“Ki Bon Ta un Palabra Duna na Ora!”

DURANTE henter un dia di asamblea di Testigonan di Yehova, Kim a haci su best pa scucha y tuma nota mientras cu alabes e tawata purba laga su yiu mohe di dos aña y mei sinta keto. Na final di e programa, un ruman mohe cristian sinta den e mesun rei a bin serca Kim y a elogi’e sinseramente pa e manera cu e cu su casa a atende cu nan yiu mohe durante e programa. E elogio ei a nifica asina hopi pa Kim cu te awe, añanan despues, e ta bisa: “Ora cu mi ta sinti mi hopi cansa na reunion, mi ta pensa riba loke e ruman mohe ei a bisa mi. Su palabranan bondadoso ainda ta anima mi pa sigui entrena nos yiu mohe.” En berdad, palabranan papia na ora por curasha un persona. Bijbel ta declara: “Ki bon ta un palabra duna na ora!”—Proverbionan 15:23.

Pero pa algun di nos kisas ta dificil pa elogia otro hende. Tin biaha esei ta bin door cu nos ta conciente di nos propio deficiencianan. Un cristian a bisa: “Pa mi, esei ta manera ora bo ta para riba tera moli. Mas mi hisa otro hende na halto [door di elogia nan], mas mi ta sinti con mi ta sak bai abou.” Factornan manera timides, falta di confiansa den bo mes of miedo cu hende lo compronde bo malo, tambe por pone cu ta dificil pa duna elogio. Ademas, si nos mes personalmente a haya masha tiki of ningun reconocemento tempo cu nos tawata lanta como mucha, lo por ta dificil pa nos elogia otro hende.

Sinembargo, e echo cu nos sa cu elogio por tin un bon efecto tanto riba esun cu ta dun’e como esun cu ta ricibie lo por motiva nos pa haci nos best pa duna un palabra di elogio na e momento oportuno. (Proverbionan 3:27) Kico anto ta e efectonan positivo cu ta resulta ora nos haci esei? Laga nos considera algun brevemente.

Efectonan Positivo

Elogio apropiado por edifica confiansa den esun cu hay’e. Elaine, un esposa cristian, a bisa: “Ora hende elogia mi, mi ta sinti cu nan tin confiansa den mi, cu nan ta kere den mi.” Si, elogia un persona cu falta confiansa den su mes por duna e persona ei e curashi pa trata cu obstaculo, y como resultado, e ta haya goso. Specialmente hobennan por beneficia di elogio mereci. Un teenager cu a admiti cu e ta ser descurasha door di su propio pensamentonan negativo a bisa: “Semper mi ta haci mi best pa agrada Yehova, pero tin biaha mi ta sinti cu maske kico mi haci, e no ta suficiente. Ora un hende elogia mi, mi ta sinti mi hopi bon.” En berdad e proverbio biblico aki ta cierto: “Un palabra papia na ora apropiado ta manera un apel di oro den montura di plata.”—Proverbionan 25:11.

Elogio por motiva y curasha un persona. Un sirbido di tempo completo a bisa: “Palabranan di elogio ta anima mi pa traha mas duro y pa mehora e calidad di mi sirbishi.” Un mama di dos yiu a comenta cu ora su yiunan haya palabra di elogio di otro miembronan di e congregacion pasobra nan a duna comentario na reunion, nan kier duna mas comentario. Si, elogio por motiva hobennan pa haci progreso den e bida cristian. De echo, nos tur tin mester di palabranan cu ta sigura nos cu nos ta ser aprecia y balora. E mundo yen di  stress aki kisas ta laga nos keda cansa y deprimi. Un anciano cristian a bisa: “Tin biaha ora cu mi ta desanima, elogio ta manera un contesta riba mi oracionnan.” Asina tambe Elaine a bisa: “Tin bes mi ta sinti cu Yehova ta mustra mi su aprobacion mediante e expresionnan di otro hende.”

Ser elogia por crea un sintimento di logro y aceptacion. Duna elogio sinsero ta un muestra di consideracion y ta edifica un ambiente di cariño, siguridad y aprecio. E ta prueba cu nos realmente ta stima nos rumannan cristian y ta aprecia nan. Josie, un mama, a bisa: “Den pasado, mi mester a tuma mi posicion na fabor di e berdad den un famia dividi pa motibo religioso. E tempo ei, e palabranan di aprecio cu mi a haya di personanan spiritualmente maduro a fortalece mi determinacion pa no entrega.” En berdad, “nos ta miembro di otro.”—Efesionan 4:25.

E deseo di kier elogia otro hende ta yuda nos mira e bon den nan. Nos ta wak e bon cualidadnan di otro hende, no nan debilidadnan. Un anciano cristian cu yama David a bisa: “Ora nos ta gradicido pa loke otro hende ta haci, esei lo yuda nos elogia otro hende cu mas frecuencia.” Teniendo na mente con generoso Yehova cu su Yiu ta den papia bon di hende imperfecto lo motiva nos pa imita nan den esei.—Mateo 25:21-23; 1 Corintionan 4:5.

Personanan Cu Ta Merece Elogio

Yehova Dios, como e Creador, ta Esun principal entre esnan cu merece elogio. (Revelacion 4:11) Aunke e no tin mester di nos pa  stimula su confiansa of motiv’e, ora nos ta alaba Yehova pa su grandesa y su bondad amoroso, e ta hala serca nos y nos ta desaroya un relacion cu ne. Tambe dunamento di elogio of alabansa na Dios ta yuda nos desaroya un opinion sano y modesto di nos propio logronan y ta pone nos atribui nos exitonan na Yehova. (Yeremias 9:23, 24) Yehova ta ofrece na tur hende merecedor e speransa di bida eterno, y esei ta un motibo mas pa stimula nos pa alab’e. (Revelacion 21:3, 4) Rei David di pasado tawata ansioso pa “alaba e nomber di Dios” y “engrandec’e cu gradicimento.” (Salmo 69:30) Laga esei ta nos deseo tambe.

Nos compañeronan di adoracion ta merece elogio apropiado. Ora nos ta duna nan esei, nos ta actua na harmonia cu e mandamento divino pa “considera con pa stimula otro pa stima y haci bon obra.” (Hebreonan 10:24) Un bon ehempel di esaki tawata apostel Pablo. El a skirbi e congregacion na Roma: “Na prome luga mi ta gradici mi Dios pa medio di Hesucristo pa boso tur, pasobra boso fe ta wordo proclama den henter mundo.” (Romanonan 1:8) Asina tambe apostel Huan a duna reconocemento na su compañero cristian Gayo pa su ehempel excelente di “cana den e berdad.”—3 Huan 1-4.

Awe, nos tin un excelente oportunidad pa expresa nos aprecio na un ruman cristian ora cu e desplega den un manera ehemplar un cualidad semehante di Cristo, ora cu e presenta un parti bon prepara den reunion of ora cu e duna un comentario sinsero durante un reunion. Tambe nos por elogia un mucha ora cu e ta haci su best pa busca e textonan di Bijbel durante reunionnan di congregacion. Elaine, menciona anteriormente, a bisa: “Nos cada un tin talento diferente. Door di tuma nota di loke un otro hende ta haci, nos ta mustra nos aprecio pa e variedad di talentonan cu tin den e pueblo di Dios.”

 Duna Elogio den e Circulo di Famia

Kico di expresa aprecio na miembronan di nos propio famia? Pa un esposo y esposa percura sosten spiritual, emocional y material pa nan famia ta rekeri hopi tempo, esfuerso y atencion amoroso. Definitivamente nan ta merece di tende palabranan di elogio di otro y di nan yiunan. (Efesionan 5:33) Por ehempel, e Palabra di Dios ta bisa relaciona cu un esposa capas: “Su yiunan ta lanta y ta yam’e bendiciona; su esposo tambe, y e ta gab’e.”—Proverbionan 31:10, 28.

Muchanan tambe merece elogio. Lamentablemente, algun mayor ta masha lihe pa bisa nan yiunan kico nan ta spera di nan, pero masha poco bes nan ta elogia nan yiunan pa e esfuerso cu nan ta haci pa ta respetuoso y obediente. (Lucas 3:22) Dunamento di elogio den e prome añanan di un mucha su desaroyo ta contribui hopi bes na laga e mucha sinti su mes stima y mas sigur.

Ta berdad cu dunamento di elogio ta rekeri esfuerso, pero nos ta cosecha hopi beneficio ora nos hacie. De echo, mas diligente nos ta den elogia personanan cu merece esei, mas grandi nos felicidad lo ta.—Echonan 20:35.

Acepta y Duna Elogio cu e Actitud Corecto

Sinembargo, hayamento di elogio por ta un test pa algun hende. (Proverbionan 27:21) Por ehempel, esei por fomenta sintimentonan di superioridad den personanan cu tin e tendencia di ta orguyoso. (Proverbionan 16:18) Pesei, ta necesario pa nos ta balansa. Apostel Pablo a duna e conseho practico aki: “Mi ta bisa cada un di boso pa no pensa mas halto di su mes cu e mester pensa; ma pa mas bien pensa di su mes cu sano huicio, di acuerdo cu e midi di fe cu Dios a duna bo.” (Romanonan 12:3) Pa yuda hende pa nan no cai den e trampa di pensa mucho halto di nan mes, kisas ta sabi pa no consentra riba cosnan manera hopi inteligencia of bon aparencia. Mas bien, nos mester elogia hende pa nan obranan excelente.

Ora duna y acepta palabranan di elogio cu e actitud corecto, nan por tin un efecto positivo riba nos. Nos por sinti nos conmovi pa reconoce cu nos mester ta gradicido na Yehova pa tur cos bon cu nos a haci. Elogio por anima nos tambe pa sigui comporta nos mes na un manera excelente.

Elogio sinsero y bon mereci ta un regalo cu nos tur por duna. Ora cu bondadosamente nos dun’e na un persona, e por nifica mas pa e persona ei cu nos hamas lo realisa.

[Cuadro/Plachi na pagina 18]

Un Carta Cu A Touch Su Curason

Un superintendente biahero ta corda cla cla un ocasion cu e y su esposa a regresa nan alohamento despues di a pasa un dia di winter hopi friu den sirbishi di veld. El a conta: “Mi esposa tawata sinti friu y tawata desanima, y el a bisa mi cu e ta sinti cu e no por sigui mas. E di cu mi: ‘Lo ta mucho mas mihor pa nos sirbi den e sirbishi di tempo completo cu un congregacion, keda na un luga y conduci nos propio estudionan di Bijbel.’ Mi a pospone tumamento di un decision door di bis’e cu nos lo sigui cu e trabou pa e resto di e siman y wak con e ta sinti na final. Si ainda e kier a bandona e trabou biahero, lo mi respeta su sintimento. E mesun dia ei, nos a pasa postkantoor y a haya un carta for di sucursal cu tawata dirigi na dje personalmente. E carta tawatin elogio sinsero pa e esfuerso cu e ta haci den sirbishi di veld y pa su perseverancia, y a reconoce con dificil e por ta pa drumi tur siman den un otro cama. El a keda asina conmovi pa e elogio ei cu nunca mas e no a papia di bandona e trabou biahero. De echo, varios biaha el a anima ami pa sigui ora cu mi tawata pensa pa stop.” E pareha aki a keda den e trabou biahero pa casi 40 aña.

[Plachi na pagina 17]

Ken den bo congregacion merece elogio?

[Plachi na pagina 19]

Mucha ta bai bon ora nan haya atencion amoroso y elogio