tawata na Babilonia rond di aña 62 pa 64. Durante su estadia einan, el a skirbi su prome carta y posiblemente e di dos tambe. (1 Pedro 5:13) Obviamente, Babilonia cu su poblacion grandi di Hudiu a wordo considera como parti di e teritorio asigna na Pedro, Huan y Santiago den e reunion na cua e carta dirigi na e Galationan ta referi.

E Congregacion di Herusalem y e Hudiunan den e Diaspora

Santiago, kende tambe a asisti na e reunion caminda e teritorionan a ser menciona, a sirbi como superintendente den e congregacion di Herusalem. (Echonan 12:12, 17; 15:13; Galationan 1:18, 19) Na Pentecoste di aña 33, e tawata presente ora miles di bishitante Hudiu di e Diaspora a acepta e bon nobo y a batisa.—Echonan 1:14; 2:1, 41.

E tempo ei y despues miles y miles di Hudiu tawata bini pa e fiestanan anual. E stad a yena  cu demasiado hende, y bishitantenan tawatin cu keda den e pueblitonan den bicindario of campa den tent. Segun e Encyclopaedia Judaica, ademas di topa cu nan amigonan, e peregrinonan tawata drenta e tempel pa rindi adoracion, ofrece sacrificio y participa den e estudio di e Tora.

Sin duda, Santiago y e otro miembronan di e congregacion di Herusalem a probecha di e oportunidadnan aki pa duna testimonio na e Hudiunan di e Diaspora. Podise e apostelnan a haci esei cu hopi discrecion durante e periodo cu a lanta e “persecucion grandi contra e iglesia di Herusalem” como resultado di e morto di Esteban. (Echonan 8:1) E registro ta indica cu tanto prome como despues di e suseso aki, e entusiasmo di e cristiannan aki pa predica a resulta den aumento continuo.—Echonan 5:42; 8:4; 9:31.

Kico Nos Por Siña?

E prome cristiannan a echt haci un esfuerso sinsero pa bai tur caminda cu e Hudiunan tawata biba. Rond di e mesun tempo ei, Pablo y su compañeronan a trata pa alcansa e hendenan no Hudiu den e teritorio Europeo. Nan a cumpli cu e instruccion di despedida cu Hesus a duna su siguidonan pa haci hende di “tur e nacionnan” disipel di dje.—Mateo 28:19, 20.

Nos por siña for di nan ehempel e importancia di predica den un forma organisa pa nos por haya e sosten di Yehova su spirito. Tambe nos por mira e bentahanan di busca esnan cu tin respet pa e Palabra di Dios, specialmente den teritorionan caminda tin poco Testigo di Yehova. Tin algun area di e teritorio asigna na boso congregacion cu ta mas productivo cu otro? Kisas ta beneficioso pa cubri esakinan cu mas frecuencia. Tin evenementonan publico den e bicindario cu ta crea oportunidad pa duna testimonio? E ora ei kisas por haci un esfuerso special pa duna testimonio informal y riba caya.

Nos ta beneficia no solamente door di lesa den Bijbel tocante e prome cristiannan sino tambe door di familiarisa nos mes cu algun di e detayenan historico y geografico. Un medio cu nos por uza pa amplia nos comprondemento ta e foyeto “Mira e Tera Bunita”, cu su varios mapa- y potretnan.

[Nota]

[Tabel na pagina 14]

APOSTEL PABLO SU INTERES DEN E HUDIUNAN DEN E DIASPORA

PROME CU E REUNION NA HERUSALEM NA AÑA 49 DI NOS ERA

Echonan 9:19, 20 Damasco — ‘el a cuminsa proclama den sinagoganan’

Echonan 9:29 Herusalem — “e tawata papia ... cu e Hudiunan

Griego”

Echonan 13:5 Salamina, Cyprus — ‘a cuminsa proclama e palabra

di Dios den e sinagoganan di

e Hudiunan’

Echonan 13:14 Antiokia di Pisidia — ‘drentando den sinagoga’

Echonan 14:1 Iconio — ‘a bai den sinagoga di e

Hudiunan’

DESPUES DI E REUNION NA HERUSALEM NA AÑA 49 DI NOS ERA

Echonan 16:14 Filipos — “Lidia, ... un adorado di Dios”

Echonan 17:1 Tesalonica — ‘un sinagoga di e Hudiunan’

Echonan 17:10 Berea — ‘sinagoga di e Hudiunan’

Echonan 17:17 Atenas — ‘rasona den sinagoga cu e Hudiunan’

Echonan 18:4,NW Corinto — “duna discurso den e sinagoga”

Echonan 18:19 Efeso — ‘a bai den sinagoga y tawata rasona

cu e Hudiunan’

Echonan 19:8 Efeso — ‘el a bai den sinagoga y a sigui papia

cu tur frankesa pa tres luna’

Echonan 28:17 Roma — “a yama e lidernan di e Hudiunan hunto”

[Mapa na pagina 15]

(Pa e texto den su formato completo , wak e publicacion)

E Hudiunan cu a tende e bon nobo na Pentecoste di aña 33 a bini for di un area extenso

ILIRICO

ITALIA

Roma

MACEDONIA

GRECIA

Atenas

CRETA

Sirene

LIBIA

BITINIA

GALACIA

ASIA

FRIGIA

PAMFILIA

CYPRUS

EGIPTO

ETIOPIA

PONTO

CAPADOCIA

CILICIA

MESOPOTAMIA

SIRIA

SAMARIA

Herusalem

HUDEA

MEDIA

Babilonia

ELAM

ARABIA

PARTIA

[Awanan]

Lama Mediteraneo

Lama Preto

Lama Cora

Golfo Persico