“E Citanan di Mas Bieu Cu Nos Conoce di Textonan Biblico”

BINTICINCO aña pasa, arkeologonan Israeli a haci un descubrimento espectacular. Den un cueba cu tawata ser uza como santana na bahada di e Vaye di Hinom na Herusalem, nan a haya dos rol chikito di plata cu textonan biblico skirbi riba nan. E rolnan tawata data di e tempo prome cu Babilonia a destrui Herusalem na aña 607 prome cu nos era. E textonan tawata cita parti di e bendicionnan cu tin para na Numbernan 6:24-26. Dios su nomber personal, Yehova, a aparece varios biaha riba ambos rol. Expertonan a describi e inscripcionnan como “e obhetonan di mas bieu cu nos conoce di e mundo di antiguedad cu ta documenta partinan for di e Bijbel Hebreo.”

Sinembargo, algun erudito a cuestiona e fecha y a argumenta cu e rolnan tawata skirbi den siglo 2 prome cu nos era. Un di e factornan cu a hiba na e desacuerdo aki tawata cu debi na e calidad di e prome potretnan cu a saca di e rolnan masha chikito aki, no tawata posibel pa haci un examinacion profundo di e detayenan. Pa resolve e desacuerdo tocante e fecha, un team di academico a haci un estudio nobo. Nan a uza e tecnologianan di mas moderno riba tereno di fotografia y imagennan computerisa pa produci potretnan digital di resolucion halto di e rolnan aki. Resientemente nan a publica e resultadonan di e analisisnan nobo aki. Na ki conclusion e team di academico a yega?

Na prome luga, nan a enfatisa cu e datonan arkeologico ta apoya un fecha prome cu e exilio pa Babilonia. Nan observacionnan paleografico—es decir, e manera di determina e fecha di algo skirbi a base di e forma, estilo, posicion, secuencia y direccion di e letternan—ta señala na e mesun periodo, cual ta fin di siglo 7 prome cu nos era. Anto por ultimo, ora considera e ortografia, es decir, e estudio di spelling di palabra, e team aki a conclui: “E datonan ortografico den e plakkaatnan [rolnan] ta consistente cu e evidencia arkeologico y paleografico pa loke ta e fecha di e inscripcionnan.”

E revista Bulletin of the American Schools of Oriental Research a resumi e analisis di e rolnan di plata ei, conoci tambe como e inscripcionnan di Ketef Hinnom, asin’aki: “Pues nos por reconfirma e conclusion cu mayoria erudito a yega na dje cu e inscripcionnan haya riba e plakkaatnan aki ta conserva e citanan di mas bieu cu nos conoce di textonan biblico.”

[Reconocemento pa Potret na pagina 32]

Cueba: Pictorial Archive (Near Eastern History) Est.; inscripcionnan: Potret © Museo di Israel, Herusalem; cortesia di Israel Antiquities Authority