Abo Ta Kere di Berdad Cu Diabel Ta Existi?

E SCRITURA ta pinta Diabel como un persona real. E ta invisibel pa hende pa e mesun motibo cu Dios ta invisibel pa wowo humano. Bijbel ta bisa cu “Dios ta [un] Spirito.” (Huan 4:24) Diabel ta un criatura spiritual. Pero contrario na e Creador, Diabel si tawatin un principio.

Hopi tempo prome cu Yehova Dios a crea hende, el a traha un gran cantidad di criatura spiritual. (Job 38:4, 7) Bijbel ta yama e spiritonan aki angel. (Hebreonan 1:13, 14) Dios a crea nan tur perfecto; ni un di nan tawata un diabel of tawatin cualkier maldad den dje. Con anto Diabel a cuminsa existi? E palabra “diabel” ta nifica “calumniado” y pesei e ta referi na un persona cu ta lanta mentira malicioso contra otronan. “Satanas” ta nifica “Resistido” of opositor. Mescos cu un homber cu un tempo tawata honrado ta haci su mes un ladron door di horta, asina un di e yiunan spiritual perfecto di Dios a bai tras di su mal deseo y a haci su mes Satanas e Diabel. Bijbel ta splica con un persona ta corumpi su mes, bisando: “Cada un ta wordo tenta ora cu e wordo atrai y seduci door di su mes pasion [of, deseo]. Anto ora pasion consebi, e ta duna lus na pica; y ora pica keda cumpli, e ta produci morto.”—Santiago 1:14, 15.

Aparentemente ta esaki ta loke a sosode. Ora Yehova Dios a crea e prome pareha humano, Adam cu Eva, e angel cu tawata cla pa rebela contra Dios a tuma nota di esaki. E tawata sa cu Yehova a manda Adam cu Eva yena tera cu hende husto, cu lo a adora e Creador. (Genesis 1:28) Aki e angel a mira su chens di haya honor y prominencia. Motiva pa golosidad, el a cudisha loke e Creador so tawatin e derecho legitimo di haya, esta, adoracion di hende. En bes di rechasa e deseo incorecto ei, e yiu spiritual di Dios aki a keda pensa riba dje te ora esaki a hiba na un mentira y despues na rebelion. Ban wak kico el a haci.

E angel rebelde a uza un colebra pa papia cu e prome mohe, Eva. E colebra a puntra Eva:  “Di berdad ta asina cu Dios a bisa cu boso no mag come di tur palo di e hofi?” [NW] Ora Eva a cita e mandamento di Dios y e castigo pa desobediencia, e colebra a declara: “Siguramente boso lo no muri! Pasobra Dios sa cu e dia cu boso come di [e palo meimei di e hofi], boso wowo lo habri y boso lo ta manera Dios, conociendo bon y malo.” (Genesis 3:1-5) El a insinua cu Dios no a papia e berdad cu Adam y Eva. Door di come e fruta di e palo ei, Eva supuestamente lo a bira mescos cu Dios, cu e derecho pa dicidi loke ta bon y loke ta malo. Esei tawata e prome mentira den historia, locual a pone e angel cu a papi’e bira un calumniado. Tambe el a bira un opositor di Dios. Pesei Bijbel ta identifica e enemigo di Dios aki como “e colebra [original] di antiguedad, kende ta wordo yama Diabel y Satanas.”—Revelacion 12:9.

“Sea Alerta”

E mentira cu Diabel a bisa Eva a logra su meta. Bijbel ta bisa: “Ora cu e mohe a mira cu e palo tawata bon pa cuminda, y cu e tawata un delicia pa bista, y cu e palo tawata deseabel pa haci hende bira sabi, el a cohe di su fruta y a come; y el a duna su esposo tambe cu tawata hunto cu ne, y el a come.” (Genesis 3:6) Eva a kere loke Satanas a bis’e y a desobedece Dios. Pa colmo el a pone Adam tambe viola e lei di Dios. Asina Diabel a logra pone e prome pareha humano rebela contra Dios. For di e tempo ei padilanti, Satanas ta eherciendo su influencia invisibel riba asuntonan humano. Cu ki meta? Pa hende no adora e Dios berdadero sino pa nan rindi adoracion na dje. (Mateo 4:8, 9) Cu bon motibo anto e Scritura ta duna e spiertamento: “Sea sobrio, sea alerta. Boso adversario, e Diabel, ta cana rond manera un leon cu ta gruña, buscando ken e por devora.”—1 Pedro 5:8.

Bijbel ta mustra bon cla cu Diabel ta un berdadero persona spiritual, un angel cu a bira corupto y peligroso! E prome paso esencial cu nos tin cu dal pa keda alerta ta di reconoce cu di berdad e ta existi. Pero pa nos mantene nos huicio y keda alerta nos tin cu tene cuenta cu algo mas. Ta importante tambe pa no ignora e “trikinan” di Satanas y su tacticanan di engaño. (2 Corintionan 2:11) Kico ta su tacticanan mañoso? Y con nos por para firme contra nan?

Diabel Ta Probecha di Hende Su Necesidad Natural

Diabel a bin ta observa hende desde creacion di humanidad. E conoce hende su naturalesa, y kico ta su necesidadnan, su interesnan y su deseonan. Satanas ta bon na haltura cu hende a ser crea cu un necesidad di adora, y den su astucia, el a probecha di e necesidad aki. Con asina? Door di alimenta hende cu mentira religioso. (Huan 8:44) Hopi siñansa religioso tocante Dios ta contradictorio y ta crea confusion. Ken bo ta kere tin un interes special den esaki? Si dos siñansa ta contradeci otro, nan tur dos no por ta berdad. Pues ta existi e posibilidad anto cu hopi siñansa religioso ta spesificamente diseña pa gaña hende y cu Satanas ta uza nan cu e meta ei. De echo, Bijbel ta referi na Satanas como “e dios di e mundo aki” cu a ciega mente di hende.—2 Corintionan 4:4.

E berdad di Dios ta proteha hende contra engaño religioso. Bijbel ta compara e berdad di e Palabra di Dios cu e faha cu un solda di antiguedad tawata bisti pa yuda proteha su heupnan. (Efesionan 6:14) Si bo siña conoce Bijbel y biba segun su mensahe, fahando bo curpa cu ne na moda di papia, e Palabra di  Dios lo proteha bo contra engaño y eror religioso.

E deseo cu hende tin pa adora a impuls’e pa e bai explora lo desconoci, locual a expon’e na un otro triki di Satanas. Probechando di hende su curiosidad pa cu loke ta straño y misterioso, Satanas a uza spiritismo pa controla bida di hopi hende. Mescos cu un yagdo ta uza as pa atrae su victima, Satanas ta uza trikinan manera miramento di destino, astrologia, hipnotismo, bruheria, lesamento di plant’i man y magia pa atrae y cohe hende rond mundo den trampa.—Levitico 19:31; Salmo 119:110.

Con bo por proteha bo mes pa bo no cai den e trampa di spiritismo? Deuteronomio 18:10-12 ta declara: “Entre boso no mag wordo haya ningun hende cu ta haci su yiu homber of su yiu mohe pasa door di candela, ni ningun hende cu ta practica adivinacion of cu ta practica bruheria, of cu ta pronostica, of cu ta practica magia, ni ningun hende cu ta plega hende, of cu ta montado of spiritista, of cu ta consulta cu e mortonan. Pasobra ken cu haci e cosnan aki ta un abominacion na SEÑOR; y pa motibo di e abominacionnan aki SEÑOR bo Dios lo core cu nan for di bo dilanti.”

E conseho biblico ta masha spesifico: Keda leu for di spiritismo. Kico bo tin cu haci si bo ta practicando un ke otro forma di spiritismo y awor bo kier stop cu esei? Bo por sigui e ehempel di e prome cristiannan den e stad di Efeso. Ora nan a acepta “e palabra di Yehova”, segun e relato di Bijbel “hopi di esnan cu a practica e arte di magia a trece nan bukinan hunto y a kima nan dilanti tur hende.” E bukinan ei tawata masha costoso. Nan tawata bal 50.000 pida plata. (Echonan 19:19, 20, NW) Pero toch e cristiannan na Efeso no a basila pa destrui nan.

Satanas Ta Probecha di Debilidadnan Humano

Un angel perfecto a bira Satanas e Diabel pasobra el a sucumbi na e deseo di halsa su mes. Den Eva tambe el a lanta un anhelo egoista y orguyoso di kier ta manera Dios. Awe, Satanas ta tene hopi hende den su gara door di lanta den nan e sintimento di orguyo. Por ehempel, algun hende ta haya cu nan rasa, grupo etnico of nacionalidad ta mihor cu di otro hende. Esaki no ta cuadra mes cu loke Bijbel ta siña! (Echonan 10:34, 35) Bijbel ta bisa bon cla: “For di un hende [Dios] a crea tur pueblo.”—Echonan 17:26, BPK.

Un bon defensa contra Satanas su trampa di orguyo ta humildad. Bijbel ta conseha nos pa “no pensa mas halto di [nos] mes cu [nos] mester pensa.” (Romanonan 12:3) E ta bisa cu “Dios ta resisti e orguyosonan, ma ta duna gracia na e humildenan.” (Santiago 4:6) Un  manera efectivo pa resisti e intentonan di Satanas ta pa ser humilde y manifesta e otro cualidadnan cu Dios ta aproba den bo bida personal.

Diabel ta ansioso tambe pa probecha di hende su debilidad di cede na deseonan carnal inapropiado. E proposito di Yehova Dios tawata pa hende gosa di bida. Ora nan ta satisface nan deseonan na e manera cu ta cuadra cu e boluntad di Dios, nan lo ta berdaderamente felis. Pero Satanas ta hinca nan den tentacion pa satisface nan deseonan na un manera inmoral. (1 Corintionan 6:9, 10) Ta mucho mas mihor pa consentra riba loke ta puro y birtuoso. (Filipensenan 4:8) Esaki lo yuda bo domina bo pensamento- y emocionnan.

Sigui Resisti Diabel

Bo por logra resisti Diabel? Si, bo por. Bijbel ta sigura nos: “Resisti Diabel y e lo hui for di boso.” (Santiago 4:7) Asta ora bo para firme contra Satanas, lo e no entrega mesora y stop di causa mas problema pa bo segun cu bo ta haya conocemento di Dios. No, lo e ‘laga bo pa un tempo’ y bolbe purba un otro ora cumbiniente. (Lucas 4:13) Ma bo no tin nodi tene miedo di Diabel. Si bo sigui resistie, lo e no por aleha bo for di e Dios berdadero.

Sinembargo, pa bo resisti Diabel, bo mester sa ken e ta y con e ta engaña hende. Ademas, bo mester siña ki medidanan bo por tuma pa proteha bo mes contra su tacticanan mañoso. E unico fuente cu por duna bo e conocemento exacto ei ta Bijbel, e Palabra di Dios. Pues, sea firme den bo decision pa studia e Scritura inspira, y aplica loke bo siña for di dje den bo bida. Gustosamente e Testigonan di Yehova den bo area lo yuda bo gratis cu un estudio asina, na un ora cumbiniente pa bo. Por fabor, no basila pa tuma contacto cu nan of pa skirbi e editornan di e revista aki.

Segun bo ta studia Bijbel, tene na mente cu Satanas por uza oposicion of persecucion pa stroba bo di siña e berdad cu tin den e Palabra di Dios. Algun di bo sernan keri por asta rabia cu bo pasobra bo ta studia Bijbel, specialmente door cu kisas nan no conoce e berdadnan maraviyoso cu Bijbel ta contene. Otronan kisas ta haci chercha di bo. Pero Dios realmente lo keda contento si bo sucumbi na e presionnan ei? Ta Diabel kier desanima bo pa bo stop di siña tocante e Dios berdadero. Pakico bo tin cu laga Satanas gana? (Mateo 10:34-39) Bo no deb’e nada. Ta Yehova bo debe bo bida. Pues, sea dicidido anto pa resisti Diabel y ‘haci Yehova su curason contento.’—Proverbionan 27:11.

[Plachi na pagina 6]

Hende cu a bira cristian a kima nan bukinan di spiritismo

[Plachi na pagina 7]

Tuma e decision firme pa studia Bijbel