Cana cu Dios y Cosecha Loke Ta Bon

“Nan ta sembra biento, y nan ta cosecha warwaru.”—OSEAS 8:7.

1. Con nos por cana cu Yehova?

UN BIAHE door di un region peligroso lo ta mas safe si esun cu ta cana dilanti ta un guia cu experencia. Lo ta mas sabi pa nos cana cu un guia asina cu bai nos so. Den algun sentido, esei ta ilustra e situacion cu nos ta aden. Yehova a ofrece su mes, na moda di papia, pa guia nos door di e desierto inmenso di e mundo malbado djawe. Lo ta sabi di nos parti pa cana cu ne en bes di purba dirigi nos mes pasonan. Con nos por cana cu Dios? Door di sigui e guia cu e ta duna den su Palabra.

2. Kico nos lo trata den e articulo aki?

² E articulo anterior a considera e drama simbolico cu nos ta haya den Oseas capitulo 1 te cu 5. Manera nos a mira, e drama ei ta contene lesnan cu por yuda nos cana cu Dios. Laga nos trata awor algun punto sobresaliente di capitulo 6 te cu 9. Lo ta bon pa cuminsa cu un resumen breve di e cuater capitulonan aki.

Un Resumen Breve

3. Duna un resumen cortico di Oseas capitulo 6 te cu 9.

³ Yehova a manda Oseas bai profetisa principalmente na e reino di dies tribu di Israel den parti nort. E nacion ei, conoci tambe como Efrain, a base di e nomber di e tribu dominante, a bira lomba pa Dios. Oseas capitulo 6 te cu 9 ta mustra con e pueblo a mustra deslealtad door di viola Yehova su aliansa y practica maldad. (Oseas 6:7) Nan a confia den aliansanan mundano en bes di bolbe serca Yehova. Door cu nan a sigui sembra loke ta malo, nan lo a bin cosecha loke ta malo. Cu otro palabra, huicio desfaborabel tawata na caminda! Sinembargo, e profecia di Oseas ta contene tambe un mensahe alentador. E profeta a sigura e pueblo cu nan por a bolbe na Yehova y haya misericordia, basta cu nan a duna prueba di repentimento sinsero.

4. Ki lesnan practico for di e profecia di Oseas nos lo considera?

⁴ For di e cuater capitulonan aki di e profecia di Oseas, nos por haya mas guia cu lo yuda nos cana cu Dios. Laga nos considera cuater les practico: (1) Berdadero repentimento ta ser manifesta cu accion, no djis cu palabra; (2) sacrificio so no ta agrada Dios; (3) ora Yehova su adoradonan bira lomba p’e, nan ta hacie tristo; y (4) pa cosecha loke ta bon, nos tin cu sembra loke ta bon.

Con Ta Demostra Berdadero Repentimento

5. Menciona e idea principal di loke ta ser bisa na Oseas 6:1-3.

⁵ E profecia di Oseas ta siña nos hopi cos tocante repentimento y misericordia. Na Oseas 6:1-3 nos ta lesa: “Ban, laga nos bolbe na SEÑOR. Pasobra el a scheur nos, ma e lo cura nos; el a herida nos, ma e lo mara nos cu verband. E lo rebiba nos despues di dos dia; e lo lanta nos riba e di tres dia, pa nos por biba su dilanti. Asina, laga nos conoce, laga nos persevera pa conoce SEÑOR. Mes sigur cu dia ta habri, e lo aparece; y e lo bin serca nos manera awasero, manera e awasero di primavera cu ta muha tera.”

6-8. Kico tawata robes cu Israel su repentimento?

⁶ Ken a papia e palabranan registra den e versiculonan aki? Tin hende ta bisa cu ta e Israelitanan infiel a haci e declaracionnan aki y  cu e pueblo desobediente a fingi repentimento y a abusa di Dios su misericordia. Otronan, sinembargo, ta kere cu ta profeta Oseas tawata papiando, rogando e pueblo pa bin bek serca Yehova. Sin importa ta ken a haci e declaracionnan aki, e pregunta cardinal ta: E pueblo en general di e reino di dies tribu di Israel a bolbe bek na Yehova, manifestando berdadero repentimento? E contesta ta no. Yehova ta bisa mediante Oseas: “Kico lo mi haci cu bo, o Efrain? Kico lo mi haci cu bo, o Huda? Pasobra bo lealtad ta manera un nubia di mainta, y manera serena cu ta disparce tempran.” (Oseas 6:4) Esaki ta bisa tur cos di e condicion spiritual deplorabel di e pueblo di Dios! Lealtad, of amor leal, a disparce casi por completo, manera e neblina of serena di mainta cu rapidamente ta somenta ora cu solo sali. Aunke e pueblo aparentemente a haci como si fuera nan a repenti, Yehova no a haya ningun base pa mustra misericordia na nan. Kico tawata e problema?

⁷ E repentimento di Israel no tawata realmente di curason. Oseas 7:14 ta bisa lo siguiente tocante Yehova su disgusto cu su pueblo: “Nan no ta sclama na mi for di nan curason, ora nan ta lamenta riba nan cama.” Hos 7 Versiculo 16 ta agrega: “Nan ta bolbe, ma no serca e Haltisimo.” E pueblo no tawata dispuesto pa bolbe na e adoracion di e Haltisimo, Yehova, door di haci e cambionan necesario pa drecha nan relacion cu ne. De echo, nan no kier a echt cana cu Dios.

⁸ Tawatin un otro problema cu Israel su repentimento. E hendenan a sigui practica pica—anto tur tipo di pica—entre otro fraude, matamento, ladronicia, idolatria y seramento di aliansa imprudente cu otro nacionnan. Na Oseas 7:4, e pueblo ta ser compara cu un “forno” di panadero, evidentemente pa motibo di e mal deseonan ardiente cu nan tawatin. En bista di un condicion spiritual asina deplorabel, e pueblo acaso a merece misericordia? Definitivamente cu no! Oseas ta bisa e pueblo rebelde cu Yehova lo “corda nan inikidad” y “castiga nan picanan.” (Oseas 9:9) No tin misericordia pa nan!

9. Kico Oseas su palabranan ta siña nos tocante repentimento y misericordia?

⁹ Kico nos ta siña tocante repentimento y misericordia segun cu nos ta lesa Oseas su palabranan? E ehempel di e Israelitanan sin fe ta sirbi como un spiertamento y ta siña nos cu pa nos beneficia di Yehova su misericordia, nos tin cu demostra repentimento sinsero. Con e repentimento ei ta ser manifesta? Hende no por gaña Yehova cu lagrima of djis cu palabra. Berdadero repentimento ta ser manifesta cu accion. Pa un malechor ricibi misericordia, e tin cu bandona su caminda pecaminoso completamente y pone su bida na  harmonia cu e normanan halto di Yehova su adoracion eleva.

Sacrificio So No Ta Agrada Yehova

10, 11. Manera a keda demostra den e caso di Israel, dicon sacrificio so no ta agrada Yehova?

¹⁰ Awor laga nos papia di e di dos les cu por yuda nos cana cu Yehova. E ta lo siguiente: Sacrificio so no ta agrada Dios. Oseas 6:6 ta bisa: “Mi [esta, Yehova] tin delicia den lealtad mas cu den sacrificio, y den e conocemento di Dios, mas cu den ofrendanan kima.” Ripara cu Yehova tin delicia den lealtad, of amor leal cu ta un cualidad di curason, y den e echo cu hende tin conocemento di dje. Pero kisas bo ta puntra bo mes: ‘Pakico e versiculo ta bisa cu Yehova no tin delicia den “sacrificio” ni “ofrendanan kima”? Esakinan no tawata cosnan cu nan mester a cumpli cu ne bou di e Lei di Moises?’

¹¹ En berdad, sacrificio y ofrenda tawata rekisitonan stipula den e Lei, sinembargo tawatin un problema serio cu e hendenan den tempo di Oseas. Aparentemente tawatin Israelita cu tawata cumpli debidamente cu e ofrendanan ei pero djis pa duna hende e impresion cu nan ta deboto. Ma na mes momento, e hendenan ei tawata practica pica. Door di nan actonan pecaminoso nan a indica cu nan no tawatin amor leal den nan curason. Tambe nan a demostra cu nan a rechasa e conocemento di Dios, pasobra nan no tawata biba na harmonia cu ne. Si e hendenan no tawatin e condicion corecto di curason ni no tawata hiba un bida corecto, ki balor nan sacrificionan tawatin? Nan sacrificionan tawata mas bien repugnante pa Yehova Dios.

12. Oseas 6:6 ta contene ki spiertamento pa hende djawe?

¹² E palabranan di Oseas ta contene un spiertamento pa hopi baido di misa di awendia. Nan ta haci ofrenda na Dios den forma di practicanan religioso. Sinembargo, nan adoracion tin masha tiki efecto riba nan conducta diario, y tin biaha asta ningun efecto. Acaso hende asina realmente ta agrada Dios si nan curason no ta impulsa nan pa adkiri conocemento exacto di dje y aplica e conocemento ei door di stop cu practicanan pecaminoso? No laga ningun hende kere cu obra religioso so ta agrada Dios. Yehova no tin delicia den hende cu ta purba gana su fabor door di tin un aparencia religioso en bes di realmente biba segun su Palabra.—2 Timoteo 3:5.

13. Ki clase di sacrificio nos ta ofrece, pero kico nos tin cu corda relaciona cu nan balor?

¹³ Como cristiannan berdadero, nos ta corda cu sacrificio so no ta agrada Dios. Ta berdad cu nos no ta sacrifica bestia na Yehova. Sinembargo, nos ta “ofrece continuamente un sacrificio di alabansa na Dios, esta, e fruta di lipnan cu ta duna gradicimento na su nomber.” (Hebreonan 13:15) Ta importante pa nos no bira manera e Israelitanan pecaminoso di Oseas su tempo, pensando cu nos por compensa malecho door di ofrece sacrificio spiritual na Dios. Considera e ehempel di un hoben cu a practica inmoralidad sexual den scondi. El a admiti despues: “Mi a cuminsa traha mas tanto den sirbishi di veld, pensando cu esaki di un manera of otro lo a tapa e malecho.” Esei ta mescos cu loke e Israelitanan  desobediente a purba haci. Sinembargo, nos sacrificio di alabansa ta aceptabel pa Yehova solamente si e ta compaña pa e motivacion corecto di curason y conducta deboto.

Yehova Ta Bira Tristo Ora Cu Su Adoradonan Bandon’e

14. E profecia di Oseas ta revela kico tocante Dios su sintimentonan?

¹⁴ Un di tres les cu nos ta siña for di Oseas capitulo 6 te cu 9 ta con Yehova ta sinti ora cu su adoradonan bira lomba p’e. Dios tin sintimentonan fuerte y tambe tierno. E tin e sintimentonan tierno di goso y compasion pa cu hende cu repenti di nan picanan. Pero ora cu su pueblo no kier repenti, e ta tuma accion fuerte y dicidido. Door cu Dios ta profundamente interesa den nos bienestar, e ta alegra ora cu nos ta cana fielmente cu ne. Salmo 149:4 ta bisa cu Yehova ta “hiba gusto den su pueblo.” Pero con Dios ta sinti ora cu su sirbidonan ta infiel?

15. Di acuerdo cu Oseas 6:7, con algun Israelita tawata actua?

¹⁵ Papiando di e Israelitanan infiel, Yehova ta bisa: “Manera Adam nan a transgresa [viola] e aliansa; ayanan nan a trata cu traicion contra mi.” (Oseas 6:7) E palabra Hebreo traduci “trata cu traicion” ta nifica tambe “trata cu engaño, (trata) infielmente.” Na Malakias 2:10-16, ta uza e mesun palabra Hebreo pa describi e conducta desleal di e Israelitanan cu tawata infiel na nan partner matrimonial. Relaciona cu e uzo di e palabra aki na Oseas 6:7, un buki di consulta ta bisa cu uzo di e termino aki ta indica cu Israel tawata den un relacion intimo y personal cu Yehova, mescos cu den un matrimonio, pero nan a traiciona e amor cu el a mustra na nan.

16, 17. (a) Con Israel a actua relaciona cu Dios su aliansa cu e nacion? (b) Kico nos no mester lubida tocante nos accionnan?

¹⁶ Yehova a mira Israel como su esposa figurativo pa motibo di su aliansa cu e nacion. Pesei ora su pueblo a viola e condicionnan di e aliansa ei, tawata como si fuera nan a comete adulterio. Dios tawata manera un esposo fiel, pero su pueblo a bandon’e!

¹⁷ Kico di nos? Dios ta interesa pa wak si nos ta cana cu ne of no. Ta bon pa nos no lubida  cu “Dios ta amor” y cu nos accionnan tin efecto riba dje. (1 Huan 4:16) Si nos sigui un mal caminda, nos por haci Yehova dolor y sigur lo e no ta contento cu nos. Si nos tene esaki na mente, e por ta un motivacion fuerte pa nos no cede na tentacion.

Con Nos Por Cosecha Loke Ta Bon

18, 19. Ki principio nos ta haya na Oseas 8:7, y con e principio ei a resulta cierto den caso di e Israelitanan?

¹⁸ Laga nos considera un di cuater les for di e profecia di Oseas: Con nos por cosecha loke ta bon. Oseas ta skirbi relaciona cu e Israelitanan y e bobedad y banidad di nan infieldad: “Nan ta sembra biento, y nan ta cosecha warwaru.” (Oseas 8:7) Aki nos ta haya un principio cu ta bon pa nos tene na mente: Tin un relacion directo entre loke nos ta haci awor y loke ta sosode cu nos despues. Con e principio aki a resulta cierto den caso di e Israelitanan infiel?

¹⁹ Door di practica pica, e Israelitanan ei tawata sembra loke ta malo. Nan lo por a sigui haci esei sin cosecha mal consecuencia? Claro cu no! Nan lo no a scapa huicio desfaborabel. Oseas 8:13 ta declara: “[Yehova] lo corda nan inikidad, y castiga nan pa nan picanan.” Y na Oseas 9:17, nos ta lesa: “Mi Dios lo tira nan afo, pasobra nan no a scuch’e. Y nan lo ta hende cu ta cana dual meimei di e nacionnan.” Si, Yehova lo a tene e Israelitanan responsabel pa nan picanan. Door cu nan a sembra loke ta malo, nan lo a cosecha loke ta malo. Dios su huicio contra nan a wordo efectua na aña 740 prome cu nos era, ora cu e Asirionan a tumba e reino di dies tribu di Israel y a hiba su habitantenan den cautiverio.

20. Kico nos ta siña for di loke a pasa cu e Israelitanan?

²⁰ Loke a pasa cu e Israelitanan ei ta siña nos un berdad basico: Nos ta cosecha loke nos sembra. E Palabra di Dios ta spierta nos: “No gaña boso mes: Dios no ta laga haci bofon di dje; pasobra loke un hende sembra, esaki tambe e lo cosecha.” (Galationan 6:7) Si nos sembra loke ta malo, nos lo cosecha loke ta malo. Por ehempel, hende cu ta hiba un bida inmoral lo cosecha consecuencianan amargo. Un pecado cu no repenti lo tin un resultado infelis.

21. Con nos por cosecha loke ta bon?

²¹ Con anto nos por cosecha loke ta bon? Nos por contesta e pregunta ei cu un simpel ilustracion. Si un cunukero kier cosecha calbas, lo e planta pampuna? Claro cu no! Pampuna no sa pari calbas. E tin cu planta loke e kier cosecha. Mescos tambe, si nos kier cosecha loke ta bon, nos tin cu sembra loke ta bon. Bo kier sigui cosecha loke ta bon? Por ehempel, un bida felis y di satisfaccion awor y cu e speransa di bida eterno den Dios su mundo nobo? Si ta asina, anto bo tin cu sigui sembra loke ta bon door di cana cu Dios y biba na harmonia cu su normanan husto.

22. Ki lesnan nos a siña for di Oseas capitulo 6 te cu 9?

²² For di Oseas capitulo 6 te cu 9 nos a siña cuater les cu por yuda nos cana cu Dios: (1) Berdadero repentimento ta ser manifesta cu accion; (2) sacrificio so no ta agrada Dios; (3) ora Yehova su adoradonan bira lomba p’e, nan ta hacie tristo; y (4) pa cosecha loke ta bon, nos tin cu sembra loke ta bon. Con e ultimo cinco capitulonan di e buki biblico aki por yuda nos cana cu Dios?

Con Lo Bo Contesta?

• Con berdadero repentimento ta ser manifesta?

• Dicon sacrificio so no ta agrada nos Tata celestial?

• Con Dios ta sinti ora cu su adoradonan bandon’e?

• Kico nos tin cu sembra pa nos por cosecha loke ta bon?

[Preguntanan di Estudio]

[Plachi na pagina 23]

Israel su amor leal a disparce mescos cu nubia di mainta

[Plachi na pagina 23]

E mal deseonan di Israel tawata kima manera un forno

[Plachi na pagina 24]

Dicon Yehova a rechasa e sacrificionan di su pueblo?

[Plachi na pagina 25]

Pa cosecha loke ta bon, nos tin cu sembra loke ta bon