Nan A Haci Curason di Nan Mayornan Contento

“MI YIU, si bo curason ta sabi, e ora ei mi curason tambe lo keda contento.” (Proverbionan 23:15) En berdad mayornan cristian ta alegra ora cu nan yiunan adkiri sabiduria divino. Diasabra, 10 di september 2005, un grupo internacional di 6.859 persona a asisti na graduacion di e di 119 klas di e Scol Biblico di Galad di Watchtower. Tur esnan presente su curason a yena cu alegria, specialmente curason di e mayornan di e 56 graduadonan.

David Walker, kende tin hopi aña como miembro di e famia di Betel di Merca, a habri e programa cu un oracion di curason. Despues e presidente di e programa, David Splane di e Cuerpo Gobernante di Testigonan di Yehova, a cuminsa cu e programa di graduacion bisando tata y mama di e graduadonan: “Boso ta merece nos mas sinsero elogio. E cualidadnan cu boso a cultiva den boso yiu hombernan y yiu mohenan a motiva nan pa bai den e sirbishi di misionero.” E mayornan ei kisas tawata un tiki precupa como cu denter di un poco tempo nan yiunan lo a bai asignacionnan leu. Pero Ruman Splane a trankilisa nan: “No precupa pa boso yiunan. Yehova por cuida nan hopi mas mihor cu boso.” Caba el a bisa: “Pensa riba e bon cu boso yiunan lo logra. Hende cu ta sufri lo bai haya berdadero consuelo pa prome biaha den nan bida.”

Con pa Sigui Haci Otro Hende Contento

E presidente a introduci cuater orado. Esun prome, Ralph Walls di e Comite di Sucursal di Merca, a papia riba e tema “Tene Boso Wowonan Habri.” El a enfatisa cu ser ciego spiritual ta piyo cu ser ciego literal. Den prome siglo, e congregacion na Laodicea a perde su bista spiritual. Hesus a ofrece yudansa na e cristiannan spiritualmente ciego den e congregacion ei, pero semper ta mihor pa preveni di bira ciego door di tene nos wowonan spiritual habri. (Revelacion 3:14-18) E orado a bisa: “Tene boso wowonan habri, y mira e ruman hombernan responsabel manera Yehova ta mira nan.” E graduadonan no mester ta indebidamente precupa si tin problema den congregacion. Señor Hesucristo ta conciente di tur e cosnan ei. E lo percura pa e asuntonan wordo atendi na nan debido tempo.

Despues a sigui Samuel Herd di Cuerpo Gobernante cu a contesta e pregunta “Bo Ta Cla?” Mescos cu un hende cu ta biaha ta bai cu e pañanan cu e tin mester, asina e graduadonan semper mester ta bisti cu e cualidadnan di e personalidad nobo. Nan mester tin e mesun compasion cu Hesus tawatin. Ora un leproso a bisa Hesus: “Si bo kier, bo por haci mi bira limpi.” Hesus di: “Mi kier, sea limpi.” (Marco 1:40-42) Anto e orado a declara: “Si di berdad boso kier yuda hende, boso lo haya un manera pa hacie.” Filipensenan 2:3 [NW] ta bisa cristiannan pa considera “cu otronan  ta superior.” Ruman Herd a bisa: “Ser humilde di curason ta mas importante cu e echo cu nos tin conocemento. E personanan cu boso ta topa den boso ministerio y e rumannan den congregacion lo beneficia di boso conocemento solamente si boso ta humilde.” El a conclui bisando cu si e graduadonan sigui bisti nan mes cu amor cristian, nan ta cla pa bai nan asignacion, y cu exito sigur nan dilanti.—Colosensenan 3:14.

Mark Noumair, un di e instructornan di Galad a crea expectativa cu e tema di su discurso: “Lo Bo Keda cu e Sintimento Ei?” “E sintimento ei” ta referi na nos gratitud pa Yehova su bondad. Salmo 103:2 [NW] ta declara: “Bendiciona Yehova, o mi alma, y no lubida tur su echonan.” E Israelitanan a demostra un falta di gratitud pa e mana cu a mantene nan na bida, y nan a yam’e “cuminda miserabel.” (Numbernan 21:5) No ta e balor di e mana a cambia segun cu tempo a pasa, sino mas bien ta nan aprecio p’e a disparce. E instructor a bisa: “Si boso lubida Yehova su echonan y laga boso sirbishi den estranheria bira algo comun y coriente, esei lo afecta e manera cu boso ta mira e trabou cu Yehova a duna boso pa haci.” Salmo 103:4 ta declara cu Yehova ta “corona bo cu misericordia” of bondad amoroso. E graduadonan lo experencia Dios su bondad amoroso den nan congregacion nobo.

Un otro instructor di Galad, Lawrence Bowen, a papia riba e tema “Bendicion Lo Alcansa Bo?” El a remarca cu e miembronan di e di 119 klas di Galad a train duro pa nan por ta misioneronan exitoso. Pero awor nan tin cu pega na Yehova y na e trabou cu el a asigna na nan. Na Revelacion 14:1-4, e 144.000 ta ser describi como “esnan cu ta sigui e Lamchi unda cu e bai.” Tur den e grupo ei ta pega lealmente na Yehova y na su Yiu sin importa nan pruebanan, y nan lo alcansa nan meta. E orado a bisa: “Pase loke pase, nos tambe ta pega lealmente na Yehova y na e trabou cu el a asigna na nos.” Door di haci esei, e graduadonan lo ripara cu e bendicionnan di Yehova ta “alcansa” nan.—Deuteronomio 28:2.

Produciendo Fruta den Nan Sirbishi

Durante e curso, e studiantenan tawata participa tur fin di siman den sirbishi di veld. Segun cu Wallace Liverance, secretario di e scol, a papia cu nan durante e programa di graduacion, a sali na cla cu nan tawatin exito den esei. Nan a predica e bon nobo den por lo menos dies idioma y a cuminsa varios estudio di Bijbel. Un pareha den e klas di Galad a cuminsa un estudio di Bijbel cu un homber Chines. Despues di dos bishita, nan a puntr’e con e ta haya awor cu e ta siña conoce Yehova. El a habri su Bijbel y a pidi nan lesa Huan 17:3. El a haya cu e tawata riba e caminda cu ta hiba na bida.

Anthony Morris di Cuerpo Gobernante siguientemente a entrevista tres ruman cu ta sirbi respectivamente den e Comite di Sucursal di Côte d’Ivoire, Ecuador y Republica Dominicana. E rumannan aki a sigura e graduadonan cu e Comitenan di Sucursal ta spera ansiosamente riba nan yegada y lo yuda nan ahusta nan mes na nan asignacion.

Despues Leonard Pearson di e famia di Betel di Merca a papia cu tres miembro di Comite di Sucursal di respectivamente Papua Nueva Guinea, Republica Democratico di Congo y Uganda. E rumannan aki a anima e graduadonan pa envolve nan mes por completo den sirbishi di veld. Un pareha misionero cu a pasa mas cu 21 aña na Congo a yuda 60 persona yega na dedicacion y bautismo. E pareha aworaki ta conduci 30 estudio di Bijbel, y 22 di nan studiantenan ta asisti na reunionnan di congregacion. Siendo cu tin asina un gran cosecha spiritual, awor ta un tempo maraviyoso pa sirbi como misionero.

Duna Testimonio cu un Spirito di Urgencia

Gerrit Lösch di Cuerpo Gobernante a presenta e discurso final. Su tema tawata “Papia Tocante Dios y Duna Testimonio di Hesus den e Dia di Señor.” E palabranan “testigo”, “testigonan”, “testifica” y “testimonio” ta aparece 19 biaha den e buki di Revelacion. Pues, no tin duda cua ta e trabou cu Yehova kier pa su pueblo haci. Na ki tempo nos tin cu duna e testimonio  ei? Durante “e dia di Señor.” (Revelacion 1:9, 10) E dia ei a cuminsa na aña 1914, y ta siguiendo den nos tempo y extendiendo den futuro. Segun Revelacion 14:6 y 7, e trabou di papia tocante Dios tin sosten di e angelnan. Revelacion 22:17 ta mustra cu e resto di cristiannan ungi a ser confia cu e responsabilidad di dirigi e trabou di duna testimonio di Hesus. Pero ta nos tur tin cu probecha di e privilegio ei awor. Den versiculo 20 tin para skirbi cu Hesus ta bisa: “Mi ta bin pronto.” Ruman Lösch a urgi tur esnan presente: “Yama e hendenan y bisa nan: ‘Bin! Tuma e awa di bida pornada.’ Hesus ta bin pronto. Nos ta cla prepara?”

Fred Rusk, kende a yega di sirbi como un instructor di Scol di Galad pa 11 aña, a termina e programa cu un oracion di gradicimento na Yehova cu a touch curason di tur hende presente. Esei tawata un bon final pa un dia cu tawata un ocasion di gran alegria.

[Cuadro na pagina 13]

ESTADISTICANAN DI E KLAS

Cantidad di pais representa: 10

Cantidad di pais na cua a asigna nan: 25

Cantidad di studiante: 56

Promedio di edad: 32,5

Promedio di aña den e berdad: 16,4

Promedio di aña den sirbishi di tempo completo: 12,1

[Plachi na pagina 15]

E di 119 Klas di Graduadonan di e Scol Biblico di Galad di Watchtower

Den e lista akibou, e reinan ta numera di dilanti bai patras, y e nombernan ta bai di robes pa drechi den cada rei.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.